The Phnom Penh Post Search

Search form




Logo of Phnom Penh Post newspaper Phnom Penh Post - សិស្សក្រីក្រ ៤​នាក់ ចង់​ឲ្យ​លោក​នាយក​រដ្ឋ​មន្ត្រី ជួយ​ពួកគេ​ចូល​រៀន​នៅ​សាលាពេទ្យ

សិស្សក្រីក្រ ៤​នាក់ ចង់​ឲ្យ​លោក​នាយក​រដ្ឋ​មន្ត្រី ជួយ​ពួកគេ​ចូល​រៀន​នៅ​សាលាពេទ្យ

Content image - Phnom Penh Post
យុវជន ថុល តូម៉ា បង់ក ក្រម៉ា និង​ក្រុម​សិស្ស​ក្រី​ក្រ ដែលទទួលបានអាហារូបករណ៍រួច ក្នុងពេល​រួម​ដំណើរ​លើ​រថភ្លើង​ជា​មួយ​លោកនាយករដ្ឋមន្ត្រី ហ៊ុន សែន​ កាល​ពី​ឆ្នាំ​មុន ។ រូបថត សហការី

សិស្សក្រីក្រ ៤​នាក់ ចង់​ឲ្យ​លោក​នាយក​រដ្ឋ​មន្ត្រី ជួយ​ពួកគេ​ចូល​រៀន​នៅ​សាលាពេទ្យ

ភ្នំពេញៈ ​សិស្ស​ក្រី​ក្រ​ ​៤ នាក់​​ បាន​អំពាវនាវ​ដល់​លោកនាយករដ្ឋមន្ត្រី ហ៊ុន សែន ឲ្យ​ជួយ​ពួកគេ​​បាន​ចូល​រៀន​នៅ​សាកល​វិទ្យា​ល័យ​វិទ្យាសាស្រ្ដ​សុខា​ភិបាល ដោយ​មិន​ចាំ​បាច់​បង់​ប្រាក់ ដោយសារ​តែ​ជីវភាព​ខ្វះ​ខាត​ខ្លាំង។ នេះ​បើ​តាម​ការ​ឲ្យ​ដឹង​ពី យុវជន ថុល តូម៉ា​ ​ប្រធាន​ក្រុម​យុវ​ជន​ឈ្មោះ «គ្រួសារ​តែ​មួយ» ដែល​បាន​ចូលរួម​ជាមួយ​ពួកគេ ក្នុង​ដំណើរ​លើ​រថភ្លើង​នោះ​ផងដែរ។

កាល​ពី​ឆ្នាំ​មុន ​លោកនាយករដ្ឋមន្ត្រី​​បាន​ផ្ដល់​កិត្ដិយសដល់​យុវជនរូបនេះ​ និង​សិស្ស ៤ នាក់ផ្សេងទៀត បាន​អង្គុយ​រួមដំណើរ​ និង​ពិសារ​ពោត​ជាមួយ​លោក​នៅ​លើ​រថភ្លើង ចេញ​ដំណើរ​ពី​ភ្នំពេញ ទៅ​កាន់​ខេត្ត​ព្រះសីហនុ។

បើតាម លោក តូម៉ា​ លោកនាយករដ្ឋមន្ត្រី​​ធ្លាប់បាន​ឆ្លើយតប​​ ឲ្យ​ពួកគេ ​(សិស្ស​ក្រី​ក្រ) ​ដាក់​លិខិត​ម្នាក់​មួយ​ៗ ដោយ​ខ្លួន​ឯង​ ដើម្បី​ស្នើសុំ​អាហារូបករណ៍ហ្នឹង ប៉ុន្ដែ​ រូបគេ ដែល​ជា​អ្នក​ជួយ សិស្ស​ទាំង ៤​នាក់​នោះ មិន​ដឹង​​មាន​ដំណើរ​ការ​យ៉ាង​ម៉េច​ដែរ ព្រោះរូបគេមិន​​មិន​​សួរ​រឿង​ផ្ទៃ​ក្នុង​របស់​គេទេ។

យុវជនរូបនេះនិយាយ​​ថា «ក្មេង​ៗ​បាន​ដាក់​លិខិត​ដោយ​ខ្លួន​ឯង​ទៅ​ជាច្រើន​ដង​មក​ហើយ នៅ​ទី​ស្ដី​ការ​គណៈ​រដ្ឋ​​មន្រ្ដី នៅ​ក្រសួង​ និង​នៅ​តាម​សាកលវិទ្យា​ល័យ​ តែ​ខ្ញុំ​មិន​ដឹង​ថា​​ លិខិត​នោះ​បាន​ទៅ​ដល់​ត្រឹម​ណាទេ»។

