The Phnom Penh Post Search

Search form




Logo of Phnom Penh Post newspaper Phnom Penh Post - ៦ នាក់​ជាប់​ពាន​រង្វាន់​ការ​ប្រកួត​ស្នាដៃ​ថតរូប​យុវជន សហភាព​អឺរ៉ុប-អាស៊ាន

៦ នាក់​ជាប់​ពាន​រង្វាន់​ការ​ប្រកួត​ស្នាដៃ​ថតរូប​យុវជន សហភាព​អឺរ៉ុប-អាស៊ាន

Content image - Phnom Penh Post
ក្រុម​យុវជន​ជយលាភីកម្ពុជា ទទួល​រង្វាន់​ពី​លោក ចច អេដហ្គា​ឯកអគ្គរដ្ឋទូតសហភាពអឺរ៉ុបប្រចាំកម្ពុជា នាព្រឹក​មិញ​នេះ។ រូបថត សហការី

៦ នាក់​ជាប់​ពាន​រង្វាន់​ការ​ប្រកួត​ស្នាដៃ​ថតរូប​យុវជន សហភាព​អឺរ៉ុប-អាស៊ាន

ភ្នំពេញៈ អ្នក​ចូល​រួម​ប្រកួត​ ៦ នាក់​មក​ពី​សាលា​រៀន និង​ស្ថាប័ន​ផ្សេង​ៗ​នៅ​កម្ពុជា បាន​ជាប់ពាន​រង្វាន់​ ​ក្នុង​ការ​ប្រកួត​ ស្នា​ដៃ​ថត​រូប​យុវជន​សហ​ភាព​អឺរ៉ុប​-អាស៊ាន​ លើ​ប្រធាន​​បទ​ «ការរួបរួម​នៅក្នុង​ភាព​ចម្រុះ» ដែល​រៀប​ចំ​ដោយ​​ស្ថាន​បេសក​កម្ម​សហ​ភាព​អឺរ៉ុប​ប្រចាំ​អាស៊ាន​ ដើម្បី​​ជា​កិច្ច​​អប​អរ​​ខួប​អនុស្សាវ​រីយ៍​​លើក​ទី ៤០ ​នៃ​ទំនាក់​ទំនង​រវាង​ សហភាព​អឺរ៉ុប​-​អាស៊ាន ។

រូប​ថត​ដ៏ស្រស់​ស្អាត​ជាង ​៧០០ សន្លឹក ត្រូវបាន​បេក្ខជន​វ័យ​ក្មេង​មក​ពីបណ្ដា​ប្រទេស​ជា​សមាជិក​អាស៊ាន​ដាក់​ចូល​រួម​នៅ​ក្នុង​​ការប្រកួត ដែល​បាន​ឆ្លុះ​បញ្ចាំង​ និង​ ពណ៌នា លើ​ប្រធាន​បទស្តីពី​ «ការ​រួបរួម​នៅ​ក្នុង​ភាព​ចម្រុះ» ហើយ​នេះជា​ស្មារតី​រួម​របស់​ប្រជា​ជាតិ​នៃសហ​ភាព​អឺរ៉ុប​ និង​អាស៊ាន ។

លោក អំា ​វ៉ាលីនដា​ បេក្ខជន​ជយ​លាភី​កម្ពុជា ក្នុងការ​ប្រកួត​ស្នាដៃ​រូប​ថតនេះ​បាន​ថ្លែង​ថា រូបថត​ជយលាភី​​ដែល​លោក​ដាក់​ប្រកួត​នេះ បាន​បង្ហាញ​ពី​ក្មេងៗ​មួយ​ក្រុម​កំពុង​ជិះកង់​ធ្វើ​ដំណើរ​តាម​វាល​ស្រែ​ទៅ​ស្វែង​រក​ប្រភព​​ទឹក ដើម្បី​ចាប់​ត្រី​ ឬ​ ក្ដាម​ ខ្យង​ជាដើម យក​មក​ផ្គត់​ផ្គង់​គ្រួសារ​ក្រោយ​ពី​ការ​សិក្សា​។

លោកបន្ដ​ថា «រូបថត​នេះ ខ្ញុំ​ក៏​ចង់​បង្ហាញ​ពី​ការ​រួប​រួម​គ្នា​របស់​ប្រជាជន​ខ្មែរ ទៅ​កាន់​ប្រទេស​អ៊ឺរ៉ុប និង អាស៊ាន ឲ្យ​ដឹង​ថា យើង​បាន​ធ្វើ​អ្វីៗ​រួបរួម​គ្នា​ជាច្រើន ក្នុង​ជីវភាព​រស់​នៅ​រាល់​ថ្ងៃ​នេះ​» ។

