The Phnom Penh Post Search

Search form




Logo of Phnom Penh Post newspaper Phnom Penh Post - JCI៖ យុវជន​កម្ពុជា នឹង​តំណាង​ឲ្យ​ប្រទេស​ក្នុង​តំបន់​អាស៊ី​ប៉ាស៊ីហ្វិក​ ទៅ​ប្រកួត​កម្រិត​ពិភព​លោក

JCI៖ យុវជន​កម្ពុជា នឹង​តំណាង​ឲ្យ​ប្រទេស​ក្នុង​តំបន់​អាស៊ី​ប៉ាស៊ីហ្វិក​ ទៅ​ប្រកួត​កម្រិត​ពិភព​លោក

Content image - Phnom Penh Post
យុវជន​កម្ពុជា ទទួល​ពាន​ក្នុង​ការ​ប្រកួតតស៊ូ​មតិ កាល​ពី​ថ្ងៃ​ ថ្ងៃទី១១ ខែមិថុនា នៅទីក្រុងអ៊ូឡាន់បាតា ប្រទេសម៉ុងហ្គោលី។

JCI៖ យុវជន​កម្ពុជា នឹង​តំណាង​ឲ្យ​ប្រទេស​ក្នុង​តំបន់​អាស៊ី​ប៉ាស៊ីហ្វិក​ ទៅ​ប្រកួត​កម្រិត​ពិភព​លោក

ភ្នំពេញៈ នេះជា​លើក​ទីមួយ​ហើយ​ដែល​យុវជន​កម្ពុជា បាន​ឈ្នះ​ពាន​រង្វាន់​ការ​ប្រកួត​តស៊ូ​មតិ​ថ្នាក់​តំបន់់​អាស៊ី​ប៉ាស៊ី​ហ្វិក នឹង​ ត្រូវ​តំណាង​ឲ្យ​ប្រទេស​ក្នុង​តំបន់នេះ ទៅ​ចូលរួម​ប្រកួត​បន្ដ​កម្រិត​ពិភព​លោក​នា​ខែ​វិច្ឆិកា​ខាង​មុខ។​ នេះ​បើ​តាម​ការ​ឲ្យ​ដឹង​ពី​លោក​ស្រី​ ជា​ សុផល្លា ប្រធាន​ថ្នាក់​ជាតិ សភា​យុវពា​ណិជ្ជករ​អន្តរជាតិ​កម្ពុជា (JCI) បាន​ថ្លែង​នៅ​ក្នុង​សន្និត សារព័ត៌មាន​មួយ​នៅ​ភ្នំ​ពេញ​ ​កាល​ពីល្ងាច​ថ្ងៃ​សុក្រ​សប្ដាហ៍​មុន​នេះ។

លោកស្រី ជា សុផល្លា ​ថ្លែង​ថា ថ្វី​ត្បិត​តែ​យុវជន​កម្ពុជា មាន​បទ​ពិសោធន៍​ស្ដួច​ស្ដើង​ និង​វ័យ​ក្មេង​ជាង​យុវជន​ក្នុង​តំបន់​ប្រទេស​អាស៊ី​ប៉ា​ស៊ី​ហ្វិក​ ប៉ុន្ដែ​ក្នុង​ការ​ប្រកួតនេះ កម្ពុជា​បាន​ទទួល​ពាន​ផ្នែក​តស៊ូ​មតិ ​ដោយ​បាន​ផ្ដួល​បេក្ខ​ជន​មក​ពី​បណ្ដា​ប្រទេស​ផ្សេងៗ​ដូចជា ហុងកុង ម៉ាឡេស៊ី ម៉ុងហ្គោលី និង​បែលហ្សិក ដែល​ជា​ប្រទេស​ប្រើ​ប្រាស់​ជា​សា​អង់​គ្លេស​។

លោក​ស្រី​បន្ដ​ថា «ជោគជ័យ​នេះ​ ជា​មោទភាព​មួយ​ដ៏ធំ​សម្រាប់​ប្រទេស​កម្ពុជា​យើង ​ដែល​បេក្ខ​ជន ​របស់​យើង​ដែល​ជានិស្សិត​បាន​យក​ឈ្នះ​បេក្ខ​ជន​មក​ពី​បណ្ដា​ប្រទេស​ផ្សេងៗ ​ដែល​មាន​បទពិសោធ ​និង​សមត្ថ​ភាព​ខ្លាំងៗ ទាំង​ចំណេះ​ដឹង​ទូទៅ និងភាសា​អង់​គ្លេស» ។

ក្រុម​និស្សិត​ជយ​លាភី​ឆ្នាំ​នេះ​សុទ្ធតែ​ជា​និស្សិត​មក​ពីសាល​វិទ្យាល័យ​ភូមិន្ទ​និតិសាស្រ្ដ​ និង​វិទ្យា​សាស្រ្ដ សេដ្ឋកិច្ច ​រួម​មាន​ យុវតី នូវ សុនីកា យុវតី ស៊ុំ សាន្តសុគន្ធកក្កដា និង​យុវជន ស៊ុន វណ្ណៈ ហើយ​ក្រុម​ជ័យលាភី​នឹង​ត្រូវ​បន្ត​ទៅ​ប្រកួត​ពានរង្វាន់​តស៊ូ​មតិ​ ថ្នាក់​ពិភព​លោក​ របស់​សភាយុវពា​ណិជ្ជករ​អន្តរជាតិ ​នៅ​ប្រទេស​ហូឡង់ នា​ខែ​វិច្ឆិកា​ខាង​មុខ។​

