The Phnom Penh Post Search

Search form




Logo of Phnom Penh Post newspaper Phnom Penh Post - យុវជន ​៤ រូប​ឈ្នះ​ការ​ប្រកួត អ្នក​វិទ្យាសាស្រ្ដ​ និង​វិស្វករ​វ័យ​ក្មេង

យុវជន ​៤ រូប​ឈ្នះ​ការ​ប្រកួត អ្នក​វិទ្យាសាស្រ្ដ​ និង​វិស្វករ​វ័យ​ក្មេង

Content image - Phnom Penh Post
ក្រុម​យុវជន​ជយលាភីពានររង្វាន់​អ្នក​វិទ្យា​សាស្រ្ដ និង​វិស្វករ​វ័យ​ក្មេង​នៅ CJCC កាល​ពី​ថ្ងៃ សុក្រ​សប្ដាហ៍​មុន​។ រូបថត សហការី

យុវជន ​៤ រូប​ឈ្នះ​ការ​ប្រកួត អ្នក​វិទ្យាសាស្រ្ដ​ និង​វិស្វករ​វ័យ​ក្មេង

ភ្នំពេញៈ មូនិធិ​ហុងដា​ បាន​រក​ឃើញ​បេក្ខជន​ជយ​លាភី​ ៤ រូប​ នៃ​ការ​ប្រកួត​ពាន​រង្វាន់​ហុងដា ​សម្រាប់​អ្នក​វិទ្យា​សាស្រ្ដ​ និង​វិស្វករ​វ័យ​ក្មេង​ក្នុង​ប្រទេស​កម្ពុជា​ប្រចាំ​ឆ្នាំ ២០១៦។

ថវិកា​ចំនួន ​៣០០០ ដុល្លាអាមេរិក​ មេដាយ​មាស​ និងវិញ្ញា​បនប័ត្រ ​ពី​មូនិធិ​ហុងដា ​បាន​ប្រគល់​ឲ្យ​ជយលាភី​យុវតី​ សុង ​ប៊ុនទៀត​ យុវជន​ រ៉ូ ​ច័ន្ទណារិទ្ធ​ យុវជន​ គួច ​គាងអាង​ និង ​យុវជន​ ថៃ ​សេរីវុឌ្ឍ​ កាល​ពី​ថ្ងៃ​សុក្រ សប្ដាហ៍​មុន​នៅ​ CJCC ។

យុវតី សុង ប៊ុន ទៀង និស្សិត​អាហារូបករណ៍​នៃ​សាកល​វិទ្យា​ល័យ​ភូមិន្ទ​កសិកម្ម និង​ជា​តំណាង​ក្រុម​បេក្ខជន​ជយលាភី​បាន​ថ្លែង​ឲ្យ​ដឹង​ថា​ ការ​ចូល​រួម​ប្រកួត​ប្រជែង​ពាន​ រង្វាន់​ហុងដា​សម្រាប់​វិស្វករ​ និង​អ្នក​វិទ្យា​សាស្ត្រ​វ័យ​ក្មេង​បាន​បង្កើន​ចំណេះ​ដឹង​ទាក់​ទង​នឹង​អេកូតិច​ណូឡូជី​កាន់​តែ​ទូលំ​ទូលាយ​ជាង​មុន។

យុវតី​តំណាង​ក្រុម​ជយលាភី​រូបនេះ​បន្ដ​ថា «ខ្ញុំបាន​ទទួល​នូវ​សមិទ្ធ​ផល​ថ្ងៃ​នេះ​ ដោយ​សារ​តែ​ការ​ខិត​ខំប្រឹង​ប្រែង​សិក្សា​ស្រាវ​ជ្រាវ ការ​អាន​ឯក​សារ​បន្ថែម​ ការ​អនុវត្ត និង​ការ​ព្យា​យាម​ពង្រឹង​សមត្ថភាព​ទាំង​ជំនាញ​ និង​ភាសា ​ហើយ​អ្វី​ដែល​ពួកខ្ញុំ​បាន​តស៊ូ​ប្រឹង​ប្រែង​កន្លង​មក​នេះ​ ពិត​ជា​បាន​ធ្វើ​ឲ្យ​ ពួក​ខ្ញុំ​ទាំង​ ៤ នាក់​បាន​ទទួល​ជយ​លាភី​រង្វាន់​ហុង​ដា​នេះ​មែន»។

