The Phnom Penh Post Search

Search form

Logo of Phnom Penh Post newspaper Phnom Penh Post - កម្មវិធី «សុបិន» ស្រី្ត​ឆ្នាំ​២០១៥ បើក​ឱកាស​ដល់​ស្ត្រី​កម្ពុជា​ដែល​ចូលចិត្ត​ការ​រចនា បង្ហាញ​ស្នាដៃ​របស់​ខ្លួន




កម្មវិធី «សុបិន» ស្រី្ត​ឆ្នាំ​២០១៥ បើក​ឱកាស​ដល់​ស្ត្រី​កម្ពុជា​ដែល​ចូលចិត្ត​ការ​រចនា បង្ហាញ​ស្នាដៃ​របស់​ខ្លួន

ការ​តាំង​ស្នាដៃ​រចនាម៉ូដ​ជ័យលាភី «សុបិនស្រ្តី» នៅ​ផ្សារទំនើប​អ៊ីអន។​
ការ​តាំង​ស្នាដៃ​រចនាម៉ូដ​ជ័យលាភី «សុបិនស្រ្តី» នៅ​ផ្សារទំនើប​អ៊ីអន។ ផា លីណា

កម្មវិធី «សុបិន» ស្រី្ត​ឆ្នាំ​២០១៥ បើក​ឱកាស​ដល់​ស្ត្រី​កម្ពុជា​ដែល​ចូលចិត្ត​ការ​រចនា បង្ហាញ​ស្នាដៃ​របស់​ខ្លួន

សម្រាប់​យុវតី និង​ស្ត្រី​កម្ពុជា​ដែល​មាន​ទេពកោសល្យ​ខាង​ផ្នែក​រចនា ហើយ​មាន​អាយុ​ចាប់ពី​១៣​ឆ្នាំ​ឡើង​ទៅ កម្មវិធី​ការ​ប្រកួត​រចនា​ម៉ូដ​«សុបិនស្ត្រី»​លើក​ទី​៥ ដែល​រៀបចំ​ដោយ អ្នកស្រី វ៉ាកាណា ណូគូអិ (Wakana NUKUI) ម្ចាស់​ហាង​វ៉ាកាណា​នៅ​ផ្សារទំនើប​អ៊ីអន​បាន​បើក​ឱកាស​ឲ្យ​ពួកគេ​ដាក់​ពាក្យ​ដើម្បី​ប្រកួតប្រជែង​ជំនាញ​ការ​រចនា​ដើម្បី​ទទួល​យក​រង្វាន់ និង​ក្លាយ​ជា​អ្នក​អាជីព។

ការ​ទទួល​ពាក្យ​បាន​ចាប់បើក​ពី​ថ្ងៃនេះ​រហូត​ដល់​ថ្ងៃ​ទី​ ២២ ខែ​មករា ឆ្នាំ​២០១៥ ហើយ​ថ្ងៃ​ប្រកាស​ចុងក្រោយ គឺ​ថ្ងៃ​ ២៨ ខែ​មករា ឆ្នាំ​២០១៥។

Content image - Phnom Penh Post

បេក្ខជន​ដែល​ត្រូវ​បាន​ជ្រើសរើស​សម្រាប់​វគ្គ​ផ្តាច់ព្រ័ត្រ​នឹង​ត្រូវ​ចូលរួម​ទទួល​ការ​ផ្តល់​ដំបូន្មាន​លើ​ការ​រចនា​នៅ​ចុង​ខែ​មករា​ឆ្នាំ​២០១៥។ ពិធី​ប្រគល់​ពាន​រង្វាន់​ដល់​ជ័យលាភី​ទាំងអស់​នឹង​ប្រព្រឹត្ត​ទៅ​នៅ​ថ្ងៃ​ទី​១ ខែ​មីនា ឆ្នាំ​២០១៥។

ស្ថាបនិក​កម្មវិធី «សុបិនស្ត្រី» និង​ជា​ម្ចាស់​ហាង​វ៉ាកាណា​នៅ​ផ្សារ​ទំនើប​អ៊ីអន អ្នកស្រី វ៉ាកាណា ណូគូអិ (Wakana NUKUI) បាន​ឲ្យ​ដឹង​ថា កម្មវិធី​ប្រកួត​រចនា​ម៉ូដ «សុបិនស្ត្រី»​លើក​ទី​៥​នេះ គឺជា​ការ​ប្រកួត​រចនា​ម៉ូដ​ប្រចាំ​ឆ្នាំ ធំ​ជាង​ឆ្នាំ​ណាៗ​ទាំងអស់ ចាប់​តាំងពី​កម្មវិធី​នេះ បាន​ប្រារព្ធ​ធ្វើ​ឡើង​នៅក្នុង​ឆ្នាំ​២០១១​មក។

