The Phnom Penh Post Search

Search form

Logo of Phnom Penh Post newspaper Phnom Penh Post - ប្រវត្តិ និង​ តម្លៃ​ នៃ​សិល្បៈ​លោត​ម៉ុងសាយ




ប្រវត្តិ និង​ តម្លៃ​ នៃ​សិល្បៈ​លោត​ម៉ុងសាយ

ក្រុម​លោត​ម៉ុង​សាយ របស់​សមាគម​ចិន ទាជីវ។
ក្រុម​លោត​ម៉ុង​សាយ របស់​សមាគម​ចិន ទាជីវ។ ម៉ៃ វីរៈ

ប្រវត្តិ និង​ តម្លៃ​ នៃ​សិល្បៈ​លោត​ម៉ុងសាយ

រៀង​រាល់​រដូវ​កាល​ចូល​ឆ្នាំ​ចិន​ម្តងៗ ប្រជាជន​កម្ពុជា​ដែល​ជាប់​សែ​ស្រឡាយ​ចិន​នៅ​កម្ពុជា ក៏បាន​ចូល​រួម​អបអរ​សាទរ និង​ប្រារព្ធ​ពិធី​បែប​ប្រពៃណី​ចិន​មួយ​នេះ​ផង​ដែរ។

នៅ​តាម​ដង​ផ្លូវ អគារ ផ្សារ​ទំនើប គេ​ក៏​អាច​សង្កេត​ឃើញ មាន​បិទ​ក្រដាស​ពណ៌​ក្រហមៗ តាម​ជញ្ជាំង​មាន​អក្សរ​ចិន​ផង រួម​ទាំង​ការ​ដាក់​តាំង​គោម និង​វត្ថុ​តាំង​លម្អ​ជាច្រើន​ទៀត ខណៈ​ប្រជា​ពលរដ្ឋ​ខ្មែរ​ជាប់​សែ​ស្រឡាយ​ចិន​ជាច្រើន​ទៀត នាំ​គ្នា​រៀបចំ តុបតែង​ផ្ទះ ទិញ​ទំនិញ ផ្លែ​ឈើ ជ្រូក​ខ្វៃ មាន់ ទា ធូប ទៀន ផ្គា​អង្គាសីល ក៏​ដូចជា​គ្រឿង​ទេស​ដទៃ​ទៀត​សម្រាប់​សែន​ព្រេន​ទៅ​តាម​ប្រពៃណី​ទំនៀម​ទម្លាប់​របស់​គេ។

យោង​តាម​ប្រភព (CIA WORLD FACTBOOK) ក្នុង ឆ្នាំ​២០១៤ ប្រទេស​កម្ពុជា មាន​ប្រជាជន ៩០ ភាគរយ​ជា​ជនជាតិ​ខ្មែរ ៥ ភាគរយ​ជា​ជនជាតិ​វៀតណាម មួយ​ភាគរយ​ជា​ជន​ជាតិ​ចិន និង ៤ ភាគរយ​ទៀត​ជា​ជនជាតិ​ផ្សេងៗ​ទៀត។

បើ​តាម​តួលេខ​របស់​សមាគម​ចិន​នៅ​កម្ពុជា កូន​ខ្មែរ​មាន​ឈាម​ជ័រ​ចិន​ដែល​កំពុង​រស់​នៅ​ប្រទេស​កម្ពុជា​សព្វ​ថ្ងៃ​មាន​ចំនួន​ប្រមាណ​ជា ៧០ ម៉ឺន​នាក់។

លោក ម៉ី ទីតូ គឺជា​ប្រជា​ពលរដ្ឋ​ខ្មែរ​ម្នាក់​ដែល​ជាប់​សែ​ស្រឡាយ​ចិន។ ក្រុម​គ្រួសារ​របស់​លោក តែងតែ​ប្រារព្ធ​ពិធី​បុណ្យ​ចូល​ឆ្នាំ​ចិន​នេះ​ជា​រៀង​រាល់​ឆ្នាំ​មិន​ដែល​ខាន​សោះ​ឡើយ។

