.jpg)
អនុរក្សកំពុងត្រួតពិនិត្យសិស្សចូលប្រឡងថ្នាក់ទី ១២ នៅមណ្ឌលប្រឡងមួយ កាលពីឆ្នាំមុន។ ហុង មិនា
ភ្នំពេញៈ ខណៈដែលសម័យប្រឡងសញ្ញាបត្របឋមភូមិ និងសញ្ញាបត្រទុតិយភូមិខិតជិតមកដល់ មន្ត្រីជាន់ខ្ពស់ក្រសួងអប់រំ បានក្រើនរំឭកថា សិស្សានុសិស្សទាំងអស់ត្រូវប្រឹងសិក្សា ពីព្រោះ «ក្រសួងនៅតែបន្តការរឹតបន្តឹងកម្មវិធីប្រឡងដូចឆ្នាំមុនៗដដែល ដើម្បីឲ្យប្រាកដថា អ្នកចេះប្រឡងជាប់»។
វិធានការបែបនេះ ក៏បានធ្វើឲ្យមានការភ្ញាក់រឭកច្រើន នៅក្នុងចំណោមសិស្សានុសិស្ស និងអាណាព្យាបាលរបស់សិស្សងាកមកយកចិត្តទុកដាក់ឲ្យតម្លៃក្នុងការសិក្សារៀនសូត្ររបស់សិស្សបានប្រសើរថែមមួយកម្រិតទៀត។
លោក រស់ សាលីន អ្នកនាំពាក្យក្រសួង អប់រំ យុវជន និង កីឡា បានមានប្រសាសន៍ តាមសារអេឡិចត្រូនិកថា កាលបរិច្ឆេទនៃសម័យប្រឡងសញ្ញាបត្របឋមភូមិ (ឌីប្លូម) និងសញ្ញាបត្រទុតិយភូមិ (បាក់ឌុប) កាន់តែខិតជិតមកដល់ហើយដោយក្រសួងបានសម្រេចយក «សម័យប្រឡងមធ្យមសិក្សាបឋមភូមិ នៅថ្ងៃចន្ទ ទី ៦ ខែសីហា ឆ្នាំ ២០១៨ និងសម័យប្រឡងមធ្យមសិក្សាទុតិយភូមិ រយៈពេល ២ ថ្ងៃ គឺនៅថ្ងៃចន្ទ ទី ២០ ដល់ថ្ងៃអង្គារ ទី ២១ ខែ សីហា ឆ្នាំ ២០១៨ នេះ»។ រីឯមណ្ឌលប្រឡងនីមួយៗ រួមទាំងគណៈមេប្រយោគនិងមេប្រយោគ ក្រសួងនឹងធ្វើការសម្រេចជាក់ស្តែងជាមួយថ្នាក់ ខេត្ត-ក្រុង និងស្រុកនីមួយៗ ដែលមានចំនួនបេក្ខជនបេក្ខនារី ត្រូវប្រឡងជាក់ស្តែងនៅទីនោះ។
លោក សាលីន បន្តថា ចំនួនបេក្ខជន និងបេក្ខនារី «ជាសិស្សរៀនថ្នាក់ទី ១២ នៅឆ្នាំសិក្សា ២០១៧-២០១៨ នេះ មានចំនួន ៨៨ ៦៨៤ នាក់» ពួកគាត់គឺជាបេក្ខជនត្រៀមខ្លួន សម្រាប់សម័យប្រឡងបាក់ឌុបនៅឆ្នាំ ២០១៨ នេះ។ ចំណែកសិស្សរៀនថ្នាក់ទី ៩ មាន១៧៩ ៥៨១ នាក់ ដែលពួកគាត់កំពុងត្រៀមខ្លួនប្រឡងបញ្ចប់ការសិក្សានៅកម្រិតអនុវិទ្យាល័យ នឹងឡើងទៅកម្រិតវិទ្យាល័យ។
លោក ឌី ខាំបូលី អ្នកនាំពាក្យក្រសួង អប់រំ ម្នាក់ទៀតបានថ្លែងថា សម័យប្រឡងបឋមភូមិ និងទុតិយភូមិនាខែសីហា ឆ្នាំ ២០១៨ ខាងមុខនេះ។
លោកបញ្ជាក់ថា៖ «ក្រសួងបន្តពង្រឹងការរឹតបន្តឹងវិធានការប្រឡងដូចឆ្នាំមុនៗ ដោយមានមន្រ្តី ACU ចូលរួមសង្កេតការណ៍ គោរពគោលការណ៍ អ្នកចេះគឺជាប់។ លោកបានរំឭកថា ចាប់ពីពេលនេះតទៅ នៅមានពេលវេលាសមល្មមសម្រាប់ឲ្យសិស្សានុសិស្សយកចិត្តទុកដាក់ក្នុងការរៀនសូត្របន្ថែម រៀនបំប៉ន ឬរៀនគួរ សម្រាប់ត្រៀមប្រឡង។ ចំពោះសិស្សដែលបានខិតខំរៀនសូត្រក្រសួងជឿជាក់ថា ពួកគាត់ពិតជាមានចំណេះដឹងគ្រប់គ្រាន់ និងមានសមត្ថភាពប្រឡងជាប់ជាស្ថាពរ។
