The Phnom Penh Post Search

Search form

Logo of Phnom Penh Post newspaper Phnom Penh Post - ដំណើរ​កម្សាន្ត​ទៅកាន់​កោះ​តៅ​នៃ​ប្រទេស​ថៃ




ដំណើរ​កម្សាន្ត​ទៅកាន់​កោះ​តៅ​នៃ​ប្រទេស​ថៃ

Content image - Phnom Penh Post

ដំណើរ​កម្សាន្ត​ទៅកាន់​កោះ​តៅ​នៃ​ប្រទេស​ថៃ

សុភាសិត​បរទេស​មួយ​បាន​ពោល​ថា ពិភពលោក​នេះ​ដូចជា​សៀវភៅ​មួយ​ក្បាល​អ៊ីចឹង អ្នក​ដែល​មិន​បាន​ធ្វើ​ដំណើរ គឺ​ហាក់​បីដូចជា​បាន​អាន​តែ​មួយ​ទំព័រ​ប៉ុណ្ណោះ​នៃ​សៀវភៅ​នោះ។ ព្រះតេជគុណ​ដាឡៃឡាម៉ា ក៏​ធ្លាប់​ពោល​ដែរ​ថា ម្តង​ក្នុង​មួយ​ឆ្នាំ គេ​គួរ​ធ្វើ​ដំណើរ​ទៅកាន់​ទីកន្លែង​ណា​មួយ​ដែល​គេ​មិន​ធ្លាប់​ទៅ។

ដោយសារ​តែ​យល់ឃើញ​ដូចនេះ​ហើយ ទើប​កញ្ញា​ មួង វណ្ណឌី តែងតែ​ព្យាយាម​ឆ្លៀត​ឱកាស​នានា​ដើម្បី​បាន​ទៅ​ដើរកម្សាន្ត​នៅ​កន្លែង​ថ្មីៗ​ដែល​នាង​ពុំ​ធ្លាប់​បាន​ទៅ។ ពេលនេះ​នាង​បាន​ស្ម័គ្រចិត្ត​ចែករំលែក​ពី​បទពិសោធ​ខ្លះៗ ក្នុង​ដំណើរកម្សាន្ត​របស់​នាង​នៅ ប្រទេស​ថៃ។

ភាគច្រើន​នៃ​ប្រជាពលរដ្ឋ​ដែល​ទៅ កម្សាន្ត​នៅ​ប្រទេស​ថៃ​​​តែងតែ​មិន​រំលង​ទេ ពី​ការដើរ​ផ្សារ​​នៅ​ទីនោះ ព្រោះ​ថា វា​គឺជា​កន្លែង​​មួយ​អស្ចារ្យ​ណាស់​សម្រាប់​អ្នក​ដែល​ចូលចិត្ត​ដើរ​ទិញ​ទំនិញ​ដូចជា​សម្លៀកបំពាក់​ស្បែកជើង​ និង​គ្រឿង​អលង្ការ​ផ្សេងៗ។ គេ​អាច​នឹង​ឈ្លក់វង្វេង​ទៅ​​នឹង​ការដើរ​ជ្រើសរើស​នៅក្នុង​ផ្សារ ព្រោះ​ផ្សារ​នីមួយៗ គឺ​ពោរពេញ​ទៅ​ដោយ​ទំនិញ​គ្រប់​ប្រភេទ។ ប៉ុន្តែ​បើ​អ្នកអផ្សុក ហត់នឿយ​នឹង​ការដើរ​ហាង ហើយ​ចង់ផ្លាស់ប្តូរ​បរិយាកាស ទៅ​ទីកន្លែង​ដែល​អ្នក​អាច​លម្ហែកាយ នៅ​ប្រទេស​ថៃ​មាន​​កន្លែង​ច្រើន​ដែល​ត្រូវ​ទៅ។

តំបន់​កោះតៅ (Koh Tao Island) ឋានសួគ៌​លើ​ផ្ទៃ​សមុទ្រ​ដោយ​បន្ត​ដំណើរ​តាម​រថយន្ត​ក្រុង អស់​រយៈពេល ៨ ម៉ោង​ពី​ទីក្រុង​បាងកក ខេត្ត Chumphon ជា​ខេត្ត​ប្រជុំ​កោះ​នៅលើ​ឆ្នេរសមុទ្រ​ភាគ​ខាង​លិច​នៃ​ឈូងសមុទ្រ និង​ជា​ទី​ចំណត​មួយ​សម្រាប់​បន្ត​ឆ្លង​ទៅ​កោះ​ផ្សេងៗ​តាម​កប៉ាល់ ដូចជា​កោះ​ណាងយួន (Koh Nang Youn) កោះតៅ(Koh Tao) កោះ​ផាងាង( Koh Pha Ngan) កោះ​សាមុយ (Koh Samui) និង​កោះ​ដទៃ​ទៀត​នៅ​ក្បែរៗ​នោះ។

