The Phnom Penh Post Search

Search form




Logo of Phnom Penh Post newspaper Phnom Penh Post - ​យុវជន​យល់​ដឹង​​ប្រសើរ​ជាង​មុន ក្នុង​ការ​ឃោសនា​ជ្រើស​រើស​ក្រុម​ប្រឹក្សា ឃុំ-សង្កាត់​ អាណត្ដិ​នេះ​

​យុវជន​យល់​ដឹង​​ប្រសើរ​ជាង​មុន ក្នុង​ការ​ឃោសនា​ជ្រើស​រើស​ក្រុម​ប្រឹក្សា ឃុំ-សង្កាត់​ អាណត្ដិ​នេះ​

Content image - Phnom Penh Post
យុវជន​ពីបក្ស​ក្នុង​ក្បួន​ឃោសនាមួយ​នៅ​ខណ្ឌមានជ័យ​នៅ​ក្នុង​ការ​ឃោសនា​បោះឆ្នោត​អាណត្ថិ​នេះ។ ផា លីណា

​យុវជន​យល់​ដឹង​​ប្រសើរ​ជាង​មុន ក្នុង​ការ​ឃោសនា​ជ្រើស​រើស​ក្រុម​ប្រឹក្សា ឃុំ-សង្កាត់​ អាណត្ដិ​នេះ​

ភ្នំពេញៈ អ្នក​នាំពាក្យ​គណៈកម្មាធិការ​ជាតិ​រៀប​ចំ​ការ​បោះឆ្នោត (គ.ជ.ប) និង​យុវជន​មួយ​ចំនួន​ទៀត បាន​មើល​ឃើញ​ថា យុទ្ធ​នាការ​ឃោសនា​បោះ​ឆ្នោត​ជ្រើស​រើស​ក្រុម​ប្រឹក្សា​ ឃុំ-សង្កាត់ អាណត្ដិ​នេះ បន្ទាប់​ពី​ការ​ឃោសនា​បាន​ជាង​ ១០ ​ថ្ងៃ​ ហាក់​ដំណើរ​ការ​ទៅ​ដោយ​រលូន មិន​មាន​បញ្ហា​ណា​ដែល​ដោះ​ស្រាយ​មិន​បាន​នោះ​ទេ។

កាល​ពី​ថ្ងៃទី ២៦ ខែ​ឧសភា កន្លង​ទៅ​ថ្មីៗនេះ ​គ​.​ជ​.​ប បាន​ចេញ​សេចក្ដី​ប្រកាស​មួយ​ថា ក្នុង​រយៈពេល ៦ ថ្ងៃ​នៃ​ការ​ឃោសនា​បោះ​ឆ្នោត​ជ្រើស​រើស​ក្រុម​ប្រឹក្សា​​ ឃុំ-សង្កាត់​ អាណត្ដិ​ទី៤​នេះ សកម្ម​ភាព​ឃោស​នា​បោះ​ឆ្នោត​របស់​គណបក្ស​នយោបាយ បាន​ប្រព្រឹត្ដ​ទៅ​ដោយ​រលូត​ សន្ដិ​សុខ សណ្ដាប់​ធ្នាប់​ល្អ និង​គ្មាន​អំពើ​ហិង្សារ​នោះទេ។

លោក ហង្ស ពុទ្ធា អ្នក​នាំពាក្យ​ គ.​ជ​.ប ​បាន​ថ្លែង​ប្រាប់ LIFT-យុវវ័យ នៃ​កាសែត​ភ្នំពេញ​បុស្ដិ៍ ​កាល​ពី​ថ្ងៃ ​អង្គារ​ម្សិល​មិញ​ថា តាម​រយៈ​ទិន្នន័យ​យុវជន​ដែល​បាន​មក​ចូល​រួម​ចុះ​ឈ្មោះ​បោះ​ឆ្នោត​អាណត្ដិ​នេះ ប្រមាណ​ ជាង​៣៦ភាគ​រយ បាន​បង្ហាញ​ថា នេះ​ជាចំណុច​ចាប់​ផ្ដើម​យ៉ាង​សកម្ម​របស់​យុវជន ​នៅ​ក្នុង​វិស័យ​បោះ​ឆ្នោត​នៅ​កម្ពុជា ហើយ​ចំពោះ​វិស័យ​សង្គម​វិញ យុវជន​ក៏​ទទួល​បាន​ការ​អប់រំ រាល់​សកម្ម​ភាព​របស់​ពួកគាត់​សកម្ម​គួរ​ឲ្យ​ចាប់​អារម្មណ៍ ។

លោក​បន្ដ​ថា៖ «មិន​មាន​បញ្ហា​ធំដុំ​ដែល​មិន​អាច​ដោះ​ស្រាយ​បាន​នោះទេ​ ចំពោះ​ការ​ឃោសនា​ នាប៉ុន្មាន​ថ្ងៃនេះ»​។

