The Phnom Penh Post Search

Search form

Logo of Phnom Penh Post newspaper Phnom Penh Post - ទូរទស្សន៍ និង​វិទ្យុ គឺជា​ប្រព័ន្ធ​ផ្សព្វ​ផ្សាយ​សំខាន់​សម្រាប់​យុវជន​ទូទៅ ​ខណៈ​អ៊ីនធឺណិត​មាន​ប្រជា​ប្រិយ​ភាព​នៅ​ទីក្រុង




ទូរទស្សន៍ និង​វិទ្យុ គឺជា​ប្រព័ន្ធ​ផ្សព្វ​ផ្សាយ​សំខាន់​សម្រាប់​យុវជន​ទូទៅ ​ខណៈ​អ៊ីនធឺណិត​មាន​ប្រជា​ប្រិយ​ភាព​នៅ​ទីក្រុង

ទូរទស្សន៍ និង​វិទ្យុ គឺជា​ប្រព័ន្ធ​ផ្សព្វ​ផ្សាយ​សំខាន់​សម្រាប់​យុវជន​ទូទៅ​ខណៈ​អ៊ីនធឺណិត​មាន​ប្រជា​ប្រិយ​ភាព​នៅ​ទីក្រុង។
ទូរទស្សន៍ និង​វិទ្យុ គឺជា​ប្រព័ន្ធ​ផ្សព្វ​ផ្សាយ​សំខាន់​សម្រាប់​យុវជន​ទូទៅ​ខណៈ​អ៊ីនធឺណិត​មាន​ប្រជា​ប្រិយ​ភាព​នៅ​ទីក្រុង។

ទូរទស្សន៍ និង​វិទ្យុ គឺជា​ប្រព័ន្ធ​ផ្សព្វ​ផ្សាយ​សំខាន់​សម្រាប់​យុវជន​ទូទៅ ​ខណៈ​អ៊ីនធឺណិត​មាន​ប្រជា​ប្រិយ​ភាព​នៅ​ទីក្រុង

លទ្ធភាព​នៃ​ការ​ទទួល​បាន​ព័ត៌មាន​ពី​ការ​ប្រើ​ប្រាស់​ប្រព័ន្ធ​ផ្សព្វ​ផ្សាយ​របស់​យុវជន​កម្ពុជា​

​យុវជន​កម្ពុជា បច្ចុប្បន្ន​នេះ មាន​លទ្ធភាព​ច្រើន ក្នុង​ការ​ទទួល​បាន​ព័ត៌មាន​ពី​ប្រព័ន្ធ​ផ្សព្វ​ផ្សាយ​នានា តាម​បែប​ប្រពៃណី (traditional media) និង​ទូរស័ព្ទ​ដៃ។ បើ​តាម​ការ​សិក្សា​មួយ យុវជន​កម្ពុជា​បាន​ប្រើ​ប្រាស់​ប្រព័ន្ធ​ផ្សព្វ​ផ្សាយ​ច្រើន​ប្រភេទ ដើម្បី​ទទួល​បាន​ព័ត៌មាន​ជា​រៀងរាល់​ថ្ងៃ ដែល​ភាគ​ច្រើន យ៉ាង​ហោច​ណាស់​ពួកគេ​ប្រើ​ម្តង ក្នុង​មួយ​ថ្ងៃ ខណៈ​ការ​ប្រើ​ប្រាស់​អ៊ីនធឺណិត​របស់​យុវជន នៅ​តែ​មាន​កម្រិត​ទាប​នៅ​ឡើយ​បើ​ប្រៀប​ធៀប​ទៅ​នឹង​ប្រព័ន្ធ​ផ្សព្វ​ផ្សាយ​បែប​ប្រពៃណី និង​ទូរស័ព្ទ​ដៃ។

