The Phnom Penh Post Search

Search form

Logo of Phnom Penh Post newspaper Phnom Penh Post - តើ​ការ​ប្រឡង​ឆមាស​ថ្នាក់​ទី ​១២​ មាន​សារៈសំខាន់​ទៀត ឬ​ទេ?




តើ​ការ​ប្រឡង​ឆមាស​ថ្នាក់​ទី ​១២​ មាន​សារៈសំខាន់​ទៀត ឬ​ទេ?

សិស្សានុសិស្ស​កំពុង​ពិនិត្យ​មើល​ឈ្មោះ​ប្រឡង​លើក​ទី​ពីរ​នៅ​សាលា​មួយ​ក្នុង​រាជធានី​ភ្នំពេញ។
សិស្សានុសិស្ស​កំពុង​ពិនិត្យ​មើល​ឈ្មោះ​ប្រឡង​លើក​ទី​ពីរ​នៅ​សាលា​មួយ​ក្នុង​រាជធានី​ភ្នំពេញ។ ហេង ជីវ័ន

តើ​ការ​ប្រឡង​ឆមាស​ថ្នាក់​ទី ​១២​ មាន​សារៈសំខាន់​ទៀត ឬ​ទេ?

ការ​ប្រឡង​សញ្ញាបត្រ​មធ្យមសិក្សាទុតិយភូមិ​កាលពី​ឆ្នាំ​២០១៤​កន្លង​ទៅ​នេះ បាន​បញ្ចប់​ដោយ​លទ្ធផល​អ្នក​ជាប់​បាក់ឌុប​លើក​ទី​មួយ​មាន​ចំនួន​ប្រមាណ​តែ​២៦​ភាគរយ និង​ប្រមាណ​១៨​ភាគរយ នៅលើក​ទី​ពីរ ដែល​មាន​ភាព​ខុស​គ្នា​ឆ្ងាយ​បើ​ប្រៀបធៀប​កាលពី​ឆ្នាំ​មុន​(២០១៣)​ដែល​មាន​រហូត​ដល់​ទៅ​៨៧​ភាគរយ​។

សម្រាប់​ការ​ប្រឡង​មធ្យមសិក្សា​ថ្នាក់​ជាតិ​ឆ្នាំ​២០១៤ នោះ​ដែរ ក្រសួង​អប់រំ​បាន​ធ្វើ​កំណែ​ទម្រង់​ការ​ប្រឡង ដោយ​គិត​តែ​ពិន្ទុ​ពេល​ប្រឡង​ថ្នាក់ជាតិ​ប៉ុណ្ណោះ មិន​រាប់​បញ្ចូល​ពិន្ទុ​ឆមាស​ឡើយ​។ វា​ខុស​ប្លែក​គ្នា​ពី​ឆ្នាំ​កន្លង​ទៅ​ដែល​គេ​បូក​បញ្ចូល​ទាំង​ពិន្ទុ​ថ្នាក់​ជាតិ និង​ឆមាស។

បើ​តាម​លោក​រស់ សាលីន អ្នក​នាំពាក្យ​របស់​ក្រសួង​អប់រំ ក្រសួង​បាន​ដឹង​ពី​បញ្ហា​អសកម្ម​មួយ​ចំនួន​ទាក់ទង​នឹង​ការ​ទិញ​ពិន្ទុ​ឆមាស​ពី​សាលា​ជាដើម​នោះ ទើប​បាន​ជា​ក្នុង​ឆ្នាំ​២០១៤​កន្លងមក ក្រសួង​បាន​សម្រេចចិត្ត​មិន​គិត​ពិន្ទុ​ឆមាស​របស់​សិស្ស​ដែល​បាន​មកពី​សាលា​នោះ​ទេ ហើយ​ទុក​ឲ្យ​សិស្ស​ប្រើប្រាស់​សមត្ថភាព​ខ្លួនឯង​សុទ្ធសាធ​ដើម្បី​ប្រឡង​ជាប់​ថ្នាក់​ជាតិ។

បើសិន​ជា​ពិន្ទ​ឆមាស​មិន​ត្រូវ​បាន​គេ​គិត​បញ្ចូល​នឹង​ពិន្ទុ​ថ្នាក់​ជាតិ តើ​វា​ចាំបាច់ ឬ​ទេ ដែល​មាន​ការ​ប្រឡង​ឆមាស​ក្នុង​សាលា?