កញ្ញា ស៊ិន ចាន់ពៅរ៉ូហ្សែត ​បេក្ខជន​ស្ត្រី​វ័យក្មេង​ឈរ​ឈ្មោះ​លេខ​រៀង​ទី​មួយ​ ​គណបក្ស​សង្គ្រោះ​ជាតិ​នៅ​ឃុំ​អូចារ​នៃ​ខេត្ដ​បាត់​ដំបង ក៏​បាន​ឲ្យ​ដឹង​ដែរ​ថា ទាក់​ទិន​នឹង​ការ​ឃោសនា​បោះ​ឆ្នោត​ ឃុំ-​សង្កាត់​អាណត្ដិ​នេះ​នៅ​ឃុំ​ អូចារ យុវជន ក៏​ដូច​ជា​ប្រជា​ពល​រដ្ឋ​ទូទៅ មិន​មាន​ការ​ឃោសនា​ ឬ បង្ក​បញ្ហា​អ្វី​នោះ​ទេ​ មាន​តែ​ការ​ចេះ​អធ្យា​ស្រ័យ​ និង​យោគ​យល់​ឲ្យ​គ្នា​ប៉ុណ្ណោះ ។

កញ្ញា បាន​បន្ដថា​៖ «នៅ​សង្កាត់​ខ្ញុំ ពេល​ហែ​គណៈបក្ស​ម្ដងៗ ហើយ​ជួប​គ្នា​ជា​មួយ​គូរ​ប្រឈម​នៅ​ទល់​មុខ​គ្នា យើង​អែប​ទៅ​ម្ខាង ហើយ​ម្ខាង​ទៀត​បិទ​ម៉េក្រូ ដើម្បី​ឲ្យ​គេ​ហែ​បក្ស​គេទៅ» ។

កញ្ញា ចាន់ពៅរ៉ូហ្សែត បាន​លើក​ឡើង​ទៀត​ថា «រឿង​នេះ ក៏​ដោយ​សារ​យើង​ចេះ​អធ្យា​ស្រ័យ​គ្នា អនុគ្រោះ​ឲ្យ​គ្នា​ទៅ​វិញ​ទៅ​មក ហើយ​បើ​យើង​គិត​ថា​ យើង​មិន​យក​គ្នា​ធ្វើ​ជា​សត្រូវ​ទៅវិញ​ទៅ​មក ពេល​យើង​ជួប​គ្នា ក៏​មិន​មាន​បញ្ហា​ប្រឈម​អ្វី​ទេ​។ ​ព្រោះ​បើ​យើង​ហែ​ប៉ះគ្នា ដៀម​ដាម​ឲ្យ​គ្នា ​នោះ​មិន​មែន​ជា​អ្នក​ធ្វើ​នយោ​បាយ​ទេ ព្រោះ​ការ​ធ្វើ​នយោបាយ​ឈ្នះ គឺ​ឈ្នះ​ដោយ​ការ​បោះឆ្នោត ​យើងឈ្នះ​យើង​ត្រូវ​រួម​គ្នា​ជា​មួយ​អ្នក​ចាញ់​ មក​អភិវឌ្ឍ​ក្នុង​ភូម​របស់​យើង»។

ទាក់​ទិន​នឹង​យុទ្ធ​នាការ​ឃោសនា​នេះ​ កញ្ញា​ និយាយ​ថា​ មិន​មែន​ត្រឹម​តែ​អ្នក​នយោបាយ​ទេ​ដែល​ត្រូវ​មាន​ក្រម​សីលធម៌ ពលរដ្ឋ​ខ្មែរ​ទាំង​អស់ ក៏ត្រូវ​ប្រកាន់​ភ្ជាប់​នៅ​ក្រម​សីធម៌ ជា​ពលរដ្ឋ​ម្នាក់​ដែល​ល្អ ដែរ។

កញ្ញា​បន្ដ​ «ចំពោះ​អ្នក​នយោ​បាយ​ ឬ​យុវជន​ក្ដី យើង​ត្រូវ​ចេះ​បង្ហាញ​នូវ​គំនិត​ដែល​ថ្មី ​យុវជន​ជំនាន់​ថ្មី​ត្រូវ​ចេះ​គោរព​គ្នា​ទៅ​វិញ​ទៅ​មក​ យើង​ជា​អ្នក​នយោ​បាយ​ដូច​គ្នា ​យើង​ប្រកួត​គ្នា​នៅ​ពេល​បោះ​ឆ្នោត​រាល់​៥ឆ្នាំ​ម្ដង ប៉ុន្ដែ​ក្រោយ​ពេល​បោះ​ឆ្នោត​យើង​ត្រូវ​រួមគ្នា​ក៏សាង​ប្រទេស​ជាតិ​»។

ព្រះតេជ​គុណ កុយ ​ភារម្យ សមណៈ​និស្សិត​នៅ​សាកវិទ្យា​ល័យ​ភូមិន្ទ​ភ្នំពេញ មាន​សង្ឃ​ដីកា​ឲ្យ​ដឹង​ថា ព្រះ​អង្គ​ក្រៅ​ពី​បាន​ចុះឈ្មោះ​ បោះ​ឆ្នោត ឃុំ-សង្កាត់ អាណត្ដិ​នេះ ព្រះអង្គ​ក៏បាន​ចុះ​ចូល​រួម​ជា​បេក្ខ​ជន​ស្មគ្រ​ចិត្ដ​អង្កេត​ការ​ ចំពោះ​ការ​បោះ​ឆ្នោត​ជ្រើស​រើស​ក្រុម​ប្រឹក្សា​ឃុំ-សង្កាត់​នេះ​ដែរ ។

