The Phnom Penh Post Search

Search form

Logo of Phnom Penh Post newspaper Phnom Penh Post - ការនិពន្ធ​បទចម្រៀង​របស់​យុវជន​ក្នុង​គេហទំព័រ​យូធូប កំពុង​ទទួល​បាន​ការ​ពេញនិយម​យ៉ាងខ្លាំង




ការនិពន្ធ​បទចម្រៀង​របស់​យុវជន​ក្នុង​គេហទំព័រ​យូធូប កំពុង​ទទួល​បាន​ការ​ពេញនិយម​យ៉ាងខ្លាំង

ក្រុម Small World Small Band ប្រគំតន្ត្រី​ក្នុង​ពិធីសម្ពោធ​កម្មវិធី​ស្តាប់​ចម្រៀង​របស់​ខ្ញុំ​លើក​ទី​ពីរ​ឆ្នាំ​២០១៤​។
ក្រុម Small World Small Band ប្រគំតន្ត្រី​ក្នុង​ពិធីសម្ពោធ​កម្មវិធី​ស្តាប់​ចម្រៀង​របស់​ខ្ញុំ​លើក​ទី​ពីរ​ឆ្នាំ​២០១៤​។ រូបថត សហការី

ការនិពន្ធ​បទចម្រៀង​របស់​យុវជន​ក្នុង​គេហទំព័រ​យូធូប កំពុង​ទទួល​បាន​ការ​ពេញនិយម​យ៉ាងខ្លាំង

ថ្មីៗ​នេះ​មាន​យុវជន​កម្ពុជា​កាន់តែ​ច្រើន​ឡើងៗ នាំ​គ្នា​តែង​និពន្ធ​បទចម្រៀង និង​ទំនុក​ភ្លេង​ដោយ​ខ្លួនឯង​ផ្ទាល់​បង្ហោះ​តាម​បណ្តាញសង្គម និង​គេហទំព័រ​យូធូប ដែល​ទទួល​បាន​ការ​ចាប់​អារម្មណ៍​យ៉ាង​ខ្លាំង រហូត​មាន​អ្នក​ខ្លះ​បាន​ចេញ​លក់​ជា​អាល់ប៊ុម និង​ល្បី​ឈ្មោះ​ក្នុង​ស្រទាប់​យុវវ័យ​ទៀត​ផង​។

អត្ថន័យ​នៃ​បទចម្រៀង​ទាំងអស់​នោះ មាន​ភាព​ខុសៗ​គ្នា ក្នុង​ន័យ​អប់រំ ស្នេហា ការ​ស្រឡាញ់​សិល្បៈ​វប្បធម៌​ខ្មែរ​ជាដើម។

បទចម្រៀង​ល្បីៗ​ដែល​និពន្ធ​ដោយ​យុវជន​ខ្មែរ​ដែល​មិនមែន​ជា​អ្នក​អាជីព

១. បទ«No Money» និង «She's the one» ជា​បទចម្រៀង​ភាសា​អង់គ្លេស​លាយ​ខ្មែរ​ចង្វាក់​ហីបហប​របស់​យុវជន​ខ្មែរ​នៅ​កាណាដាតូនី កែវ។ បទ​ទាំង​ពីរ​នេះ ទទួល​បាន​ប្រជាប្រិយភាព​យ៉ាង​ច្រើន​ក្នុង​បណ្តាញ​សង្គម​ហ្វេសប៊ុក និង​យូធូប​នៅ​ចុង​ឆ្នាំ​២០១៤។

បើ​តាម​លោក តូនី កែវ មូលហេតុ​ដែល​លោក​សរសេរ​បទចម្រៀង​ទាំង​ពីរ​នេះ គឺ​ព្រោះ​លោក​ចង់​ចូលរួម​នាំ​យក​បទចម្រៀង​លក្ខណៈ​ហីបហប រ៉េប ឲ្យ​ប្រជាជន​ខ្មែរ​បាន​ស្គាល់ ដ្បិត​លោក​យល់​ថា សម្រាប់​កម្ពុជា បទចម្រៀង​លក្ខណៈ​បែប​នេះ នៅ​ថ្មី​នៅ​ឡើយ​។

