The Phnom Penh Post Search

Search form




Logo of Phnom Penh Post newspaper Phnom Penh Post - យុវតី ៣ ក្រុម​ឈ្នះ​ការ​ប្រកួត Technovation ថ្នាក់​ជាតិ ​ត្រៀម​​​ប្រកួត​កម្រិត​ពិភព​លោក

យុវតី ៣ ក្រុម​ឈ្នះ​ការ​ប្រកួត Technovation ថ្នាក់​ជាតិ ​ត្រៀម​​​ប្រកួត​កម្រិត​ពិភព​លោក

Content image - Phnom Penh Post
ក្រុម​យុវតី និង​យុវជន ចូលរួម​ក្នុង​ការ​ប្រកួត​ Technovation ឆ្នាំនេះ ។

យុវតី ៣ ក្រុម​ឈ្នះ​ការ​ប្រកួត Technovation ថ្នាក់​ជាតិ ​ត្រៀម​​​ប្រកួត​កម្រិត​ពិភព​លោក

ភ្នំពេញៈ យុវតី ៣ ក្រុម​បាន​ឈ្នះ​ការ​ប្រកួត​ Technovation ​២០១៧​ ថ្នាក់​ជាតិ ក្រោយ​ពេល​ពួកគេ​បាន​ផ្ដួល​យុវតី​ ៩ ក្រុម​ផ្សេង​ទៀតកាល​ចុង​សប្តាហ៍​មុន នៅ​មជ្ឈ​មណ្ឌល​សហ​ប្រតិ​បត្តិ​ការ​ កម្ពុជា​-កូរ៉េ (CKCC)។

Technovation ជា​កម្មវិធី​អប់រំ​រយៈពេល​ ១២​ សប្ដាហ៍ សម្រាប់​សិស្ស​ស្រី​​ចាប់​ពី​អាយុ ១០ ទៅ ១៩ឆ្នាំ ដែល​កំពុង​សិក្សា​នៅ​ថ្នាក់​អនុវិទ្យាល័យ និង​វិទ្យាល័យ ក្នុង​គោល​បំណង​លើ​ទឹក​ចិត្ត​ស្រ្ដី ឲ្យ​ចូល​រួម​កាន់​តែ​ច្រើន​ក្នុង​វិស័យ​បច្ចេក​វិទ្យា (ICT)​ និង​វិស័យ​ធុរៈកិច្ច ។

ការ​ប្រកួត​ឆ្នាំនេះ ក្រុម​ជយលាភី​លេខ ១ ទទួល​បាន​រង្វាន់​ Tablet ​៣​ គ្រឿង និង ថវិកា​ជាង ​២០០ ដុល្លារ​អាមេរិក។ ​លេខ​ ​២​ ទទួល​បាន​ Tablet ​៣​ គ្រឿង និងថវិកា​ជាង​១០០ ​ដុល្លារ​អាមេ​រិក​​ ខណៈកម្មវិធី​ប្រកួត​នេះ ជា​គម្រោងរបស់​ ​Development Innovations ដែល​ទទួល​បាន​ការ​ឧបត្ថម្ភ​ដោយ ទីភ្នាក់​ងារ​អាមេរិក​សម្រាប់​ការ​អភិវឌ្ឍអន្តរ​ជាតិ​ (USAID) ​សហជាមួយ​​ក្រសួង​អប់រំ​ យុវជន និង កីឡា ។

លោក ពិតោរ លីដែត Master Educator នៃកម្មវិធី Technovation Cambodia បាន​ថ្លែង​ប្រាប់​ LIF ថា ទាំង​ក្រុម​យុវតី​ជយលាភី ៣ក្រុម និង៩​​ក្រុម​ទៀត​​ដែល​បាន​ចូលរួម​ការ​ប្រកួត​​ថ្នាក់​ជាតិ ​នឹង​ត្រូវ​បញ្ចូល​គម្រោង​របស់​​ពួកគេ ​ឲ្យ​ទៅ​ចូលរួម​ប្រកួត​​ថ្នាក់​ពិភព​លោកនៅ​សហរដ្ឋ​អាមេរិក​ ​ចាប់​​ពីខែ​មិថុនា ដែល​នឹង​បើក​វគ្គប្រកួត​ជ្រើស​រើស​ នា​ខែ​កក្កដា ប្រកួត​វគ្គ​ពាក់​កណ្ដាល​ផ្ដាច់​ព្រ័ត្រ និង​ ខែ​សីហា ​ប្រកួត​ផ្ដាច់​ព្រ័ត្រ។

ក្រុមយុវតី​ជយលាភី​លេខ ១ ​កម្រិត​អនុ​វិទ្យាល័យឬ ​Junior Division បាន​ទៅ​ក្រុម Techlifestyle​ និងក្រុម ​​Girls For Tomorrow ជាប់​ជយ​លាភី​ ១​ សម្រាប់​យុវតី​កម្រិត​​វិទ្យាល័យឬ Senior Division ខណៈ​លេខ​ក្រុម​លេខ​ពីរ កម្រិត Senior Division បាន​ទៅ​លើ​ The Square Bracket ។