លោក​បាន​ឲ្យ​ដឹង​ថា៖ «មុន​ពេល​ដល់​ថ្ងៃ​សែន​គ្រួសារ​របស់​ខ្ញុំ​ត្រូវ​រៀបចំ​បោស​ផ្ទះ​សម្បែង​ឲ្យ​បាន​ស្អាត និង​តុបតែង​ដោយ​មាន​ដាក់​ផ្កា​អង្គាសីល ឬ​លម្អ​ដោយ​មាន​ភ្លើង​ប្រដេញ​ជាដើម។ មិន​តែ​ប៉ុណ្ណោះ​អ្វី​ដែល​មិន​អាច​បំភ្លេច​បាន​គឺ​ការ​បិទ​ក្រដាស​ពណ៌​ក្រហម​ដែល​មាន​ពាក្យ​ស្លោក​ល្អៗ​សម្រាប់​នាំ​សិរី​សួស្តី​ចូល​ផ្ទះ»។

ក្រុម​លោត​ម៉ុង​សាយ របស់​សមាគម​ចិន ទាជីវ។
ក្រុម​លោត​ម៉ុង​សាយ របស់​សមាគម​ចិន ទាជីវ។ ម៉ៃ វីរៈ

មិន​ខុស​គ្នា​ប៉ុន្មាន​ពី​លោក ទីតូ កញ្ញា លី ចាន់ណារ៉ុង កូន​ខ្មែរ​កាត់​ចិន​ម្នាក់​ក្នុង​ទីក្រុង​ភ្នំពេញ ក៏​បាន​រៀបចំ​បោស​ជូត​ផ្ទះ​ផ្លាស់​ប្តូរ​កម្រាល​ពូក​ចាស់ៗ​ចោល។ល។ រួច​អស់​ហើយ​ដែរ។

យុវតី​សម្បុរ​សរូប​នេះ​បាន​ពោល​ថា៖ «សម្រាប់​ពេល​ព្រឹក​យើង​រៀបចំ​សែន​មាន់​ស្ងោរ ភេសជ្ជៈ ឬ​ផ្លែឈើ​ជាដើម លុះ​ដល់​ពេល​ម៉ោង​ប្រមាណ​ជា ៨ ឬ ៩ ព្រឹក​បន្ទាប់​ពី​ធ្វើ​ម្ហូប​ចប់​សព្វ​គ្រប់​ហើយ យើង​នឹង​រៀបចំ​សែន​កុងម៉ា ជីដូន​ជីតា ដែល​បាន​ចែក​ឋាន​ទៅ»។

ទន្ទឹម​នឹង​ការ​ញាប់​ដៃ​ញាប់​ជើង រក​ទិញ​ម្ហូប ជ្រួក​ខ្វៃ ឬ​ទា​ខ្វៃ មក​សែន​ព្រេន​នោះ ប្រពៃណី​មួយ​ទៀត​ដែល​គេ​តែង​តែ​ឃើញ​មិន​ដែល​ខាន​នោះ គឺ​ការ​លោត​ម៉ុង​សាយ នៅ​តាម​ផ្ទះ ក្រុម​ហ៊ុន ស្ថាប័ន និង​កន្លែង​បើក​អាជីវកម្ម​ផ្សេង។ ការ​ធ្វើ​ពិធី​លោត​ម៉ុង​សាយ​គឺជា​ប្រពៃណី​មួយ​ដែល​ប្រជាជន​ចិន​ជឿ​ថា នឹង​នាំ​រាសី​ជោគជ័យ​សំណាង​ល្អ និង​បណ្តេញ​ឧបទ្រព​ចង្រៃ ហើយ​នាំ​មក​នូវ​លាភ​សំណាង​ក្នុង​ឆ្នាំ​ថ្មី។

តើ​ម៉ុង​សាយ​ជា​អ្វី? ហេតុ​អ្វី​បាន​ជា​ប្រជាជន​ចិន​និយម​ការ​លោត​ ម៉ុង​សាយ?