លោក តូនី កែវ ក្នុង​សកម្មភាព​ថត​បទចម្រៀង She's the one។
លោក តូនី កែវ ក្នុង​សកម្មភាព​ថត​បទចម្រៀង She's the one។ រូបថត សហការី

លោក តូនី កែវ ម្ចាស់​បទ «No Money» បាន​ឲ្យ​ដឹង​ទៀត​ថា លោក​មិន​នឹក​ស្មាន​ថា បទ​លោក​មាន​ការ​គាំទ្រ​យ៉ាងច្រើន​បែប​នេះ​នោះ​ឡើយ។

លោក​បន្ត​ថា លោក​នឹង​បន្ត​តែង​បទចម្រៀង​ឲ្យ​បាន​ច្រើន​បន្ត​ទៀត និង​សង្ឃឹម​ថា នៅ​ថ្ងៃ​អនាគត​កូនខ្មែរ​ទាំងអស់​មិន​ថា​អ្នក​នៅក្នុង​ស្រុក ឬ​ក្រៅ​ស្រុក​នោះ​ទេ នឹង​បន្ត​ការ​តែង​និពន្ធ​ចម្រៀង​ខ្លួនឯង​មិន​ចម្លង​ពី​បរទេស​ដើម្បី​លើកស្ទួយ​វិស័យ​សិល្បៈ​ស្រុក​ខ្មែរ។

២. បទ«ឈឺ» និង «ភ្លេចខ្លួន» របស់​កញ្ញា​ចិត្ត កញ្ចនា​ដែល​បាន​បង្ហោះ​នៅលើ​យូធូប​នៅ​ចុង​ឆ្នាំ​ ២០១៣។ បទ​ទាំង​ពីរ​នេះ​ហើយ​ដែល​បាន​ធ្វើឲ្យ​កញ្ញា​មាន​ការ​ទទួល​ស្គាល់ និង​ពេញនិយម​ពី​សំណាក់​យុវវ័យ​ខ្មែរ ដោយ​មាន​ចំនួន​អ្នក​ចូល​ទស្សនា​ច្រើន​ជាង​មួយ​ម៉ឺន​ដង។

កញ្ញាចិត្ត កញ្ចនា សព្វថ្ងៃ​នេះ​មាន​អាយុ​ ២១​ឆ្នាំ ក្រៅពី​ចេះ​ច្រៀង កញ្ចនា​ក៏​ចេះ​លេង​ឧបករណ៍​ហ្គីតា​ផង​ដែរ​។ តាំងពី​ឆ្នាំ ​២០១៣ ​មក កញ្ញា​បាន​ផលិត​បទចម្រៀង​ជាច្រើន​បទ ហើយ​បទ​ទាំងនោះ​កញ្ញា​បាន​បង្ហោះ​ក្នុង​គេហទំព័រ​យូធូប។ សម្រាប់​ឆ្នាំ​២០១៤​នេះ កញ្ចនា បាន​និពន្ធចម្រៀង​ចំនួន ​៧​បទ ប៉ុន្តែ​បទ​ដែល​លេចធ្លោ​ជាង​គេ​មាន​ដូចជា «ស្រឡាញ់​បង​លុះ​បេះដូង​អូន​ឈប់​ដើរ» បទ«I Wish» និង​បទ​ «សុំ​បាន​ទេ»។

គួរ​រំព្ញក​ផង​ដែរ​ថា កាលពី​ឆ្នាំ ​២០១៣ កញ្ចនា និង​មិត្តភក្តិ​ផ្សេង​ទៀត បាន​ផលិត​អាល់ប៊ុម​ចម្រៀង​ដោយ​ខ្លួនឯង​ផ្ទាល់​ដែល​មាន​ឈ្មោះ​ថា​ «ដើម្បី​កូនខ្មែរ»​ ក្នុង​គោលបំណង​យក​ប្រាក់​ដែល​បាន​ពី​ការ​លក់ ​CD ​ទៅ​ជួយ​កុមារកំព្រា។ ពេល​នោះ​ CD ​ចំនួន ​១០០០ ត្រូវ​បាន​លក់​ដាច់ ក្នុង​តម្លៃ​ ១០០០០ ​រៀល​ក្នុង​មួយ​បន្ទះ។