លោកបន្តថា ការរៀនបំប៉នបន្ថែមថ្ងៃ សៅរ៍ អាទិត្យ ដោយអ្នកស្ម័គ្រចិត្តទន្ទឹមនឹងនោះ ក្រសួងអប់រំ ផ្សព្វផ្សាយឯកសារសង្ខេបមេរៀន គណិតវិទ្យា វិទ្យាសាស្រ្ត ប្រវត្តិវិទ្យា និងតែងសេចក្តីខ្មែរ នៅលើគេហទំព័រ Facebook ផ្លូវការរបស់ក្រសួង។ លើសពីនេះ ក្រសួងបានពង្រឹងការរៀន និងការបង្រៀន នៅតាមសាលាតាំងពីដើមឆ្នាំរៀងមកដើម្បីធានាគុណភាពនៃការអប់រំ។
លោក ខាំបូលី បញ្ជាក់ទៀតថា៖ «ការប្រឡងទាំង ២ កម្រិត ត្រូវគោរពគោលការណ៍ ៤ ៖ ច្បាប់ យុត្តិធម៌ តម្លាភាព លទ្ធផលទទួលយកបាន»។
បុគ្គលិកអ្នកគ្រប់គ្រងគេហទំព័រ Facebook របស់សាលាជ័យថាវី ដែលជាសាលាបង្រៀនគួរក្រៅម៉ោងសិក្សាសម្រាប់សិស្សគ្រប់ភូមិសិក្សា នៅម្តុំវិទ្យាល័យបាក់ទូក រាជធានីភ្នំពេញបានឆ្លើយតាមសារអេឡិចត្រូនិកក្នុងលក្ខខណ្ឌមិនបង្ហាញអត្តសញ្ញាណថា៖ «សម្រាប់ថ្នាក់ឌីប្លូម (សិស្សថ្នាក់ទី ៩) ចំនួនសិស្ស (ចូលរៀន) មិនមានការប្រែប្រួលច្រើនទេ បានន័យថា មិនមានសិស្សមកសិក្សានៅសាលាយើងខ្ញុំច្រើនទេ»។
បុគ្គលិករូបនេះបានបន្តថា៖ «ចំពោះតម្លៃសិក្សា សាលាយើងខ្ញុំ មិនមានការគិតគូរយកថ្លៃខ្ពស់ពេកទេពីព្រោះថា សាលាយល់ថា សម្រាប់សិស្សមួយចំនួនធំ ពួកគាត់នឹងពិបាកលើថ្លៃចំណាយរបស់ពួកគាត់»។
មន្រ្តីអ្នកនាំពាក្យក្រសួងអប់រំ លោក សាលីន ឲ្យដឹងថា នៅក្នុងឆ្នាំសិក្សា ២០១៧-២០១៨ នៅទូទាំងប្រទេសកម្ពុជា មាន «សិស្សសរុបនៅគ្រប់ភូមិសិក្សាសាធារណៈ និងឯកជន គិតពីកម្រិតមត្តេយ្យសិក្សា រហូតដល់មធ្យមសិក្សា មានចំនួន ៣ ៣៤៦ ៣៣៦ នាក់ ក្នុងនោះ សិស្សស្រីចំនួន ១ ៦៥២ ០២១ នាក់ ស្មើនឹង ៤៩,៣៧ ភាគរយ»។
នៅទូទាំងប្រទេស កម្ពុជា មាន «គ្រឹះស្ថានឧត្តមសិក្សាចំនួន ១២១ ទីតាំង ក្នុងនោះ គ្រឹះស្ថានឧត្តមសិក្សារដ្ឋ ៤៨ និងឯកជន ៧៣ ដែលមានទីតាំងស្ថិតនៅតាមរាជធានី-ខេត្ត-ក្រុង ចំនួន ២០។ គ្រឹះស្ថានឧត្តមសិក្សាទាំងនោះ ស្ថិតនៅក្រោមការគ្រប់គ្រងរបស់ ក្រសួង-ស្ថាប័ន ចំនួន ១៦។ ចំណែកគ្រឹះស្ថានឧត្តមសិក្សា ដែលស្ថិតក្រោមការគ្រប់គ្រងរបស់ក្រសួងអប់រំ យុវជន និងកីឡាមានចំនួន ៧៣ ក្នុងនោះរដ្ឋ ១៣ និងឯកជន ៦០»។
លើសពីនេះ ចំនួន «និស្សិត ចាប់ពីថ្នាក់បរិញ្ញាបត្ររង ដល់បណ្ឌិតមានចំនួន ២០៧ ៤២៣ នាក់ ក្នុងនោះសិស្សស្រីចំនួន ៩៤ ២៤២ នាក់ ស្មើនឹង ៤៥,៤៣ ភាគរយ»។ នេះបើតាមសំណេរក្នុងសារអេឡិចត្រូនិករបស់លោក សាលីន៕
