The Phnom Penh Post Search

Search form

Logo of Phnom Penh Post newspaper Phnom Penh Post - យុវជន​ខ្មែរ​ម្នាក់ រួច​ផុត​ពី​សេចក្តី​ស្លាប់​ដោយ​គ្រោះ​រញ្ជួយដី​ដោយសារ​ការគ្រេចជើង និង​សេះ​មួយ​ក្បាល




យុវជន​ខ្មែរ​ម្នាក់ រួច​ផុត​ពី​សេចក្តី​ស្លាប់​ដោយ​គ្រោះ​រញ្ជួយដី​ដោយសារ​ការគ្រេចជើង និង​សេះ​មួយ​ក្បាល

យុវជន មិន ចាន់តុលា (ឆ្វេងដៃ)។
យុវជន មិន ចាន់តុលា (ឆ្វេងដៃ)។ រូបថត សហការី

យុវជន​ខ្មែរ​ម្នាក់ រួច​ផុត​ពី​សេចក្តី​ស្លាប់​ដោយ​គ្រោះ​រញ្ជួយដី​ដោយសារ​ការគ្រេចជើង និង​សេះ​មួយ​ក្បាល

ក្នុង​ស្ថានភាព​សំណាង​មួយ​ក្នុង​មួយ​ពាន់​គ្រោះថ្នាក់ យុវជន​ខ្មែរ​ម្នាក់​ដែល​មាន​ឈ្មោះ មិន ចាន់តុលា បាន​និយាយ​ថា លោក​បាន​រួចផុត​ពី​​សេចក្តី​ស្លាប់​ដោយសារ​ការគ្រេចជើង និង​សេះ​មួយ​ក្បាល​។

កាលពី​ថ្ងៃ​ទី ២៥ ខែ​មេសា​ យុវជន តុលា និស្សិត​សាកលវិទ្យាល័យ​បញ្ញាសាស្រ្ត​ម្នាក់ បាន​ចំណាយ​រយៈពេល​មួយ​សប្តាហ៍​នៅក្នុង​​ប្រទេស​​នេប៉ាល់​ម្នាក់ឯង ក្នុង​អំឡុង​ពេល​​​វិស្សមកាល​របស់​គាត់​ដែល​មាន​រយៈពេល​ចំនួន​ ១ ​ខែ​។ លោក បាន​ទៅ​ដល់​ភូមិ KyanginGumpa តាម​ជ្រលង​ភ្នំ Langtang ដែល​មាន​ប្រជាជន​ ២០០ ​គ្រួសារ​រស់នៅ​។

ការធ្វើដំណើរ​ថ្មើរជើង​អស់​រយៈពេល​ ២ ​ថ្ងៃ​ទៅកាន់​ភូមិ KyanginGumpa បាន​ធ្វើឲ្យ​តុលា​ឈឺ​ជង្គង់ ដែល​នាំឲ្យ​លោក​ត្រូវ​ខកខាន​មិន​បាន​ធ្វើដំណើរ​បន្ត​ទៅ​ជំរំ​មួយ​ទៀត​ដែល​នៅ​ចម្ងាយ​ ១០០០ ម៉ែត​ពី​ភូមិ​។ ដោយ​មិន​មាន​ទូរទស្សន៍ និង​អ៊ីនធឺណិត យុវជន​តុលា ក៏​សម្រេចចិត្ត​ជួល​សេះ​ដើម្បី​ជិះ​។

នៅ​ម៉ោង ១១ និង​ ៤៥ នាទី តុលា​បាន​ចុះ​ទៅ​ក្រោល​សេះ​។ នៅ​ម៉ោង ១១ និង​ ៥៦ ​នាទី គ្រោះ​រញ្ជួយដី​ដែល​ខ្លាំង​ជាង​គេ​នៅក្នុង​ប្រទេស​នេប៉ាល់ ក្នុង​រយៈពេល​ ៨១ ឆ្នាំ​នេះ ក៏​ចាប់ផ្តើម​កើតមានឡើង​។ សណ្ឋាគារ​ដែល​តុលា​ស្នាក់នៅ បាន​រលំ​ស្ទើរតែ​ទាំងអស់​។