ភ្ញៀវទេសចរ​សម្រាក​ហាលថ្ងៃ​​​​នៅ​កោះ​តៅ។
ភ្ញៀវទេសចរ​សម្រាក​ហាលថ្ងៃ​​​​នៅ​កោះ​តៅ។ រូបថត មួង វណ្ណឌី

ដើម្បី​បន្ត​ដំណើរ​ទៅ​ដល់​កោះ​តៅ គឺ​គេ​ត្រូវ​ចំណាយ​រយៈពេល​ពីរ​ម៉ោង​កន្លះ ពី​កន្លែង​ចំណត​កប៉ាល់​នីមួយៗ។

គេ​ក៏​អាច​ជ្រើសរើស​វិធី​ដ៏ងាយ គឺ​តាម​​យន្តហោះ​ពី​ទីក្រុង​បាងកក​មក​ដល់​​កោះ​សាមុយ ដែល​ជា​កោះ​នៅ​ក្បែរ​កោះតៅ ដោយ​ចំណាយ​ត្រឹមតែ​រយៈពេល​ពីរ​ម៉ោង ហើយ​បន្ត​ពី​កោះ​សាមុយ​តាមរយៈ​កប៉ា់ល់ ឬ​ទូក​ទៅ​ដល់​កោះ​តៅ​ជា​ការស្រេច។

ទស្សនីយភាព​លើ​គោក និង​ក្នុង​ទឹក ទាំង​ខ្សាច់ សមុទ្រ និង​ទឹកសមុទ្រ សុទ្ធសឹង​តែ​ជា​កន្លែង​ធម្មជាតិ​ដែល​យើង​មិន​អាច​រំលង​បាន​ដូចជា ឆ្នេរ​សន្តិភាព ​(Freedom Beach) ដែល​ជា​ឆ្នេរ​សាធារណៈ​សម្រាប់​មនុស្ស​គ្រប់រូប​​ចូល​​ទៅ​​​​ហាល​ថ្ងៃ​លើ​ខ្សាច់​ម៉ដ្ត​ពណ៌ស ហែល​​ទឹក​មើល​​សត្វសមុទ្រ​ដ៏សម្បូរបែប។ ចំណែក​ឆ្នេរ​សាយរៀ (Sairee Beach) ​​ជា​ឆ្នេរ​​​​សាធារណៈ​ដែល​មាន​មនុស្ស​ទៅ​ច្រើន​​ដោយសារ​តែ​មាន​កន្លែង​ធំ​សម្រាប់​សម្រាក​​តាម​មាត់ឆ្នេរ ជិះ​កាណូត ម៉ូតូទឹក​​កម្សាន្ត ស្តាប់​ភ្លេង និង​ទស្សនា​ការសម្តែង​​គ្រវី​ភ្លើង​នៅពេល​រាត្រី និង​មាន​​ឆ្នេរ​ឯកជន​ជាច្រើន​ទៀត​ដែល​ភ្ញៀវទេសចរ​ត្រូវ​បង់​ថវិកា​ដើម្បី​ចូល​ទស្សនា​​ (១ នាក់ ២០០ បាត)។

នៅលើ​កោះ​នេះ​​​មាន​ភ្ញៀវ អន្តរជាតិ​ជាង​ ៨០ ​ភាគរយ លើកលែង​អ្នក​ដែល​ជា​ម្ចាស់​ស្រុក និង​អ្នក​មក​ប្រកប​ការងារ​តែ​ប៉ុណ្ណោះ ដែល​មាន​​ដូចជា​ជនជាតិ​ថៃ មីយ៉ាន់ម៉ា និង​ឡាវ​។

ការស្នាក់នៅ​លើ​តំបន់​កោះ​តៅ

យើង​អាច​ជ្រើសរើស​ការស្នាក់នៅ​តាម​​បែប​ស្ងប់ស្ងាត់ និង​អ៊ូអរ​បាន។ នៅ​ទីនោះ​មាន​កន្លែង​ស្នាក់នៅ​ដូចជា​បន្ទប់​នៅក្នុង​វីសត​បន្ទប់​ជា​អ្នកដើរ​ទេសចរ (Backpacker) និង​បន្ទប់​ជា​គ្រួសារ​ក្នុង​ផ្ទះវីឡា​នីមួយៗ​នៅលើ​តំបន់​ភ្នំ។ សម្រាប់​ការជ្រើសរើស​រស់​នៅក្នុង​បន្ទប់ វីឡា​គឺ​ពិតជា​មាន​ផាសុកភាព​ខ្លាំង​ណាស់ ព្រោះ​ថា​យើង​អាច​ធ្វើ​ពិធី​ជប់លៀង​ជាមួយ​​មិត្តភក្តិ និង​ក្រុម​​គ្រួសារ​ទស្សនា​ថ្ងៃរះ ថ្ងៃលិច ហើយ​ថែម​ទាំង​មាន​​នៅ​អាង​ហែលទឹក​ដ៏ស្រស់ស្អាត​​​នៅ​ខាង​មុខ​វីឡា​ផង​ដែរ។​ ប៉ុន្តែ​ប្រាកដ​​ណាស់​តម្លៃ​ពិតជា​ខ្ពស់។