កញ្ចនា បាន​ពោល​ថា នាង​មាន​ការ​សប្បាយ​ចិត្ត​យ៉ាងខ្លាំង​ដែល​ឃើញ​មិត្តយុវវ័យ​គាំទ្រ​បទចម្រៀង​របស់​នាង ហើយ​នាង​រឹតតែ​សប្បាយ​ចិត្ត​លើស​នេះ​ទៀត ដែល​ឃើញ​មាន​ការ​រីក​ដុះដាល​នូវ​បទចម្រៀង​របស់​កូនខ្មែរ​ដែល​មិន​ចម្លង​ពី​បរទេស។ នាង​សង្ឃឹម​ថា យុវជន​ខ្មែរ​នឹង​ងាក​មក​គាំទ្រ​នូវ​ស្នាដៃ​ចម្រៀង​របស់​កូនខ្មែរ​កាន់តែ​ច្រើន​ឡើងៗ នឹង​លែង​មាន​ការ​ចម្លង​បទ​ពី​បរទេស​តទៅទៀត។

កញ្ញា ចិត្ត កញ្ចនា ច្រៀង​ក្នុង ពិធី​សម្ពោធ​ហ្គេម​របស់​ក្រុមហ៊ុន​សប្បាយ។
កញ្ញា ចិត្ត កញ្ចនា ច្រៀង​ក្នុង ពិធី​សម្ពោធ​ហ្គេម​របស់​ក្រុមហ៊ុន​សប្បាយ។ រូបថត សហការី

៣. បទ «ឱ​ទង់ជាតិ​ខ្មែរ» ​របស់​ក្រុម Small World Small Band។ បទ​នេះ​ត្រូវ​បាន​និពន្ធ​នៅ​ចុង​ឆ្នាំ ​២០១៣​ ហើយ​មាន​ការ​ទទួល​ស្គាល់​យ៉ាងខ្លាំង​ពី​សំណាក់​យុវវ័យ​ទាំង​ក្នុង​បណ្តាញ​យូធូប និង​នៅ​សង្គម​ខាង​ក្រៅ។

បើ​តាម​លោក រៀម សុខភិរម្យ ជា​សមាជិក​ម្នាក់​របស់​ក្រុម Small World Small Band លោក​មាន​ចិត្ត​សប្បាយ​រីករាយ​ដែល​ឃើញ​កូនខ្មែរ​ឥឡូវ​ងាក​មក​គាំទ្រ និង​ឲ្យ​តម្លៃ​លើ​វិស័យ​ចម្រៀង​របស់​ជាតិ។

លោក​ថា កាលពី​ឆ្នាំ​២០១២ ឬ​២០១៣ ម្នាក់ៗ​មាន​បទ​របស់​ខ្លួនឯង​តែ​មួយ​ទេ។ ដោយឡែក​នៅ​ឆ្នាំ​២០១៤​វិញ លោក​សង្កេត​ឃើញ​ថា អ្នក​ទាំងនោះ​ចាប់ផ្តើម​បន្ត​និពន្ធ​បទចម្រៀង​របស់​ខ្លួន​ច្រើន​ឡើងៗ ដោយ​អ្នក​ខ្លះ​អាច​មាន​ដល់​ទៅ​ ៤ ឬ​ ៥​ បទ។

សម្រាប់​ឆ្នាំ​២០១៤​នេះ​ដែរ​ក្រុម​របស់​លោក​មាន​ចម្រៀង​ចំនួន​ពីរ​បទ​គឺ​បទ​«ស្នេហ៍​ជា​អ្វី?» និង​«បទ​ស្នេហ៍​៩»​ដែល​ត្រូវ​បាន​ដាក់​បញ្ចូល​ទៅក្នុង​កម្មវិធី​ទូរទស្សន៍​អប់រំ «ស្នេហ៍​ ៩»​ ដែល​ជា​គម្រោង​របស់ BBC Media Action។