តុលា បាន​ប្រាប់​តាម​ទូរស័ព្ទ​ពី​រដ្ឋធានី​ Kathmandu ប្រទេស​នេប៉ាល់ កាលពី​ថ្ងៃ ៣០ មេសា​ថា​៖ «​បើ​ខ្ញុំ​នៅក្នុង​សណ្ឋាគារ​នោះ ខ្ញុំ​ប្រាកដ​ជា​ស្លាប់​ដោយសារ​ថ្ម​ធ្លាក់​ពី​លើ​បាត់​ហើយ​»​។

យុវជន​តុលា បាន​រៀបរាប់​ទៀត​ថា ពេល​​ដែល​មាន​គ្រោះ​រញ្ជួយដី​នោះ​ហើយ​ភ្លាម អ្នកនាំ​ផ្លូវ​ម្នាក់​បាន​ទាញ​គាត់​ចូល​ទៅក្នុង​ផ្ទះ​ឈើ​តូច​មួយ​។ លោក​ថា លោក​បាន​ឃើញ​អ្នក​ដែល​នៅ​ខាង​ក្រៅ​ឱប​ក្រុម​គ្រួសារ​ពួកគេ ហើយ​រក​កន្លែង​ជ្រក ដោយ​មាន​ព្រឹល​ទឹកកក ធ្លាក់​ពី​លើ​ភ្នំ​ដែល​នៅ​ជុំវិញ​នោះ​។ មនុស្ស​ជាច្រើន​នាក់​នៅ​កន្លែង​​នោះ​ត្រូវ កម្ទេចកម្ទី ដែល​ហោះ​នៅ​ជុំវិញ​នោះ ធ្លាក់​លើ​ក្បាល និង​លើ​ខ្លួន​ពួកគេ​។

អគារ​ស្នាក់នៅ បាក់បែក​ក្រោយ​គ្រោះ​រញ្ជួយដី។
អគារ​ស្នាក់នៅ បាក់បែក​ក្រោយ​គ្រោះ​រញ្ជួយដី។ រូបថត សហការី

ជ្រលងភ្នំ Lantang ស្ថិត​នៅ​ជាង​ ៦៤ ​គីឡួម៉ែត្រ ខាង​ជើង​ពី Kathmandu ដែល​នៅ​ជិត​កន្លែង​ដែល​គ្រោះ​រញ្ជួយដី​កម្រិត ៧,៨ រ៉ិចទ័រ បាន​រង្គើ​ខ្លាំង​ជាងគេ​។ គ្រោះ​រញ្ជួយដី​នេះ បាន​ធ្វើឲ្យ​មនុស្ស​ជាង ៧៥០០ នាក់​បាន​ស្លាប់​បាត់បង់​ជីវិត បើ​គិត​មក​ត្រឹម​ថ្ងៃ​ទី​ ៥​ ខែ​ឧសភា​នេះ​។

អ្នក​ដែល​បាន​ឃើញ​ហេតុការណ៍​នេះ​ផ្ទាល់​ភ្នែក​បាន​និយាយ​ថា ជាង​ ៩០ ​ភាគរយ​នៃ​អគារ​នៅ​តាម​ជ្រលង​ភ្នំ​នោះ ត្រូវ​បាន​កម្ទេច​​ដោយ​គ្រោះ​រញ្ជួយដី​នេះ​។

ក្រោយពី​គ្រោះ​រញ្ជួយដី​នោះ ដោយ​មិន​អាច​ទាក់ទង​ជាមួយ​នឹង​ប្រទេស​ក្រៅ​បាន​តុលា បាន​និយាយ​ថា អ្នកនាំ​ផ្លូវ​ពីរ​នាក់​ដែល​នៅក្នុង​ភូមិ​នោះ បាន​ជួយ​សង្គ្រោះជីវិត​របស់​លោក​។ បន្ទាប់ពី​សម្រាក​បាន​មួយ​យប់ អ្នក​នាំ​ផ្លូវ​ទាំង​ ២ នាក់​នោះ បាន​នាំ​លោក​ធ្វើ​ដំណើរ​ថ្មើរជើង​ចម្ងាយ​ ៨ ​គីឡូម៉ែត្រ​ចេញពី KyanginGumpa ឆ្ពោះ​ទៅ​ភូមិ​ដែល​ធំ​ជាង​នោះ នៅក្នុង​ជ្រលង​ភ្នំ Langtang ដូច​គ្នា​។ អ្នកភូមិ​នៅ​ទីនោះ​ចំនួន​ ៦ ​នាក់​បាន​ស្លាប់​បាត់បង់​ជីវិត ព្រម​ជាមួយ​នឹង​អ្នករបួស​ជាច្រើន​នាក់​ទៀត​។