​សម្រាប់​តម្លៃ​ក្នុង​ការស្នាក់​នៅក្នុង​​វីឡា​ដែល​មាន​ចំនួន​ពីរ​បន្ទប់ និង​បន្ទប់ទឹក ចង្រ្កោនបាយ អាងហែលទឹក និង​សួនច្បារ​នៅ​ជុំវិញ​នោះ គែ​ត្រូវ​ចំណាយ​ចាប់ពី ៣០០០ ​​​បាត ( ១០០ ដុល្លារ) ​ទៅ ៣០ ០០០ បាត ( ១០០០ ដុល្លារ ) ទៅ​តាម​រចនាប័ទ្ម និង​ចម្ងាយ​ទីកន្លែង។

សម្រាប់​បន្ទប់​នៅ​តាម​ឆ្នេរ​ឯកជន​មួយ​ចំនួន​គឺ​មាន​តម្លៃ​ទៅ​ដល់ ៧៥ ០០០ ​បាត (២៥០០ ដុល្លារ) ក្នុង​មួយ​យប់​ក៏​មាន។ ក្រៅពី​នេះ​​ក៏​នៅ​មាន​បន្ទប់​ដែល​មាន​តម្លៃ​ពី​ ៦០០ បាត ទៅ​ ១០០០ បាត​ដែរ ប៉ុន្តែ​វា​​ស្ថិត​នៅ​ឆ្ងាយ​ពី​ឆ្នេរសមុទ្រ និង​ទីប្រជុំជន។

កន្លែង​លម្ហែកាយ​នៅលើ​កោះ​តៅ។
កន្លែង​លម្ហែកាយ​នៅលើ​កោះ​តៅ។ រូបថត មួង វណ្ណឌី

មធ្យោបាយ​ធ្វើ​ដំណើរ​នៅលើ​កោះ

ការធ្វើដំណើរ​ទៅ​ណា​មក​ណា​នៅ​តំបន់​​លើ​កោះ​តៅ​នេះ​គឺ​ត្រូវ​ចំណាយ​ច្រើន ប្រសិន​ជា​យើង​មិន​ជួល​យានជំនិះ​ផ្សេងៗ។ មិន​ថា​យើង​មិន​ថា​គេ នៅពេល​​​​ដែល​ទៅ​ដល់​ទី​នោះ​គឺត្រូវ ជួល​យានជំនិះ​ដូចជា​​ម៉ូតូ​តាម​ធុន តែ​ភាគច្រើន​ជា​ម៉ូតូ អូតូ​ពីព្រោះ​វា​ងាយស្រួល​ក្នុង​ការធ្វើ​ដំណើរ​ឡើង​ចុះ​ភ្នំ​ពី​កន្លែង​មួយ​ទៅ​កន្លែង​​មួយ។ សម្រាប់​ម៉ូតូ​ទាំងនោះ​មាន​តម្លៃ​ជួល​មិន​សូវ​ជា​ថ្លៃ​ប៉ុន្មាន​ទេ ដោយ​តម្លៃ​ចាប់ពី ១០០ ​បាត ទៅ ៥០០ បាត​សម្រាប់​មួយ​ថ្ងៃ​ទៅ​តាម​ប្រភេទ ម៉ូតូ​ ( ១០ បាត= ១ ២០០ រៀល) ប៉ុន្តែ​បើ​យើង​​ជិះ​ឡាន​តាក់ស៊ី តែ​ម្តង​គឺ ចំណាយ​អស់ ១០០០ បាត។ ដូច្នេះ ការជួល​ម៉ូតូ​ជិះ​ខ្លួនឯង​ប្រកប​ដោយ​ការប្រុងប្រយ័ត្ន​គឺ​ជា​ជម្រើស​ដ៏ត្រឹមត្រូវ​បំផុត​សម្រាប់​ដំណើរ​កម្សាន្ត​នេះ។

