The Phnom Penh Post Search

Search form




Logo of Phnom Penh Post newspaper Phnom Penh Post - កាហ្វេ​ជួយ​កាត់​បន្ថយ​ជំងឺ​បេះដូង និង​ប្រព័ន្ធ​ប្រសាទ

កាហ្វេ​ជួយ​កាត់​បន្ថយ​ជំងឺ​បេះដូង និង​ប្រព័ន្ធ​ប្រសាទ

Content image - Phnom Penh Post
ការ​សិក្សា​មួយ​នៅ​អាមេរិក​ រក​ឃើញ​ថា អ្នក​ទទួល​ទាន​កាហ្វេ​លើស ៣​ពែង មិន​ងាយ​ប្រឈម​នឹង​ជំងឺ​បេះដូង និង​ប្រព័ន្ធ​ប្រសាទ។ bloomberg

កាហ្វេ​ជួយ​កាត់​បន្ថយ​ជំងឺ​បេះដូង និង​ប្រព័ន្ធ​ប្រសាទ

ម៉ៃអាមី៖ ក្រុមអ្នក​ស្រាវ​ជ្រាវ​របស់​សហរដ្ឋ​អាមេរិក បាន​ឲ្យ​ដឹង​ថា​ មនុស្ស​ពិសារ ​កាហ្វេ​ពី​ ៣ ទៅ​ ៥​ ពែង​ក្នុង​មួយ​ថ្ងៃ​​ប្រឈម​មុខ​កាន់​តែ​តិច​ទៅ​នឹង​ការ​ស្លាប់​ដោយសារ​ជំងឺ​បេះដូង ការ​ធ្វើ​អត្តឃាត រោគ​ទឹក​នោម​ផ្អែម ឬ​ ជំងឺ​កន្ត្រាក់​សរសៃ។

ការ​សិក្សា​ស្រាវជ្រាវ​ធ្វើ​ឡើង​ដោយ​ក្រុម​អ្នក​ស្រាវ​ជ្រាវ​នៅ​មហា​វិទ្យាល័យ​សុខភាព​សាធារណៈ នៃ​សាកល​វិទ្យាល័យ Havard នៅក្នុង​ព្រឹត្ត​ប័ត្រ​ Circulation កាល​ពី​ថ្ងៃ​ទី១៦ ខែ​វិច្ឆិកា ​បាន​បង្ហាញ​ថា ​ប្រភេទ​​កាហ្វេ​ដែល​មាន និង​គ្មាន​សារធាតុ​កាហ្វេអ៊ីន សុទ្ធតែ​មាន​ប្រយោជន៍​សម្រាប់​សុខភាព។

ការ​សិក្សា​នេះ​ បាន​ប្រៀប​ធៀប​អ្នក​ដែល​មិន​ទទួល​ទាន​កាហ្វេ ឬ​ទទួល​ទាន​តិច​ជាង​ ២​​ ពែង​ក្នុង​មួយ​ថ្ងៃ ជាមួយ​​អ្នក​​ទទួល​ទាន​​កាហ្វេលើស​ពី ២​ ពែង​ ​ដល់​ ៥ ​​ពែង​ក្នុង​មួយ​ថ្ងៃ។

ការ​សិក្សា​ស្រាវជ្រាវ​នេះ​ មិន​បាន​បង្ហាញ​ឲ្យ​ឃើញ​ផល​ប៉ះ​ពាល់​បណ្ដាល​មក​ពី​​​ការ​ទទួល​ទា​ន​កាហ្វេ​ និង​ការ​ធ្លាក់​ចុះ​នៃ​ជំងឺ​ណា​មួយ​នោះ​ឡើយ ប៉ុន្តែ បាន​រក​ឃើញ​នូវ​ទំនាក់​ទំនង​​ច្បាស់​លាស់​មួយ​ដែល​​ស្រប​នឹង​ការ​សិក្សា​មុនៗ និង​អ្វី​ដែល​អ្នក​វិទ្យាសាស្ត្រ​ចង់​សិក្សា​បន្ថែម​ទៀត។

លោក Ming Ding ជានិស្សិត​ថ្នាក់​បណ្ឌិត​នៅ​ដេប៉ាតឺ​ម៉​ងត៍​អាហារូបត្ថម្ភ​ និង​ជា​អ្នក​សរសេរ​របាយការណ៍​សិក្សា​​​នេះ បាន​និយាយ​ថា៖ «សមាសធាតុ​ជីវសកម្ម​មាន​នៅ​ក្នុង​កាហ្វេ​ ជួយ​កាត់បន្ថយ​​កម្រិត​នៃការ​ធន់​របស់​អាំង​ស៊ុយ​លីន និង​ការ​រលាក​ជា​ប្រព័ន្ធ​នៅ​ក្នុង​រាងកាយ។ វា​អាច​ពន្យល់​បាន​ខ្លះ​អំពី​របក​គំហើញ​របស់​យើង។ ទោះជាយ៉ាងណា គេ​ចាំ​បាច់​ត្រូវ​សិក្សា​បន្ថែម​ទៀត​ដើម្បី​ពិនិត្យ​មើល​សិរីរាង្គ​ជីវសាស្ត្រ​ដែល​បង្កើត​ផល​ប៉ះ​ពាល់​ទាំង​នេះ»។

