The Phnom Penh Post Search

Search form




Logo of Phnom Penh Post newspaper Phnom Penh Post - App ស្មាតហ្វូន​ថ្មី​បង្កើត​ ដោយ​យុវជន​ខ្មែរ ប្រាប់​គន្លឹះ​នៃ​ការ​សិក្សា និង​មេរៀន​ជីវិត

App ស្មាតហ្វូន​ថ្មី​បង្កើត​ ដោយ​យុវជន​ខ្មែរ ប្រាប់​គន្លឹះ​នៃ​ការ​សិក្សា និង​មេរៀន​ជីវិត

Content image - Phnom Penh Post

App ស្មាតហ្វូន​ថ្មី​បង្កើត​ ដោយ​យុវជន​ខ្មែរ ប្រាប់​គន្លឹះ​នៃ​ការ​សិក្សា និង​មេរៀន​ជីវិត

ភ្នំពេញៈ យុវជន ជៀប គន្ធា ​ស្ថាបនិក​​បង្កើត​ App ស្មាតហ្វូន សម្រាប់​ជំនួយ​ដល់​ការ​សិក្សា​​ របស់​សិស្ស​-និស្សិត​ច្រើន​​កន្លង​មក​នេះ​ បាន​ផ្ដើម​បង្កើត App ​ថ្មី​ ឈ្មោះ «Learning tips» ដែល​ប្រាប់​ពី​គន្លឹះនៃ​ការ​សិក្សា និង​មេរៀន​ជីវិត​ពី​បុគ្គល​ជោគជ័យ​ជាច្រើន សម្រាប់​​ជា​ប្រយោជន៍​ដល់​យុវជន ។

យុវជនកូន​អ្នក​ខេត្ដ​កំពងធំ​ បញ្ចប់​ការ​​សិក្សា​ ជំនាញ​វិស្វករ​ឧហ្សាហកម្ម តែ​ដោយ​មាន​ឆន្ទៈ ជួយ​ក្នុង​វិស័យ​អប់រំ​រូប​នេះ បាន​ថ្លែង​ប្រាប់​ LIFT-យុវវ័យ ថា គោល​បំណង​នៃការ​បង្កើត​ App ថ្មី​នេះ​ គឺ​ដើម្បី​ផ្ដល់​គន្លឹះ និង​វិធី​សាស្ត្រ​នៃ​ការ​សិក្សា ​ក៏ដូច​ជា​បទ​ពិសោធន៍​ ​ពី​បុគ្គល​​ដែល​ធ្លាប់​បាន​ទទួល​ជោគ​ជ័យ​ក្នុង​ការ​សិក្សា​ មាន​(សិស្ស​ពូកែ ជយ​លាភី​និទ្ទេស A និង​សិស្ស​រៀន​បាន​លេខ ១) ដល់​ប្អូនៗ​ដែល​រៀន​អនុវិទ្យល័យ​ និង​វិទ្យាល័យ។

យុវជន​ធ្លាប់​បង្កើត App ស្មាតហ្វូន​សម្រាប់​ជួយ​ដល់​ការ​សិក្សា​របស់​សិស្ស​ជា​ច្រើន​ ដូច​ជា App រូបមន្ដ គីមី រូប និង វេយ្យាករណ៍​ខ្មែរ​ ព្រម​ទាំង​ ចំណេះ​ដឹង​ទូទៅ និង​ App រឿង​ព្រេង​និទាន​ខ្មែរ​ជាដើម នាពេល​កន្លង​មក​នេះ បន្ដថា«ខ្ញុំ​ក៏​សរសេរ​បញ្ចូល​ពាក្យ​អប់រំ ពី​ទ្រឹស្ដី​ព្រះ​ពុទ្ធ​សាសនា​ ដើម្បី​ឲ្យ​មនុស្ស​ទូទៅ​បាន​ដឹង​ពី​មេរៀន​ជីវិត​ដែរ​» ។

បើ​តាម​យុវជន​វ័យ​ ២៧ ឆ្នាំ​រូបនេះ គន្លឹះ​សិក្សា​នៅ​ក្នុង​ App នេះ បាន​និយាយ​ពីគន្លឹះរៀន​ឲ្យឆាប់​យល់​ ឆាប់​ចេះ ​វីធី​រៀន​ឲ្យ​ពូកែ​ គន្លឹះ​ក្នុង​ប្រឡង​បាក់ឌុប​ និងវិធី​នៃការ​រៀន​តាម​មុខ​វិជ្ជា​នីមួយៗ​។

ចំណែក​ទំព័រ ពាក្យ​ទូន្មាន​ បាន​ដក​ស្រង់​នូវ​កម្រង​ពុទ្ធ​ភាសិត​ និង​ពាក្យ​អប់រំ​នានា​ចេញ​ពីសៀវ​ភៅ​របស់​អគ្គ​បណ្ឌិត​ ធម្មាចារ្យ ​ប៊ុត សាវង្ស ថែមទៀត ។

ក្រៅ​ពីនេះ App នេះ ក៏​មាន វីដេអូ​អប់រំ​ដែល​បាន​ប្រមូល​ផ្ដុំ​នូវ​វីដេអូ​និយាយ​ពីការ​ចែក​រំលែក​បញ្ញា​ញាណ​ដើម្បី​សេចក្ដី​សុខ​ក្នុង​ជីវិត​ដែល​រៀប​រៀង​ដោយ​ភិក្ខុ​វជិរប្ប​ញ្ញោ​ គូ សុភាព ផងដែរ ។

យុវជន​រូបនេះ​អះអាងថា កម្មវិធីថ្មី​នេះ​ ជា​លក្ខណៈ​Online ដូចនេះ​រាល់​វិធីរៀន​ ពាក្យ​ទូន្មាន​ និង​វីដេអូ​អប់រំ​នឹង​ត្រូវ​បាន​ធ្វើបច្ចុប្បន្ន​ភាព​ថ្មី​ជាប្រចាំ ។

យុវជន អាច​ទាញ​យក App នេះ​បាន ដោយសេរី នៅ​ Play Store ឈ្មោះ «គន្លឹះរៀន» ។ ចំណែក iOS ឈ្មោះ «Learning tips» ៕

អត្ថបទគួរចាប់អារម្មណ៍