ការ​ប្រកួត​នេះ​យុវជន​កម្ពុជា​នឹង​តំណាង​ឲ្យ​ទ្វីប​អាស៊ី​ប៉ាស៊ីហ្វិក​ទាំងមូល ​ចូលរួម​ប្រកួត​ជាមួយ​នឹងយុវជន​មក​ពី​បណ្ដា​ទ្វីប​ដទៃទៀត​ ដូចជា​ទ្វីប​មជ្ឈិមបូព៌ា ទ្វីប​អាមេរិក និង​ទ្វីប​អឺរ៉ុប ។

យុវតី  ស៊ុំ សាន្តសុគន្ធកក្កដា បាន​លើក​ឡើង​ថា នាង​មិន​នឹង​ស្មាន​ថា អាច​ទទួល​បាន​ជ័យ​លាភី​នេះ​ទាល់​តែ​សោះ​កាល​ពី ការ​ចាប់​ផ្ដើម​ការ​ប្រកួត​ ព្រោះ​យុវតី​រូបនេះ​មាន​ការ​ព្រួយ​បារម្មណ៍​ដោយ​ក្រុម​របស់​ខ្លួន​ជាយុវជន​វ័យ​ក្មេង​ជាង​គេ និង​មិន​សូវ​មាន​បទ​ពិសោធ​ច្រើន​ដូចគេ។

យុវតី​រូបនេះ​បន្ដ​ថា «កាល​ពី​ការ​ចាប់​ផ្ដើម​ប្រកួត​ ខ្ញុំ​មាន​អារម្មណ៍​ភ័យ​ច្រើន តែ​ដល់​ពេល​ដឹង​លទ្ធផល​ថា​ទទួល​បាន​ជយ​លាភី​លើ​ក្រុម​ម្ចាស់​ផ្ទះ ​ក៏​មាន​ចិត្ដ​រំភើប ហើយ​រឹត​តែ​មាន​កម្លាំង​ចិត្ដ​ ជាង​មុន ​ក្នុង​ការ​ប្រកួត​ទោ​វគ្គ​បន្ដ ។

ចំពោះ​ការ​ដណ្ដើម​បាន​ជយ​លាភី​ដំបូង​លើ​ក្រុម​តស៊ូ​មតិ​នេះ យុវជន ស៊ុន វណ្ណៈ បាន​លើក​ឡើង​ថា ការ​សហការ​ធ្វើ​ការ​ងារ​ក្រុម​ពិត​ជា​សំខាន់​ណាស់ ដើម្បី​ជ្រើស​រើស​យក​ប្រធាន​បទ​ស្រាវជ្រាវ​ឲ្យ​ត្រូវ​តាម​ប្រធាន​បទ​ដែល​គេ​ដាក់​ឲ្យ​ក្នុង​រយៈ​ពេល​ខ្លី​បំផុត​ត្រឹម​២៤ម៉ោង​លើ​៤០​ប្រធាន​បទ ។

យុវជន​រូបនេះ​លើក «ពិត​ប្រាកដ​ណាស់ ការ​ប្រកួត​នេះ​យើង​ត្រូវ​ធ្វើ​សិក្សា​ស្រាវជ្រាវ​ជាក្រុម ត្រូវ​ស្ដាប់​ និង​ទទួល​យក​គំនិត​ពីសមា​ជិក​ក្រុម​របស់​យើង ​និង​បែង​ចែក​កិច្ចការ​ងារលើ​ប្រធាន​បទ​ចែក​គ្នា​ធ្វើ​ក្នុង​រយៈ​ពេល​ខ្លី​បំផុត​ ដើម្បី​ឆ្លើយ​តប​ទាំង​ប្រធាន​បទ​ស្រប​ និង​បដិសេធ»។

ចំពោះ​ការ​ទៅ​ប្រកួត​បន្ដ​ថ្នាក់​ពិភពលោក​នេះ លោស្រី សុផល្លា បាន​លើក​ឡើង​ថា JCI មាន​ភាព​ជឿជាក់ និង​ក្ដី​សង្ឃឹម​ថា យុវជន​កម្ពុជានឹង​ទទួល​បាន​ជយលាភី​បន្ដ​ទៀត​កម្រិត​ពិភពលោក ព្រោះ​យុវជន​កម្ពុជា​ពេល​នេះ​ក៏​មាន​បទ​ពិសោធច្រើន បាន​ជាប់​ពានជាបន្ដ​បន្ទាប់​ ហើយ ​JCI នឹង​រៀបចំ​ផែន​ការ​យុទ្ធសាស្រ្ដ​បន្ថែម​ទៀត​ដើម្បី​បង្កើន​សមត្ថ​ភាព​ក្រុម​យុវជន​កម្ពុជា៕

អត្ថបទគួរចាប់អារម្មណ៍