ភ្នំពេញៈ ខណៈបច្ចុប្បន្ននៅកម្ពុជា ក្នុងមួយថ្ងៃនៅមានមនុស្សលើសពី ២នាក់ បានឆ្លងមេរោគអេដស៍នៅឡើយ ទិវាស្រោមអនាម័យអន្ដរជាតិ ម្សិលមិញ អង្គការថែទំាសុខភាពអ្នកជំងឺអេដស៍ (AHF) បានធ្វើសកម្មភាព ដាស់តឿនដល់យុវជន និងសាធារណៈជនទូទៅ ក្នុងការបង្ការ ជំងឺអេដស៍ និងកាមរោគ តាមរយៈ ការចែកស្រោមអនាម័យដោយមិនគិតថ្លៃ ការធ្វើតេស្ដឈាមរកមេរោគអេដស៍ និងការផ្សព្វផ្សាយអំពីការបង្ការ ការចម្លងមេរោគអេដស៍ កាមរោគ និងការរួមភេទដោយសុវត្ថិភាព។
លោក វេច្ជបណ្ឌិត តែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ បានឲ្យដឹងថា «សព្វថ្ងៃនេះទោះបីជា បញ្ហាមេរោគអេដស៍នៅក្នុងប្រទេសកម្ពុជាមានភាពស្ងប់ស្ងាត់ខ្លះ ប៉ុន្ដែមិនមែនមានន័យថា អេដស៍បានឈប់ចម្លងមេរោគអេដស៍មកលើប្រជាជនកម្ពុជានោះទេ»។
របាយការណ៍ក្នុងឆ្នាំ ២០១៥ ១ថ្ងៃ មានមនុស្សលើសពី ២នាក់ នៅក្នុងប្រទេសកម្ពុជា និងជាង ១ លាននាក់ នៅលើពិភពលោក កំពុងឆ្លងមេរោគអេដស៍។
ទិវាស្រោមអនាម័យអន្ដរជាតិឆ្នាំ២០១៦នេះដែរ អង្ការ AHF បានប្រកាសពាក្យស្លោកមួយឃ្លាថា “ Wrap Your Love ” មានន័យថា ស្រោមអនាម័យ ជួយជីវិតអ្នក និងមនុស្សជាទីស្រលាញរបស់អ្នក ។
ខណៈក្នុងប្រទេសកម្ពុជា មានយុវវ័យ និងសាធារណៈជនរាប់ពាន់នាក់បានចូលរួមក្នុងទិវានេះ នៅកោះពេជ្យ លោក វេជ្ជបណ្ឌិត ស្រី វ៉ាន់ធួន ប្រធានអង្គការ AHF ប្រចាំកម្ពុជានិយាយថា «ទិវានេះ មិនមែនមានន័យថា ជាការលើកទឹកចិត្ដដល់យុវវ័យក្នុងការរួមភេទនោះ ប៉ុន្ដែគឺជាការផ្សព្វផ្សាយការអប់រំ នៃការប្រើប្រាស់ស្រោមអនាម័យ និងការឆ្លងមេរោគអេដស៍ រួមជាមួយការជួសឈាមស្វែងរកមេរោគអេដស៍ដោយមិនគិតថ្លៃដល់សាធាជនទូទៅ»។
លោក បន្ដថា «ក្ដីបារម្ភធំបំផុតរបស់យើង នៅជុំវិញពិភពលោក គឺខ្លាចការគាំទ្រ និងការយល់ដឹងដែលថា ការប្រើប្រាស់ស្រោមអនាម័យអាចសង្គ្រោះជីវិតមានការធ្លាក់ចុះ»។
លោក បន្ថែមថា អង្គការ AHF មានមោទនភាពណាស់ ដែលកាលពីឆ្នាំ ១៩៩៣ ប្រទេសកម្ពុជាមានអត្រាអ្នកឆ្លងមេរោគអេដស៍ ចំពោះប្រជាជន ចាប់ពី អាយុ ១៥ ទៅ ៤៨ឆ្នាំ មានដល់ ២.៧ ភាគរយ ប៉ុន្ដែរហូតមកដល់ឆ្នាំ ២០១៥នេះ អត្រាអ្នកឆ្លងមេរោគអេដស៍សល់ត្រឹម ០.៦ភាគរយប៉ុណ្ណោះ។ ហើយ AHF និងខិតខំធ្វើឲ្យអត្រានេះកាន់តែប្រសើរជាងនេះទៀតទៅថ្ងៃអនាគត៕