ក្រៅតែ​ពី​បទចម្រៀង​ដែល​បាន​រៀបរាប់​ខាងលើ នៅ​មាន​បទចម្រៀង​ដែល​តែង​និពន្ធ​ថ្មីៗ​មិន​ចម្លង​ពី​បរទេស​របស់​យុវជន​ខ្មែរ​ជាច្រើន​ទៀត​ដែល​ទទួល​បាន​ប្រជាប្រិយភាព​ខ្លាំង​ពី​សំណាក់​យុវវ័យ​ទាំង​ក្នុង​គេហទំព័រ​យូធូប និង​ក្នុង​សង្គម​ខាង​ក្រៅ។

ក្នុង​ចំណោម​នោះ​គេ​ឃើញ​មាន​ដូចជា​បទ «អារម្មណ៍​ត្រូវការ​អូន»​របស់​ណូលីថែម (Noly time)​ ដែល​មាន​ចំនួន​អ្នក​ទស្សនា​ជាង​ ៧​ ម៉ឺន​ដង បទ «មា្នក់ឯង​រហូត​ឬ Forever Alone» របស់​សក្កដា ​(Sakada) ដែល​មាន​ចំនួន​អ្នក​ទស្សនា​ជាង​១០​ម៉ឺន​ដង បទ​របស់​សីហា ហា (Seyha Ha) «អូនអ៊ូក» មាន​ចំនួន​អ្នក​ទស្សនា​ជាង​ ១៨ ​ម៉ឺន​ដង និង​បទ «វិទ្យាល័យ​ខ្ញុំ» ដែល​មាន​អ្នក​ទស្សនា​ប្រមាណ​ជាង ​៨ ​ម៉ឺន​ដង។ល។

កញ្ញា ម៉េង ម៉ាលីដា ដែល​ជា​អ្នក​និយម​ស្តាប់​បទចម្រៀង​ជា​ភាសាខ្មែរ​កន្លងមក​បាន​និយាយ​ថា ក្នុង​ឆ្នាំ ២០១៤​នេះ កញ្ញា​ឃើញ​មាន​ការ​កើនឡើង​នូវ​បទចម្រៀង​ដែល​កូនខ្មែរ​និពន្ធ​ខ្លួនឯង ហើយ​បង្ហោះ​តាម​បណ្តាញ​សង្គម​ដូចជា​ហ្វេសប៊ុក និង​យូធូប។ ក្នុង​នោះ​កញ្ញា​ចូលចិត្ត​តារាចម្រៀង​នៅ​តាម​យូធូប​ឈ្មោះ​ថាTena ម្ចាស់​បទចម្រៀង​ដែល​មាន​ចំណងជើង​ថា «I smoke because of you» ដែល​បាន​ចេញ​ក្នុង​ឆ្នាំ​ ២០១៤ ​នេះ។

និស្សិត​សាកលវិទ្យាល័យ​បញ្ញាសាស្ត្រ​រូប​នេះ​បាន​និយាយ​ផង​ដែរ​ថា៖ «ផលិតកម្ម​ខ្មែរ​យើង​គួរតែ​នាំគ្នា​ងាក​មក​និពន្ធ​បទចម្រៀង​ខ្លួនឯង​ហើយ​ឈប់​ចម្លង​គេ​ទៀត ត្រូវ​គិត​ថា បើ​ប្រទេស​គេ​ធ្វើ​បាន​យើង​ក៏​ធ្វើ​ដូចគ្នា​ដែរ»។

មិន​ខុស​គ្នា​ប៉ុន្មាន​ដែរ លោក សែម សំណាង និស្សិត​ឆ្នាំ​ទី​បួន​នៅ​សាកលវិទ្យាល័យភូមិន្ទ​កសិកម្ម​បាន​និយាយ​ថា កាលពី​មុន​បទចម្រៀង​ខ្មែរ​គឺ​ចម្លង​ពី​គេ​ទាំង​ដុល​តែម្តង មិន​ថា​ទំនុក​ភ្លេង​ហើយ​សូម្បី​តែ​វីដេអូ​ចម្រៀង​ក៏​ធ្វើ​តាម​គេ​ដែរ។

