The Phnom Penh Post Search

Search form




Logo of Phnom Penh Post newspaper Phnom Penh Post - មហោស្រព​ភាសា និង​វប្បធម៌​អន្ដរជាតិ​ឆ្នាំ​នេះ​ មាន​ ៤៥ ​ប្រទេស​ចូល​រួម និង​សិស្ស​ជាង​ ៧ ពាន់​នាក់

មហោស្រព​ភាសា និង​វប្បធម៌​អន្ដរជាតិ​ឆ្នាំ​នេះ​ មាន​ ៤៥ ​ប្រទេស​ចូល​រួម និង​សិស្ស​ជាង​ ៧ ពាន់​នាក់

Content image - Phnom Penh Post
សិស្សានុសិស្សមកពីបណ្ដាប្រទេសនានា និងកម្ពុជា ចូលរួមក្នុងមហោស្រពភាសា និងវប្បធម៌អន្ដរជាតិ កាលពីថ្ងៃសៅរចុងសប្ដាហ៍មុននេះ ។ រូបថត សហការី

មហោស្រព​ភាសា និង​វប្បធម៌​អន្ដរជាតិ​ឆ្នាំ​នេះ​ មាន​ ៤៥ ​ប្រទេស​ចូល​រួម និង​សិស្ស​ជាង​ ៧ ពាន់​នាក់

ភ្នំពេញៈ មហោស្រព​ភាសា និង​វប្បធម៌​អន្ដរជាតិ ដែល​បាន​ប្រារព្ធ​ឡើង​នៅ​អាគារ​កោះពេជ្រ​ កាល​ពី​ថ្ងៃ​សៅរ៍​សប្ដាហ៍​មុន​ មាន​សិស្សា​នុសិស្ស​ប្រមាណ​ជាង​ ៧ពាន់នាក់ ​មក​ពី​ ៤៥​ប្រទេស​នៅ​លើ​ពិភព​លោក​បាន​ចូលរួម​ ខណៈ​កាល​ពី​ឆាំ ២០១៦ ​មាន​អ្នក​ចូល​រួម​ចំនួន​ ៥ ពាន់​នាក់ និង​ប្រទេស​ចំនួន​ ៣៣ ​ប៉ុណ្ណោះ។

កញ្ញា ផល ​ម៉ារីណា​ នាយកប្រតិបត្តិ​អង្គការ​ ILCO បាន​ថ្លែង​ឲ្យដឹង​នៅ​ក្នុង​ពិធី​សម្ពោធ​មហោ​ស្រព​នេះ​ថា មហោ​ស្រព​នេះ​ បង្កើត​ឡើង​ក្នុង​បំណង​ បង្កើន​ភាព​ជិត​ស្និត​ រវាង​សហគមន៍​ផ្សេងៗ​តាម​រយៈសិល្បៈ​ និង​វប្បធម៌​នឹង​បង្កើន​ការ​យល់​ដឹង​អំពី​សារៈ​សំខាន់ នៃ​វប្បធម៌​ការ​កសាង​សន្ដិភាព។

កញ្ញា​បន្ដថា​ «ឆ្នាំ​នេះ​ស្ដង់​វប្បធម៌​ តំណាង​ឲ្យប្រទេស​ផ្សេងៗ​គ្នា​ មាន​ការ​កើន​ឡើង​ពី​ ១៣ ​ប្រទេស​ក្នុង​ឆ្នាំ​ ២០១៥​ ៣៣​ប្រទេស​ឆ្នាំ​ ២០១៦ ​កើន​រហូត​ដល់​ ៤៥ ​ប្រទេស​ក្នុង​ឆ្នាំ​២០១៧​ ដែល​មាន​អ្នក​ចូល​រួម​កើន​ឡើង​ពី​ចំនួន​ ៣ ពាន់នាក់​ រហូត​មក​ដល់​ ៥ ពាន់នាក់​ឆ្នាំ ២០១៦ និង​ជាង​ ៧ ពាន់​នាក់​ក្នុង​ឆ្នាំនេះ» ។

