The Phnom Penh Post Search

Search form




Logo of Phnom Penh Post newspaper Phnom Penh Post - សិស្ស-និស្សិត​ជាង ​២០០០ នាក់​ចូល​រួម​កម្មវិធី​បោះ​ជំរុំ​ពិភព​លោក

សិស្ស-និស្សិត​ជាង ​២០០០ នាក់​ចូល​រួម​កម្មវិធី​បោះ​ជំរុំ​ពិភព​លោក

Content image - Phnom Penh Post

សិស្ស-និស្សិត​ជាង ​២០០០ នាក់​ចូល​រួម​កម្មវិធី​បោះ​ជំរុំ​ពិភព​លោក

ភ្នំពេញៈ សិស្ស​-និស្សិត​ ប្រមាណ​ជាង​ ២ ០០០ នាក់​ មាន​ទាំង​និស្សិត​ខ្មែរ​ និង​បរទេស បាន​មក​ចូល​រួម​ក្នុង​​ព្រឹត្ដិការណ៍​ បោះ​ជំរុំ​អន្ដរជាតិ​ នៅ​វិទ្យាស្ថាន​បច្ចេក​វិទ្យា​កម្ពុជា​ ដែល​បាន​រៀប​ចំ​ដោយ អង្គការ​សម្ព័ន្ធ​យុវជន​អន្ដជាតិ (International Youth Folloship) ចាប់ពី​ថ្ងៃ​ទី ២៤-២៧​ ខែ​ មករា ឆ្នាំ​ ២០១៦ នេះ។​

គោល​បំណង​នៃ​កម្មវិធី​នេះ​​ គឺ​ដើម្បី​ផ្ដល់​នូវ​ចំណេះ​ដឹង និង​បទ​ពិសោធន៍​ ជាច្រើន​ពី​សិស្ស-និស្សិត​ វាគ្មិន​មក​ពី​ប្រទេស​ផ្សេងៗ​ក្នុង​ការ​រួម​ចំណែក​ចែក​រំលែក​ចំណេះ​ដឹង វប្បធម៌​ និង​ការ​បើក​​ចិត្ដ​ទូលាយ​ ​ផ្លាស់​ប្ដូរ​ផ្នត់​គំនិត​ ដើម្បី​ឲ្យ​យុវជន​​ក្លាយ​ជា​អ្នក​ដឹង​នាំ​ល្អ​មួយ​រូប​នៅ​ក្នុង​សង្គម។

លោក អ៊ី សេងលី អនុប្រធាន​អង្គការ​សម្ព័ន្ធ​យុវជន​អន្ដរជាតិ (IYF) បាន​ប្រាប់​ LIFT ថា៖ «ក្នុង​កម្ម​វិធី​បោះ​ជំរុំ​នេះ​យើង​បាន​ផ្ដោត​សំខាន់​ទៅ​លើ​ការ​អប់​រំ​ ជាពិសេស​ការ​អប់រំ​​ផ្នែក​ស្មារតី និង​ចិត្ដ​គំនិត​​ដល់ យុវជន​ និង​​សិស្សា​នុសិស្ស​ដែល​បាន​ចូល​រួម​ក្នុង​កម្ម​វិធី​នេះ»។

លោក​បន្ដ​ថា ការ​បោះ​ជំរុំ​រយៈពេល​ ៤ ថ្ងៃ​នេះ​ សិស្ស​ និស្សិត និង​ចាប់​ផ្ដើម​ធ្វើ​សកម្មភាព​ចាប់​​ពី​ម៉ោង​ ៧ ព្រឹក ដល់​ម៉ោង​ ៦ ល្ងាច​ ដោយ​ធ្វើ​សកម្ម​ភាព​សំខាន់​ទៅ​លើ​ការ​អប់​រំផ្នែក​ចិត្ដគំនិត​​ ដោយ​​យើង​បាន​អញ្ចើញ​វាគ្មិន​​មក​ចែក​រំលែកអំពី​បទ​ពិសោធន៍ និង​ការ​ដឹក​នាំ​ ដើម្បី​ឲ្យ​សិស្ស​ និស្សិត​ អាច​ក្លាយ​ខ្លួន​ជា​អ្នក​ដឹក​នាំ​ល្អ​ទៅ​ថ្ងៃ​អនាគត។

