ភ្នំពេញៈ ក្រុមហ៊ុន តូតាល់ កម្ពុជា និងអង្គការ Sipar បានចាប់ដៃគ្នាផ្សព្វផ្សាយពីយុទ្ធនាការអប់រំ អំពីសុវត្ថិភាពចរាចរណ៍ផ្លូវគោកតាមរយៈ បណ្ណាល័យចល័តសុវត្ថិភាព របស់អង្គការ Sipar ដើម្បីបង្កើនការយល់ដឹងអំពីសុវត្ថិភាពចរាចរណ៍ដល់ប្រជាជនខ្មែរ ជាពិសេស សិស្ស-និស្សិត និងយុវជន។
Sipar បានដាក់ឲ្យមានបណ្ណាល័យចល័តមួយឈ្មោះថា «សុវត្ថិភាព» ដែលបណ្ណាល័យនេះបានធ្វើសកម្មភាពអប់រំជារៀងរាល់ថ្ងៃ ខណៈប្រជាជន សិស្សានុសិស្ស ប្រមាណជាង ១០ ៦៣៥ នាក់ហើយ បានទទួលការអប់រំអំពីសុវត្ថិភាពចរាចរណ៍ និង សម្ភារៈ រួមទាំងបានអាន សៀវភៅរូបភាពអប់រំអំពីសុវត្ថិភាពចរាចរណ៍ផ្លូវគោក ដែលផលិតដោយកុ្រមនិស្សិតស្ម័គ្រចិត្ត Drop Everything and Read និង ក្រុមការងារ One Medi។
លោក សាំង ប៊ុនទី ទូតសុចន្ទៈសុវត្ថិភាពចរាចរណ៍ផ្លូវគោក បាន ថ្លែងទៅកាន់សិស្សានុសិស្ស និងអ្នកចូលរួម ក្នុងកម្មវិធី ប្រកាសធ្វើយុទ្ធនាការអប់រំសុវត្ថិភាពចរាចណ៍កាលពីសប្តាហ៍មុនថា៖ «ការគោរពច្បាប់ចរាចរណ៍គឺផ្ដើមចេញពីយើងទាំងអស់គ្នា»។
សូមបញ្ជាក់ថា ៣ ឆ្នាំមកនេះ អង្គការ Sipar និង ក្រុមហ៊ុន តូតាល់ បានសហការគ្នាធ្វើការលើកកម្ពស់សុវត្ថិភាពចរាចរណ៍តាមរយៈការចុះធ្វើយុទ្ធនាការអប់រំតាមស្រុក ភូមិ សាលារៀន វិទ្យាល័យទាំងក្នុងរាជធានីភ្នំពេញ និងតាមបណ្ដាខេត្ដនានា (កណ្ដាល កំពង់ស្ពឺ តាកែវ) ហើយនិងរំពឹងទុកក្នុងឆ្នាំ ២០១៦ ខាងមុខ នឹងអាចធ្វើយុទ្ធនាការអប់រំ សុវត្ថិភាពចរាចរណ៍ តាមគ្រឹះស្ថានមធ្យមសិក្សា និងវិទ្យាល័យចំនួន ១០០ នៅខេត្ដកណ្ដាល៕
