The Phnom Penh Post Search

Search form




Logo of Phnom Penh Post newspaper Phnom Penh Post - សួររឿង​បុណ្យ​ជាតិ​យុវជន​​មួយ​ចំនួន​មិន​សូវ​ដឹង​ បុណ្យ​អន្ដរជាតិ​មិន​ទាន់​ដល់​ថ្ងៃ​ ត្រៀម​ខ្លួន​រួច​ស្រេច​

សួររឿង​បុណ្យ​ជាតិ​យុវជន​​មួយ​ចំនួន​មិន​សូវ​ដឹង​ បុណ្យ​អន្ដរជាតិ​មិន​ទាន់​ដល់​ថ្ងៃ​ ត្រៀម​ខ្លួន​រួច​ស្រេច​

Content image - Phnom Penh Post
ព្រះសង្ឃ​ និង​ពុទ្ធបរិស័ទ​ដង្ហែ​ក្បួន​បុណ្យ​មាឃ​បូជា​តាម​ផ្លូវ​មាត់​ទន្លេ​ក្នុង​រាជធានី​​ព្រឹកមិញ។ ផា លីណា

សួររឿង​បុណ្យ​ជាតិ​យុវជន​​មួយ​ចំនួន​មិន​សូវ​ដឹង​ បុណ្យ​អន្ដរជាតិ​មិន​ទាន់​ដល់​ថ្ងៃ​ ត្រៀម​ខ្លួន​រួច​ស្រេច​

ភ្នំពេញៈ ព្រះ​ពុទ្ធ​សាសនា​ត្រូវ​បាន​ចាត់​ទុក​ជា​សាសនា​របស់​​រដ្ឋ ប្រជាជន​កម្ពុជា​ប្រមាណ​​ ៩០ ភាគរយ​​ គឺ​ជា​អ្នក​កាន់​ព្រះ​ពុទ្ធ​សាសនា។​ ស្រប​ពេល​បុណ្យ​សាសនា ឬ​ បុណ្យ​ប្រពៃ​ណី​ជាតិ​ក្នុង​ ១ ឆ្នាំ​ៗ ​​គេ​សង្កេត​ឃើញ​ថា មិន​សូវ​មាន​យុវជន​ចាប់​រម្មណ៍​ មិន​យល់​ពី​អត្ថន័យ ​នៃ​បុណ្យ​ជាតិ​របស់​ខ្លួន​ ប៉ុន្ដែ ​បើ​​បុណ្យ​អន្ដរជាតិ​​វិញ​ ​យុវជន​មួយ​ចំនួន ជាពិសេសនៅក្នុងរាជធានីភ្នំពេញ ​​នាំគ្នា​​កើន​បក្ស​ពួក​ដើម្បី​ប្រារព្ធ​បុណ្យ​ទាំង​នោះ​។

ព្រះ​តេជគុណ កុច សារ៉ាត់ ចៅ​អធិការ​វត្ដ​ ឬស្សីជ្រោយ នៅ​ក្នុង​ស្រុក​ស្អាង ខេត្ដ កណ្ដាល បាន​ឲ្យ​ដឹង​ថា៖ «ថ្ងៃ​បុណ្យ​មាឃ​បូជា​នេះ​ត្រូវ​នឹង​ថ្ងៃ​ឧបោសថសីល ដូច្នេះ​មាន​បរិស័ទ​ មក​ចូល​រួម​ សមាទាន​សីល និង​ធ្វើ​បុណ្យ​បាន​ច្រើន​ជាង​ថ្ងៃ​សីល​ធម្មតា។ ប៉ុន្ដែ​ចំពោះ​យុវជន និង​សិស្សានុសិស្ស​វិញ កម្រ​មាន​មក​ចូល​រួម​បុណ្យ​​សាសនា​ ដូច​មាឃ​បូជា​​នេះ​ណាស់ ដូច​នៅ​វត្ដ​អាត្មា​ថ្ងៃ​នេះផ្ទាល់​ មាន​តែ​ចាស់ៗ​អញ្ចើញ​មក​ ក្មេង​ៗ​មិន​មាន​សោះ​តែ​ម្ដង​»។