យោង​តាម​របាយ​ការណ៍​របស់ BBC Media Action ដែល​បាន​ធ្វើ​ការ​ស្ទាប​ស្ទង់​មតិ​ទៅ​លើ​មនុស្ស​ចំនួន ២៥៩៧ នាក់ អាយុ​ពី ១៥ ដល់ ២៤​ឆ្នាំ ម​កពី ២៤ ខេត្ត ក្រុង ដែល​មាន​ចំណង​ជើង​ថា «Media Habits and Information Sources of Youth in Cambodia» ចេញ​ផ្សាយ​កាល​ពី ឆ្នាំ​២០១៤ បាន​បង្ហាញ​ថា ប្រភព​ព័ត៌មាន​ដែល​សំខាន់​ជាង​គេ​របស់​យុវជន​គឺ​ទូរទស្សន៍ ក្នុង​នោះ​យុវជន​ប្រមាណ ៩២ ភាគរយ​អាច​ទទួល​ព័ត៌មាន​តាម​ទូរទស្សន៍ (៧០ ភាគរយ មើល​ទូរទស្សន៍​រាល់​ថ្ងៃ) ៩២ ភាគរយ​នៃ​យុវជន​មាន​វិទ្យុ​ស្តាប់ (៥៤ ភាគរយ​ស្តាប់​រាល់​ថ្ងៃ) ៩៦ ភាគរយ​នៃ​យុវជន​មាន​ទូរស័ព្ទ​ប្រើ (៦៦ ភាគរយ​ប្រើ​ទូរស័ព្ទ​រាល់​ថ្ងៃ) ហើយ​មាន​តែ ៣៤ ភាគរយ​នៃ​យុវជន ប៉ុណ្ណោះ​មាន​អ៊ីនធឺណិត​ប្រើ​ប្រាស់។

ការ​ទទួល​យក​ព័ត៌មាន និង​ការ​ប្រើ​ប្រាស់​បណ្តាញ​សង្គម​គឺជា​ហេតុផល​ចម្បង​បំផុត​នៃ​យុវជន​ដែល​ប្រើ​ប្រាស់​អ៊ីន​ធឺ​ណិត

​របាយ​ការណ៍​របស់ BBC Media Action ដដែល​នេះ​បាន​បង្ហាញ​ផង​ដែរ​ថា មាន​តែ​មួយ​ភាគ​បី​នៃ​យុវជន​ក្នុង​ប្រទេស​កម្ពុជា មាន​អ៊ីន​ធឺ​ណិត​ប្រើ​ប្រាស់ ហើយ​ភាគ​ច្រើន គឺជា​យុវជន​ដែល​រស់​នៅ​ទីក្រុង និង​ទីប្រជុំជន។ គោល​បំណង​សំខាន់​របស់​ពួកគេ (យុវជន​វ័យ​ក្មេង) ក្នុង​ការ​ប្រើ​ប្រាស់​អ៊ីន​ធឺ​ណិត គឺ​ដើម្បី​មើល​ព័ត៌មាន (៧៣ ភាគរយ) ប្រើ​ប្រាស់​បណ្តាញ​សង្គម (៦៣ ភាគរយ) បើក​មើល​គេហទំព័រ​នានា (៤១ ភាគរយ) ហ្គេម (៣១ ភាគរយ) និង​សម្រាប់​ការ​សិក្សា (៣០ ភាគរយ)។

កញ្ញា ទុយ គន្ធា ជា​និស្សិត​នៅ​វិទ្យាស្ថាន​ភាសា​បរទេស បាន​ឲ្យ​ដឹង​ថា វិទ្យុ និង​បណ្តាញ​សង្គម គឺជា​ប្រភព​សំខាន់​ដែល​កញ្ញា​ទទួល​បាន​ព័ត៌មាន។

កញ្ញា បាន​និយាយ​ថា៖ «ខ្ញុំ​ទទួល​បាន​ព័ត៌មាន​តាម​រយៈ​ហ្វេសប៊ុក ដែល​មាន​មិត្តភក្តិ​ចែក​រំលែក។ ខ្ញុំ​អាន​កាសែត​ដែរ យូរ​ម្តងៗ តែ​ភាគ​ច្រើន​គឺ​អាន​ព័ត៌មាន​តាម​អនឡាញ តាម​រយៈ​ទូរស័ព្ទ​ស្មាត​ហ្វូន​របស់​ខ្ញុំ ហើយ​រៀងរាល់​ព្រឹក ស្តាប់​វិទ្យុ​ដូចជា​ប៉ុស្តិ៍​អាស៊ី​សេរី ឬ​វីអូអេ​ជាដើម»។

