The Phnom Penh Post Search

Search form




Logo of Phnom Penh Post newspaper Phnom Penh Post - បុរស​កូរ៉េ​ម្នាក់​ចំណាយ​ពេល​ជាង​ ៤ ឆ្នាំ​បង្កើត​វចនានុ​ក្រម​ ៣ ភាសា​សម្រាប់​ពលរដ្ឋ​ខ្មែរ

បុរស​កូរ៉េ​ម្នាក់​ចំណាយ​ពេល​ជាង​ ៤ ឆ្នាំ​បង្កើត​វចនានុ​ក្រម​ ៣ ភាសា​សម្រាប់​ពលរដ្ឋ​ខ្មែរ

Content image - Phnom Penh Post
លោក គីម វូ ថេក ឆ្វេង និង លោក រិន សុជា ស្ដាំ កាល​ពី​ពេល​សហការ​គ្នា​បង្កើត អេហ្វ​វចនានុក្រុម។ រូបថត សហការី

បុរស​កូរ៉េ​ម្នាក់​ចំណាយ​ពេល​ជាង​ ៤ ឆ្នាំ​បង្កើត​វចនានុ​ក្រម​ ៣ ភាសា​សម្រាប់​ពលរដ្ឋ​ខ្មែរ

ភ្នំពេញៈ ​លោក គីម វូ ថេក ​(Kin Woo Taek) ​បាន​ចំណាយ​ពេល​វេលា​ផ្ទាល់​ខ្លួន​ជាង​ ៤ ឆ្នាំ ដើម្បី​បង្កើត​វចនា​នុក្រម​ភាសា​ខ្មែរ​-កូរ៉េ​-អង់គ្លេស​ ឈ្មោះ​ «Phum ​Korean ​Dictionary» ​ជា​សៀវភៅ​មាន​កម្រាស់​ជាង​ ១ ពាន់​ទំព័រ​និង​បាន​កែ​សម្រួល​ជា App ​ស្មាត​ហ្វូន​ ឲ្យ​សាធារណ​ជន​អាច​​ទាញ​យក​ទៅ​ប្រើ​ប្រាស់​ដោយ​សេរី។

លោក ​គីម​ វូ ​ថេក ​ថ្លែង​ប្រាប់​ LIFT ​ម្សិលមិញថា ​វចនានុក្រម​នេះ​លោក​បង្កើត​ឡើង​ដើម្បី​ជួយ​សម្រួល​ដល់​ប្រជាពលរដ្ឋ​ខ្មែរ​ ដែល​កំពុង​និយម​សិក្សា​ភាសា កូរ៉េ ​ពិសេស​ពលករ​ដែល​ត្រូវ​ចេញ​ទៅ​ធ្វើ​ការ​នៅ​កូរ៉េ។

លោក​ថ្លែង​ថា ​«វចនានុក្រម​នេះ ​អាច​ជួយ​សម្រួល​ដល់​ប្រជាជន​កម្ពុជា ​ដែល​ចង់​សិក្សា​ភាសា​កូរ៉េ ហើយ ​ប្រជាជន​កូរ៉េ ​ក៏​អាច​ប្រើប្រាស់​ក្នុង​ការ​បកប្រែ​ភាសា​ខ្មែរ​បាន​ដែរ»។

ស្ថាបនិក​វចនា​នុក្រម​ ៣ ភាសា​រូបនេះ​ បន្ត​ថា ​ដំបូង​លោក​គ្រាន់តែ​ចង់​បង្កើត​វចនា​នុក្រម​ភាសា​ខ្មែរ-កូរ៉េ-អង់គ្លេស​ ជា​សៀវភៅ​ប៉ុណ្ណោះ ​ប៉ុន្ដែ​ក្រោយ​មក​លោក​ចង់​ឲ្យ​ប្រជា​ពលរដ្ឋ​បាន​ប្រើ​ប្រាស់​កាន់​តែ​ទូលំ​ទូលាយ​ ដូច្នេះ​ក៏​បាន​សហការ​ជាមួយ​ក្រុមហ៊ុន ​Biz Solution ​ដែល​មាន​ជំនាញ​លើ​ផ្នែក​អភិវឌ្ឍន៍​កម្មវិធី​ប្រព័ន្ធ​ទូរស័ព្ទ និង​កុំព្យូទ័រ ​និង​ទស្សនៈវិស័យ​ជួយ​សង្គម​ដូចគ្នា​ ក៏​បាន​ឲ្យ​ក្រុម​ពួកគាត់​ជួយ​បង្កើត​ App ស្មាត​ហ្វូនតែ​ម្ដង ។