ប៊ុន​ ទៀង​ បន្ថែមថា «កម្មវិធី​ប្រកួត​នេះ​ជា​ឱកាស​សម្រាប់​ឲ្យ​ខ្ញុំ ក៏​ដូច​ជា​យុវជន​អាច​បង្ហាញ​ពី​សមត្ថ​ភាព​ និង​គំនិត​របស់​ខ្លួន​អំពី​អេកូ​តិច​ណូ​ឡូជី​ដែល​ជា​ទុន​យ៉ាង​សំខាន់​សម្រាប់​ពិចារណា​ និង​ស្វែង​រក​ដំណោះ​ស្រាយ​ដោយ​មាន​ទំនួល​ខុស​ត្រូវ​ខ្ពស់​ក្នុង​នាម​ជា​អ្នក​វិទ្យា​សាស្រ្ត​ និង​អ្នក​អភិវឌ្ឍន៍​ដ៏​ពិត​ប្រាកដ»។

យុវតីកំពុង​សិក្សា​ឆ្នាំទី ៤ នៃ​មហាវិទ្យាល័យ កសិ-ឧស្សហកម្ម រូប​នេះ​បាន​ឲ្យ​ដឹង​ថា​ ការ​យល់​ដឹង​ពី អេកូ​តិច​ណូ​ឡូ​ជី​ពិត​ជា​មាន​សារៈ​សំខាន់​ក្នុង​​ការ​អភិវឌ្ឍ​ប្រទេស​ដោយ​ការ​យក​ចិត្ត​ទុក​ដាក់​ទាំង​សង្គម​ សេដ្ឋកិច្ច​ និង​យក​ចិត្ត​ទុក​ដាក់​ខ្ពស់​ចំពោះ​មនុស្ស​ជាតិ​ និង​គុណ​ភាព​បរិស្ថាន​ ដោយ​សារ​តែ​រាល់​ការ​អភិវឌ្ឍ​ទាំង​ឡាយ​នឹង​ត្រូវ​បាន​សិក្សា​វិភាគ​ល្អិត​ល្អន់​ដោយ​មាន​ការ​ចូល​រួម​ពីអ្នក​ជំនាញ​ឯក​ទេស​ និង​អ្នក​បច្ចេក​ទេស​ដើម្បី​កាត់​បន្ថយ​រាល់​ផល​ប៉ះ​ពាល់​ដែល​អាច​កើត​មាន​ឡើង ។

កញ្ញា ​នួន ​កូហ្សូម៉ា ​លេខា​​កម្ម​វិធី​ពាន​រង្វាន់​ហុងដាសម្រាប់​អ្នក​វិទ្យា​សាស្រ្ដ ​និង​វិស្វករ​វ័យ​ក្មេង​កម្ពុជា ​បាន​ឲ្យ​ដឹង​ដែរ​ថា​ កម្ម​វីធី​ប្រកួត​នេះ​បាន​ប្រមូល​ផ្តុំ​យុវជន​ជំនាន់​ក្រោយ​ចូល​រួម​ក្នុង​ការ​ផ្តល់​មតិ​យោបល់​ដើម្បី​ការ​អភិវឌ្ឍ​ប្រកប​ដោយ​និរន្តភាព។

