The Phnom Penh Post Search

Search form




Logo of Phnom Penh Post newspaper Phnom Penh Post - យុវជន​ងាយ​រង​គ្រោះ​ មិន​ធ្វើ​​ចំណាក​ស្រុក​ព្រោះ​ទទួល​បាន​ការបណ្ដុះ​បណ្ដាល​​​ការងារ​

យុវជន​ងាយ​រង​គ្រោះ​ មិន​ធ្វើ​​ចំណាក​ស្រុក​ព្រោះ​ទទួល​បាន​ការបណ្ដុះ​បណ្ដាល​​​ការងារ​

Content image - Phnom Penh Post
យុវជន និង​មន្រ្ដី​អង្គការភ្លែនអន្ដរជាតិ និង​មន្រ្ដី​ក្រ្ម​ប្រឹក្សាឃុំ នៅ​ស្ថានីយទឹកស្អាត។

យុវជន​ងាយ​រង​គ្រោះ​ មិន​ធ្វើ​​ចំណាក​ស្រុក​ព្រោះ​ទទួល​បាន​ការបណ្ដុះ​បណ្ដាល​​​ការងារ​

សៀមរាបៈ យុវជន​មួយ​ចំនួន​ដែល​ទទួល​បាន​ការ​បណ្ដុះ​បណ្ដាល​ពី​អង្គការ​ភ្លែន​អន្ដរជាតិ​កម្ពុជា ពួកគេ​ ប្រែ​ចិត្ដ​ពី​ការ​ធ្វើ​ការ​ចំណាក​ស្រុក​ទៅ​ធ្វើ​ពលករ​នៅ​ស្រុក​គេ តួរយ៉ាង​មាន​ប្រទេស​ទេសថៃ និង​កូរ៉េ ​បែរមក​ធ្វើ​ការ​នៅ​ស្រុក​កំណើត​ខ្លួន​វិញ ព្រោះ​ទទួល​បាន​ការ​ណែនាំ និង​ផ្ដល់​ឱកាស ​រៀន​ជំនាញ​វិជ្ជា​ជីវៈ​រយៈ​ពេល​ខ្លី (៤-៦ខែ)​ និង​ទទួល​បាន​ការ​ងារ​សមរម្យ​ក្រោយ​បញ្ចប់​វគ្គ​សិក្សា ។

យុវតី ឡន ស្រីកា រស់​នៅ​ភូមិ វត្ដ ឃុំត្បែង ស្រុកបន្ទាយ​ស្រី ខេត្ដសៀមរាប បាន​ថ្លែង​ប្រាប់ LIFT ឲ្យ​ដឹង​ថា នាង​ជា​យុវតី​ម្នាក់​ដែល​បាន​រៀន​ត្រឹម​ថ្នាក់​ទី៩ ព្រោះ​កត្ដា​ជីវភាព​ មិន​បាន​បន្ដ​ការ​សិក្សា​ ក៏​ត្រលប់​មក​ជួយ​ធ្វើ​ស្រែ និង​ស៊ី​ឈ្នួល​​ច្រូត​ស្រូវ​ឲ្យ​គេ​។

យុវតី​វ័យ​២២ឆ្នាំ​រូបនេះ​បន្ដថា កាល​ពី​អំឡុង​ពេល​បី​ឆ្នាំ​មុន មុន​ពេល​ដែល​បាន​ចូលរៀន​ជំនាញ​ផ្នែក​ប្រព័ន្ធ​ទឹក​ស្អាត និង​ធ្វើ​ការ​ងារ​ជា​ភ្នាកងារ​ចែកចាយ​ទឹក​ស្អាត​ដល់​ប្រជា​ពលរដ្ឋ ​នៅ​ក្នុង​ស្រុកភូមិនេះ នាង​ធ្លាប់​គិត​ពី​ការ​ទៅ​ស្វែង​រក​ការ​ងារ ​នៅ​ស្រុក​គេ​ដែរ ប៉ុន្ដែ​ក្រោយ​ពី​បាន​រៀន​ជំនាញ​ និង​ទទួល​បាន​ការ​ងារ​ បាន​ប្រាក់​ខែ​សមរម្យ ​នៅ​ក្នុង​ស្រុក​ភូមិ​ផង ក៏​សម្រេច​ចិត្ដ​មិន​ចង់​ទៅ​បន្ដ​ទៅ​ធ្វើ​ការ​នៅ​ឯណា​ទៀត​ទេ ។