ក្រុម​នីមួយៗ​មាន​សមាជិក​ចាប់​ពី​ពីរ នាក់​​ឡើង​ទៅ​។

ថ្លែងក្នុងកម្មវិធី​បិទ​ការ​ប្រកួត យុវតី​ តាំង​ វួច​លាប ​តំណាង​ក្រុម Techlifestyle​ ដែលជា​ក្រុម​មក​ពី​វិទ្យាល័យ ​ព្រះ​ស៊ី​សុវត្ថិ​ ​បាន​ថ្លែង​ឲ្យ​ដឹង​ថា ​ក្រុម​ពួកនាង​បាន​លើក​យក​ពីការ​បង្កើត ​App​ ឈ្មោះ ​Pre-Health ដែល​ជា​អេហ្វ​មួយប្រភេទ ​អាច​ជួយ​ថែទាំ​សុខ​ភាព​ដល់​ប្រជាជន​ទូទៅ​ ពិសេស​បង្ហាញ​ពី​បញ្ហា​​សុខភាព​។

យុវតី​រូបនេះ​ ថ្លែងថា «​App នេះ​​ធ្វើ​ឡើង​សម្រាប់​​ផ្ដល់​ព័ត៌មាន​នានា​ ទាក់​ទង​នឹង​បញ្ហា​សុខភាព ​គឺ​អាច​ឲ្យ​​​អ្នក​​ប្រើ​ប្រាស់​យក​ អេហ្វ​នេះ​ ដើម្បី​តាម​ដាន​ពី​សុខភាព​របស់​ខ្លួន​ឲ្យ​កាន់​តែ​ប្រសើរ​ផង​ដែរ​»។

ក្រុម​យុវតី ​Girls For Tomorrow ​មក​ពី​មជ្ឈ​មណ្ឌល​ Liger Learning ​ដែល​ជា​ជយ​លាភី​លេខ១​ ផ្នែក Senior Division បាន​ឲ្យ​ដឹង​ដែរ​ថា ពួកនាង​បាន​លើក​យក​គម្រោង​នៃ​ការ​បង្កើត​ App ​មាន​ឈ្មោះ​ថា ​V-Ed Kh ​។

យុវតី ​ជុន​ វីរីយ៉ា ​តំណាង​ក្រុម​បាន​និយាយ​ប្រាប់​ ថា App​ របស់​ពួកគេ អាច​ជួយ​លើក​កម្ពស់​ដល់​វិស័យ​អប់រំ​ពិសេស​ជួយ​ដល់​សិស្ស​-និស្សិត ​ឲ្យ​ងាយ​ស្រួល​ក្នុង​សិក្សា​បន្ថែម​ ។

វីរីយ៉ា ​បន្ដថា ​«អេហ្វ​នេះ​ ក៏​អាច​ឲ្យ​ សិស្ស​-និស្សិត ​រៀនបន្ថែម​ ​នៅ​លើ ​Online ​តាម​រយៈ ​វីដេអូ​ និងឯកសារ​បង្រៀន​ជាច្រើន​» ។

ចំណែក​ជយ​លាភី​លេខ​ ២​ ផ្នែក ​Senior Division ​បាន​ទៅ​លើ​ក្រុម​យុវតី ​The Square Bracket ​ជាសិស្ស​មក​ពីសាលា​ CIA First International School។ ​ក្រុម​ពួកគេ​បាន​បង្កើត​​គម្រោង​ App​ មួយ​ឈ្មោះ​ TechersNearMe ។

បើត​តាម​ យុវតី ស្រី នៀត តំណាងក្រុម បាន​ឲ្យ​ដឹង​ថា TechersNearMe គឺ​មាន​គោល​បំណង​ក្នុង​ការ​ផ្ដល់​ឲ្យ​អ្នក​ប្រើប្រាស់​ក្នុង​ការ​ស្វែង​រក​គ្រូ​បង្រៀន​ក្រៅ​ម៉ោង​សម្រាប់​ជា​ជំនួយ​ក្នុង​ការ​សិក្សាផងដែរ ​។

លោក ​ពិតោរ លីដែត Master Educator នៃកម្មវិធី Technovation Cambodia ​ បាន​បន្ថែម​​ថា ការ​ប្រកួត​គម្រោង​បង្កើត​ App នៅ​ក្នុង​កម្ម​វិធី​ Technovation ឆ្នាំ​​នេះ បាន​រៀប​ចំ​ឲ្យ​ក្រុម​យុវតី បង្កើត​គម្រោង​របស់​ពួកគេ ឲ្យ​សម​ស្រប ទៅតាម​គោល​ដៅ​អភិវឌ្ឍសហស្សវត្ស​រទាំង​ ៦ របស់​ អង្គការ​សហប្រជាជាតិ ។

លោកស្រី​ គឹម ​សេដ្ឋានី ​រដ្ឋលេខា​ធិការ​ក្រសួង​អប់រំ​ យុវជន ​និងកីឡា ​បាន​ថ្លែង​ក្នុង​ពិធីនេះ​ដែល​ថា​Technovation ពិត​ជាអាច​រួមចំណែក​យ៉ាង​សំខាន់​ក្នុង​ការជួយ​ឲ្យមាតា​បិតា​ ​អាណា ​ព្យាបាល​សិស្ស និង​យុវ​នារី​វ័យក្មេង​ទាំង​អស់​ បាន​យល់​ដឹង​បន្ថែម​ ​ពីសារៈ​សំខាន់​នៃ​ឧប​ករណ៍​បច្ចេកវិទ្យា​ព័ត៌​មាន​ (ICT) ​ក្នុង​គោល​បំណង​លើក​កម្ពស់​ការ​ចូល​រួម​របស់​ស្ត្រី ​លើ​ផ្នែក​បច្ចេក​វិទ្យា​ និង​ធុរៈកិច្ច ​ក៏ដូច​ជា​បង្កើន​ការ​ភ្ជាប់​ទំនាក់​ទំនង​របស់​ពួកគេ​ក្នុង​វិស័យ​នេះ​ផងដែរ៕

អត្ថបទគួរចាប់អារម្មណ៍