ម៉ុងសាយ​ជា​ក្រុម​របាំ​ប្រពៃណី​ចិន​រួម​សម្ដែង​ដោយ​សិល្បករ​ពាក់​ក្រណាត់​ច្នៃ​ជា​រូប​តោ [Lion Dance] ហក់​លោត​ធ្វើ​ត្រាប់​តាម​កាយវិការ​សត្វ​សាហាវ​ពិតៗ​កំដរ​ដោយ​អ្នក​វាយ​ស្គរ​លាន់​ទ្រហឹង​អឺង​អាប់​ឲ្យ​ស៊ី​ទៅ​នឹង​ចង្វាក់​នៃ​ការ​លោត​ផ្លោះ​របស់​តោ។ របាំ​នេះ​មាន​គោល​បំណង​បណ្ដេញ​ឬ​កម្ចាត់​ភាវៈ​អាក្រក់​ឧបទ្រព​ចង្រៃ​ផង​ទាំង​ពួង​ដើម្បី​នាំ​មក​នូវ​សិរី​សួស្ដី​ដល់​ក្រុម​គ្រួសារ​ម្ចាស់​ផង។

ម៉ុង​សាយ​ជា​ទូទៅ​ត្រូវ​បាន​សម្តែង​ឡើង​នៅ​ក្នុង​ពេល​បុណ្យ​ចូល​ឆ្នាំ​ចិន និង​ពិធី​បុណ្យ​ប្រពៃណី​របស់​ជនជាតិ​ចិន​មួយ​ចំនួន​ទៀត។ ការ​រាំ​ឡក​ម៉ុងសាយ​ក៏​អាច​ធ្វើ​ឡើង​សម្រាប់​ឱកាស​ពិសេស​ដូចជា​ការ​បើក​សម្ពោធ​ហាង​ថ្មី ការ​ប្រារព្ធ​ពិធី​បុណ្យ​ពិសេស​ណា​មួយ​ក្នុង​ពិធី​មង្គលការ ឬ​ក្នុង​ពេល​ដែល​ទទួល​ភ្ញៀវ​កិត្តិយស​ណា​ម្នាក់​ក៏​បាន។

ការ​រាំ​ម៉ុង​សាយ​គឺជា​ញឹក​ញាប់​ត្រូវ​បាន​គេ​ច្រឡំ​នឹង​របាំ​នាគ (Dragon Dance)។ អ្វី​ដែល​ជា​ការ​ងាយ​ស្រួល​សម្គាល់​ពី​ការ​រាំ​ម៉ុង​សាយ (Lion Dance) គឺថា​ជា​ទូទៅ​ការ​រាំ​ម៉ុង​សាយ​ត្រូវ​ការ​មនុស្ស​តែ​ពីរ​នាក់​ទេ​ផ្ទុយ​ពីរ​បាំ​នាគ​ដែល​គេ​ត្រូវ​ការ​មនុស្ស​ច្រើន។ ម្យ៉ាង​រាំ​ម៉ុង​សាយ​គេ​មិន​ងាយ​ឃើញ​មុខ​អ្នក​រាំ​ទេ​ព្រោះ​គ្រប​ជិត​ដោយ​សម្លៀក​បំពាក់​តោ​ខណៈ​ដែល​របាំ​នាគ​គឺ​អាច​មើល​ឃើញ​អ្នក​រាំ​ច្បាស់​ព្រោះ​នាគ​គេ​គ្រាន់​តែ​កាន់​នឹង​បង្គោល​ប៉ុណ្ណោះ។

ក្រុម​លោត​ម៉ុង​សាយ របស់​សមាគម​ចិន ទាជីវ។
ក្រុម​លោត​ម៉ុង​សាយ របស់​សមាគម​ចិន ទាជីវ។ ម៉ៃ វីរៈ

ការ​លោត​ម៉ុង​សាយ ឬ​របាំ​តោ​មាន​ពីរ​ទម្រង់​ធំៗ​តោ​ភាគ​ខាង​ជើង និង​តោ​ភាគ​ខាង​ត្បូង។ ទាំង​ពីរ​ទម្រង់​នេះ​គឺ​ធម្មតា​ត្រូវ​បាន​គេ​រក​ឃើញ​នៅ​ប្រទេស​ចិន ប៉ុន្តែ​នៅ​ជុំវិញ​ពិភពលោក​ជាពិសេស​នៅ​អាស៊ី​អាគ្នេយ៍​តោ​ភាគ​ខាង​ត្បូង​មាន​ភាព​លេច​ធ្លោ​ជាង​ដោយ​សារ​តែ​វា​បាន​សាយភាយ​តាម​រយៈ​សហគមន៍​ជនជាតិ​ដើម​ចិន (Chinese diaspora communities) ដែល​ភាគ​ច្រើន​មាន​ប្រវត្តិ​ដើម​ជា​ជន​ជាតិ​ចិន​ភាគ​ខាង​ត្បូង។ការ​រាំ​ម៉ុង​សាយ​ក៏​ត្រូវ​បាន​គេ​រក​ឃើញ​នៅ​ក្នុង​ប្រទេស​ជប៉ុន​កូរ៉េ ទី​បេ និង​វៀតណាម​ផង​ដែរ។