យុវតី​រូបនេះ​បន្ដ​ថា «ខ្ញុំ​បាន​ធ្វើ​ការ​ជំនាញ​ផ្នែក​ប្រព័ន្ធ​ទឹក​ស្អាត​នេះ ខ្ញុំ​ពិត​ជា​សប្បាយ​ចិត្ដ​ ទោះ​មិន​សូវ​បាន​ប្រាក់​ខែ​ច្រើន​ប៉ុន្មាន តែ​នៅ​ក្នុង​ស្រុក​ភូមិ​ខ្លួន​ឯង ខ្ញុំ​មិន​ចំណាយ​ច្រើន ប្រាក់​ខែ​បើក​មក​សល់ ហើយ​អាច​ជួយ​ដល់​អ្នក​ភូមិ ប្រជា​ពលឲ្យ​បាន​ប្រើ​ប្រាស់​ទឹក​ស្អាត​ថែម​ទៀត​» ។

ស្រីកា បាន​ឲ្យ​ដឹង​ទៀត​ថា កាល​ពី​មុន យុវជន​ស្របាល​ៗនាង នៅ​ក្នុង​ស្រុក​ភូមិ​ជិត​គ្នា ភាគច្រើន​បាន​ធ្វើ​ចំណាក​ស្រុក​ទៅ​ធ្វើ​ពលករ​នៅ​ប្រទេស​គេ ដូចជានៅ​ប្រទេសថៃ និង​កូរ៉េជាដើម ។

យុវជន ទឹម ពេទ្យ ​វ័យ​២៨ឆ្នាំ ​បាន​បោះ​បង់​ការ​សិក្សា​ បន្ទាប់​ពី​ប្រឡង​ធ្លាក់​បាក់​ឌុប និង​កំពុង​ធ្វើ​ការ​នៅ​ សហ​គមន៍​ទឹក​ស្អាត​ អូ-វី ឃុំត្បែង ដែល​ស្ថាន​នីយទឹក​ស្អាត​នេះ ត្រូវ​បាន​ក​សាង​ឡើង​ដោយ​អង្គការ​ភ្លែន​អន្ដរ​ជាតិ​កម្ពុជា​ សហការ​ជាមួយ ក្រសួង​អភិវឌ្ឍន៍​ជនបទ ក្រុម​ប្រឹក្សា​ឃុំ​សង្កាត់ និង​អង្គការ​ទឹក​ស្អាត​១០០១​។

យុវជន​រូប​នេះ​បន្ដថា «ខ្ញុំ​ចង់​បន្ដ​ការ​សិក្សា​ដែរ​ តែព្រោះ​ជីវភាព​គ្រួសារ​ ហើយប្រឡង​​ធ្លាក់​បាក់​ឌុប​ផង ខ្ញុំ​ក៏​ឈប់​រៀន ហើយ​នៅ​ផ្ទះ​ធ្វើស្រែ។ ខ្ញុំ​ក៏​ធ្លាប់​ចង់​ទៅ​ធ្វើ​ការ​ចំណាក​ស្រុក​ជា​មួយ​អ្នក​ភូមិនៅ​ថៃ​​ដែរ ព្រោះ​ឃើញ​គេ​ទៅ​ធ្វើ​ការ​នៅទីនោះ​​ច្រើន។ ក្រោយ​មក ខ្ញុំ​ក៏​ទទួល​បាន​ការ​បណ្ដុះ​បណ្ដាល​លើ​ជំនាញ​ផ្នែក​ផលិត​ទឹកស្អាត​ ហើយ​ខ្ញុំ​ក៏​នៅ​ធ្វើ​ការ​នៅ​ក្នុង​ភូមិ​តែ​ម្ដង​ទៅ»។

យុវជន​រូបនេះ​បាន​លើក​ឡើង​ថា ​ប្រជា​ជន​នៅ​សហគមន៍​របស់​ កួរ​ងាក​មក​ប្រើ​ប្រាស់​ទឹក​ស្អាត​ដែល​ អង្គការ និង​ប្រជាជន​សហគមន៍​ជ​ផលិតវិញ​​ ទឹក​ស្អាត​នេះ​បាន​​ទទួល​ស្គាល​គុណភាព​ពី​ក្រសួង អភិវឌ្ឍន៍​ជនបទ និង​មាន​ការ​ថែ​ទាំ​ល្អពី​អ្នក​ជំនាញ​បែប​វិទ្យាសាស្រ្ដ​ អាច​បញ្ជៀស​ការ​កើត​ឡើង​នៅ​ជម្ងឺ​ផ្សេង​ និង​លក់​ក្នុង​មួយ​ធុង (២៥ លីត្រ) ត្រឹម​ ១៣០០រៀល​ប៉ុណ្ណោះ​។