ការ​បោះ​ជំរុំ​នេះ​ក៏មាន​កម្មវិធី​ជំនាញ​វគ្គខ្លី​ទៅ​តាម​ជំនាញ​របស់​សិស្ស​ និស្សិត​ ដែល​ពួក​គាត់​អាច​ជ្រើស​រើស​ទៅ​តាម​ចំណូល​ចិត្ដ​របស់​ពួក​គាត់​ ក្រៅ​ពី​នេះ​យើង​ក៏​មាន​ការ​ប្រកួត​ប្រជែង​ លេងហ្គេម ការ​ប្រកួត​ជាក្រុម​​ និង​កម្មវិធី​ផ្សេង​ៗ​​ជាច្រើន​ទៀត​។

លោក​បាន​ឲ្យ​ដឹង​ថា ក្រៅ​ពី​មាន​កម្ម​វិធី​បោះ​ជំរុំ​នៅ​​ក្នុង​ប្រទេស​កម្ពុជា ​ យុវជន​ក៏​អាច​មាន​ឱកាស​ទៅ​ចូល​រួម​កម្ម​វិធី​បោះ​ជុំ​នៅ​ក្រៅ​ប្រទេស​ ទូទាំង​ពិភព​លោក ដែល​សព្វ​ថ្ងៃ​នេះ​ អង្គការ​សម្ព័ន្ធ​យុវជន​អន្ដជាតិ​មាន​សាខា​ ៨០ ​ប្រទេស​ទូទាំង​ពិភព​លោក​​ដែល​យុវជន​អាច​ចូល​រួម​បាន​។ ​

ដោយ​ទទួល​បាន​ការ​សហការ​​ពី​ក្រសួង​អប់រំ​យុវជន​ និង​កីឡា អង្គការ​សម្ព័ន្ធ​យុវជន​អន្ដ​ជាតិ​ បានប្ដេជ្ញា​​ខិត​ខំ​ប្រឹង​ធ្វើ​សកម្មភាព​បោះ​ជំរុំ​ដល់​យុវជន​ឲ្យ​បាន​ច្រើន​ថែម​ទៀត​ទៅ​ថ្ងៃ​អនាគត។

អង្គការ​សម្ព័ន្ធ​យុវជន​អន្ដរជាតិ​ ក៏​សង្ឃឹមដែរ​ថា​ បន្ទាប់​ពី​បញ្ចប់​កម្ម​វិធីនេះ​ យុវជន​នឹង​ទទួល​បាន​ការ​រីក​ចម្រើន​ នូវ​​ចំណេះ​ដឹងនៃ​ការ​អប់រំ​ស្មារតី​ និង​ចិត្ដ​គំនិត​ ដោយ​​ត្រឹម​ត្រូវ។​

គួរ​បញ្ជាក់​ថា អង្គការ​សម្ព័ន្ធ​យុវជន​អន្ដជាតិ គឺ​ជា​អង្គការ​ក្រៅរដ្ឋាភិបាល​ ដែល​ធ្វើ​ការ​មិន​សំដៅ​យក​ប្រាក់​ចំណេញ​ ដោយ​មាន​ទី​ស្នាក់​ការ​ធំ​នៅ​សាធារណរដ្ឋ​កូរ៉េ និង​មាន​សាខា​នៅ ​៨០ ​ប្រទេស​ ជុំ​វិញ​ភិភពលោក និង​បាន​បង្កើត​ឡើង​ក្នុង​គោល​បំណង​អភិវឌ្ឍន៍​យុវជន​ឲ្យ​ក្លាយ​ជា​អ្នក​ដឹក​នាំនៅ​ថ្ងៃ​អនាគត​។

World Camp បាន​ចាប់​បដិសន្ធិ​នៅ​សាធារណរដ្ឋកូរ៉េ នៅ​ឆ្នាំ ១៩៩៥។ ជារៀង​រាល់​ឆ្នាំ បាន​ដំពើរការ​នៅ​ ៥០​ ប្រទេស​ជុំ​វិញ​ពិភពលោក ដោយ​មាន​យុវជន​រាប់​​ពាន់​នាក់​បាន​ចូល​រួម​ ដែល​ក្នុង​នោះ​ប្រទេស​កម្ពុជា​ មាន​យុវជន​ និង​ សិស្ស​ និស្សិត​បាន​ចូល​រួម​ជាច្រើន​ផង​ដែរ​៕

អត្ថបទគួរចាប់អារម្មណ៍