កញ្ញាថា «មហោ​ស្រព​ភាសា​ និង​វប្បធម៌​អន្ដរ​ជាតិ​ បាន​ទទួល​ជោគ​ជ័យ​ និង​កម្លាំង​ចិត្ត​យ៉ាង​ខ្លាំង​ក្លា រួម​ជា​មួយ​អ្វី​ដែល​ថ្មី ​និង​ប្លែកៗ​ តាម​រយៈ​ការ​​សហការ​ជាមួយ​នឹង​សហគមន៍​ផ្សេង​ៗ​ទូទាំង​ពិភព​លោក ​ដោយ​បាន​ចែក​រំលែក​វប្បធម៌​គ្នា​ ដោយ​បាន​​តាំង​ពិព័ណ៌​ម្ហូប​អាហារ និង​ការ​សម្តែង​សិល្បៈ​ជាដើម»។

លោក ​សោម សុគន្ធ ​រដ្ឋលេខា​ធិការ​ក្រសួង​វប្បធម៌ និង​វិចិត្រ​សិល្បៈ​បាន​ឲ្យដឹង​ថា ​មហោ​ស្រព​នេះ​ ពិត​ជា​មាន​អត្ថ​ប្រយោជន៍​ និង​មាន​ន័យ​ខ្លឹម​សារ​ខ្លាំងណាស់​ ព្រោះ​បាន​ស្ដែង​ឲ្យឃើញ​នូវការ​​ខិតខំ​ យក​មក​បង្ហាញ​អំពី​ភាព​សម្បូណ៍​បែប​ និង​លក្ខណៈ​ដោយ​ឡែក​​ទីទៃពីគ្នា​ នៃ​វប្បធម៌​របស់​មនុស្ស​ជាតិ​ ក្នុង​ពិភព​លោក។

លោក​បន្ដថា ​«មហោ​ស្រព​នេះ​ក៏​ជា​ឱកាស​ដើម្បី​ឲ្យ​កម្ពុជា ​បាន​ផ្សព្វ​ផ្សាយ​បន្ថែម​ពី​វប្បធម៌ ​និង​សិល្បៈ​របស់​ខ្លួន​ទៅ​កាន់​ប្រទេស​នានា​នៅ​លើ​សកល​លោក​ និង​ក៏ជា​ផ្នែក​មួយ​នៃ​ការ​លើក​ស្ទួយ​វប្បធម៌​ជាតិ​ដែរ​» ។

លោក​ អ៊ាង ​សុផល្លែត ​អគ្គ​នាយក​កិត្ដិយស​ក្រុម​ហ៊ុន​ហ្សាម៉ាន់ ​ខូអិលធីឌី​ បាន​ថ្លែង​ឲ្យ​ដឹង​ដៃរថា​ មហោស្រព​នេះ ​បាន​ចូលរួម​ចែក​រំលែក ចំណេះដឹងពី​វប្បធម៌​ប្រពៃណី​ពី​ប្រទេស​ផ្សេងៗ​ជាច្រើន​ដល់​យុវជន​ និង​សិស្សានុសិស្ស​កម្ពុជា​ ។

លោកបន្ដ​ថា ​មហោ​ស្រពនេះ​ បាន​បង្ហាញ​នូវ​វប្ប​ធម៌​របស់​ប្រទេស​កម្ពុជា​ ជា​មួយ​នឹង​ប្រទេស​អន្ដរ​ជាតិ​ដទៃ​ទៀត​ និង​បង្ហាញ​ពីការស្ងោច​សសើរ​ នូវ​តួនាទី​ដ៏​រស់​រវើក​នៃម្ហូប​អាហារ​ វប្បធម៌​ និង​សិល្បៈ​ សំម្លៀក​បំពាក់ ប្រពៃណី​ផ្សេងៗ​គ្នាផង​ដែរ៕

អត្ថបទគួរចាប់អារម្មណ៍