យុវជន​រូប​នេះ ក៏​បានសរសេរ លើ​ហ្វេស​ប៊ុក​​ខ្លួនដែរ​​ថា ​« ឱ! វិមាន​សន្តិ​ភាព​អើយ​ម្តេច​ខ្ញុំ​ជិះ​កាត់​អ្នក​រាល់​ថ្ងៃ​ បែរ​ជា​គ្មាន​វាសនា​ នាំកូនៗ​ឆ្នាំនេះ ជួបសម្តេចទៀត?​ ឬមកពីឋាន:? ដូច​មិន​មែន​ទេ​......​នេះ​មក​ពី​ផ្លូវ​ទៅ​ជួប​សម្តេច​ពិបាក​ជាង​ផ្លូវ​ទៅ​ជួប​ព្រះ​ឥន្ទ្រ​ទេ​ដឹង​? ឬមក​ពី​ខ្ញុំ​ឈ្មោះ​ជួប​សុំ?» ។

សិស្សិក្រីក្រ ទាំង ៤ នាក់នោះ មក​ពី​ខេត្ដ​​សៀមរាប​ បន្ទាយ​មានជ័យ​ និង​បាត់​ដំបង​ បាន​ប្រឡង​ជាប់​ចូល​រៀន​នៅ​សាកល​វិទ្យា​ល័យ​វិទ្យាសាស្រ្ដ​សុខា​ភិបាល ប៉ុន្តែ គ្រួសារ​មិន​មាន​លទ្ធភាព​ឲ្យ​បន្ដ​ការ​សិក្សា​ ដោយសារ អ្នក​ខ្លះជា​កូន​កំព្រា ខ្លះ​ទៀត​ឱពុក​ម្ដាយ​កំពុង​ធ្វើ​ការ​ងារ​ចំណាក​ស្រុក​​នៅ​ប្រទេស​ថៃ និង​ម្នាក់​មាន​ឱពុក​ជា​ជន​ពិការ។

Content image - Phnom Penh Post
យុវជន ថុល តូម៉ា បង់កក្រម៉ា (កណ្ដាល), យុវតី យឿត សុខា (ឆ្វេង) និងយុវតី សុធាបូរមី (ស្ដាំ) ចូលរួម​ក្នុងពីធីសប្បុរសធម៌មួយនៅសាលាភូមិន្ទភ្នំពេញកាលពីឆ្នាំមុន។ រូបថត សហការី

តូម៉ា ​​បន្តថា ​«បើ​និយាយ​ដល់​ត្រឹម​នេះ​ ខ្ញុំមាន​អារម្មណ៍​កំសត់​ខ្លួន​ទៅវិញ​ ព្រោះ​ខ្ញុំ​មិន​ដែល​បាន​សុំ​សម្រាប់​ខ្លួន​ឯង​ម្តង​ណាទេ​ ឬ​ដើម្បី​ប្រយោជន៍​ខ្លូន​ឯង​ម្តង​ណា​ឡើយ។ ខ្ញុំ​សុខ​ចិត្ត​មុខ​ក្រាស់​មិន​ត្រឡប់​ទៅ​តាម​ការកោះ​ហៅ​របស់​សាកល​វិទ្យា​ល័យ​នៅ​ស្វីស​ជា​ច្រើន​លើក​ច្រើន​សារ​ រយៈ​ពេល​ជាង ​២ ឆ្នាំ​ រហូត​ គេទ្រាំ​លែង​បាន​ ក៏បញ្ជូន​ខ្ញុំ​ទៅ​នេ​ប៉ាល់​វិញ»។

យុវតី យឿត សុខា សិស្ស​ក្រី​ក្រ​បញ្ចប់​បាក់​ឌុប​នៅ​វិទ្យាល័យ​១០មករា នៃ​ខេត្ដ​សៀម​រាប និង​ឪពុកម្ដាយ​កំពុង​ធ្វើ​ការ​ចំណាកស្រុក ធ្វើ​កម្មករ​នៅ​ប្រទេស​ថៃ បាន​និយាយ​ថា នាង​មាន​ក្ដី​សុបិន​ក្នុង​ចិត្ដចង់​បន្ដ​ការ​សិក្សា​ជំនាញពេទ្យ តែ​គ្រួសារ​មិន​មាន​លទ្ធភាព​អាច​ឲ្យ​នាង​ប​ន្ដ​ការ​សិក្សា​បាន​ទេ បើ​នាង​មិន​ទទួល​បាន​អាហា​រូប​ករណ៍​ នាង​នឹង​ត្រលប់​ទៅ​ខេត្ដ​សៀម​រាប​វិញ រកការ​ងារ​ធ្វើ​នៅ​ទីនោះ​ ដើម្បី​ជួយ​ផ្គត់​ផ្គង់​ជីវភាព​គ្រួសារ​ ។

