The Phnom Penh Post Search

Search form




Logo of Phnom Penh Post newspaper Phnom Penh Post - បណ្ដាំ​ម្ដាយ ជំរុញ​យុវតី​ក្រីក្រ​ម្នាក់​តស៊ូ​រៀន​រហូត​ចប់​អនុបណ្ឌិត​ពី​បរទេស

បណ្ដាំ​ម្ដាយ ជំរុញ​យុវតី​ក្រីក្រ​ម្នាក់​តស៊ូ​រៀន​រហូត​ចប់​អនុបណ្ឌិត​ពី​បរទេស

Content image - Phnom Penh Post

បណ្ដាំ​ម្ដាយ ជំរុញ​យុវតី​ក្រីក្រ​ម្នាក់​តស៊ូ​រៀន​រហូត​ចប់​អនុបណ្ឌិត​ពី​បរទេស

ភ្នំពេញៈ ពាក្យ​មួយ​ឃ្លា​ពី​ម្តាយ «មនុស្ស​យើង​គ្មាន​អ្វី​សំខាន់​ជាង​ចំណេះ និង​ ជំនាញ​នេះ​ទេ​កូន!» ធ្វើ​ឲ្យ​យុវតី​វ័យ​ ២៧​ ឆ្នាំ​ម្នាក់​ដែល​រស់​ក្នុង​ជីវ​ភាព​ក្រីក្រ ប្រឹង​រៀន​រហូត​បញ្ចប់​ការ​សិក្សា​ថ្នាក់​អនុបណ្ឌិត​នៅ​ឯ​ប្រទេស​ហ្វីលីពីន ជា​មួយ​​និង​ការងារ​ប្រាក់​ខែ​ជិត​ពាន់​ដុល្លារ​ក្នុង​ ១ ​ខែ។

ជាកូន​កសិករ​ក្រី​ក្រ​មួយ​រូប​នៅ​ឯ​ស្រុក​ត្រាំ​កក់​ ខេត្ដ​តាកែវ យុវតី ជិន ចន្ធី ប្រាប់ LIFT ថា «ពាក្យ​សម្ដី​​ម្ដាយ​ខ្ញុំ​ទាំង​អស់​នេះ បាន​ធ្វើ​ឲ្យ​ខ្ញុំ​មាន​ក្ដី​ស្រមៃថា កាល​ណា​រៀន​សូត្រ​ចេះ​ដឹង​បាន​កាន់​តែច្រើន​​ នឹង​មាន​មុខ​​មាត់​ ​មិន​ពិបាក​ដូច្នេះ​ទៀត​ទេ​ ​ទើប​អាច​ក្លាយ​ខ្លួន​ជា​មនុស្ស​ដែល​មាន​តម្លៃ​នៅ​ក្នុង​សង្គម»។

ជិន​ ចន្ធី ដែល​ជា​អតីត​និស្សិត​ នៃ​សាកល​វិទ្យាល័យ​ភូមិន្ទ​ភ្នំពេញ​ ជំនាញ​ផ្នែក ចិត្ដ​វិទ្យា និង​បច្ចុប្បន្ន​ ជា​មន្ដ្រី​ប្រឹក្សា​​កិច្ច​ការ​ស្រាវ​ជ្រាវនៃ​អង្គការ​ក្រៅ​រដ្ឋា​ភិបាល​មួយនៅ​ភ្នំពេញ បន្ត​ថា ម្ដាយនាង​​តែង​តែ​ជំរុញ​លើក​ទឹក​ចិត្ដ​​ជា​និច្ច​មិន​ឲ្យ​​ឈប់​រៀន​នោះ​ទេ គាត់​ថា​ការ​ងារ​ជា​ អ្នក​អ៊ុត​សក់​ មិន​អាច​ជួយ​ឲ្យ​មាន​អនាគត​​ល្អ​ទេ មាន​តែ​ចំណេះ​វិជ្ជា​ទេ​ដែល​ល្អ​។

ចន្ធី និយាយថា «កាល​រៀន​នៅ​វិទ្យាល័យ ជីវភាព​កាន់​តែ​ប្រឈម ខ្ញុំក៏​បាន​ជួយ​ធ្វើ​កិច្ច​ការ​ងារម្ដាយ​ នៅ​ហាង​អ៊ុតសក់​ ​ដើម្បី​រក​ប្រាក់​មក​ផ្គត់​ផ្គង់​គ្រួ​សារ​ និង​ឧបត្ថម្ភ​ដល់​បង​ប្រុស​ ដែល​កំពុង​បន្ដ​ការ​សិក្សា​បរិញ្ញា​បត្រ​ជំនាញ​វិស្វករ​​នៅ​ភ្នំ​ពេញ​ ប៉ុន្តែ​គាត់​ថា ការ​ងារ​នេះ​ ពេល​ដែល​ចាស់​ទៅ​ អស់​កម្លាំង​ និង​ធ្វើ​អ្វី​មិន​កើត​ទាំង​អស់»។

យុវតី​​បាន​អំពាវនាវឲ្យ​យុវជន​ទាំង​អស់ កុំ​ឲ្យ​មាន​ការ​អស់​សង្ឃឹម ព្រោះ​នៅ​ពេល​អស់​សង្ឃឹម​អ្នក​ធ្វើ​អ្វី​ក៏​មិន​កើត​ដែរ​ ក្ដី​សង្ឃឹម គឺ​​ជា​គោល​ដៅ​របស់​យើង ដូច្នេះ​បើ​យើង​មាន​ក្ដី​សង្ឃឹម​ ត្រូវ​ដឹង​ថា ក្ដី​សង្ឃឹម​នេះ​ដើរ​តាម​ផ្លូវ​ណា​ ព្រោះ​ឧបសគ្គ​គ្រាន់​តែ​ជា​មេរៀន​សម្រាប់​យើង​ម្នាក់​ៗ​ប៉ុណ្ណោះ​៕​

អត្ថបទគួរចាប់អារម្មណ៍