.jpg)
អង្គការភ្លែនអន្តរជាតិប្រចាំកម្ពុជា ប្រជុំប្រកាសបើកគម្រោង «ក្មេងស្រីដឹកនាំ» នៅក្នុងខេត្តចំនួន ៣។ ហេង ជីវ័ន
រតនគិរីៈ ដោយសារតែមានគោលដៅចង់លើកកម្ពស់ទៅដល់សមភាពយេនឌ័រ នៅក្នុងប្រទេសកម្ពុជា ជាពិសេសការបង្កើតគម្រោងឲ្យមានការជួយបង្កើនពីសមត្ថភាព និងលទ្ធភាព ក្មេងស្រីតែម្តង ទើបអង្គការភ្លែនអន្តរជាតិ បានរៀបចំគម្រោងមួយក្រោមប្រធានបទថា «ក្មេងស្រីដឹកនាំ» រយៈពេល ៥ ឆ្នាំ ដោយមានទំហំទឹកប្រាក់ចំនួន ៣ លាន ដុល្លារ ឲ្យអនុវត្តនៅក្នុងខេត្តចំនួន ៣។
នេះបើតាមពិធីបើកសន្និសីទសារព័ត៌មានប្រកាសឲ្យដាក់ដំណើរការគម្រោងនេះ កាលពីថ្ងៃទី ១៩ ខែ មិថុនា ឆ្នាំ ២០១៨ នៅឯខេត្តរតនគិរី សម្រាប់ការអនុវត្តផែនការចំនួន ៥ ឆ្នាំចាប់ពីឆ្នាំ ២០១៨ រហូតទៅដល់ឆ្នាំ ២០២៣។
គម្រោងក្មេងស្រីដឹកនាំ ដែលមានទំហំទឹកប្រាក់ ៣ លាន ដុល្លារ ដែលមានគោលដៅ ធ្វើយ៉ាងណាឲ្យជំទង់ និងយុវជន ជាពិសេស កុមារី និងស្ត្រីវ័យក្មេង ចូលរួមពង្រឹង កៀរគរសកម្មភាពក្នុងការកសាងសមភាពយេនឌ័រ និងសំឡេងពួកគេត្រូវផ្តល់តម្លៃក្នុងការសេចក្តីសម្រេចចិត្តគ្រប់កម្រិត។
លោក យេន យេប ក្លែនរេនស៊ីង្គ ជានាយកប្រចាំប្រទេសនៃអង្គការភ្លែនអន្តរជាតិ ឲ្យដឹងថា «គម្រោងនេះ នឹងបង្កើនសមត្ថភាព និងលទ្ធភាព របស់ក្មេងស្រី ដើម្បីឲ្យពួកគេទទួលបានផលជាច្រើន។ ទី ១ ទទួលបានការសិក្សា ទី ២ ការចែករំលែក ទី ៣ ការបង្កើត និងទី ៤ ដឹកនាំ»។
នាយកប្រចាំប្រទេសនៃអង្គការភ្លែនអន្តរជាតិ បានបន្តថា៖ «គម្រោងនេះប្រើប្រាស់យន្តការ ពង្រឹងសមត្ថភាពទាំងក្មេងស្រី និងក្មេងប្រុស ដោយធ្វើយ៉ាងណាឲ្យពួកគេសហការគ្នា ស្វែងយល់ សម្រួល ដោះស្រាយ និងផ្លាស់ប្តូរវិសមភាពសង្គម និងវិសមភាពយេនឌ័រនៅកម្ពុជា។ ក្តីរំពឹងទុកសំខាន់ៗនៃគម្រោងនេះ ចង់ឲ្យកុមារី និងកុមារា ជាសមាជិកក្រុមក្លិបកុមារ នឹងសិក្សា ចែករំលែក បង្កើត និងដឹកនាំ លើកកម្ពស់ការអភិវឌ្ឍសង្គម និងសមភាពយេនឌ័រ។ ជាបន្ទាប់ក្រុមគ្រួសារ និងអាជ្ញាធរមូលដ្ឋាន នឹងជួយគាំទ្រដល់កុមារី និងកុមារា ឲ្យពួកគេបានចូលរួមក្នុងការផ្លាស់ប្តូរវិសមភាពសង្គម និងវិសមភាពយេនឌ័រ។ ជាពិសេសចង់ឲ្យពួកគេមានសមត្ថភាពបង្កើតបណា្ដញកុមារអ្នកតស៊ូមតិ (CAN) និងបណា្ដញស្ត្រីអ្នកដឹកនាំវ័យក្មេង (YWLN) នឹងត្រូវបានពង្រឹងដើម្បីចូលរួមយ៉ាងសកម្មក្នុងសកម្មភាពយេនឌ័រ និងការចូលរួមពីកុមារ»។
ចំពោះក្មេងស្រី និងក្មេងប្រុស នៅក្នុងខេត្តគោលដៅទាំង ៣ ខេត្តមានប្រមាណ ៤០០០ នាក់ នឹងមានឱកាសសិក្សាតាមរយៈសកម្មភាពហៅថា ជើងឯកសម្រាប់កម្ពុជា និងអាចចែករំលែកចំណេះដឹងកម្មវិធីស្នូរជួង សកម្មភាពរួមតាមរយៈជំនួយខ្នាតតូចលើកស្ទួយសមភាព យេនឌ័រ និងដឹកនាំធ្វើជាគំរូ និងគាំពារមតិនៅថ្នាក់ឃុំ ថ្នាក់ខេត្ត និងថ្នាក់ជាតិ៕