តុលា ចំណាយ​រយៈពេល ៣ យប់​នៅ Langtang ដើម្បី​រង់ចាំ​ឧទ្ធម្ភាគចក្រ​។ អ្នកនាំផ្លូវ​របស់​តុលា បាន​យក​ម្ហូប​ពី​ផ្ទះ​អ្នក​ដែល​បាន​ស្លាប់ មក​ឲ្យ​អ្នក​នៅក្នុង​ក្រុម​នោះ​បរិភោគ​។ លោក​និយាយ​ថា លោក​បាន​យំ ហើយ​គេង​មិន​លក់​ព្រោះ​លោក​មាន​អារម្មណ៍​ថា​នៅ​ឆ្ងាយ​ពី​ផ្ទះ​។

លោក​ពោល​ថា​៖ «​ខ្ញុំ​មាន​អារម្មណ៍​ថា​ខ្ញុំ​នឹង​ស្លាប់ ហើយ​ខ្ញុំ​គិត​ថា​ខ្ញុំ​ប្រហែល​ជា​ឆ្កួត​ហើយ​ដែល​សម្រេចចិត្ត​មក​ទៅ​នេះ​។ ព្រោះ​បើ​ខ្ញុំ​ស្លាប់ ខ្ញុំ​ចង់​ស្លាប់​នៅ​ជិត​មនុស្ស​ដែល​ខ្ញុំ​ស្រឡាញ់​»​។

កន្លែង​ដែល​យុវជន មិន ចាន់តុលា ស្នាក់នៅ​ក្នុង​ភូមិ KyanginGumpa។
កន្លែង​ដែល​យុវជន មិន ចាន់តុលា ស្នាក់នៅ​ក្នុង​ភូមិ KyanginGumpa។ រូបថត សហការី

៣ ​យប់​ក្រោយមក ឧទ្ធម្ភាគចក្រ​ឯកជន​​មួយ​បាន​មក​យក តុលា ពី​ជ្រលងភ្នំ​។ លោក​បាន​ចំណាយ​ប្រាក់​អស់ ១០០០ ដុល្លារ​ដើម្បី​ឲ្យ​គេ​ជួយ​សង្គ្រោះ​លោក​។ លោក​បាន​ប្រាប់​ថា​៖ «​អ្នកនាំផ្លូវ​ខ្ញុំ​ប្រាប់​ខ្ញុំ​ឲ្យ​ទៅ តែ​ពួកគាត់​មិន​ទៅ​ជាមួយ​ខ្ញុំ​ទេ ព្រោះ​ត្រូវ​ចំណាយ​អស់​លុយ​ច្រើន​ពេក​»​។

ក្រៅពី​តុលា ក៏​មាន​ប្រជាជន​ជនជាតិ​ខ្មែរ​ម្នាក់​ទៀត ឈ្មោះ លោក ខួន “​ឌីណា​” សុភ័ក្ត្រ​អាយុ​ ៣៥ ​ឆ្នាំ ជាប់​នៅក្នុង​គ្រោះ​រញ្ជួយដី​នោះ​ដែរ​។ លោក ឌីណា បាន​ស្នាក់នៅ​ប្រទេស​នេប៉ាល់​អស់​រយៈពេល​ ៩ ​ខែ ដោយ Cambodia Centre for Independent Media បាន​បញ្ជូន​លោក​ឲ្យ​ទៅ​ធ្វើការ​នៅ​ទីនោះ​រយៈពេល​ ១ ​ឆ្នាំ​។

លោក​ឌីណា បាន​និយាយ​ថា លោក​ពិបាក មិន​ដឹង​ថា​ត្រូវ​ទៅ​រក​ជំនួយ​ពី​ទីណា​។

លោក​ថា​៖ «​ជនជាតិ​ផ្សេង​បាន​ជំនួយ ដូចជា​ម្ហូប និង​កន្លែង​ស្នាក់នៅ ពី​រដ្ឋាភិបាល​របស់​ពួកគេ​។ សម្រាប់​ខ្ញុំ​ដែល​ជា​ជនជាតិ​ខ្មែរ ខ្ញុំ​មិន​បាន​ទទួល​ជំនួយ​ទេ​។ ខ្ញុំ​ត្រូវ​ទៅ​រកម្ហូប និង​កន្លែង​ស្នាក់នៅ​ដោយ​ខ្លួនឯង ដូច​មនុស្ស​មួយ​ចំនួន​នៅ​ទី​នោះ​ដែរ​»៕