អ្នកស្រី វ៉ាកាណា ណូគូអិ (Wakana NUKUI​) បន្ត​ថា មូលហេតុ​ដែល​អ្នកស្រី​បង្កើត​កម្មវិធី​នេះ​ឡើង​គឺ​ដើម្បី​ជា​ការ​ចូលរួម​ចំណែក​លើក​កម្ពស់​សមត្ថភាព​របស់​ស្ត្រី​កម្ពុជា​ទាក់ទង​ទៅ​នឹង​ការ​ច្នៃម៉ូដ។ គំនិត​ក្នុង​ការ​បង្កើត​កម្មវិធី​នេះ​គឺ​ដោយសារ អ្នកស្រី​មាន​ការ​កោតសរសើរ​ចំពោះ​ក្បូរក្បាច់​រចនា​ដ៏ល្អ​ប្រណីត​នៅលើ​ជញ្ជាំង​ប្រាសាទ​អង្គរវត្ត​របស់​កម្ពុជា ខណៈ​អ្នកស្រី​បាន​មក​ប្រទេស​កម្ពុជា​ជា​លើកដំបូង​នៅក្នុង​ឆ្នាំ​២០០៩។

ហាង វ៉ាកាណា ដែល​បាន​តាំង​លក់​ផលិតផល​ច្នៃម៉ូត​របស់​ជ័យលាភី «សុបិនស្ត្រី»។
ហាង វ៉ាកាណា ដែល​បាន​តាំង​លក់​ផលិតផល​ច្នៃម៉ូត​របស់​ជ័យលាភី «សុបិនស្ត្រី»។ រូបថត សហការី

អ្នកស្រី​បាន​និយាយ​ថា៖ «ខ្ញុំ​គិត​ថា ប្រជាជន​កម្ពុជា​ប្រាកដ​ជា​សម្បូរ​ទៅ​ដោយ​អ្នក​មាន​សមត្ថភាព​ខាង​រចនា​ម៉ូដ​ដោយ​យើង​អាច​មើលឃើញ​តាមរយៈ​ជញ្ជាំង​ប្រាសាទ​អង្គរវត្ត​ដ៏ល្អ​ឥតខ្ចោះ​នោះ»។

ដោយសារ​តែ​ចំនួន​ស្ត្រី​ខ្មែរ​ចូលរួម​ក្នុង​កិច្ចការងារ​សង្គម​នៅ​មាន​កម្រិត កម្មវិធី​នេះ អនុញ្ញាត​ឲ្យ​តែ​ស្ត្រី​ខ្មែរ​ប៉ុណ្ណោះ​ដើម្បី​ចូលរួម។ វា​ជា​ការ​ផ្តល់​ឱកាស​ដល់​ស្ត្រី​កម្ពុជា​ដែល​មាន​សុបិន​ចង់​ក្លាយ​ទៅ​ជា​អ្នក​រចនាម៉ូដ​ទាំងអស់​ឲ្យ​សម្រេច​តាម​បំណង​ប្រាថ្នា​របស់​ខ្លួន​បាន។

អ្នកនាង​ទេព សុភ័ក្រ កញ្ញា​ជ័យលាភី​លេខ​១​របស់ «សុបិនស្ត្រី»​ក្នុង​ឆ្នាំ​២០១៤ បាន​និយាយ​ថា អ្នកនាង​ចូលចិត្ត​ការ​គូរ​រូប​បំផុត ហើយ​ចង់​បង្ហាញ​ស្នាដៃ​រចនា​របស់​ខ្លួន​ឲ្យ​អ្នកដទៃ​បាន​ឃើញ​ថា ស្ត្រី​ក៏​អាច​មាន​សមត្ថភាព​ធ្វើការ​ច្នៃម៉ូដ​ផ្សេងៗ​បាន​ដែរ​មិនមែន​ចេះ​តែ​ការងារ​ផ្ទះ​នោះ​ទេ។ នោះ​ហើយ​ជា​មូលហេតុ​ដែល​អ្នកនាង​ដាក់​ពាក្យ​ចូលរួម​ប្រកួត​ក្នុង​កម្មវិធី​នេះ​តាំងតែ​ពី​ឆ្នាំ​ដំបូង​ម្ល៉េះ​ពោល​គឺ​តាំងពី​ឆ្នាំ​ ២០១១។

 អ្នកស្រី វ៉ាកាណា ណូគូអិ និង​ជ័យលាភី​លេខ​មួយ «សុបិនស្រី្ត» ក្នុង​ឆ្នាំ ២០១៤។
អ្នកស្រី វ៉ាកាណា ណូគូអិ និង​ជ័យលាភី​លេខ​មួយ «សុបិនស្រី្ត» ក្នុង​ឆ្នាំ ២០១៤។ រូបថត សហការី

ម្ចាស់​អាជីវកម្ម​ដេគ័រ និង​រចនា​ក្រាហ្វិក​ឈ្មោះ​ថា «ច័ន្ទពិដោរ» វ័យ​២៦​ឆ្នាំ​រូប​នេះ បាន​លើក​ទឹកចិត្ត​ដល់​ស្ត្រី​ខ្មែរ​វ័យ​ក្មេង​ដទៃ​ទៀត​ដែល​ចូលចិត្ត​ការ​គូរ ឬ​រចនា​ម៉ូដ​ផ្សេងៗ​ឲ្យ​ចូលរួម​ប្រកួត​ក្នុង​កម្មវិធី​នេះ​ដើម្បី​ជា​ឱកាស​មួយ​សម្រាប់​បង្ហាញ​ស្នាដៃ​របស់​ខ្លួន​ទៅឲ្យ​អ្នកដទៃ​បាន​ឃើញ។