យោង​តាម​គេហទំព័រ (www.nationsonline.org) តាម​ប្រពៃណី​ជំនឿ​របស់​ជនជាតិ​ចិន តោ​គឺ​តំណាង​ឲ្យ​ភាព​ក្លាហាន ស្ថិរភាព​និង​ឧត្តមភាព។ ម៉ុង​សាយ ​ត្រូវ​បាន​គេ​យក​មក​សម្តែង​ដើម្បី​បណ្តេញ​ខ្មោច​ព្រាយ​បិសាច​ដោយ​សារ​តែ​គេ​ជឿ​ថា ពួក​អសុរកាយ​ទាំង​នោះ​ខា្លច​សំឡេង​ឮ។ ភ្លេង​គឺ​ប្រគំ​តាម​ការ​ធ្វើ​ចលនា​របស់​សត្វ​តោ​ស្គរ​ធ្វើ​តាម​តោ​ឈិង និង​គង​ធ្វើ​តាម​អ្នក​លេង​ស្គរ។ ការ​រាំ​ម៉ុង​សាយ​គឺជា​ការ​រួម​បញ្ចូល​សិល្បៈ​ប្រវត្តិសាស្ត្រ​និង​ក្បាច់​គុន​កុងហ្វូ។ ជា​ទូទៅ​អ្នក​រាំ​ម៉ុង​សាយ​គឺជា​អ្នក​ហាត់​កុង​ហ្វូ​ហើយ​ការ​រាំ​លោត​ម៉ុង​សាយ​នេះ​មាន​មនុស្ស​ប្រហែល​ជា ១០ នាក់។

ការ​ហក់​លោត​ម៉ុង​សាយ​គឺ​គេ​សម្តែង​នៅ​ក្នុង​អំឡុង​ពេល​ពីរ​បី​ថ្ងៃ​ដំបូង​នៃ​ពិធី​បុណ្យ​ចូល​ឆ្នាំ​ចិន។ ម៉ុង​សាយ​មួយ​គេ​ត្រូវ​ការ​ឲ្យ​មាន​អ្នក​រាំ​ចំនួន​ពីរ​នាក់ ម្នាក់​គឺ​នៅ​ក្បាល​តោ និង​ម្នាក់​ទៀត​នៅ​កន្ទុយ​តោ។

រូប​រាង​របស់​តោ និង​ពណ៌​រោម​ក៏​មាន​អត្ថន័យ​របស់​វា​ដែរ។ ទ្រឹស្តី​គ្រឿង​ផ្សំ​ចំនួន​ប្រាំ ពណ៌​តំណាង និមិត្ត​សញ្ញា​ទាំង​ប្រាំបី និង​ពណ៌​គឺ​សុទ្ធ​តែ​ទាក់​ទង​នឹង​ហុងស៊ុយ​ដែល​ជា​មូលដ្ឋាន​សម្រាប់​បកប្រែ​ពី​ពណ៌​របស់​តោ។ ជា​ប្រពៃណី វា​ប្រហែល​ជា​មាន​ការ​បក​ប្រែ​ខុស​គ្នា​ដោយ​អាស្រ័យ​លើ​ការ​ជះ​ឥទ្ធិពល​ពី​រឿង​និទាន​តំណាល​តៗ​គ្នា។

តម្លៃ​នៃ​ការ​ជួល​ម៉ុង​សាយ​នៅ​ប្រទេស​កម្ពុជា នៅ​ក្នុង​ប្រទេស​កម្ពុជា​ជា​ទូទៅ​ការ​ជួល​ម៉ុង​សាយ​ឲ្យ​លោត​គឺ​អាច​រក​បាន​នៅ​តាម​សមាគម​ខ្មែរ​ចិន ឬ​សាលា​រៀន​ចិន ព្រោះ​ថា នៅ​ទីនោះ​មាន​ការ​ហ្វឹក​ហ្វាត់ និង​បង្រៀន​ពី​ការ​លោត​ម៉ុង​សាយ។