Content image - Phnom Penh Post

លោក​និយាយ​ថា «​ពួកយើង​មាន​គំនិត​គោល ​ចង់​បង្កើត​វា​ទៅជា​កម្មវិធី​ឌីជីថល​ ដែល​អាច​ទាញ​យក​ទៅ​ប្រើ​ប្រាស់​បាន​ដោយ​ឥត​គិត​ថ្លៃ ​នៅ​លើ​ទូរស័ព្ទ​ស្មាត​ហ្វូន ​និង​កុំព្យូទ័រ​ផង​ដែរ​» ។

លោកស្រី ​សោម ​សុភាព​ ភរិយា​លោក គីម​ វូ ថេក ​បាន​បង្ហាញ​អារម្មណ៍​រីករាយ​ និង​មោទន​ភាព​យ៉ាង​ខ្លាំង​ ដែល​ស្វាមី​ខ្លួន​ជា​បរទេស ​តែ​អាច​មក​បង្កើត​វចនានុ​ក្រម​ជា​ភាសា​ខ្មែរ​ សម្រាប់​ប្រជាជន​ខ្មែរ​ ។

លោកស្រី​ថ្លែង​ថា ​«ខ្ញុំ​ពិត​ជា​សប្បាយ​ចិត្ដ​ណាស់ ​ដែល​ឃើញ​គាត់​បាន​បង្កើត​សៀវភៅ​មួយ​ក្បាល​ដែល​មាន​តម្លៃ​បែប​នេះ ​ព្រោះ​គាត់​ម្នាក់​ឯង​ គាត់​ចង់​ឲ្យ​មនុស្ស​ជាច្រើន​ទៀត​រៀន​ពី​គាត់​ ហើយ​អ្នក​ផ្សេង​ជា​ច្រើន​ទៀត​គេ​អាច​ទទួល​បាន​ផល​ប្រយោជន៍​ពី​វចនា​នុក្រម​នេះ​» ។

លោក​ស្រី​បន្ថែមថា ​មុន​ពេល​ស្វាមី​លោក​ស្រី​បង្កើត​ អេហ្វ​ស្មាត​ហ្វូន ​វចនានុ​ក្រម​នេះ ​គាត់​បាន​បង្កើត វចនានុក្រម​ជា​សៀវភៅ​មុន​ ហើយ​តាម​រយៈការ​ឆ្លង​កាត់​បទ​ពិសោធន៍​ជាច្រើន​នៃការ​ស្រាវ​ជ្រាវ​ចង​ក្រង​សៀវភៅ ដែល​បាន​ចំណាយ​ពេល​ជាង ៤ ឆ្នាំ ​លោក​ស្រី​​ជឿជាក់​ថា ​វចនា​នុក្រម​នេះ ​ពិត​ជាអាច​ផ្ដល់​ភាព​ត្រឹមត្រូវ​ជូន​អ្នក​ប្រើ​ប្រាស់​ទាំង​អស់​យ៉ាង​មាន​ប្រសិទ្ធិ​ភាព​ ។

លោក ​រិន ​សុជា ​ប្រធាន​ផ្នែក​លក់​នៃ​ Biz Solution ​បាន​ប្រាប់​ឲ្យ​ដឹង​ដែរ​ថា ​ដំបូង​លោក ​លោក ​គីម ​វូ ថេក គាត់​មាន​សៀវភៅ ​និង​ ឯកសារ ​(Soft)​អស់​ទៅ​ហើយ​ ខាង​លោក​គ្រាន់​តែ​ជួយ​ក្នុង​ការ​បង្កើត​កម្ម​វិធី​ដើម្បី​យក​មក​ដាក់​នៅ​លើ​កម្ម​វិធី​ស្មាត​ហ្វូន​ប៉ុណ្ណោះ ។

លោក​បញ្ជាក់​ថា​ «​តាម​ពិត​ទៅ​គោល​បំណង​ដែល​គាត់​ចង់​បង្កើត​វចនា​នុក្រម​នេះ ​ព្រោះ​គាត់​ចង់​ទាញ​ប្រជា​ជន​ខ្មែរ​ដែល​ចង់​រៀន​ភាសា​កូរ៉េ ​និង​ប្រជា​ជន​កូរ៉េ​ដែល​ចង់​រៀន​ខ្មែរ​ ឲ្យ​កាន់​តែ​មាន​ភាព​ងាយ​ស្រួល​» ៕

អត្ថបទគួរចាប់អារម្មណ៍