បើ​តាម​អ្នក​នាំពាក្យ​ក្រសួង​អប់រំ ការ​ប្រឡង​ឆមាស​ក្នុង​ថ្នាក់​គឺ​ធ្វើ​ឡើង​ដើម្បី​ជា​ឱកាស​ដល់​គ្រូ​ប្រចាំ​ថ្នាក់​ឲ្យ​ដឹង​ពី​សមត្ថភាព​របស់​សិស្ស​ម្នាក់ៗ ប៉ុណ្ណោះ។ លោក​ថា ក្រសួង​នឹង​នៅ​តែ​មិន​រាប់​បញ្ចូល​ពិន្ទុ​នោះ​ទៅក្នុង​ការ ប្រឡង​ថ្នាក់ជាតិ​ឡើយ​សម្រាប់​ឆ្នាំសិក្សា ២០១៥ ខាង​មុខ​នេះ។ មួយ​វិញ​ទៀត ការ​ប្រឡង​ឆមាស​ក៏​នឹង​ធ្វើឡើង​តែ​ក្នុង​ថ្នាក់​នីមួយៗ​ប្រចំា​សាលា​ប៉ុណ្ណោះ​ដោយ​វិញ្ញាសា​គ្រូ​ជា​អ្នក​ចេញ​ដោយ​ខ្លួនឯង មិនមែន​ចេញ​ពី​ក្រសួង​ទេ។

លោកគ្រូ​មុខវិជ្ជា​គណិតវិទ្យា​នៅ​វិទ្យាល័យ​មួយ​ក្នុង​រាជធានី​ភ្នំពេញ​ដែល​សុំ​មិន​បញ្ចេញ​ឈ្មោះ បាន​និយាយ​ថា ការ​រៀបចំ​ការ​ប្រឡង​ឆមាស​មួយ​ដែល​មាន​លក្ខណៈ​ស្តង់ដារ ដោយ​វិញ្ញាសា​ក្រសួង​ជា​អ្នក​កំណត់ វា​សំខាន់​ណាស់ ព្រោះ​នេះ​អាច​ជា​ការ​ពញ្ញាក់​ស្មារតី​សិស្ស​ឲ្យ​ដឹង​ពី​របៀប​បែបបទ​នៃ​ការ​ប្រឡង និង​កម្រិត​នៃ​លំហាត់ និង​សំណួរ​សម្រាប់​ឲ្យ​ពួកគេ​ត្រៀម​ខ្លួន​ពេល​ប្រឡង​ថ្នាក់​ជាតិ។

លោកគ្រូ​រូប​នេះ​បាន​បន្ត​ថា ប្រសិន​ជា​ក្រសួង​មិន​រៀបចំ​ការ​ប្រឡង​ឆមាស​ជា​លក្ខណៈ​រួម​មួយ​ទេ អ៊ីចឹង​សិស្ស​ដែល​ប៉ះ​ចំ​ថ្នាក់​គ្រូ​ចេញ​លំហាត់​ងាយស្រួល​ពេល​ប្រឡង​នៅ​តែ​មិន​អាច​ស្ទាបស្ទង់​ពី​លទ្ធភាព​ដែល​អាច​ចេញ​ពេល​ប្រឡង​ថ្នាក់ជាតិ​បាន​ដដែល​។ លោក និយាយ​ដូចច្នេះ​ដោយ​សំអាង​ហេតុផល​ថា ទោះបី​ជា​គ្រូ​មុខវិជ្ជា​គណិត​ដូចគ្នា​ក៏​មាន​អ្នក​ពូកែ និង​មិន​សូវ​ពូកែ​ដែរ។ ដូច្នេះ​វា​ទាមទារ​ឲ្យ​ក្រសួង​ធ្វើការ​ជ្រើសរើស​វិញ្ញាសា​រួម​មួយ​សម្រាប់​សិស្ស​ទាំងអស់​ឲ្យ​ប្រឡង​ដោយ​ស្មើភាព​គ្នា។