ព្រះអង្គ​បន្ដថា «អាត្មា​បាន​ចុះ​ឈ្មោះ​ធ្វើ​ជា​អ្នក​សង្កេត​ការ​នៅ ​អង្គការ ខមហ្រ្វែល​ ប៉ុន្ដែ​ខាង​អង្គការ គេ​មិន​អនុញ្ញាតិ​ឲ្យ​ព្រះសង្ឃ​ ចូលរួម​ធ្វើ​ការ​ងារ​នេះទេ។ ដូច្នេះ​បើ​តាម​អាត្មាយល់ អ្នក​អង្កេត​ការ​នៅ​ទូទាំង​ប្រទេស ប្រហែល​ជា​គ្នាន​ព្រះ​សង្ឃ​ចូលរួម​នោះទេ»។

«ចំណែក​ការ​ឃោស​នា​ និង​ការ​បញ្ចេញ​មតិ​របស់​យុវជន​វិញ អាត្មា​សង្កេត​ឃើញ​ថា​ មិន​សូវ​មាន​បញ្ហា​អ្វី​ច្រើន​ដូច​កាល​ពី​អាណត្ដិ​មុន​ទេ ​ឃើញ​មាន​ មួយ​ចំនួន​តូច​ប៉ុណ្ណោះ​ បញ្ចេញ​មតិ​ធ្ងន់​ដាក់​គ្នា​នៅ​លើ​បណ្ដា​ហ្វេស​ប៊ុក​» ព្រះតេជគុណ​បន្ថែម​ ។

យុវជន​ យ៉ាន់ ឧត្ដម និស្សិត​ជំនាញ​​វិទ្យា​សាស្រ្ដ​នយោ​បាយ​នៅ​បញ្ញា​សាស្រ្ដ​ បាន​មើល​ឃើញ​ថា ​អាណត្ដិ​នេះ ឃើញ​យុវជន​បាន​ចុះ​ឈ្មោះ​បោះ​ឆ្នោត​ច្រើន​ជាង​អាណត្ដិ​មុន ប៉ុន្ដែ​ ការ​បញ្ចេញ​មតិ​ឃោស​នា និង​ការ​ជជែក​គ្នា ពី​នយោ​បាយ​របស់​យុវជន​ហាក់​មាន​ការ​ប្រសើរ​ជាង​អាណត្ដិ​មុន​ៗ​។

ឧត្ដម​ បន្ដ​ «តាម​ការ​អង្កេត​របស់​ខ្ញុំ​ផ្ទាល់​ការ​ចូល​រួម​របស់​ពួក​គាត់​មាន​ការ​ប្រសើរ​ជាង​មុនៗ​ បើ​យើង​ក្រឡេក​មើល​ទៅ​តាម​ថ្នល់​ ពេល​មាន​ការ​ហែ​គណ​បក្ស​ យើង​ឃើញ​មាន​សុទ្ធ​តែ​យុវជន ប៉ុន្ដែ​ក្រម​សីល​ធម៌​ចំពោះ​បញ្ចេញ​មតិ​មាន​ការ​ប្រសើរ​ឡើង​ជា​ងមុន ហើ​យនៅ​តាម​បណ្ដាញ​សង្គម​ហ្វេស​ប៊ុក​​ក៏ដូច​គ្នា​ នេះ​ប្រហែល​មក​ពី​ខាង​ គ​.ជ​.ប​ ​បាន​ចេញ​ច្បាប់​មួយ​ចំនួន​ចំពោះ​ការ​ឃោស​នា​ អាណត្ដិ​នេះ​»។

យុទ្ធនា​ការ​ឃោសនា​បោះឆ្នោត​ក្រុម​ប្រឹក្សា​ ឃុំ-សង្កាត់​អាណត្តិ​ទី​ ៤ នេះ មាន​រយៈ​ពេល​ ១៤ ​ថ្ងៃ​ ចាប់​ផ្ដើម​ពី​ថ្ងៃ​ទី​ ២០ ខែ ឧសភា រហូត​ដល់​ថ្ងៃ​ទី ០២ ខែ មិថុនា ឆ្នាំ ២០១៧ ហើយ​ការ​បោះ​ឆ្នោត​ជ្រើ​រើស​ក្រុម​ប្រឹក្សា​ឃុំ​-សង្កាត់ នា​អាណត្តិ​ទី​៤ នឹង​ប្រព្រឹត្ត​ទៅ​នៅ​ថ្ងៃទី​៤ ខែមិថុនា ឆ្នាំ​២០១៧ ៕

អត្ថបទគួរចាប់អារម្មណ៍