អ្នកនាង​បាន​និយាយ​ថា៖ «ត្រូវ​ហ៊ាន​សាកល្បង ត្រូវ​ហ៊ាន​ចូលរួម សូម​កុំ​គិត​ថា ខ្លួនឯង​មិន​ចេះ បើ​មិន​សាកល្បង​យើង​មិន​អាច​ដឹង​ថា​ខ្លួន​មាន​សមត្ថភាព​ប៉ុនណា​នោះ​ទេ»។

ប្រធានបទ​នៃ​ការ​រចនា​ម៉ូដ «សុបិនស្ត្រី» ឆ្នាំ​នេះ មាន​ចំនួន​បី​ដូចជា ការ​រចនា​បែប​អង្គរវត្ត របាំ​អប្សរា និង​ធម្មជាតិ។ ការ​រចនា​បែប​អង្គរវត្ត​គឺ​ធ្វើ​ទៅ​ដោយ​មាន​ការ​គោរព​មាន​លក្ខណៈ​បុរាណ​ភាពក្លៀវក្លា និង​អានុភាព​ដ៏អស្ចារ្យ។ សម្រាប់​ការ​រចនា​របាំ​អប្សរា ត្រូវ​មាន​លក្ខណៈ​រស់រវើក សមសួន រួសរាយ ប្រណីត (ផ្ចិតផ្ចង់ ទន់ភ្លន់)។ ដោយឡែក​ប្រសិន​បើ​បេក្ខជន​មាន​ចំណាប់​អារម្មណ៍​រចនា​បែប​ធម្មជាតិ គឺ​ត្រូវ​មាន​លក្ខណៈ​ជា​ផ្កា ស្លឹកឈើ ឬ​ទន្លេ។ល។

បេក្ខជន​ដែល​មាន​បំណង​ដាក់​ពាក្យ​ចូលរួម​ប្រកួត​ទាំងអស់​អាច​រក​មើល​ក្រដាស​បំពេញ​ពាក្យ​ពី​គេហទំព័រ (www.designcontest1.jimdo.com) ហើយ​ផ្ញើ​អ៊ីមែល​ទៅកាន់ letsgo@chocott.com ឬ​យក​ពាក្យ និង​ដាក់​ពាក្យ​នៅ​ហាង វ៉ាកាណា​ផ្សារ​ទំនើប​ អ៊ីអន ​(ភ្នំពេញ​) ​និង​នៅ​ការិយាល័យ​ទស្សនាវដ្តី​ក្រមា​ (ខេត្ត​សៀមរាប)។

ថ្ងៃ​ប្រកាស​លទ្ធផល​ចុងក្រោយ​ការ​ប្រកួត​រចនាម៉ូដ «សុបិនស្រ្តី» កាលពី​ឆ្នាំ​២០១៤ កន្លង​ទៅ។
ថ្ងៃ​ប្រកាស​លទ្ធផល​ចុងក្រោយ​ការ​ប្រកួត​រចនាម៉ូដ «សុបិនស្រ្តី» កាលពី​ឆ្នាំ​២០១៤ កន្លង​ទៅ។ រូបថត សហការី

រង្វាន់​ត្រូវ​បាន​បែងចែក​ជា​ពីរ​ប្រភេទ គឺ​រង្វាន់​ផ្នែក​រចនា​សិល្បៈ និង​រង្វាន់​ផ្នែក​រចនាពាណិជ្ជកម្ម។ ក្នុង​នោះ​ផ្នែក​រចនា​សិល្បៈ​ជ័យលាភី​លេខ​មួយ​ត្រូវ​ទទួល​បាន​ទឹកប្រាក់​ចំនួន ​១០០០​ ដុល្លារអាមេរិក លេខ​ពីរ ​២០០​ ដុល្លារ លេខ​បី​ ១០០ ​ដុល្លារ និង​រង្វាន់​កិត្តិយស​ចំនួន​ ៥០​ដុល្លារ ​(អាច​មាន​ច្រើន​នាក់)។

ដោយឡែក​រង្វាន់​ផ្នែក​រចនា​ពាណិជ្ជកម្ម​វិញ ​(អាច​មាន​ច្រើន​នាក់​) ​គឺ​ទទួល​បាន​ទឹកប្រាក់​ចំនួន​ ៣០០ ​ដុល្លារ​អាមេរិក​ពី​ហាង​លក់​សម្លៀកបំពាក់ FLAXUS TOKYO ឬ​ ៣០០ ​ដុល្លារ​ពី​ក្រុមហ៊ុន​ផលិត​សាប៊ូ​កម្ពុជា KHMER RABBIT ឬ​ ៣០០​ ដុល្លារ​អាមេរិក​ពី​ហាង​វ៉ាកាណា (WAKANA) [អាស្រ័យ​ទៅ​តាម​ម៉ូដដែល​គេ​រចនា]៕

អត្ថបទគួរចាប់អារម្មណ៍