.jpg)
លោកស្រីអ៊ុងសាន ស៊ូជី ជួបពិភាក្សាជាមួយប្រធានាធិបតីឥណ្ឌាលោក Shri Ram Nath នៅក្នុងនិវេសនដ្ឋានប្រធានាធិបតីនៅក្រុងញូវដែលី។ AFP
ក្រុងយ៉ាំងហ្គោនៈ សកម្មជនម្នាក់ បាននិយាយកាលពីថ្ងៃអាទិត្យថា និស្សិត ១៤ នាក់ ត្រូវបានបណ្តេញចេញពីសាកលវិទ្យាល័យមួយនៅមីយ៉ាន់ម៉ា បន្ទាប់ពីធ្វើការតវ៉ាមួយ ដែលអំពាវនាវសុំឲ្យមានមូលនិធិបន្ថែមសម្រាប់ការអប់រំ ដោយបានបង្កឲ្យមានការព្រួយបារម្ភជុំវិញសេរីភាព ដែលកំពុងរេចរឹលនៅក្នុងប្រទេសលទ្ធិប្រជាធិបតេយ្យក្មេងខ្ចីមួយនេះ។
ការជួបជុំរយៈពេល ៤ ថ្ងៃនៅសាកលវិទ្យាល័យ Yadanabon នៅក្នុងក្រុង Mandalay បានទាក់ទាញនិស្សិតប្រហែល ១០០ នាក់ មុនពេលត្រូវប៉ូលិស បំបែកកាលពីថ្ងៃទី ២៥ ខែមករា។
នេះ គឺជាការតវ៉ារបស់ក្រុមនិស្សិតលើកដំបូងនៅរដ្ឋការស៊ីវិលរបស់លោកស្រីអ៊ុង សាន ស៊ូជី ដែលបានឡើងកាន់តំណែងកាលពីដើមឆ្នាំ ២០១៦។
ក្រុមនិស្សិត គឺជាអ្នកជំរុញឲ្យមានការរិះគន់ផ្នែកនយោបាយដ៏សំខាន់ នៅក្រោមអតីតរបបយោធា ដែលបានបង្ក្រាបទៅលើការប្រឆាំងនៅក្នុងអំឡុងការដឹកនាំរយៈពេល ៥០ ឆ្នាំនោះ។
ប្រជាជនភាគច្រើនសង្ឃឹមថា លោកស្រីស៊ូជី ជាជយលាភីណូបែល និងជាអ្នកទោសនយោបាយម្នាក់ នឹងដឹកនាំនៅក្នុងសករាជថ្មីមួយ ដែលមានសេរីភាពទូលំទូលាយ។
ប៉ុន្តែមានសំណុំរឿងបទបរិហារកេរ្តិ៍ និងការចាប់ខ្លួនអ្នកកាសែតជាច្រើននាក់ រួមទាំងការរឹតត្បិតការរិះគន់នៅក្នុងវិស័យសិល្បៈ ធ្វើឲ្យប៉ះពាល់ដល់សុទិដ្ឋិនិយមនិងបង្កឲ្យមានការភ័យខ្លាចថា សេរីភាពកំពុងធ្លាក់ចុះយ៉ាងខ្លាំង។
ករណីថ្មីបំផុតដែលនាំឲ្យមានការរិះគន់ខ្លាំង គឺការបណ្តេញនិស្សិត ១៤ នាក់ចេញពីសាកលវិទ្យាល័យនៅក្រុង Mandalay ដែលអំពាវនាវឲ្យមានការចំណាយបន្ថែមទៅវិស័យអប់រំនោះ៕