សុខា បន្ដថា «ខ្ញុំ​មាន​បងប្អូន​ ៥ នាក់ ហើយ​ខ្ញុំ​ជាកូន​បង ខ្ញុំ​បាន​ប្រឡង​ជាប់​ចូល​រៀន​នៅ​សាលា​ពេទ្យ និង​បាន​ចូលរៀនដោយ​សូម​ពន្យា​ពេល​ការ​បង់​ថ្លៃ​សិក្សា​មួយ​ឆមាស បើ​ខ្ញុំ​មិន​ទទួល​បាន​អាហារូបករណ៍ទេ ខ្ញុំ​ត្រូវ​ត្រលប់​​ទៅ​ខេត្ដ​សៀមរាប​វិញ​ រកការ​ងារ​ធ្វើ ជួយ​ផ្គត់​ផ្គង់​គ្រួសារ និង​ប្អូន​ៗ​ដែល​កំពុង​រៀន​» ។

យុវតី ​សុធា ​ច័ន្ទបូរមី ​កំព្រាម្ដាយ​តាំង​ពី​ក្មេង ឪពុក​មាន​ប្រពន្ធចុង និង​កំពុង​រស់​នៅ​ពីរ​នាក់​ប្អូន​ប្រុស​ជា​មួយ​យាយ​តា មាន​អាយុ​ជាង ៦០ឆ្នាំ​នៅ​ខេត្ដ​សៀម​រាប​ដែរ​នោះ បាន​ឲ្យ​ដឹង​ថា ​«តាំង​ពី​ខ្ញុំ​ប្រឡងជាប់​បាក់​ឌុប​ដំបូង ​ខ្ញុំ​បាន​សរសេរ​លិខិត​ ស្នើសុំ​អាហា​រូបករណ៍​ ដាក់​ផ្ញើជូន​ទៅ​សម្ដេច​រួចទៅ​ហើយ ​ប៉ុន្ដែ​សាលា​ពេទ្យ ​គេ​ប្រាប់​ថា ​មិន​មាន​អាហា​រូបករណ៍​ទេ ​តែ​ព្រោះ​ខ្ញុំ​ចង់​រៀន​ពេទ្យ​ ខ្ញុំ​ក៏​បាន​ដាក់​លិខិត​ទៅ​សម្ដេច​ទៀត»​ ។

យុវតី​រូបនេះ​បន្ដ​ថា ​«តាំង​ពី​ប្រឡង​ជាប់ ​នៅ​សាលា​ពេទ្យ ​ពួកខ្ញុំ​បាន​ចូល​រៀន​នៅ​សាលា​ពេទ្យ​តាំង​ពី​ខែ​មក​រា​មក​ មក​ទល់​ពេល​នេះ​បាន​ជាង​ពីរ​ខែហើយ ​ប៉ុន្ដែ​ពួកខ្ញុំ​ខុស​គេ ​ព្រោះ​មិន​បាន​បង់​លុយ​ ចូលរៀន​ដោយ​មិន​មាន​កាត​សិស្ស​ពាក់​ទេ ​ហើយ​ដល់​ពេល​ប្រឡង​ឆមាស​ បើ​នៅ​តែ​មិន​បង់​លុយ​គេ​មិន​ឲ្យ​ពួកខ្ញុំ​ប្រឡង​ទេ​» ៕

LIFT សូមកែតម្រូវ ដែលថា សិស្ស​ក្រី​ក្រ​ ​៤ នាក់​​ដែល​បាន​ជួប​លោក​នាយក​រដ្ឋ​មន្ត្រី ហ៊ុន សែន ពេល​ជិះរ​ថភ្លើង កាល​ពី​ឆ្នាំ​មុន មកជា សិស្ស​ក្រី​ក្រ​ ​៤ នាក់​​ បាន​អំពាវនាវ​ដល់​លោកនាយករដ្ឋមន្ត្រី ហ៊ុន សែន

អត្ថបទគួរចាប់អារម្មណ៍