តំបន់​នៅក្នុង​ផ្ទៃទឹក​បាតសមុទ្រ

ការមុជទឹក​ចូល​ទៅក្នុង​បាតសមុទ្រ​មិនមែន​ជា​ការងាយ​នោះ​ទេ​បើសិន​ជា​យើង​មិន​ចេះ​ហែល​ទឹក និង​មិន​មាន​ឧបករណ៍​ត្រឹមត្រូវ​ពីព្រោះ​សកម្មភាព​ទាំងនេះ​គឺ​ត្រូវការ​មាន​បច្ចេកទេស​មុជ​ទៅ​ជ្រៅ​បាតសមុទ្រ​ដើម្បី​ទស្សនា​សត្វសមុទ្រ​ដូចជា​ត្រីសមុទ្រ​ផ្កាថ្ម​ជាដើម។ អ្នក​ដែល​មិនមាន​បទពិសោធ ក្នុង​ការមុជ​មើល​សត្វសមុទ្រ​នឹង​មាន​អារម្មណ៍​ភ្ញាក់ផ្អើល និង​រន្ធត់​ជា​ខ្លាំង​នៅពេល​ដែល​ឃើញ​សត្វ​ទាំងនោះ​មាន​ចលនា​នៅក្នុង​ទឹក​ជម្រៅ​ជ្រៅ។

តំបន់​មាត់ឆ្នេរ​នៅលើ​កោះ​តៅ

តំបន់​មាត់ឆ្នេរ​សម្បូរ​ទៅ​ដោយ​ជនជាតិ​បរទេស​ស្បែកស​គេង​ហាលថ្ងៃ​ជាច្រើន​ដើម្បី​ធ្វើឲ្យ​មាន​ការប្រែប្រួល​សម្បុរ​ទៅ​ជា​សម្បុរ​អាស៊ី​នៅ​ថ្ងៃ​ឈប់​សម្រាក។ នៅលើ​ឆ្នេរសមុទ្រ​ទាំង​សាធារណៈ និង​ឯកជន​យើង​អាច​ហាលថ្ងៃ​នៅលើ​ខ្សាច់​ពណ៌ស​ស្អាត​ មើល​សៀវភៅ ឬ​ចុះ​ងូត​ក្នុង​ទឹកថ្លា​ពណ៌​ទឹកសមុទ្រ និង​ញុំា​អាហារ ឬ​ភេសជ្ជៈ។

នៅពេល​ព្រលប់

នៅពេល​ព្រលប់​បន្ទាប់ពី​គេង​ហាល​ថ្ងៃ មុជទឹក​បាតសមុទ្រ មើល​សត្វ​សមុទ្រ ងូតទឹក​នៅ​តាម​ឆ្នេរសមុទ្រ​នានា​យើង​សង្កេត​ឃើញ​ថា​ភ្ញៀវទេសចរ​បាន​ដើរ​នៅ​តាម​ដងផ្លូវ​ជាច្រើន​តម្រង់​ទៅ​ភោជនីយដ្ឋាន​តាម​មាត់ឆ្នេរ​ដើម្បី​ស្រស់ស្រូប​អាហារ​ពេល​ល្ងាច​ទៅ​តាម​ចំណង់ចំណូលចិត្ត។ យើង​អាច​ចេញ​ទៅ​ញុំា​អាហារ​ពេល​ល្ងាច​នៅ​តាម​ភោជនីយដ្ឋាន​តាម​ឆ្នេរសមុទ្រ​ស្តាប់​សំឡេង​ទឹកសមុទ្រ​ជាមួយ​ខ្យល់​ធម្មជាតិ មើល​របាំ​គ្រវី​ភ្លើង​​នៅលើ​វាលខ្សាច់ និង​នៅលើ​ថ្ម ហើយ​យើង​អាច​រីករាយ​ជាមួយ​នឹង​ការភ្លក្ស​ស្រាក្រឡុក និង​ការលេងភ្លេង​តន្ត្រី​ផ្ទាល់​នៅ​ទីនោះ​ផង​ដែរ។

ទោះបី​ជា​យើង​បាន​ចំណាយ​ពេល​មក​កម្សាន្ត​នៅ​ទីនេះ​អស់ រយៈពេល​ជិត​មួយ​សប្តាហ៍​ទៅ​កន្លែង​ប្លែកៗ​ដូច​ដែល​យើង​បាន​រៀបរាប់​ខាងលើ ក៏​នៅ​មាន​កន្លែង​ធម្មជាតិ​ជាច្រើន​ទៀត​នៅលើ​ដី​កោះ​ដែល​មាន​ទំហំ​ត្រឹមតែ​ ២១ គីឡូម៉ែត្រ​ការ៉េ​នេះ៕

អត្ថបទគួរចាប់អារម្មណ៍