The Phnom Penh Post Search

Search form




Logo of Phnom Penh Post newspaper Phnom Penh Post - យុវជន​ ១៣៥ នាក់​នាំ​យក​សម្ភារៈ​សិក្សា​ ចែក​សិស្ស​ពីរ​សាលា​នៅ​ខេត្ដ​កំពត

យុវជន​ ១៣៥ នាក់​នាំ​យក​សម្ភារៈ​សិក្សា​ ចែក​សិស្ស​ពីរ​សាលា​នៅ​ខេត្ដ​កំពត

Content image - Phnom Penh Post

យុវជន​ ១៣៥ នាក់​នាំ​យក​សម្ភារៈ​សិក្សា​ ចែក​សិស្ស​ពីរ​សាលា​នៅ​ខេត្ដ​កំពត

ភ្នំពេញៈ ក្រុម​យុវជន​ខ្មែរ​ខេម​ ( Khmer Cam Youth ) ដែល​ជា​យុវជន​មក​ពី​បណ្ដាល​សាលា និង​សាកល​វិទ្យា​ល័យ​នានា​នៅ​រាជធានីភ្នំ​ពេញ បាន​សហការ​គ្នា បង្កើត​កម្មវិធី​សប្បុរធម៌ នាំយក​សម្ភារៈ​សិក្សា ចែក​ដល់​ សិស្សា​នុសិស្ស​នៃ​សាលារៀន​ពីរ​ស្ថិត​ក្នុង ​ឃុំ​កូនសត្វ​ ស្រុក​ទឹកឈូ ខេត្ដ​កំពត ដែល​មាន​សិស្ស​ប្រមាណ ២២៩​នាក់ កំពុង​ខ្វះខាត​សម្ភារៈ​សិក្សា។

ព្រះតេជគុណ កុយ ភារម្យ ប្រធាន​ក្រុម​យុវជន​ខ្មែរខេម​បាន​មាន​សង្ឃ​ដីកា​ប្រាប់​ LIFT ម្សិល​មិញ​ឲ្យ​ដឹង​ថា តេជគុណ និង​ក្រុម​យុវជន​ចំនួន​ ១៣៥ នាក់​ទៀត បាន​នាំ​យក​សម្ភារៈ​​សិក្សា​ ដូច​ជា​សៀវ​ភៅ ប៉ិច បន្ទាត់ កាតាប និង​ថវិកា​បន្ទិច​មន្ទិច ​ផ្ដល់​ដល់​សិស្ស​នៅ​សាលា​បឋម​សិក្សា​សាមគ្គីខ្មែរ និង​ សាលា​បឋម​សិក្សា ត្រពាំង​កក់ ដែល​ជា​សាសា​ស្ថិត​នៅ​ក្នុង​តំបន់​ដាច់​ស្រយ៉ាល​កំពុង​មាន​ការ​ខ្វះខាត។

ព្រះតេជ​គុណបាន​បន្ដថា «គោល​បំណង​កម្មវិធី​សប្បុរ​សធម៌​នេះ គឺដើម្បី​ បណ្តុះ​ទំលាប់​អាន​ដល់​​កុមារ​ ឲ្យ​ចេះ​ស្រឡាញ់ ការអាន​សៀវ​ភៅ​តាំង​ពីក្មេង​ ជំរុញ​ទឹក​ចិត្តកុមារ​ក្នុង​ការសិក្សា បរិច្ចាគ​សៀវ​ភៅ​អាន​​ដល់​បណ្ណាល័យ​របស់​សាលា​ដែល​កំពុង​តែ​ខ្វះ​ខាត​ និង​បណ្តុះ​វប្បធម៌​ចែក​រំលែក​ក្នុង​សង្គម» ។

Content image - Phnom Penh Post
ក្រុមយុវជន ផ្ដល់ដល់សិស្សនៅសាលាបឋមសិក្សាសាមគ្គីខ្មែរ កាល​ពី​ថ្ងៃ​ទី ២៨ ខែ កុម្ភះ ។ រូបថត សការី

សមណៈ​និស្សិត​កំពុង​សិស្សា​ឆ្នាំ​ទី២ នៅសាកល​វិទ្យា​ល័យ​ភូមិន្ទ​ភ្នំពេញ​រូប​នេះ​បន្ដ​មាន​សង្ឃដីកា​ទៀត​ថា​ «អាត្មា​បង្កើត​ការងារ​សង្គម​ តាម​រយៈ​កម្ម​វិធី​សប្បុរសធម៌​នេះ ​ក៏​ដើម្បី​ឲ្យ​យុវជន​កាន់​តែ​ទទួល​បាន​ឱកាស​ ចូល​រួម​ធ្វើ​កិច្ច​ការងារ​សង្គម​ ពិសេស​ក្រុម​យុវជន​ដែល​មិន​ធ្លាប់​ធ្វើ​ការ​ងារ​សង្គម​ទាល់​តែ​សោះ​ ឲ្យ​ពួក​គាត់​ទទួល​បាន​ឱកាស​ជួយ​ដល់​សង្គម​ និង​ស្វែង​យល់​ពី​ការ​ងារ​សង្គម​ដោយ​ខ្លួន​ឯង»។

បើ​តាម​ តេជគុណ ភារម្យ នៅ​ដំណាក់​កាល​ចុះឈ្មោះ​ធ្វើ​កម្ម​វិធី​សប្បុរសធម៌​នេះ​ដំបូង មាន​សិស្ស-និស្សិត និង​ក្រុម​យុវជន​ជាច្រើន​បាន​ចុះឈ្មោះ​ចូលរួម​រហូត​ដល់​ជាង​ ១ពាន់​នាក់ ដែល​នេះ​បង្ហាញ​ថា យុវជន​ខ្មែរ​រឹត​តែ​យល់​ពី​តម្លៃ​នៃ​កិច្ច​ការ​ងារ​ជួយ​ដល់​សង្គម និង​ជន​ក្រីក្រនៅ​តំបន់​ដាច់​ស្រយាល ។

ព្រះអង្គបាន​មាន​សង្ឃដីកា​ថា បន្ទាប់ពី​ធ្វើ​កម្ម​វិធី​សប្បុរស​ធម៌នេះ​ មាន​ក្រុម​យុវជន​មួយ​ចំនួន ចង់​បង្កើត​កម្ម​វិធី​សប្បុរស​ធម៌​ដោយ​ខ្លួន​ឯង​នៅ​ថ្ងៃខាង​មុខ​ថែម​ទៀត​។

តេជគុណបាន​ឲ្យ​ដឹង​ថា «យុវជន​បាន​ស្វែង​យល់​ពី​ការ​ងារ​សង្គម ពួកគាត់​មើល​ឃើញ​ឱកាស​ចំពោះ​ខ្លួន​ឯង ហើយ​នៅ​ចង់​បង្កើត​ការ​ងារ​នេះ​ ដោយ​ខ្លួន​ឯង​ថែម​ទៀត​។ អាត្មា​យល់​ឃើញ​ថា បើ​យុវជន​ទាំង​អស់​ ចេះ​បង្កើត​ការ​ងារ​សង្គម​ដូចគ្នា​នេះ នៅ​ក្នុង​១ខែ ១សប្ដាហ៍ ១ថ្ងៃ​ មួយកម្ម​វិធីនោះ នឹង​មាន​ការ​ងារ​សង្គម​កើត​ឡើង​ជាបន្ដ​បន្ទាប់​ជួយ​ដល់​សិស្សា​នុសិស្ស​នៅ​តំបន់​ដាច់​ស្រយាល»៕

អត្ថបទគួរចាប់អារម្មណ៍