The Phnom Penh Post Search

Search form




Logo of Phnom Penh Post newspaper Phnom Penh Post - អង្គការ​ភ្លែន​អន្តរ​ជាតិ៖ ​ជំនាញ​១២ ​មាន​តម្រូវការ​ការងារ​ខ្លាំង​នៅ​ខេត្ត​សៀមរាប

អង្គការ​ភ្លែន​អន្តរ​ជាតិ៖ ​ជំនាញ​១២ ​មាន​តម្រូវការ​ការងារ​ខ្លាំង​នៅ​ខេត្ត​សៀមរាប

Content image - Phnom Penh Post
លោក យី គឹមថាន ថ្លែង​ក្នុង​​ពិធី​បញ្ចប់​គម្រោង​​ដោយ​រយៈ​ពេល ៤ ឆ្នាំ​«វគ្គ​​បណ្តុះ​បណ្តាល​វិជ្ជា​ជីវៈដល់​យុវជន យុវនារី​ងាយ​រង​គ្រោះ​​នៅ​កម្ពុជា »។ រូបថត វ៉ន ដារ៉ា

អង្គការ​ភ្លែន​អន្តរ​ជាតិ៖ ​ជំនាញ​១២ ​មាន​តម្រូវការ​ការងារ​ខ្លាំង​នៅ​ខេត្ត​សៀមរាប

សៀមរាប​: យោង​តាម​ការស្រាវជ្រាវ​របស់​អង្គការ​ភ្លែ​ន​អន្តរជាតិ​កម្ពុជា បាន​រកឃើញ​ថា ជំនាញ​ចំនួន​១២​ កំពុង​មាន​តម្រូវ​ការ​ការងារ​ខ្លាំង​នៅ​ក្នុង​ខេត្ដ​ទេសច​រណ៍​វប្បធម៌​ធម្មជាតិ​មួយ​នេះ​។

ការស្រាវ​ជ្រាវ​នេះ បាន​ធ្វើ​ផ្តោត​លើ​ស្រុក​ចំនួន ៤ ក្នុង​ខេត្ត សៀមរាប​នេះ មាន​ស្រុក​ អង្គរធំ  អង្គរជុំ  បន្ទាយ​ស្រី  និង ​ស្រុក​ស្រីស្នំ ​។

លោក យី គឹម​ថា​ន ប្រធាន​គ្រប់គ្រង​កម្មវិធី​ថ្នាក់ជាតិ​របស់​អង្គការ​ភ្លែ​ន​អន្តរជាតិ បាន​ថ្លែង​នៅ​ក្នុង​កម្មវិធី​«បញ្ចប់​គម្រោង​បណ្តុះ​បណ្តាល​ជំនាញ​វិជ្ជាជីវៈ​ដល់​យុវជន​ងាយ​រងគ្រោះ» កាល​ពី​ថ្ងៃទី​២៣ ខែមិថុនា​ថា ជំនាញ ចំនួន​ ១២ ដែល​ឆ្លើយតប​នឹង​តម្រូវ​ការងារ​ រួម​មាន​ ជាង​ជួសជុល​ម៉ាស៊ីន​ធុន​តូច ជួសជុល​ម៉ូតូ ជួសជុល​ទូរស័ព្ទ ជួស​ជុល​ម៉ាញេ វិទ្យុ និង​ទូរទស្សន៍ ជំនាញ​ជួសជុល​កុំព្យូទ័រ ចុងភៅ កាត់ដេរ​សំលៀក​បំពាក់ សំអាងការ ជាង​សំណង់ ជាង​ទឹក-ភ្លើង​(​អគ្គិសនី​) ការចិញ្ចឹម​សត្វ និង​ដាំ​បន្លែ និង​ ជាង​ជួសជុល​ម៉ាស៊ីន​ត្រជាក់ ​។ 

តាម​រយៈ​គម្រោង​បណ្តុះបណ្តាល​ជំនាញ​វិជ្ជាជីវៈ​ ដល់​យុវជន​ងាយ​រងគ្រោះ អង្គការ​ភ្លែន​អន្តរជាតិ​កម្ពុជា បាន​ជួយ​បណ្តុះ​បណ្តាល​ជំនាញ​វិជ្ជាជីវៈ ​ដល់​យុវជន​ងាយ​រងគ្រោះ ជាង ២​ពាន់នាក់​ មាន​យុវជន​ យុវតី ដែល​បោះ​បង់​ចោល​ការ​សិក្សា និង​ជនពិការ​ជាដើម​ ដើម្បី​​ផ្តល់​ជំនាញ​វិជ្ជាជីវៈ​សម​ស្របណា​មួយ​ទៅ​ឲ្យ​ពួកគេ​តម្រូវ​តាម​ទីផ្សារ​ការងារ​ក្នុង​តំបន់។

លោក គឹមថាន​ បានបញ្ជាក់​ថា ​មុន​ផ្តល់​ជំនាញ​ដល់​ពួកគេ អង្គការ​ភ្លែ​ន​អន្តរជាតិ​កម្ពុជា បានចុះ​ធ្វើ​ការ​ស្រាវជ្រាវ​បែប​វិទ្យា​សាស្ត្រ​ ចំពោះ​ទីផ្សារ​ការងារ​នៅ​ខេត្តសៀមរាប​ក៏ដូច​ជា​ខេត្ដ​គោល​ដៅ​ផ្សេង​ទៀត ដើម្បី​ចៀសវាង​ការ​បណ្តុះ​បណ្តាល​ខុស​ជំនាញ នាំ​ឲ្យ​ពេល​បញ្ចប់​វគ្គ​ បែរ​ជាគ្មាន​ការងារ​ធ្វើទៅ​វិញ​។

លោក​បន្ដថា​«យើ​ង​មាន​បទ​ពិសោធន៍ ​ចំពោះ​ការ​ការបណ្តុះ​បណ្តាល នា​ពេល​កន្លង​មក​ ក្រោយ​ពេល​បញ្ចប់​​វគ្គ ពួក​គាត់ (យុវជន​ងាយ​រងគ្រោះ​) ​រក​ការងារ​ធ្វើ​មិនបាន ព្រោះ​ការបណ្តុះ​បណ្តាល​នោះ មិនបាន​ឆ្លើយ​តប​តាម​តម្រូវ​ការ​ទីផ្សារ»​។

ចំពោះ​គម្រោងយៈពេល​៤ឆ្នាំ​ (២០១៣-២០១៧) នៅ​តាម​បណ្ដា​ខេត្ដ​ចំនួន៤មាន​សៀមរាប កំពង់ចាម ត្បូងឃ្មុំ និង​រតនៈគីរី ​ក្រោយ​បញ្ចប់​វគ្គ​បណ្តុះ​បណ្តាលរ​យៈ​ពេល ​៤-៦​ខែ យុវជន​ប្រមាណ​ជាង​៧០​ភាគរយ ទទួលបាន​ការ​ងារ​​ធ្វើ ក្នុងនោះ​ខេត្តសៀមរាប ទទួលបាន​ការងារ​ច្រើន​ជាង​គេ ​៕

អត្ថបទគួរចាប់អារម្មណ៍