យ៉ាង​ណា​មិញ គន្ធា គិត​ថា បណ្តាញ​សង្គម​គ្រាន់​តែ​ជា​កន្លែង​ដែល​អាច​ផ្តល់​ព័ត៌មាន​ឲ្យ​រហ័ស​ទាន់​ចិត្ត ក៏​ប៉ុន្តែ​រាល់​ព័ត៌មាន​នៅ​លើ​នោះ​ត្រូវ​តែ​យក​មក​ធ្វើ​ការ​បញ្ជាក់​ជា​ក្រោយ​តាម​កាសែត ឬ​វិទ្យុ​ជាដើម មុន​នឹង​កញ្ញា​ជឿ​ថា ជា​ការ​ពិត។

ស្រដៀង​គ្នា​នេះ​ដែរ យុវជន ផាក សុធា និស្សិត​នៅ​សាកល​វិទ្យាល័យ​អន្តរជាតិ ក៏​មិន​ខុស​ពី គន្ធា ដែរ។ និស្សិត​រូប​នោះ​ពោល​ថា៖ «នៅ​ពេល​ដែល​ស្រេ្តស​ក្នុង​ការ​សិក្សា ខ្ញុំ​បើក​ហ្វេសប៊ុក​លេង​ជាមួយ​មិត្តភក្តិ មើល​ព័ត៌មាន​ដែល​គេ​បង្ហោះ​ថ្មី។ ខ្ញុំ​កម្រ​អាន​កាសែត​ណាស់ ភាគ​ច្រើន​ខ្ញុំ​អាន​ព័ត៌មាន​តាម​អនឡាញ ឬ​ស្តាប់​វិទ្យុ​ដើម្បី​ដឹង​ព័ត៌មាន»។

សុធា បាន​បន្ត​ផង​ដែរ​ថា៖ «យើង​មើល​ដែរ​មិន​ត្រូវ​ចេះ​តែ​ជឿ​នោះ​ទេ យើង​ត្រូវ​ស្វែង​រក​ប្រភព​ណា​មួយ​មក​បញ្ជាក់​ថា ព័ត៌មាន​នោះ​ពិត ឬ​មិន​ពិត»។

កំពុង​អង្គុយ​ដាក់​កាស​ស្តាប់​បទ​ចម្រៀង ហើយ​ភ្នែក​កំពុង​តែ​សម្លឹង​មើល​ទូរស័ព្ទ​របស់​ខ្លួន​យុវជន ឡៃ បុរី ដែល​ជា​បុគ្គលិក​របស់​ស្ថាប័ន​ឯកជន​មួយ កំពុង​តែ​អាន​ព័ត៌មាន​ដែល​មិត្តភក្តិ​របស់​គាត់​បាន​ចែក​រំលែក។ លោក​ថា៖ «ខ្ញុំ​ភាគ​ច្រើន បាន​ដឹង​ព័ត៌មាន​នានា​តាម​រយៈ​ហ្វេសប៊ុក និង​វិទ្យុ។ ព័ត៌មាន​តាម​ហ្វេសប៊ុក​វា​លឿន»។

បើ​តាម​គេហទំព័រ (www.socialmediacambodia.com) អ្នក​ប្រើ​ប្រាស់​បណ្ដាញ​សង្គម​នៅ​ក្នុង​ប្រទេស​កម្ពុជា ក្នុង ឆ្នាំ​២០១៥ នេះ មាន​ប្រមាណ​ជា ១ លាន ៧៦ ម៉ឺន​នាក់ ដែល​ភាគ​ច្រើន​ជា​ក្រុម​យុវវ័យ និង​យុវជន​ដែល​មាន​អាយុ​ពី ១៣ ដល់ ៣៤ ឆ្នាំ។