លោក​និយាយ​ថា ប៉ុន្តែ​ពេល​នេះ ជាពិសេស​ឆ្នាំ​ ២០១៤​ នេះ​តែ​ម្តង លោក​ឃើញ​ថា បទចម្រៀង​ខ្មែរ​ចាប់ផ្តើម​មាន​ការ​និពន្ធ​ខ្លួនឯង​ច្រើន ជាពិសេស​គឺ​យុវវ័យ​ក្មេងៗ​ដែល​ចេះ​សរសេរ​ចម្រៀង​ហើយ​បង្ហោះ​តាម​យូធូប​ចែករំលែក​តគ្នា។

លោក​ថា៖ «ពួកគេ​សុទ្ធតែ​ជា​ក្មេងៗ​ជំនាន់​ក្រោយ​តែ​មាន​សមត្ថភាព​និពន្ធ ចម្រៀង​ខ្លួនឯង​ពិតជា​គួរ​ឲ្យ​កោតសរសើរ​មែន»។

ក្នុង​ចំណោម​បទ​ទាំងនោះ​លោក​ចូលចិត្ត​និង​គាំទ្រ​បទ​និពន្ធ​ខ្លួនឯង​របស់​ក្រុម​សងខៃ (Songkits) គឺ​បទ «Baby I am sorry និង​បទ​របស់​ក្រុម Small world small band «ឱ​ទង់ជាតិ​ខ្មែរ»។

លោក​បាន​សំណូមពរ​ដល់​អ្នក​និពន្ធ​ចម្រៀង​ដទៃៗ​ទៀត​របស់​កម្ពុជា​ថា ​គួរ​ងាក​មក​រក​ការ​ផលិត​បទ​ខ្លួនឯង​វិញ​ល្អ​ជាង​ ដើម្បី​ទុក​ជា​កេរដំណែល​ដល់​កូនខ្មែរ​ជំនាន់​ក្រោយ​កុំ​ឲ្យ​គេ​ថា​បទ​ខ្មែរ​សុទ្ធតែ​លំនាំ​បទ​បរទេស។

កន្លងមក គេ​ឃើញ​មាន​ការ​រៀបចំ​កម្មវិធី​ជា​ហូរហែ​ដើម្បី​លើក​ទឹកចិត្ត និង​ជំរុញ​ឲ្យ​មាន​ការ​តែង​និពន្ធ​បទចម្រៀង ​«Original» ដើម្បី​ចូលរួម​លើកស្ទួយ​វិស័យ​សិល្បៈ​ចម្រៀង​ខ្មែរ​ផង​ដែរ។

ជាក់ស្តែង​កាលពី​ខែ​កុម្ភៈ ឆ្នាំ​២០១៤​កន្លង​ទៅ​ក្រុមហ៊ុន​សប្បាយ​បាន​រៀបចំ​កម្មវិធី​ប្រឡង​ចម្រៀង​ដើម្បី​ជា​ការ​លើក​ទឹកចិត្ត​ក៏ដូចជា​គាំទ្រ​ដល់​យុវជន​ខ្មែរ​ដែល​ចូលចិត្ត​ការ​ច្រៀង និង​តែង​និពន្ធ​ចម្រៀង​ដែល​មាន​ឈ្មោះ​ថា «ស្តាប់​ចម្រៀង​ខ្ញុំ» ឬ «Hear My Songs» រដូវកាល​ទី​ពីរ។ ក្នុង​កម្មវិធី​នោះ​ដែរ​គេ​ជ្រើសរើស​បាន​ជ័យលាភី​លេខ​មួយ​ដល់​លេខ​ បី ដែល​បាន​ទទួល​ប្រាក់​រង្វាន់​ចាប់ពី​ ១០០០ ដល់​ ៣០០០ ​ដុល្លារ សហរដ្ឋអាមេរិក​ជាមួយ​នឹង​កុងត្រា​រយៈពេល​មួយ​ឆ្នាំ​ធ្វើ​ជា​អ្នក​ចម្រៀង​ឲ្យ​ក្រុមហ៊ុន​សប្បាយ។