កញ្ញា​បន្ដ​ថា «ដោយ​សារ​តែ​យុវជន​ គឺជា​សរសរ​ទ្រូង​នៃ​ប្រទេស​ជាតិ​ ហើយ​អនាគត​របស់​ប្រទេស​ជាតិ​យើង​ក៏​ស្ថិត​នៅ​ក្នង​កណ្តាប់​ដៃ​របស់​យុវជន​ដែរ​ ដូច​នេះ​ហើយ​ទើប​ការ​ចូល​រួម​របស់​យុវជន​ពិត​មាន​សារៈ​សំខាន់​ណាស់​ ម្យ៉ាង​វិញ​ទៀត​វាគឺ​ជា​ឱ​កាស​មួយ​ដែល​អាច​ឲ្យ​ពួក​គាត់​កសាង​ខ្លួន​ឲ្យ​ក្លាយ​ទៅ​ជា​អ្នក​វិទ្យា​សាស្រ្ត​វិស្វក​រអ្នក​បចេ្ចក​ទេស​ដែល​មាន​ជំនាញ​ពិត​ប្រាកដ​ ក្នុង​ការ​អភិ​វឌ្ឍ​ប្រទេស​ជាតិ​ដោយ​ឈរ​លើ​គោល​ជំហរ​មួយ​ដ៏ត្រឹម​ត្រូវ​រឹងមាំ​ ប្រកប​ដោយ​សីលធម៌​វិជ្ជាជីវៈ​ដើម្បី​បម្រើ​ដល់​ប្រយោជន៍​មនុស្ស​ជាតិ​ភាព​រីក​ចម្រើន​ផ្នែក​សេដ្ឋកិច្ច និង​សុវត្ថិភាព បរិស្ថាន»។

លោក ពិត ចំណាន រដ្ឋលេខា​ធិការ​ក្រសួង​អប់រំ​ យុវជន និង​​កឡា បាន​ថ្លែង​ក្នុង​ពិធី​ប្រគល់​រង្វាន់​ដល់​យុវជន​ជយ​លាភី​ថា លោក​ចង់​ឲ្យ​អ្នក​វិទ្យា​សាស្រ្ដវ័យ​ក្មេង​ ធ្វើ​ការ​ជួបជុំ​គ្នា​ឲ្យ​បាន​ញឹក​ញាប់ និង​ប្រចាំ​ឆ្នាំ​ជាមួយ​អ្នក​ស្រាវ​ជ្រាវ និង​អ្នក​វិទ្យាសាស្រ្ដ ដើម្បី​ចែក​រំលែក​ព័ត៌មាន​ពី​ការ​វិវឌ្ឍ នៃ​បច្ចេកវិទ្យា​នៅ​កម្ពុជា​។

លោក​បន្ដ​ថា «ខ្ញុំ​ចង់​ឲ្យ​ពលរដ្ឋ​មាន​កម្ម​វិធី​ជួប​ជុំគ្នា​កាន់​តែច្រើន ពី​អ្នក​ស្រាវ​ជ្រាវ​ ពី​អ្នក​បច្ចេកវិទ្យា ដើម្បី​តាម​ដាន​ការ​វិវឌ្ឍ​ផ្នែក​វិទ្យា​សាស្រ្ដ » ។

កម្ម​វិធី​រង្វាន់​ហុងដា​សម្រាប់​អ្នក​វិទ្យា​សាស្ដ្រ ​និង​វិស្វករ​វ័យកេ្មង​ (“Y-E-S Award”)​ត្រូវ​បាន​អនុ​វត្ដ​ដោយ​ជោគ​ជ័យ​នៅ​ប្រទេស​វៀត​ណាម​ក្នុង​ឆ្នាំ២០០៦​ និង​ នៅប្រទេស​ ឥណ្ឌា​ក្នុង​ឆ្នាំ ​២០០៧​។ ​នាឆ្នាំ២០០៨ កម្ម​វិធី​នេះ​ត្រូវ​បាន​ពង្រីក​បន្ថែម​ដើម្បី​បញ្ចូល​ប្រទេស​កម្ពុជា​ក្នុង​គោល​ បំណង​គាំទ្រ ​និង​លើក​ទឹក​ចិត្ដ​សម្រាប់​ការ​អភិ​វឌ្ឍ​ធន​ធាន​មនុស្ស​ដែល​ជា​អ្នក​ទទួល​ខុស​ត្រូវ​ចំពោះ​ អនា​គត​របស់​ប្រទេស​ ព្រម​ទាំង​ជួយ​ដល់​តំបន់​អាស៊ី​អាគេ្នយ៍​ដែល​មាន​ទំហំ​ដ៏ធំ​ធេង​ ក្នុង​ការ​បង្កើត​ នូវ​សមិទ្ធ​ផល​ដែល​មាន​ភាព​ជឿន​លឿន​ប្រកប​ដោយ​តុល្យ​ភាព​​នៃ​វិទ្យា​សាស្ដ្រ​ និង​បចេ្ចក​វិទ្យា ៕

អត្ថបទគួរចាប់អារម្មណ៍