ការ​សិក្សា​នេះ មិន​បាន​រក​ឃើញ​សមាសធាតុ​ប្រឆាំង​នឹង​ជំងឺ​មហា​រីក​នោះ​ឡើយ។ ការ​ស្រាវ​ជ្រាវ​មុនៗ​មួយ​ចំនួន បាន​ចង្អុល​បង្ហាញ​ពី​ទំនាក់​ទំនង​រវាង​ការ​ពិសារ​កាហ្វេ និងឱកាស​ទាប​នៃ​ជំងឺ​មហា​រីក។

Content image - Phnom Penh Post
របាយការណ៍​ស្រាវជ្រាវ​បង្ហាញ​ថា ពិសារ​កាហ្វេ​លើស ៣​ពែង ជួយ​កាត់​បន្ថយ​ឱកាស​ស្លាប់​កាន់​តែ​ទាប។ bloomberg

ការសិក្សា​ស្រាវជ្រាវ​នេះ​ ផ្អែក​ទៅ​លើ​ទិន្នន័យ​​ទទួល​បាន​ពី​ការ​ស្ទង់​មតិ​លើ​សំណាក់ ៣​ក្រុម រួម​ទាំង​ក្រុម​គិលានុបដ្ឋាយិកា​ប្រហែល ៣​​ សែន​នាក់ និង​អ្នក​ជំនាញ​ផ្នែក​សុខាភាព​ដទៃ​ទៀត ដែល​បាន​យល់​ព្រម​ឆ្លើយ​សំណួរ​អំពី​ស្ថានភាព​សុខាភាព​ និង​ទម្លាប់​ផ្ទាល់​ខ្លួន​របស់​ពួកគេ​នៅ​ក្នុង​រយៈ​ពេល ៣០​ ឆ្នាំ​កន្លង​មក។

លទ្ធផល​នៃ​ការ​ស្រាវជ្រាវ​ បាន​បង្ហាញ​ថា៖ «នៅ​ក្នុង​ចំណោម​សំណាក​ទាំង​អស់ ការទទួល​ទាន​កាហ្វេ​ក្នុង​បរិមាណ​មធ្យម មាន​ទំនាក់​ទំនង​ជាមួយ​នឹង​ការ​កាត់​បន្ថយ​ឱកាស​កើត​ជំងឺ​បេះ​ដូង រោគ​ទឹក​នោម​ផ្អែម និងជំងឺ​ប្រព័ន្ធ​ប្រសាទ​ផ្សេងៗ ​ដូច​ជា ​ជម្ងឺ​សរសៃរ​កន្ត្រាក់ និង​ការ​ធ្វើ​អត្តឃាត»។

ក្រុម​អ្នក​ស្រាវ​ជ្រាវ​ ក៏​បាន​ពន្យល់​ពី​កត្តា​ពាក់​ព័ន្ធ​សំខាន់ៗ​ដូចជា ជក់​បារី ទម្ងន់ ការ​ធ្វើ​លំហាត់​ប្រាណ ការ​ទទួល​ទាន​គ្រឿង​ស្រវឹង និង​របប​អាហារ​ប្រចាំ​ថ្ងៃ។ ប៉ុន្តែ ការ​ពិត​គឺ​ថា ការ​ស្រាវ​ជ្រាវ​ដែល​ផ្អែក​លើ​ការ​ស្ទង់​មតិ​តាម​វិធី​រាយការណ៍​អំពី​ខ្លួន​ឯង​នេះ អាច​បង្ក​ឲ្យ​មាន​ចំណោទ​អំពី​ទំនុក​ចិត្ត​របស់​វា។

អ្នក​ជំនាញ​ ក៏​បាន​ព្រមាន​ថា កាហ្វេ​ដែល​មនុស្ស​ជា​ច្រើន​ទទួល​ទាន​ជា​ប្រចាំ មិន​មែន​សុទ្ធ​តែ​មាន​គុណ​ប្រយោជន៍​សម្រាប់​មនុស្ស​គ្រប់​គ្នា​នោះឡើយ។

លោក Frank Hu ជា​សាស្រ្តចារ្យ​ផ្នែកការ​សិក្សា​អាហារូបត្ថម្ភ និង​ជម្ងឺ​ឆ្លង​នៅ​សាកល​វិទ្យាល័យ Harvard បាន​និយាយ​ថា៖ «ការទទួល​ទាន​កាហ្វេ​ជា​ប្រចាំ​ អាច​ចាត់​ទុក​ជា​ផ្នែក​មួយ​នៃ​របប​អាហារ​ប្រកប​ដោយ​សុខភាព។ ទោះជាយ៉ាងណា មនុស្ស​មួយ​ចំនួន​ទៀត ​ដូច​ជា​ ស្ត្រី​មាន​ផ្ទៃពោះ និង​កុមារ ​គួរ​​ប្រុង​ប្រយ័ត្ន​ចំពោះ​​បរិមាណ​​កាហ្វេអ៊ីន​ខ្ពស់​នៅ​ក្នុង​កាហ្វេ ឬ​ភេសជ្ជៈ​ដទៃ​ទៀត»៕​

AFP/ប្រែ​សម្រួល​ដោយ តាំង រីនិត្យ

អត្ថបទគួរចាប់អារម្មណ៍