The Phnom Penh Post Search

Search form




Logo of Phnom Penh Post newspaper Phnom Penh Post - ​យុវតីបីនាក់ថា ពួកគេ​ទទួល​ផល​ប្រយោជន៍​ច្រើន​ពី​សារព័ត៌មាន

​យុវតីបីនាក់ថា ពួកគេ​ទទួល​ផល​ប្រយោជន៍​ច្រើន​ពី​សារព័ត៌មាន

Content image - Phnom Penh Post

​យុវតីបីនាក់ថា ពួកគេ​ទទួល​ផល​ប្រយោជន៍​ច្រើន​ពី​សារព័ត៌មាន

ភ្នំពេញៈ ​បណ្ដាញ​សារព័ត៌មាន​បាន​ក្លាយ​ទៅ​ជា​ប្រភព​ដំណឹង​ កាន់តែ​សំខាន់ ​និង​រហ័ស​ពីមួយ​ថ្ងៃ​ទៅ​មួយ​ថ្ងៃ​ ដោយ​បាន​ផ្ដល់​ផល​វិជ្ជមាន​ និង​ អវិជ្ជមាន​យ៉ាង​ច្រើន ​ដល់​សង្គម​ និង​មនុស្ស​ ខណៈ​យុវជន​កម្ពុជា​បាន​លើក​ឡើង​ថា ​ពួកគេ​បាន​ទទួល​ផល​ប្រយោជន៍ ​និង​ការ​អប់រំ​យ៉ាង​សម្បូរ​បែប​តាម​រយៈ​សារព័ត៌មាន​នានា​។

យុវតី ​សុង ​ពេជ្រ​ប៉ូលីន ​និស្សិត​បរិញ្ញា​បត្រ​ឆ្នាំ​ទី ៣ ​ជំនាញ​គណនេយ្យ​ និង​ហិរញ្ញ​វត្ថុ​នៅ​វិទ្យា​ស្ថាន​ ខេមអេដ ដែល​ទើប​តែ​ប្រឡង​​ជាប់​ចំណាត់​ថ្នាក់​លេខ ១ ​ទូទាំង​ពិភព​លោក​ក្នុង​ការ​ប្រឡង ​លើ​វិញ្ញាសា​សរសេរ​ (Paper Base Exam)​ លើ​ប្រធានបទ ​«គ្រប់​គ្រង​ហិរញ្ញវត្ថុ​»​ បាន​ថ្លែង​ប្រាប់​ LIFT ​ឲ្យ​ដឹង​ថា ការ​តាម​ដាន​ព័ត៌មាន​អាច​ឲ្យ​រូប​នាង​ទទួល​បាន​ចំណេះ​ដឹង​ថ្មី​ៗ​នៅ​ទូទាំង​ពិភព​លោក​ ។

យុវតី ​ពេជ្រ​ ប៉ូលីន ​បាន​ថ្លែង​ថា​ «តាម​រយៈ​សារព័ត៌មាន​បាន​ជួយ​ឲ្យ​យើង​បាន​ដឹង​អ្វី​ៗ​ទាំង​ក្នុង​ស្រុក​ និង​ក្រៅ​ស្រុក ​ដែល​កំពុង​តែ​កើត​មាន​ឡើង​នៅ​លើ​ពិភព​លោក​» ។

យុវតី​រូបនេះ​បាន​បន្ដ​ឲ្យ​ដឹង​ថា ​ការ​អាន​សារព័ត៌​មាន​ ដែល​ទាក់​ទង​ទៅ​នឹង​ជំនាញ​ដែល​កំពុង​សិក្សា វា​បាន​ជួយ​ដល់​ការ​សិក្សា​របស់​នាង​ជា​ច្រើន​ និង​អាច​រៀន​សូត្រ​បាន​ពូកែ​ថែម​ទៀត ។