ជាមួយ​គ្នា​នេះ​ដែរ យុវតី​វ័យ ១៧​ឆ្នាំ ទៀង ស្រីនាង ជា​សិស្ស​ថ្នាក់​ទី​១២ នៅ​វិទ្យាល័យ​ឥន្ទ្រទេវី បាន​និយាយ​ថា​វា​មាន​សារៈសំខាន់​៥០​ភាគរយ​ដែរ ដោយសារ​ការ​ប្រឡង​ថ្នាក់ជាតិ​តម្រូវ​ឲ្យ​សិស្ស​ទទួល​បាន​មធ្យមភាគ​យ៉ាង​ហោចណាស់ ២៥​ក្បៀស​ឡើង​ទៅ ទើប​អាច​មាន​សិទិ្ធ​ចូល​ប្រឡង​បាន។

យ៉ាងណា​មិញ​យុវតី​រូប​នេះ​ក៏​បាន​និយាយ​ផង​ដែរ​ថា ការពិត​ទៅ​ខ្លួន​ចង់​ឲ្យ​មាន​ការ​ប្រឡង​ឆមាស​ជា​ទ្រង់ទ្រាយ​ធំ​ពោល​គឺ​ទូទាំង​ប្រទេស​ដែរ មិនមែន​គ្រាន់​តែ​អង្គុយ​ប្រឡង​ក្នុង​ថ្នាក់ ហើយ​ឲ្យ​សិស្ស​ហែក​ក្រដាស​សរសេរ​ដូច​ប្រឡង​ប្រចាំ​ខែ​ទេ ព្រោះ​ការ​ធ្វើ​បែប​នេះ​មិនអាច​ជួយ​ឲ្យ​សិស្ស​សុំា​ទៅ​នឹង​ការ​ប្រឡង​នៅ​ថ្នាក់​ជាតិ​បាន​ឡើយ។

ការ​ធ្វើ​កំណែទម្រង់​ក្នុង​ឆ្នាំ​២០១៤​នេះ​ទៀត​សោត ក៏​បាន​បើក​កកាយ​ពី​ករណី​អំពើ​ពុករលួយ​នៅ​តាម​វិទ្យាល័យ​នានា​យ៉ាង​ផុសផុល​ជាង​មុន​ផង​ដែរ។ ការ​ប្រព្រឹត្ត​អំពើ​ពុករលួយ​នៅ​តាម​សាលា​មាន​ច្រើន​រូបភាព និង​ច្រើន​ករណី ប៉ុន្តែ​ករណី​មួយ​ក្នុង​ចំណោម​នោះ គឺ​ការ​ទិញ​លក់​ពិន្ទុ​ឆមាស មាន​លក្ខណៈ​ចំណាស់​ជាងគេ ហើយ​មិន​សូវ​មាន​ការ​ចាប់អារម្មណ៍​ប៉ុន្មាន​នោះ​ទេ។ នេះ​អាច​ដោយសារ​តែ​វា​មាន​លក្ខណៈ​សាមញ្ញ​ទៅ​ហើយ។ ការ​ទិញ​ពិន្ទុ​ពេល​ឆមាស​នេះ គឺ​កើត​មានឡើង​តាំងតែ​ពី​មុន​ការ​ធ្វើ​កំណែ​ទម្រង់​ប្រព័ន្ធ​អប់រំ​ម៉េ្លះ ហើយ​សិស្ស​មួយ​ចំនួន​បាន​ចំណាយ​រហូត​ដល់​ជាង​១០០​ដុល្លារ ដើម្បី​បាន​ពិន្ទុ​ល្អ​ពោល​គឺ​៥០​ក្បៀស​ក៏​មាន។ ការ​ធ្វើ​បែប​នេះ​ព្រោះ​គេ​ជឿ​ថា វា​នឹង​អាច​ជួយ​យឹតយោង​ពួកគេ​បាន​សម្រាប់​ពេល​ប្រឡង​ថ្នាក់​ជាតិ។

ទោះបី​ជា​ឆ្នាំ​កន្លង​ទៅ (សម័យ​ប្រឡង​ឆ្នាំ​២០១៤)​ការ​ទិញ​ពិន្ទុ​ឆមាស ហាក់​មិន​មាន​ប្រសិទ្ធភាព​ក៏ដោយ ក៏​ការ​ទិញ​ពិន្ទុ​ពេល​ឆមាស​នៅ​តែ​ជា​តម្រូវការ​ចាំបាច់​សម្រាប់​សិស្ស​ដែល​ធ្លាក់​ពេល​ប្រឡង​ឆមាស ព្រោះ​ពួកគេ​នឹង​មិន​ត្រូវ​បាន​អនុញ្ញាត​ឲ្យ​ចូល​ប្រឡង​ថ្នាក់​ជាតិ​ឡើយ​ដរាប​ណា​មិន​ទទួល​បាន​មធ្យម​ភាគ​២៥​ក្បៀស​ឡើង​ទៅ។

