The Phnom Penh Post Search

Search form




Logo of Phnom Penh Post newspaper Phnom Penh Post - JCI អំពាវនាវ​ឲ្យ​យុវជន​ចូលរួម​កម្មវិធី​តស៊ូមតិ​និង​វោហា​ស័ព្ទ​សាធារណៈ​ឲ្យ​បាន​ច្រើន

JCI អំពាវនាវ​ឲ្យ​យុវជន​ចូលរួម​កម្មវិធី​តស៊ូមតិ​និង​វោហា​ស័ព្ទ​សាធារណៈ​ឲ្យ​បាន​ច្រើន

Content image - Phnom Penh Post
លោក ប៉ិច ប៉ូឡែន (ពាក់ក្រវ៉ាត់ក) ប្រធាន​សភា​យុវពាណិជ្ជករ​អន្ដរជាតិ​កម្ពុជា (JCI) ​ថ្លែង​ក្នុង​សន្និសីទ​កាសែត​កាល​ពី​សប្តាហ៍​មុន។

JCI អំពាវនាវ​ឲ្យ​យុវជន​ចូលរួម​កម្មវិធី​តស៊ូមតិ​និង​វោហា​ស័ព្ទ​សាធារណៈ​ឲ្យ​បាន​ច្រើន

ភ្នំពេញៈ លោក ប៉ិច ប៉ូឡែន ប្រធាន​សភា​យុវពាណិជ្ជករ​អន្ដរជាតិ​កម្ពុជា (JCI) ​អំពាវនាវ​ឲ្យ​យុវជន​កម្ពុជា​ ដែល​តែង​តែ​និយម​ចូល​ចិត្ដ​បញ្ចេញ​មតិ​ ផ្តេស​ផ្តាស និង​យក​ជា​ការ​មិន​បាន​​​នៅ​លើ ​ហ្វេសប៊ុក ឲ្យ​ត្រលប់​មក​​​តស៊ូ​មតិ​បែប​វិជ្ជមាន​នៅ​វេទិកា ប្រកួត​ប្រជែង​តស៊ូ​មតិ​ និង​វោហាស័ព្ទ​​សាធារណៈ​ដ៏ធំ​បំផុត​ទូទាំង​ពិភពលោក​ ដែល​នឹង​ប្រព្រឹត្ដ​ទៅ​នាថ្ងៃ​ទី ២៧ ខែ​ មិនា ឆ្នាំ​ ២០១៦ ខាង​មុខ​នេះ​វិញ។

លោក ប៉ូឡែន បាន​ប្រាប់​មក​​គេហទំព័រ យុវវ័យ LIFT នៃ​កាសែត​​ភ្នំពេញ​បុស្ដិ៍​ កាល​ពី​ចុង​សប្ដាហ៍​មុន​នេះ​ថា៖ «យុវជន​ជាច្រើន​បាន​បញ្ចេញ​មតិ​ យក​ជា​ការ​មិន​បាន ​នៅ​លើ​ហ្វេស​ប៊ុក ខ្ញុំ​ចង់​ឲ្យ​យុវជន​បែរ​មក​ជជែក​ដេញ​ដោល​បែប​វិជ្ជមាន​នៅ​វេទិកា​តស៊ូ​មតិ​ និង​វោហាស័ព្ទ​សាធាណៈ​វិញ។ ព្រោះ​នេះ​គឺ​ជា​វេទិកា​ជជែក​ដេញដោល​ ស្វែក​រក​អ្នក​ខ្លាំង​ក្នុង​ការ​តស៊ូ​មតិ និង​​ដោះ​​ស្រាយ​បញ្ហា ដែល​ទទួល​បាន​ការ​គាំទ្រ​​វិជ្ជមាន និង​មាន​ប្រយោជន៍​សម្រាប់​​យុវជន​ថែម​ទៀត»។

កម្ម​វិធី​នេះ​ នឹង​​បើក​ទូលាយ​ដល់​យុវជន​កម្ពុជា​ ដែល​មាន​បំណង​ចង់​ក្លាយ​ជា​យុវជន​ឆ្នើម​ក្នុង​ការ​បញ្ចេញ​វោហាស័ព្ទ​ជា​សាធារណៈ​ ​បើ​​​គិត​ថាខ្លួន​​មាន​សមត្ថ​ភាព​​។ បេក្ខជន​ទទួលបាន​ជ័យលាភី នឹង​ក្លាយជា​តំណាង​ប្រទេស​កម្ពុជា ទៅ​ចូលរួម​វេទិកា​ប្រកួត​ថ្នាក់​តំបន់​អាស៊ី​ប៉ាស៊ីហ្វិក ដែល​នឹង​ប្រព្រឹត្តទៅ​នៅ​ខែ​មិថុនា ឆ្នាំ​២០១៦ ក្នុង​ទីក្រុង​តៃវ៉ាន់​។

លោក​​ ប៉ូឡែន បន្ដថា «​តាម​រយៈ​កម្មវិធីនេះ​យើង​ចង់​ប្រាប់​ពិភពលោក​ឲ្យដឹង​ថា ​យើង​មាន​ធន​ធាន​មនុស្ស​ដែល​មាន​ទេព្យ​​កោសល្យ និង​សមត្ថភាព​ ហើយ​យើង​ក៏​កំពុង​បង្ហាញ​ពិភពលោក​នៅ​រូប​ភាព​ថ្មី​មួយ​ទៀត​របស់​កម្ពុជាដែរ​​»។