ប៉ូលីន​ បាន​អះអាង​ថា ​«ការ​អាន​សារព័ត៌​មាន​ គឺ​មាន​និន្នាការ​របស់​វា ​ដូច​យើង​ជាអ្នក​រៀន​ជំនាញ​គ្រប់គ្រង​ពាណិជ្ជ​កម្ម​ បើ​យើង​បាន​តាម​ដាន​ព័ត៌មាន​ដែល​កើត​ឡើង​ថ្មីៗ​ទាក់ទង​នឹង​ពាណិជ្ជកម្ម​ ពេល​យើង​ទៅ​រៀន​នៅ​សាលា ​យើង​នឹង​ដឹង​មុន​គេ​ ហើយ​ពេល​មាន​តម្រូវ​ការ​ការ​ងារ​អ្វី​មួយ ​យើង​នឹង​ឆាប់​ទទួល​បាន​ដំណឹង​មុន​គេ​ដែរ​»។

យុវតី​វ័យ​ ២០ ឆ្នាំ​រូប​នេះ​បន្ថែម​ថា «ពេល​យើង​ដឹង​ព័ត៌មាន​ច្រើន ​មាន​ចំណេះ​ដឹង​ច្រើន ​ការ​គិត​របស់​យើង​ក៏​កាន់​តែ​ទូលំ​ទូលាយ​ដែរ ​ហើយ​នៅ​ពេល​យើង​ត្រូវ​ធ្វើ​កិច្ច​ការ​អ្វី​មួយ​ក៏​យើង​មាន​គំនិត​ច្រើន​ជាង​គេ​ដែរ​ ព្រោះ​យើង​មិន​អាច​មើល​តែ​សៀវភៅ​មួយ​មុខ​ហើយ​អាច​បែក​គំនិត​ទេ»។

បេក្ខ​នារី​លេខ​បី​ក្នុង​ការ​ប្រកួតប្រជែង​វោហា​ស័ព្ទ ​ចិន-អាស៊ាន​ក្នុង​ឆ្នាំ​ឆ្នាំ​ ២០១៦ ​យុវតី ​អៀង ​លីន​ដា បាន​ថ្លែង ឲ្យ​ដឹង​ដែរ​ថា​ បណ្ដាញ​សារព័ត៌​មាន​បាន​ចូល​រួម​ចំណែក​ជា​ច្រើន​ក្នុង​ការ​អប់រំ​ដល់​យុវជន ​និង​សិស្ស​និស្សិត តាម​រយៈ​ការ​ផ្សព្វ​ផ្សាយ​កម្ម​វិធី​សិក្សា​ និង​ចំណេះ​ដឹង​ថ្មីៗ​ទូទាំង​ពិភព​លោក ​។

លីនដា ​បាន​បន្ដថា​ «ឥលូវ​យើង​ជា​យុវជន​កម្ពុជា​ យើង​មិន​មែន​គ្រាន់​តែ​មាន​ការ​ទំនាក់​ទំនង​តែ​ជា​មួយ​យុវជន​ក្នុង​ប្រទេស​យើង​ប៉ុណ្ណោះ​ទេ ​តែ​ត្រូវ​មាន​ការ​ទំនាក់​ទំនង​ជា​មួយ​យុវជន​នៅ​តាម​បណ្ដាល​ប្រទេស​ផ្សេងៗ​ទៀត​នៅ​លើសកល​លោក។ អញ្ចឹង​មាន​យុវជ​ន​យើង​មួយ​ចំនួន​គាត់​នៅ​មិន​សូវ​ចូលចិត្ដ​អាន​ព័ត៌មាន​ ដល់​ពេល​ទៅ​ជួប​ជា​មួយ​យុវជន​គេៗ​និយាយ​ពី​ព្រឹត្ដិការ​ពិភព​លោក​ថ្មីៗ​ ដល់​ពេល​យើង​មិន​បាន​តាម​ដាន​ព្រឹត្ដិ​ការណ៍​នឹង យើង​រក​អី​និយាយ​មិន​ចេញ​ទេ» ។