ជាក់​ស្តែង សមាគម​ខ្មែរ​ទាជីវ ដែល​មាន​ទីតាំង​នៅ​ផ្សារ​កណ្តាល​នៃ​រាជធានី​ភ្នំពេញ គឺជា​សមាគម​ខ្មែរ​ចិន​ហើយ​ក៏​ជា​សាលា​រៀន​ភាសា​ចិន​ផង​ដែរ។ សមាគម​មួយ​នេះ​មាន​សមាជិក​លោត​ម៉ុង​សាយ​ប្រមាណ​ជា ៨០ នាក់ ហើយ​ជា​ទូទៅ​ត្រូវ​បាន​គេ​ជួល​ឲ្យ​ទៅ​សម្តែង​នៅ​ពេល​រដូវ​កាល​ចូល​ឆ្នាំ​ចិន​ឬ​ពេល​សម្ពោធ​ហាង​ថ្មី​នានា។

ក្រុម​លោត​ម៉ុង​សាយ របស់​សមាគម​ចិន ទាជីវ។
ក្រុម​លោត​ម៉ុង​សាយ របស់​សមាគម​ចិន ទាជីវ។ ម៉ៃ វីរៈ

បើ​តាម​លោក តូវ ហាក់ហួត ប្រធាន​ក្រុម​ម៉ុង​សាយ​នៅ​សមាគម​ខ្មែរ​ទាជីវ​បាន​ឲ្យ​ដឹង​ថា ក្រុម​របស់​លោក​គឺ​មាន​ការ​មមា​ញឹក​ជា​ខ្លាំង ជាពិសេស​គឺ​នៅ​រដូវ​ចូល​ឆ្នាំ​ចិន​នេះ​តែ​ម្តង។

លោក​បាន​បន្ត​ទៀត​ថា៖ «តែបើ​ទោះ​បីជា​មិន​មែន​ចូល​ឆ្នាំ​ចិន​ក៏​ជា​ទូទៅ​មួយ​ខែ​ក្រុម​របស់​ខ្ញុំ​អាច​លោត​បាន​ពី ៣ ទៅ ៤ ដង​ដែរ»។

ប្រធាន​ក្រុម វ័យ ២២ ឆ្នាំ​រូប​នេះ បាន​បង្ហើប​ឲ្យ​ដឹង​ពី​តម្លៃ​ក្នុង​ការ​សម្តែង​ម្តងៗ​ថា វា​អាស្រ័យ​ទៅ​លើ​ការ​ចង់​បាន​របស់​អតិថិជន ថា​តើ​គេ​ចង់​បាន​វង់​ធំ ឬ​វង់​តូច? ក្នុង​នោះ​មាន​តម្លៃ​ចាប់​ពី ៣៨៨ ដុល្លារ រហូត​ដល់​ជិត ២០០០ ដុល្លារ​ក៏​មាន។ តម្លៃ​នោះ​ទៀត​សោត​គឺមាន​កន្ទុយ ៨៨ ដោយ​សារ​គេ​គិត​ថា នេះ​ជា​លេខ​ហុងស៊ុយ​តួយ៉ាង ៣៨៨,៦៨៨,១២៨៨,១៦៨៨ ជាដើម។

លោក ហាក់ហួត ដែលជា​អ្នក​លោត​ម៉ុង​សាយ​ក្បាច់​លើ​ដែក​ក៏​បាន​ប្រាប់​ឲ្យ​ដឹង​ផង​ដែរ​ថា មូលហេតុ​ដែល​គេ​មាន​ជំនឿ​ទៅ​លើ​ការ​លោត​ម៉ុង​សាយ​នេះ គឺ​ព្រោះ​តែ​មាន​រឿង​តំណាល​តៗ​គ្នា​មក​ថា ការ​លោត​ម៉ុង​សាយ​គឺ​អាច​បណ្តេញ​ខ្មោច​ព្រាយ​បិសាច​បាន​ដោយ​សារ​ពួក​ទាំង​នោះ​ខ្លាច​សំឡេង និង​រូបរាង​របស់​ម៉ុង​សាយ។ លើស​ពី​នេះ​ទៅ​ទៀត ពណ៌​ក្រហម​ក៏​អាច​ចូល​រួម​បណ្តេញ​ខ្មោច​ព្រាយ​បិសាច ហើយ​នាំ​សិរី​សួស្តី​បាន​ផង​ដែរ​ហេតុ​ដូច្នេះ​ហើយ​ទើប​បាន​ជា​គេ​ចូល​ចិត្ត​ប្រើ​ពណ៌​ក្រហម​នៅ​ពេល​ចូល​ឆ្នាំ​ចិន។

