The Phnom Penh Post Search

Search form




Logo of Phnom Penh Post newspaper Phnom Penh Post - ទូរស័ព្ទ iPhone ស៊េរី​ចាស់​នៅ​មាន​ហាង​ឆេង​​ខ្ពស់​

ទូរស័ព្ទ iPhone ស៊េរី​ចាស់​នៅ​មាន​ហាង​ឆេង​​ខ្ពស់​

Content image - Phnom Penh Post
អតិថិជន​ទស្សនា​ទូរស័ព្ទ iPhone 6 និង iPhone 6 Plus​ ក្នុង​ហាង​របស់ Apple នៅ​ប្រទេស​ថៃ។ bloomberg

ទូរស័ព្ទ iPhone ស៊េរី​ចាស់​នៅ​មាន​ហាង​ឆេង​​ខ្ពស់​

ទូរស័ព្ទ iPhone 6 និង iPhone 6 Plus នៅ​តែ​មាន​តម្រូវការ​ខ្ពស់​ក្នុង​ចំណោម​អ្នក​ប្រើ​ប្រាស់​កម្ពុជា បើទោះ​បី​ជា​ទូរស័ព្ទ​ជំនាន់​ថ្មី​របស់​ក្រុមហ៊ុន Apple ត្រូវ​បាន​ដាក់​លក់​ជា​ផ្លូវការ​នៅ​ក្នុង​ប្រទេស​កម្ពុជា​កាល​ពី​សប្ដាហ៍​មុន​ក៏​ដោយ។

លោក ស៊ិន វន់ ម្ចាស់​ហាង​ទូរស័ព្ទ​អង្គរមាស​ក្នុង​រាជ​ធានី​ភ្នំពេញ បាន​ឲ្យ​ដឹង​ថា តម្រូវការ​ទូរស័ព្ទ iPhone 6 និង iPhone 6 Plus នៅ​តែ​ខ្ពស់​រហូត​ដល់​ដាច់​ស្តុក ខណៈ​តម្លៃ​​ទូរស័ព្ទ iPhone 6​ ត្រូវ​បាន​ដាក់​លក់​ចាប់​ពី ៦០០​ដុល្លារ​អាមេរិក​ឡើង​ទៅ​តាម​ទំហំ​មេម៉ូរី ហើយ​ទូរស័ព្ទ iPhone 6 Plus មាន​តម្លៃ​ចាប់​ពី ៧១០​ដុល្លារ​ឡើង​ទៅ។

លោក​និយាយថា​៖ «បើ​តាម​ខ្ញុំ​សង្កេត មូល​ហេតុ​ដែល​ធ្វើ​ឲ្យ​អ្នក​ប្រើ​ប្រាស់​នៅ​តែ​ទិញ​ទូរស័ព្ទ iPhone 6 និង iPhone 6 Plus ដោយសារ​រូប​រាង​ដូច​តែ​គ្នា ខុស​តែ​ពណ៌​បន្តិ​ច​ប៉ុណ្ណោះ។ មួយ​វិញ​ទៀត ប្រហែល​ជា​ពួកគាត់​រង់​ចាំ​ទូរស័ព្ទ​ស៊េរី​ថ្មី​នេះ ធ្លាក់​តម្លៃ​ទើប​ពួក​គាត់​ទិញ»។

Content image - Phnom Penh Post
ទូរស័ព្ទ iPhone 6 Plus ត្រូវ​បាន​ដាក់​តាំង​បង្ហាញ​ក្នុង​ហាង Apple Store នៅ​ទីក្រុង​ហុងកុង។ bloomberg