ព្រះ​តេជគុណ​បន្ដ​ថា​ «អាត្មា​មិន​ដឹង​ថា មក​ពី​មូលោ​ហេតុ​អ្វី​ដែរ បាន​ជា​​យុវជន​ ​មិន​សូវ​ចាប់​អារម្មណ៍ ចង់​ដឹង​ពី​បុណ្យ​​សាសនា​ខ្លួន​ដូច្នេះ។ ប្រហែល​ជា​ពួក​គាត់​មិន​សូវ​យល់​ពី​បុណ្យ​នេះ​ទេ​មើល​ទៅ។ ប៉ុន្ដែ​អាត្មា​សង្កេត​ឃើញ​ថា ចំពោះ​បុណ្យ​អន្ដរជាតិ​ មិន​ទាន់​ដល់​ថ្ងៃ​ផង​​ យុវជន​ត្រៀម​ខ្លួន នាំ​គ្នា​និយាយ​ត​ៗ​គ្នា​ជា​ស្រេច»។

ថ្ងៃទី ២២ ខែ កុម្ភៈ ឆ្នាំ​នេះ​ គឺ​ត្រូវ​នឹង​ថ្ងៃ បុណ្យ មាឃបូជា ដែល​បុណ្យ​មាឃ​បូជា​ប្រារព្ធ​ឡើង​ ដើម្បី​រំលឹក​ដល់​ថៃ្ង​ដែល​ ព្រះ​សម្មា​សម្ពុទ្ធ​ទ្រង់​ប្រកាស​បង្កើត​ ព្រះពុទ្ធ​សាសនា​ឡើង​ក្នុង​លោក​ នា​ប្រទេស​ឥណ្ឌា កាល​ពី ៥៨៨​ ឆ្នាំ​ មុន​គ្រិស្ត​សករាជ​ នាថៃ្ងទី​ ១៥ កើត​ ខែ​មាឃ​ ក្រោយ​​ពីការ​ត្រាស់​ដឹង​របស់​ព្រះ​អង្គ​ចំនួន​ ៩ ខែ​គត់។

យុវ​និស្សិត រ៉ា ហង្សគ្រី និស្សិ​ផ្នែក​ភាសា​អង់គ្លេស​ នៅ​សាកល​វិទ្យាល័យ​ជាតិគ្រប់​គ្រង​ និង​ជា​យុវជន​ម្នាក់ ក្នុង​ចំណោម​យុវជន​ជាង ១០​នាក់ ដែល LIFT បាន​ធ្វើ​ការ​សាកសួរ​អំពី បុណ្យ មាឃបូជានេះ ​បាន​ប្រាប់​​និយាយ​ស្រដៀង​គ្នា​​​ថា៖ «ខ្ញុំ​មិន​ដឹង​ថា បុណ្យ​មាឃ​បូជា​ ​គេ​ធ្វើ​ដើម្បី​អ្វី​ទេ គ្រាន់​តែ​ដឹង​ថា​ជា​បុណ្យ​ធំមួយ​សម្រាប់​សាសនា​ព្រះ​ពុទ្ធ ហើយ​ខ្ញុំ​ក៏​មិន​ដែល​បាន​ចូល​រួម​កម្ម​វិធី​បុណ្យ​នេះ​ដែរ​តាំង​មុន​មក​ ព្រោះ​ខ្ញុំ​យល់​ថា បុណ្យ​នេះ​ក្មេងៗ​មិន​ដឹង​ទៅ​ចូល​រួម​ធ្វើ​អ្វី​»។

គោល​បំណង​របស់​ព្រះ​ពុទ្ធ​សាសនា​ គឺ​ការ​បង្កើត​ឡើង​នូវ ​សន្តិភាព​ ក្នុង​ដួង​ចិត្ត​នេះ​ដែរ​ ក៏​ជា​មូល​ដ្ឋាន​គ្រឹះ​នៃ ​សន្តិភាព​ក្នុង​សង្គម​ ដែល​ខ្លួន​រស់​នៅ​ផង។​ ការ​កាន់​ព្រះ​ពុទ្ធ​សាសនា​ គឺ​ជា​ការ​ប្រឹង​ប្រែង​ ដើម្បី​បង្កើត​សន្តិ​ភាព​ដល់​ខ្លួន​ និង​ចូល​រួម​ចំណែក​ដល់​ សន្តិ​ភាព​សង្គម​ និង​ពិភព​លោក​ នេះ​ជាកា​តព្វ​កិច្ច​ ដែល​ពុទ្ធ​សាស​និក​ម្នាក់ៗ​ ត្រូវ​ប្រឹង​ប្រែង​ ធ្វើ​ឲ្យ​​សម្រេច​៕

អត្ថបទគួរចាប់អារម្មណ៍