ជាមួយ​គ្នា​នោះ​ផង​ដែរ សមាគម​ចិន​ខិ នៅ​កម្ពុជា​ដែល​មាន​ទីតាំង​នៅ​ផ្សារ​អូរឬស្សី ក៏​មាន​ការ​ហាត់​លោត​ម៉ុង​សាយ​ផង​ដែរ​នៅ​រាល់​ពេល​ឱកាស​បុណ្យ​ចូល​ឆ្នាំ​ចិន។ បើ​តាម​ការ​ឲ្យ​ដឹង​ពី​លោក ឆាយ ស៊ុន ដែល​ជា​អ្នក​ដឹក​នាំ​ក្រុម​លោត​ម៉ុង​សាយ​នៅ​សមាគម​ចិន​ខិ ក្រុម​ម៉ុង​សាយ​របស់​លោក​មាន​គ្នា​ប្រមាណ​ជា ៣០ នាក់​ហើយ​ទទួល​លោត​តែ​នៅ​រដូវ​បុណ្យ​ចូល​ឆ្នាំ​ចិន​ប៉ុណ្ណោះ។

ពាក់ព័ន្ធ​ទៅ​នឹង​ជំនឿ​នៃ​ការ​លោត​ម៉ុង​សាយ​នេះ​ដែរ​លោក ឆាយ ស៊ុន បាន​និយាយ​ថា៖ «វា​ជា​ប្រពៃណី​ទំនៀម​ទម្លាប់​តាំង​ពី​យូរ​ណាស់​មក​ហើយ គេ​ជឿ​ថា ការ​លោត​ម៉ុង​សាយ​ជា​ការ​នាំ​ហុងស៊ុយ​លើក​រាសី បណ្តេញ​ឧបទ្រព​ចង្រៃ​ក្នុង​ឆ្នាំ​ចាស់​ហើយ​នាំ​មក​នូវ​សំណាង​ល្អ​ក្នុង​ឆ្នាំ​ថ្មី ដូច្នេះ​ហើយ​មួយ​ឆ្នាំ​គេ​លោត​ម្តង»។

ទាក់ទង​នឹង​តម្លៃ​នៃ​ការ​លោត​សម្តែង​ម៉ុង​សាយ​ម្តងៗ​របស់​សមាគម​ចិន​ខិ​នៅ​កម្ពុជា​ខាង​លើ មាន​ការ​ខុស​ប្លែក​គ្នា​ពី​សមាគម​ចិន​ទាជីវ ដោយ​មិន​មាន​ជា​ការ​បែង​ចែក​តម្លៃ​ពិត​ប្រាកដ​ជាក់​ស្តែង​នោះ​ទេ។ ផ្ទុយ​ទៅ​វិញ​គឺ​អាស្រ័យ​ទៅ​លើ​សទ្ធា​ជ្រះ​ថ្លា​របស់​អតិថិជន​ដែល​មាន​បំណង​ចង់​ជួយ​ដល់​សមាគម។ បើ​តាម​ការ​ឲ្យ​ដឹង​ពី​លោក ឆាយ ស៊ុន ក្នុង​មួយ​លើក​គឺអាច​ទទួល​បាន​អាំង​ប៉ាវ ចាប់​ពី ២០០ ដុល្លារ ដល់ ២០០០ ដុល្លារ​ក៏​មាន។

យ៉ាង​ណា​ក្តី លោក​ក៏​បាន​កត់​សម្គាល់​ថា ពី​មួយ​ឆ្នាំ​ទៅ​មួយ​ឆ្នាំ ចំនួន​អ្នក​ដែល​ជួល​ក្រុម​ម៉ុង​សាយ​ទៅ​លោត​មាន​ការ​ថយ​ចុះ ដោយ​ហេតុ​ថា ប្រជាជន​មួយ​ចំនួន​ជ្រើស​រើស​ការ​ដើរ​កម្សាន្ត​នៅតាម​ខេត្ត​នានា​ជាមួយ​ក្រុម​គ្រួសារ​នៅ​ថ្ងៃ​ចូល​ឆ្នាំ​ចិន៕

អត្ថបទគួរចាប់អារម្មណ៍