ម្ចាស់​ហាង​រូប​នេះ បានឲ្យ​ដឹង​បន្ថែម​ថា សូម្បី​តែ​ទូរស័ព្ទ iPhone 6 និង iPhone 6 Plus មួយ​ទឹក ក៏​មាន​តម្រូវការ​ខ្ពស់​ផង​ដែរ។ លោក​បញ្ជាក់​ថា​៖ «ទូរស័ព្ទ iPhone 6 និង iPhone 6 Plus មួយ​ទឹក ឲ្យ​តែ​មាន មិន​សូវ​ជា​នៅ​បាន​យូរ​ទេ ភ្ញៀវ​ទិញ​យក​ភ្លាមៗ»។

មិនមែន​តែ​លោក ស៊ិន វន់ តែ​ម្នាក់​ទេ​ដែល​សង្កេត​ឃើញ​ថា ទូរស័ព្ទ iPhone 6 និង iPhone 6 Plus នៅ​តែ​មាន​ប្រជា​ប្រិយភាព​ក្នុង​នោះ​ចំណោម​អ្នក​ប្រើ​ប្រាស់​កម្ពុជា​នោះ ប៉ុន្តែ លោក ហេង វិចិត្រ ភ្នាក់ងារ​លក់​នៅ​ឯ​ហាង​មហា​មន្ត្រី​លក់​ទូរស័ព្ទ​ដៃ ក៏​បានបញ្ជាក់​ផង​ដែរ​ថា ទូរស័ព្ទ​ស៊េរី​ចាស់​ទាំង​ពីរ​ម៉ូដែល​នេះ នៅ​តែ​មាន​តម្រូវការ​ខ្ពស់។

លោក វិចិត្រ និយាយ​ថា​៖ «អតិថិជន​នៅ​តែ​និយម​ប្រើ​ប្រាស់​ទូរស័ព្ទ​ស៊េរី iPhone 6 និង iPhone 6 Plus ច្រើន​ជាង​គេ។ បើ​តាម​ខ្ញុំ​ដឹង ប្រហែល​អាច​មក​ពី​ទូរស័ព្ទ​ Apple ស៊េរី​ថ្មី នៅ​មាន​បញ្ហា​ពាក់​ព័ន្ធ​នឹង Software ហើយ​រូប​រាង​មិន​សូវ​ជា​ខុស​គ្នា​»។

កញ្ញា ស្រី​កយ ភ្នាក់ងារ​លក់​នៅ​​ហាង​គីរីរម្យ​លក់ទូរស័ព្ទដៃ ​បាន​ឱ្យ​ដឹង​មិនខុសគ្នាដែរ​ថា៖ «វាមិនខុសគ្នា​ប៉ុន្នានទេ ខុស​តែព័ណ៌ និង​រាងរៅ​តែ​បន្តិច។ អញ្ចឹង​ ពួកគាត់​មិន​សូវ​ចង់​ដូរ​ទេ​ ហើយ​ហាង​ខ្ញុំ​ក៏​នៅ​មាន​អ្នក​ចូលចិត្ដ​ទិញ​ទូរស័ព្ទ​ iPhone 6 និង​​​ iPhone 6 Plus ​នេះ​ច្រើន​ជាងគេដែរ​ បើ​ប្រៀបធៀប​ទៅ​​ទូរស័ព្ទ iPhone ស៊េរីថ្មី»។

ទូរស័ព្ទ iPhone 6s និង iPhone 6s Plus របស់​ក្រុមហ៊ុន Apple ត្រូវ​បាន​ដាក់​លក់​ជា​ផ្លូវ​ការ​កាល​ពី​ថ្ងៃ​ទី​១៣ ខែ​វិច្ឆិកា​សប្ដាហ៍​មុន បន្ទាប់​ពី​ការ​ចេញ​លក់​ក្រៅ​ផ្លូវការ​តាម​បណ្ដា​ហាង​លក់​រាយ​នានា​ក្នុង​រាជ​ធានី​ភ្នំពេញ បាន​ធ្វើ​ឡើង​កាល​ពី​ជាង ១​ខែ​មុនមក​ម៉្លេះ៕

អត្ថបទគួរចាប់អារម្មណ៍