សម្រាប់​លោក កែម ឡី អ្នក​ស្រាវជ្រាវ​ការ​អភិវឌ្ឍ​សង្គម បាន​ទទួល​ស្គាល់​ថា បណ្ដាញ​សង្គម​ហ្វេសប៊ុក​ពិត​ជា​មាន​ការ​ពេញ​និយម​សម្រាប់​យុវជន​ព្រោះ​ថា ព័ត៌មាន​តាម​ហ្វេសប៊ុក​លឿន ហើយ​មាន​ភាព​ប្លែកៗ​ពោល​គឺ​មាន​ទាំង​រូបភាព និង​វីដេអូ ហើយ ព័ត៌មាន​តាម​បណ្តាញ​សង្គម​នេះ​ទៀត​សោត វា​មាន​ភាព​ងាយ​ស្រួល​ក្នុង​ការ​រក​ដរាប​ណា​គេ​អាច​ភ្ជាប់​ទៅ​នឹង​អ៊ីន​ធឺ​ណិត។

លោក កែម ឡី បាន​យល់​ឃើញ​ថា ការ​កើន​ឡើង​យ៉ាង​គំហុក​នៃ​ចំនួន​អ្នក​ប្រើ​ប្រាស់​បណ្ដាញ​សង្គម​ហ្វេសប៊ុក​នេះ​បណ្ដាល​មក​ពី​ការ​រីក​ចម្រើន​នៃ​បច្ចេកវិទ្យា​ដែល​ក្នុង​នោះ​មាន​តម្លៃ​នៃ​សេវាកម្ម​អ៊ីន​ធឺ​ណិត​មាន​ការ​ចុះ​ថ្លៃ ការ​រីក​ចម្រើន​នៃ​ឧបករណ៍​អេឡិច​ត្រូនិក​មាន​ស្មាតហ្វូន​ជាដើម ការ​ចង់​ដឹង​ចង់​ឮ​របស់​ប្រជាជន​ជុំវិញ​រឿងរ៉ាវ​នយោបាយ និង​បញ្ហា​នានា​ដែល​កើត​ឡើង​នៅ​ក្នុង​សង្គម ហើយ​ម្យ៉ាង​វិញ​ទៀត​ហ្វេសប៊ុក​ក៏​ត្រូវ​បាន​ប្រើ​សម្រាប់​ធ្វើ​ការ​ប្រមែ​ប្រមូល​ថវិកា​សម្រាប់​កម្មវិធី​សង្គម​នានា​ផង​ដែរ​ព្រោះ​ដោយ​សារ​តែ​វា​មាន​ភាព​ងាយ​ស្រួល និង​ចំណាយ​តិច។

លោក​បាន​បន្ត​ផង​ដែរ​ថា៖ «ការ​កើន​ឡើង​នៃ​បណ្ដាញ​សង្គម​នេះ​ផ្ដល់​ជា​ផល​វិជ្ជមាន​មួយ​ចំនួន​ដល់​សង្គម​ដែល​ក្នុង​នោះ​ប្រជា​ពលរដ្ឋ​អាច​ទទួល​បាន​ព័ត៌មាន​កើត​មាន​ឡើង​នៅ​ក្នុង​សង្គម។ វា​ជា​បណ្ណាល័យ​នៃ​ការ​អប់រំ ហើយ​វា​អាច​ប្រើ​ប្រាស់​ក្នុង​ការ​លក់​ទិញ​ដូរ​ទំនិញ​ផ្សេងៗ​ជាដើម»។

លោក​បន្ត​ថា ទន្ទឹម​នឹង​នេះ វា​ក៏​ផ្ដល់​នូវ​គុណវិបត្តិ​មួយ​ចំនួន​ធំ​ផង​ដែរ​ដល់​សង្គម​ដូចជា​វា​អាច​ប៉ះពាល់​ដល់​វប្បធម៌ សីលធម៌​សង្គម ព័ត៌មាន​ខ្លះ​អាច​បង្ក​ឲ្យ​មាន​ភាព​វឹកវរ​ដល់​សង្គម​ទៀត​ផង។ លោក បាន​លើក​ជា​ឧទាហរណ៍​ជាក់​ស្តែង​ថា ពេល​ខ្លះ​អ្នក​នយោបាយ​ប្រើ​ប្រាស់​វា​ដើម្បី​ជា​ប្រយោជន៍ ដោយ​បំប៉ោង​ព័ត៌មាន​ដោយ​មិន​ឈរ​លើ​ភាព​ពិត​ជាក់​ស្តែង ដោយ​លាប​ពណ៌ និង បង្ខូច​កេរ្តិ៍​ឈ្មោះ​គ្នា​ទៅ​វិញ​ទៅ​មក។