មិន​តែ​ប៉ុណ្ណោះ​នៅ​ពាក់កណ្តាល​ខែ​មីនា ឆ្នាំ​២០១៤​មាន​ការ​សម្ពោធ​ជា​ផ្លូវការ​នូវ​ការ​លក់​អាល់ប៊ុម​ចម្រៀង​ដែល​មាន​ឈ្មោះ​ថា សងខៃ (Songkites)។ សងខៃ (Songkites) ជា​ក្រុម​តន្ដ្រីករ​យុវជន​សម័យ​ថ្មី​បាន​បង្កើត​ស្នាដៃ​អាល់ប៊ុម​ចម្រៀង​លើក​ដំបូង​ដោយ​ខ្លួនឯង​ដែល​មិន​ចម្លង​ពី​បរទេស​ទេ។ អាល់ប៊ុម​ដំបូង​របស់​ Songkites​ ទាំងអស់​មាន​ចំនួន ​១៣​ បទ។ ក្នុង​ចំណោម​នោះ​បទ​ដែល​លេចធ្លោ​រួមមាន​បទ​របស់​លោក សារុន កល្យាណ (Jimmy Kiss) «Baby I am sorry» និង​បទ​របស់​កញ្ញា​នីគី នីគី (Nikki Nikki) «Home for dinner»។

ជាមួយ​គ្នា​នេះ​ដែរ លោក ស៊ិន ច័ន្ទសាយ៉ា ប្រធាន​នាយកដ្ឋាន​ភាពយន្ត និង​ផ្សព្វផ្សាយ​របស់​ក្រសួង​វប្បធម៌ និង​វិចិត្រ​សិល្បៈ បាន​កោតសរសើរ​ពី​ឆន្ទៈ​របស់​យុវជន​ខ្មែរ​ដែល​មិនមែន​ជា​អ្នកចម្រៀង​អាជីព​ទាំងនោះ ដែល​បាន​ខិតខំ​និពន្ធ​បទ​របស់​ខ្លួន​មិន​ចម្លង​ពី​បរទេស។

លោក​បាន​និយាយ​ថា៖ «នេះ​ជា​ការ​ចូលរួម​លើកស្ទួយ​វិស័យ​ចម្រៀង​នៅ​កម្ពុជា បើ​ទោះបី​ពួកគេ​មិនមែន​ជា​អ្នក​ចម្រៀង​អាជីព​ក៏ដោយ»។

លោក សាយ៉ា ពោល​ថា កន្លងមក​ខាង​ក្រសួង​វប្បធម៌ និង​វិចិត្រ​សិល្បៈ មិន​មាន​ការ​ត្រួតពិនិត្យ​នោះ​ទេ​នូវ​រាល់​បទចម្រៀង​ដែល​ត្រូវ​បាន​និពន្ធ និង​លក់​ក្នុង​ស្រុក​។​

លោក​បន្ត​ថា ការ​លួចចម្លង​បទ​ពី​បរទេស​ទៀត​សោតក៏​ជា​ប្រពៃណី​ទៅ​ហើយ​សម្រាប់​កម្ពុជា​។

ខណៈ​នេះ​ដែរ លោក​ក៏​បាន​សម្តែង​ការ​អបអរសាទរ​ថា ការ​ផុសផុល​ឡើង​នូវ​ការ​តែងនិពន្ធ​របស់​យុវជន​ជំនាន់​ក្រោយ​សព្វថ្ងៃ​នេះ​ គឺជា ​ចរន្ត​មួយ​ដែល​អាច​ជំរុញ​ឲ្យ​មាន​ការ​គាំទ្រ​ពី​សំណាក់​មហាជន និង​ជា​ការ​ជំរុញ​មួយ​ដែរ​ដល់​អ្នក​និពន្ធ​ដទៃ​ទៀត​ ឲ្យ​ងាក​មក​ផលិត​បទ​ដោយ​ខ្លួនឯង​វិញ នៅពេល​ដែល​ស្ថិត​ក្រោម​សម្ពាធ​នៃ​ការ​រិះគន់​នានា៕

អត្ថបទគួរចាប់អារម្មណ៍