លោក អ៊ឹម សុភាព មន្រ្ដី​ជំនាញគម្រោង​ផ្នែក​ទឹកស្អាត និង​អនាម័យ នៃ​អង្គការ​ភ្លែនអន្ដរជាតិ ប្រចាំ​ខេត្ដ​សៀមរាប​បាន​ឲ្យ​ដឹង​ថា គម្រោង​​ទឹក​ស្អាត​នៅ​ស្រុក​បន្ទាយ​ស្រី​នេះ​បាន​ចាប់​ផ្ដើម​ឡើង​តាំាង​ពី​ឆ្នាំ​ ២០១៤ ដោយ​បាន​បណ្ដុះ​បណ្ដាល​យុវជន​បោះ​បង់​ការ​សិក្សា​នៅ​សហគមន៍​ផ្ទាល់​ឲ្យមាន​ជំនាញ​ផលិត​ និង​ថែទាំង​ទឹក​ស្អាត​ ដើម្បី​ផលិត​ទឹក​ស្អាត​ចែក​ជូន​ប្រជា​ពល​រដ្ឋ​នៅ​សហគមន៍​របស់​ពួកគេ ។

លោក​បន្ដថា «គម្រោង​ទឹក​ស្អាត​នេះ ក្រៅ​ពី​ជួយ​ឲ្យ​យុវជន​នៅ​សហគមន៍​ទទួល​បាន​ជំនាញ​ និង​ការងារ​ដែល​មាន​ប្រាក់​ខែ​សមរម្យ​ហើយ យើង​ក៏​ចង់​ផ្សព្វផ្សាយ​ឲ្យ​ប្រជាជន​ងាក​មក​ប្រើ​ប្រាស់​ទឹកស្អាត​ឲ្យ​បាន​គ្រប់ៗ​ដែរ​»។

អ៊ុំស្រី អ៊ុំ ហាក់ សុំ មន្រ្ដី​ក្រុម​ប្រឹក្សា​ឃុំ​ត្បែង​បាន​លើក​ឡើង​ថា នៅ​ភូមិ​ឃុំ​របស់​អ៊ុំ កាល​ពី​មិន​ទាន់​មាន​ទឹក​ស្អាត​ប្រើ​ប្រជាជន​បាន​ប្រើប្រាស់​ទឹក​អណ្ដូង ដែល​​មិន​មាន​អនាម័យ​ល្អ​ ហើយ​មាន​ប្រជាពលរដ្ឋ​ខ្លះ​តែង​តែ​មាន​បញ្ហា​រាគរុះ​ច្រើន​។

អ៊ុំស្រី​បន្ដថា «ប្រជាជន​នៅ​ឃុំ​នេះ​ភាគច្រើន​ បាន​ប្រើ​ប្រាស់​ទឹក​ស្អាត​ដែល​ក្រុម​យុវជន​ផលិត​នេះ ព្រោះ​គេ​ឃើញ​មាន​អនាម័យ​ល្អ និង​មាន​អ្នក​ជំនាញ​ចុះ​មក​ត្រួត​ពិនិត្យ​គុណភាព​ទឹក​ជាប្រចាំ​» ។

បើតាម​លោក សុភាព​ បាន​ឲ្យ​ដឹង​ ថវិកាដែល​ទទួល​បាន​ពីការ​លក់​ទឹក​នៅ​សហគមន៍ ក្រៅពីយក​មួយ​ចំណែក​ដើម្បី​ឧបត្ថម្ភដល់​យុវជន​ដែល​កំពុង​ធ្វើ​ការ​ងារ​ផ្ទាល់​ចំពោះ​ការ​ផលិត​ទឹក​ស្អាត​នេះ ថវិការ​ដែល​នៅ​សល់ អង្គការ​បាន​ប្រគល់​ឲ្យ​គណៈកម្មការ​ភូមិឃុំ​តម្កល់​ទុក​សម្រាប់​អភិវឌ្ឍន៍​ភូមិឃុំ​ផ្ទាល់​តែ​ម្ដង ៕

អត្ថបទគួរចាប់អារម្មណ៍