លោក​ បញ្ជាក់​​ថា នេះ​គឺ​​ជា​ឱ​កាស​ដ៏​ល្អ​មួយទៀត​​សម្រាប់​យុវជន​កម្ពុជា ក្នុង​បញ្ចេញ​មតិ​សាធារណៈ​ជា​លក្ខណៈ​វិជ្ជ​មាន​ ព្រម​ទាំង​តស៊ូមតិ​ជា​មួយ​ យុវជន​​ប្រមាណ ១១៥ ប្រទេស​ផ្សេង​ទៀត​។

លោក​ លឹម សិទ្ធី ប្រធាន​គម្រោង​មួយ​នេះ​ បាន​ឲ្យ​ដឹង​ដែរ​ថា​ គោល​បំណង​នៃ​ការ​បង្កើត​ការ​ប្រកកួត​នេះ​ គឺ​ដើម្បី​លើក​កម្ពស់​ការ​ធ្វើ​ការ​ងារ​ជា​ក្រុម​ ការ​ពិចារនា​ត្រិះ​រិះ និង​ការ​ដោះ​ស្រាយ​បញ្ហានានា​ ក្នុង​ចំណោម​សមាជិក​របស់​សភាយុវពាណិជ្ជករ​អន្ដ​រជាតិ​ជុំ​វិញ​ពិភពលោក​ និង​ចង់​ឲ្យ​សមាជិក​ទាំង​ឡាយ​ប្រើ​ប្រាស់​អ្វីៗ​ដែល​ខ្លួន​បាន​សិក្សាពី​កម្ម​វិធី​នេះ​ យក​ទៅ​ដោះស្រាយ​បញ្ហា​នៅ​ក្នុង​សហគមន៍​របស់​ពួក​គេ​។

លោកបន្តថា «​ប្រធាន​បទ​សម្រាប់​វេទិកា​ជជែក​ដេញ​ដោល​នេះ​ មាន​ទាំង​ប្រធាន​បទ​បែប​ស៊ី​ជម្រៅ និង​កម្លែង​ ដែល​ស្រប​ទៅ​តាម​ផែន​ការ​អភិវឌ្ឍន៍សហស្សវត្ស​ ១៧ ចំណុច​ ​របស់​អង្គការ​សហប្រជាជាតិក្នុង​ឆ្នាំ​ ២០១៦​នេះ​។ បេក្ខជន​ចូល​រួម​នឹង​ត្រូវ​បាន​សាក​ល្បង​ធ្វើ​តេស្ដ​ពី​សមត្ថ​ភាព​​ក្នុង​ការ​ប្រកែក ​អំ​ពី​គោល​ជំ​ហរ​ពិត​ប្រា​កដ​ទាក់​ទង​គ្នា​ និង​ភាព​ត្រឹម​ត្រូវ​របស់​ខ្លួន​ក្រោម​ការ​កំណត់​ពេល​វេលា​ជាក់​លាក់​»។

សូម​បញ្ជាក់​​ថា នេះ​ជា​ឆ្នាំ​ទី ​៦ ​ដែល​សភាយុវពាណិជ្ជ​ករ​អន្ដរជាតិ​កម្ពុជា​ បាន​រៀបចំ​ឲ្យ​មាន​វេទិកា​​ប្រកួត​ប្រ​ជែង​​នេះ​ឡើង​ក្នុង​ប្រ​ទេស​កម្ពុជា​ និង​​ជា​ឆ្នាំ​ទី ​៣​ ដែល​វេទិការ​ប្រកួត​ប្រជែង​វោហាស័ព្ទ​ជាសាធារណៈ​បាន​រៀប​ចំឡើង​ ដោយ​មាន​ការ​ចូល​រួម​ពី​សិស្ស​-និស្សិត និង​មហាជន​ទូទៅ​។

កាល​ពី​ឆ្នាំ​ ២០១៥​ កន្លង​ទៅ​នេះ​ យុវតី​ តារា រត្ន ដែល​ជា​បេក្ខជន​ជ័យលាភី​ប្រកួត​ប្រជែង​វោហាស័ព្ទ​សាធារណៈ​តំណាង​កម្ពុជា​ បាន​ទទួល​ជ័យ​លាភី​លេខ ១ ក្នុង​ការ​ប្រកួត​ជា​លក្ខណៈអន្ដរជាតិ​ នៅ​ទី​ក្រុង​ កាណាហ្សាវ៉ាក ប្រទេស ជប៉ុន ដែល​មាន​បេក្ខជន​ចូលរួម​ ៤ តំបន់ ដូចជា អ៊ឺរ៉ុប អាហ្វ្រិក អាមេរិក និង​អាស៊ីប៉ាស៊ីហ្វិក​៕​

អត្ថបទ​នេះ​សុំ​ប្តូរ​ចំណង​ជើង​ចាស់​ដែល​ថា «JCI៖ យុវជន​គួរឈ​ប់​បញ្ចេញ​មតិ​ឥត​ប្រយោជន៍​លើ​ហ្វេស​ប៊ុក​ មក​តស៊ូមតិ​​នៅ​ JCI» និង​ពាក្យ​នៅ​ត្រង់​នៅ​កថាខណ្ឌ​ទី​ពីរ មាន​ប្រើ​ពាក្យ «ឥត​ប្រយោជន៍» មកជាពាក្យថា «យក​ជា​ការ​មិន​បាន» វិញ។ សូម​អភ័យ​ទោស​ចំពោះ​កំហុស​ឆ្គង​នេះ

អត្ថបទគួរចាប់អារម្មណ៍