លោក​ថា៖ «ហើយ​វិច្ឆេទកម្ម​សេដ្ឋកិច្ច​ក៏​កើត​មាន​ដែរ ឧទាហរណ៍​ថា ទំនិញ​គេ​ល្អ​សោះ ផ្សព្វ​ផ្សាយ​ថា​ទំនិញ​គេ​មាន​ជាតិ​គីមី ឬ​ក៏​អាក្រក់​អ៊ីចឹង​ដើម្បី​ប្រកួត​ប្រជែង»។

បើ​តាម​អ្នក​ស្រាវ​ជ្រាវ​ការ​អភិវឌ្ឍ​សង្គម​មួយ​នេះ ប្រព័ន្ធ​ផ្សព្វ​ផ្សាយ​នៅ​ក្នុង​ប្រទេស​កម្ពុជា​នា​ពេល​បច្ចុប្បន្ន​មិន​ថា កាសែត​ទូរទស្សន៍ វិទ្យុ ឬ​បណ្តាញ​សង្គម​គឺ​មាន​ការ​ពិបាក​ក្នុង​ការ​វាយតម្លៃ​មួយ​ណា​គួរ​ជាទី​ទុក​ចិត្ត​ជាង​មួយ​ណា​ណាស់ ដោយ​សារ​តែ​វា​អាស្រ័យ​ទៅ​លើ​ប្រភព​ព័ត៌មាន​និង​ស្ថាប័ន​ដែល​ផ្តល់​ព័ត៌មាន។ ដូច្នេះ​លោក​បាន​លើក​ទឹក​ចិត្ត​ឲ្យ​យុវជន​ព្យាយាម​ស្វែង​រក​ព័ត៌មាន​ឲ្យ​បាន​គ្រប់​ជ្រុង​ជ្រោយ​ទាំងអស់​ធ្វើការ​គិត​ពិចារណា​ឲ្យ​បាន​ហ្មត់ចត់​មុន​នឹង​សម្រេច​ចិត្ត​ជឿ​ទុក​ចិត្ត​លើ​ព័ត៌មាន​ណា​មួយ។

ជាមួយ​គ្នា​នោះ​ដែរ លោក សេក បរិសុទ្ធ ប្រធាន​ក្រុម​ប្រឹក្សា​ក្រម​សីលធម៌​អ្នក​សារ​ព័ត៌មាន​កម្ពុជា បាន​មាន​ប្រសាសន៍​ថា ប្រជាជន​ខ្មែរ​ទទួល​បាន និង​ចែក​ចាយ​ព័ត៌មាន​ភាគច្រើន​តាម​រយៈ​វិទ្យុ ទូរទស្សន៍ និង តាម​បណ្ដាញ​សង្គម។

លោក​បាន​បន្តថា សម្រាប់​យុវជន​បណ្ដាញ​សង្គម​ហ្វេសប៊ុក ក៏​ដូច​ជា​ការ​អាន​ព័ត៌មាន​តាម​អនឡាញ​មាន​ការ​ពេញ​និយម​ច្រើន ដោយ​សារ​តែ​ពួក​គេ​មាន​ទាំង​ចំណេះ​ដឹង សមត្ថភាព និង​លទ្ធភាព​ក្នុង​ការ​ប្រើ​ប្រាស់​វា។ ដោយ​ឡែក Print Media (កាសែត ឬ​ទស្សនាវដ្តី) មិន​សូវ​ពេញ​និយម​ប៉ុន្មាន​ទេ​សម្រាប់​យុវជន​ខ្មែរ​នា​ពេល​បច្ចុប្បន្ន​នេះ។