Content image - Phnom Penh Post
រូបថត ដែល​បាន​ជាប់​ជយលាភី ។

លោក ​ម៉ៃ​ វិរៈ អ្នក​ថតរូប​អាជីព​ឲ្យ​ស្ថាប័ន​សារព័ត៌មាន​មួយ​នៅ​កម្ពុជា និង​ជា​បេក្ខជន​មួយ​រូប​ដែល​បាន​ជាប់​ពាន​រង្វាន់​ក្នុង​ចំណោម​បេក្ខជន​ ៥ នាក់​ផ្សេង​ទៀត​ បាន​បង្ហាញ​ពី ការ​ផ្ដិត​យក​រូប​រស់​ខ្លួន​ទៅ​ដាក់​ប្រកួត​នេះ​ដែរ​ថា ដោយ​សារ​លោក​ជា​អ្នក​អាជីព​ថត​រូប​ លោក​មាន​រូបថត​ជាច្រើន​ដែល​ត្រូវ​នឹង​ប្រធាន​បទ​នៃ​ការ​ប្រកួត​ ដូច្នេះ​លោក​បាន​ចំណាយ​ពេល​ជិត​ពីរ​សប្ដាហ៍ ​ដើម្បី​ជ្រើស​រើស​រូបថត​មួយ​សន្លឹក​ដាក់​ចូលរួម​ប្រកួត​នេះ។

លោក​និយាយថា «ខ្ញុំបាន​សម្រេច​ចិត្ដ​យក​រូបថត​មួយ​សន្លឹក​ដែល​ខ្ញុំ​បាន​ថត​នៅ​តំបន់​ដាច់​ស្រយាល​មួយ​នៃ​ខេត្ដ​សៀមរាប​ រូបថត​នោះ​បាន​បង្ហាញ​ពី​ក្មេង​ស្រី​មួយ​ក្រុម​កំពុង​ជិះ​កង់​ទៅ​សាលារៀន​ ប៉ុន្ដែ​ក្នុង​រូបថត​នេះ ខ្ញុំ​ចង់​បង្ហាញ​ថា កុមារី​ជាច្រើន​នៅ​ទី​ជនបទ កំពុង​ជួប​ប្រទះ​ ចំពោះ​បញ្ហា​នៃ​ការ​បោះ​បង់​ការ​សិក្សា​ ដែល​មាន​កម្រិត​ខ្ពស់​ជាង​កុមារា នេះ​បើ​តាម​របាយការណ៍​ពី​អង្គការ UNICEF ដែល​ខ្ញុំ​បាន​ដឹង»។

លោក​ ចច អេដហ្គា​ ឯកអគ្គ​រដ្ឋទូត​សហ​ភាព​អឺរ៉ុប​ប្រចាំ​កម្ពុជា​បាន​ថ្លែងថា​ «ខ្ញុំមាន​សេចក្ដី​សោមនស្ស​រីករាយ នៃ​ភាព​ជាដៃ​គូ​សហភាព​អឺរ៉ុប​-អាស៊ាន​ ដែល​​បាន​រួម​ចំណែក​ជំរុញ​កិច្ច​សហ​ប្រតិបត្តិ​ការ​នយោបាយ​ សេដ្ឋកិច្ច​ និង​សង្គម​ដ៏​រឹងមាំ»។

លោក អេដហ្គា បន្ត​ថា «ការងារ​ដែល​ជា​បេស​កកម្ម​របស់​សហ​ភាព​អឺរ៉ុប​ប្រចាំ​អាស៊ាន​ បាន​សម្រេច​ដោយ​ជោគ​ជ័យ​នាពេល​ថ្មីៗ​នេះ ​គឺការ​ដាក់​ចេញ​នូវ​កម្មវិធី​ប្រកប​ដោយ​មហិច្ឆតា​ចំនួន​ពីរ​ដែល​ផ្ដោតទៅ​លើ​គោល​ដៅ​ ការពារ​បរិស្ថាន​ និង​គាំទ្រ​អាស៊ាន​ នៅ​ក្នុង​ការ​ប្រយុទ្ធ​ប្រឆាំង​នឹង​ការ​ប្រែប្រួល​អាកាស​ធាតុ» ។

លោក​បញ្ជាក់​ថា ថ្មីៗនេះ គម្រោងសហ​ភាពអឺរ៉ុប​-អាស៊ាន​ថ្មី​ចំនួន​ពីរ​ស្ដីពី​ការប្រើប្រាស់​តំបន់​វាល​ភក់​និង​ការ​កាត់​បន្ថយ​ផ្សែង​អ័ព្ទ​ប្រកប​ដោយ​និរន្តរ​ភាព ព្រម​ទាំងការ​អភិរក្ស​ជីវចម្រុះ​នៅក្នុង​តំបន់​អាស៊ាន​ត្រូវ​បាន​ចុះ​ហត្ថលេខា​ដោយ​សហភាព​អឺរ៉ុប​និង​អាស៊ាន៕

អត្ថបទគួរចាប់អារម្មណ៍