លោកគ្រូ​បង្រៀន​មុខវិជ្ជា​គណិតវិទ្យា​ដដែល​រូប​នោះ​បាន​និយាយ​ទៀត​ថា​៖ «បើ​និយាយ​ពី​ការ​ទិញ​ពិន្ទុ​ឆមាស​វិញ​កាលពី​មុន​ឆ្នាំ​២០១៤​គឺ​យើង​មិន​ចាំបាច់​និយាយ​ទេ​គឺ​គេ​ដឹង​គ្រប់​គ្នា​ហើយ​ពី​បញ្ហា​ហ្នឹង តែ​សម្រាប់​ឆ្នាំ​កន្លង​ទៅ​អ្វីៗ​គឺ​បាន​ផ្លាស់ប្តូរ​តាមរយៈ​ការ​កែប្រែ​របស់​ក្រសួង​អប់រំ»។

ជាមួយ​គ្នា​នោះ​ដែរ​លោកគ្រូ​មុខវិជ្ជា​ខ្មែរ​ម្នាក់​នៅ​វិទ្យាល័យ​មួយ​ទៀត​ក្នុង​រាជធានី​ភ្នំពេញ​ក៏​បាន​សារភាព​ដែរ​ថា ករណី​ទិញ​ពិន្ទុ​នៅក្នុង​សាលា​របស់​លោក​ពិតជា​កើត​មាន​ប្រាកដ​មែន។ ភាគច្រើន​គឺ​កើតឡើង​សម្រាប់​អ្នក​ដែល​មាន​ជាប់​ពាក់ព័ន្ធ​នឹង​ខ្សែស្រឡាយ​បងប្អូន​របស់​គ្រូ​ដូច្នេះ​គេ​ចេះ​តែ​ជួយ​ទៅ។លោក​បាន​និយាយ​ថា៖ «កាត់​ទឹក​មិន​ដាច់​កាត់​សាច់​មិន​បាន»។

លោក​ថា៖ «ការ​ជួយ​ដាក់​ពិន្ទុ​ឲ្យ​ហ្នឹង​គឺ​មើល​ទៅលើ​សិស្ស​ហ្នឹង​ដែរ​ពី​មធ្យម​ភាគ​របស់​គេ​ពេល​ប្រឡង​ពោល​គឺ​បើ​ធ្លាក់​អាច​ជួយ​មក​ត្រឹម​២៥​ទៅ​៣០​ក្បៀស​ប៉ុណ្ណោះ»។ ក្នុង​ករណី​សិស្ស​ដែល​មិន​ដែល​ចូល​រៀន​សោះ​ក៏​មិន​អាច​ជួយ​បាន​ដែរ​ហើយ​រាល់​ការ​ជួយ​សិស្ស​ណា​ម្នាក់​គឺ​ត្រូវ​ធ្វើ​ទៅ​តាម​ការ​ឯកភាព​គ្នា​ជាមួយ​គណៈ​គ្រប់គ្រង​សាលា​មិនមែន​គ្រូបន្ទុក​ម្នាក់​ឯង​អាច​សម្រេច​បាន​នោះ​ទេ។

គួរ​ឲ្យ​ដឹង​ផង​ដែរ​ថា បើ​តាម​សន្ទស្សន៍​នៃ​ការ​យល់ដឹង​ពី​អំពើ​ពុករលួយ​របស់​អង្គការ​តម្លាភាព​អន្តរជាតិ​សម្រាប់​ឆ្នាំ​២០១៤ កម្ពុជា ជាប់​ចំណាត់​ថ្នាក់​ទី​១៥៦ ក្នុង​ចំណោម​ប្រទេស​ចំនួន​១៧៥ ពោល​គឺ​មាន​ការ​កែលម្អ​តិចតួច​ប៉ុណ្ណោះ​លើ​ចំណាត់​ថ្នាក់​ទី​១៦០​ក្នុង​ចំណោម​ប្រទេស​ចំនួន​១៧៧ កាលពី​ឆ្នាំ​២០១៣៕

អត្ថបទគួរចាប់អារម្មណ៍