សម្រាប់​រូប​លោក​ផ្ទាល់ ក្នុង​ចំណោម​ប្រព័ន្ធ​ផ្សព្វ​ផ្សាយ​ទាំង​អស់ កាសែត​គឺជា​ប្រភព​ព័ត៌មាន​ដែល​អាច​ទុក​ចិត្ត​បាន​ជាង​គេ​ដោយ​សារ​មុន​នឹង​ចេញ​ផ្សាយ​ជា​ទូទៅ​មាន​ការ​ផ្ទៀង​ផ្ទាត់​ជាមួយ​នឹង​ប្រភព​ច្បាស់​លាស់ បើ​ទោះ​បី​ជា​ព័ត៌មាន​នៅ​តាម​កាសែត​មិន​រហ័ស​ទាន់​ចិត្ត​ដូច​នៅ​តាម​បណ្តា​ព័ត៌មាន​តាម​អនឡាញ​ក៏​ដោយ​ចុះ។

ទោះ​ជា​យ៉ាង​ណា​ក៏​ដោយ លោក​បាន​លើក​ទឹក​ចិត្ត​ឲ្យ​យុវជន​គួរ​ចេះ​ថ្លឹង​ថ្លែង​រាល់​ព័ត៌មាន​ទាំងអស់​ដែល​ពួកគេ​ទទួល​បាន​ដោយ​ពិចារណា​ទៅ​លើ​ចំណុច​ពីរ​យ៉ាង តើ​ប្រភព​ព័ត៌មាន​ដែល​គេ​ទទួល​បាន​អាច​ទុក​ចិត្ត​បាន ឬទេ​ហើយ​ខ្លឹមសារ​នៃ​ព័ត៌មាន​មាន​ការ​ផ្ទៀង​ផ្ទាត់​ត្រឹម​ត្រូវ​នឹង​ប្រភព​ផ្សេង ឬ​អត់?

ទោះ​ជា​យ៉ាង​ណា​ក្តី បើ​ទោះ​ជា​ចំនួន​យុវជន​ដែល​ទទួល​បាន​ព័ត៌មាន​ពី​បណ្តាញ​សង្គម ឬ​គេហទំព័រ​នានា តាម​រយៈ​អ៊ីន​ធឺ​ណិត មាន​ការ​កើន​ឡើង​ក្តី ក៏​ប៉ុន្តែ​ចំនួន​នេះ នៅ​មាន​តិច​នៅ​ឡើយ ព្រោះ​ថា យុវជន​ដែល​មាន​លទ្ធភាព​ប្រើ​ប្រាស់ អ៊ីន​ធឺ​ណិត​នៅ​មាន​កម្រិត​ទាប​ហើយ​មាន​តែ​យុវជន​ដែល​រស់​នៅ​តាម​ទីក្រុង និង​ទីប្រជុំជន​ប៉ុណ្ណោះ ពោល​គឺ​មាន​តែ​ប្រមាណ​ជាង ៣០ ភាគរយ​ប៉ុណ្ណោះ​នៃ​យុវជន​សរុប​ក្នុង​ស្រុក។

យ៉ាង​ណា​មិញ គេ​ក៏​មិន​អាច​ភ្លេច​តួនាទី​ដ៏​សំខាន់​របស់​ប្រព័ន្ធ​ផ្សព្វ​ផ្សាយ​តាម​លក្ខណៈ​ប្រពៃណី​ដែល​មាន​ជា អាទិ៍ ដូចជា​ទូរទស្សន៍ និង​វិទ្យុ​ជាដើម​នោះ​ឡើយ ព្រោះ​យុវជន​ជាង ៩០ ភាគរយ​កំពុង​ទទួល​បាន​ព័ត៌មាន​តាម​រយៈ​ប្រព័ន្ធ​ផ្សព្វ​ផ្សាយ​ផ្នែក​នេះ៕

ស៊ុន សុខេន និង សុង គឹមសួរ

អត្ថបទគួរចាប់អារម្មណ៍