យុវតី​រូបនេះ​បន្ដ​ថា​ «អញ្ចឹង​ ពេល​យើង​តាម​ដាន​ព័ត៌មាន​ និង​ព្រឹត្ដិការណ៍​ពិភព​លោក​ជា​រៀង​រាល់​ថ្ងៃ​ ពេល​យើង​ប្រាស្រ័យ​ទាក់ទង​ជា​មួយ​គេ​យើង​មាន​ព័ត៌មាន​និយាយ​ជា​មួយ​គេ​រឹត​តែ​ច្រើន»។

ពិធីការិនី​បុស្ដិ៍វិទ្យុ​មួយ​រូប​ដែល​មាន​ប្រជា​ប្រិយ​ភាព​ខ្ពស់​ តាម​រយៈ​វោហា​ស័ព្ទ​ត្រង់ៗ​ក្នុង​ការ​ផ្តល់​យោបល់​ដោះ​ស្រាយ​វិបត្តិ​ស្នេហា​ បញ្ហា​ផ្លូវ​ចិត្ត​ដល់​យុវវ័យ ​កញ្ញា នាង ​សុវ៉ាតនា​ ឬ DJ NaNa ​បាន​មើល​ឃើញ​ថា តាម​រយៈ​ការ​តាម​ដាន​ព័ត៌មាន​ជា​ប្រចាំ អាច​ធ្វើ​ឲ្យ​យុវជន​មាន​ចំណេះដឹង​ទូទៅ​ច្រើន ពេល​ទៅ​ណា​មក​ណា អាច​ចូល​ក្នុង​ចំណោម​គេ​ចុះ។

កញ្ញា​បន្ដ​ថា «​យើង​តាម​ដាន​ដំណឹង​ជា​ប្រចាំ ពេល​យើង​ទៅ​ណា​មក​ណា​ យើង​អាច​ចូល​ក្នុង​ចំណោម​គេចុះ​យើង​បាន​ដឹង​ហើយ​ថា ពេល​ចូល​ក្នុង​ចំណោម​គេ ​មាន​មនុស្ស​មក​ពី​ប្រភព​ផ្សេង​ៗគ្នា បើ​យើង​មិន​មាន​ចំណេះ​ដឹង​ទូទៅ​ច្រើន​ យើង​នឹង​មិន​មាន​អ្វី​និយាយ​​ប្រាស្រ័យ​ទាក់​ទង​ទៅ​គេ​ទេ​» ។

NaNa បន្ដ​អះអាងថា «អ្នក​ដែល​ដឹង​ពី​ព័ត៌​មាន​ច្រើន​ បើ​សិនគាត់​ជា​អ្នក​រកស៊ីវិញ ​វា​បាន​ក្លាយ​ទៅ​ជា​ដើម​ទុន​នៃការ​រកស៊ី​របស់​គាត់​ដែរ។ ​ហើយ​ពាក្យ​ថា ​ដើមទុន​នៃ​ការ​រកស៊ី​មិន​មែន​មាន​តែ​លុយ​ទេ ព្រោះ​លុយ​គ្រាន់តែ​ជា​ទុន​មួយ​ផ្នែក​ ប៉ុន្ដែ​ព័ត៌មាន​ដែល​គាត់​មាន ​គឺ​ចាំបាច់​សម្រាប់​ប្រតិ​បត្ដិការ​នៅ​ក្នុង​ចំនួញ​របស់​គាត់ ​ព័ត៌មាន​គឺ​ជា​ទុន​បន្ថែម​សម្រាប់​ការ​រកស៊ី​របស់​គាត់ ​បើ​គាត់​ដឹង​ព័ត៌មាន​កាន់​តែ​ច្រើន​ វាក៏​ជួយ​កាត់​បន្ថយ​ហានិភ័យ​ចំពោះ​អាជីវកម្ម​របស់​គាត់​ដែរ»៕

អត្ថបទគួរចាប់អារម្មណ៍