អត្ថបទគួរចាប់អារម្មណ៍

  • ភ្នំពេញៈ ក្រុមហ៊ុន Longfruiter Anlong Veng Oddor Meanchey Agriculture Park Co., Ltd បាន​បញ្ចេញ​ប្រាក់​វិនិយោគ ៥១ ​លាន​ដុល្លារ​ទៅលើ​ការដាំ​ដំណាំ​ចេក និង​ដំណាំ​ហូប​ផ្លែ​មួយចំនួន​នៅក្នុង​ស្រុក​អន្លង់វែង ខេត្ត​ឧត្តរមានជ័យ ដើម្បី​ជំរុញ​ការនាំចេញ ពិសេស​ទៅ​ទីផ្សារ​ប្រទេស​ចិន​។

  • ភ្នំពេញៈ មូលនិធិ​កម្ពុជា​ប្រឆាំង​កូវីដ​ ១៩ បន្ត​អំពាវនាវ​ដល់​សប្បុរជន​ឱ្យ​ចូលរួម​បរិច្ចាគ​ធនធាន ដើម្បី​រួមចំណែក​ក្នុងការ​ឧបត្ថម្ភ​ទ្រទ្រង់​ដល់​ពលរដ្ឋ​ដែល​កំពុង​ជួប​ការលំបាក និង​ក្រុមគ្រូពេទ្យ​អាវស អំឡុងពេល​ប្រយុទ្ធប្រឆាំង​ជំងឺ​កូវីដ ខណៈ​មូលនិធិ​នេះ​បាន​ជួយ​ដល់​ពលរដ្ឋ​ជាង ១ ​ម៉ឺន​គ្រួសារ តាមរយៈ​ការផ្តល់​ជា​គ្រឿង​បរិភោគ និង​កញ្ចប់​ថ្នាំ​ជាដើម​។

  • ភ្នំពេញៈ ​ជន​ជាប់ឃុំ​នៅតាម​ពន្ធនាគារ និង​មណ្ឌល​អប់រំ​កែប្រែ​រាជធានី​-​ខេត្ដ​ជាង ២ ​ពាន់​នាក់​បាន​ចាក់​វ៉ាក់សាំង​បង្ការ​ជំងឺ​កូវីដ​ ១៩ ​ដូស​ទី​ ៣ និង​កំពុង​បន្ត​ចាក់​ដូស​ជំរុញ​នេះ​បន្ថែមទៀត ខណៈ​ជន​ជាប់ឃុំ​សរុប​ប្រមាណ ៣៨ ០០០ ​នាក់​បាន​ចាក់​ ២​ ដូស​រួចហើយ​។

  • ភ្នំពេញៈ ​សាកលវិទ្យាល័យ និង​គ្រឹះស្ថាន​អប់រំ កម្រិត​ឧត្ដមសិក្សា​សាធារណៈ និង​ឯកជន​ប្រមាណ​ ២០ នៅ​ថ្ងៃទី​ ២៩ ខែមករា ខាងមុខនេះ​នឹង​រៀបចំ «​ពិព័រណ៍​ជំនាញ និង​សាកលវិទ្យាល័យ​» ​តាម​អន​ឡាញ​ដើម្បីឱ្យ​វាគ្មិន​ជំនាញ​ចែករំលែក​ចំណេះដឹង បទពិសោធ ដល់​និស្សិត​លើ​ការជ្រើសរើស​មុខជំនាញ​សិក្សា និង​សាកលវិទ្យាល័យ​សិក្សា​នៅក្នុង​ប្រទេស​កម្ពុជា​។

  • ភ្នំពេញៈ ជប៉ុន​បាន​ផ្ដល់​រថយន្ត​ពន្លត់​អគ្គិភ័យ​ចំនួន​ ៤ ​គ្រឿង​ដល់​អង្គភាព​ការិយាល័យ​នគរបាល​បង្ការ ពន្លត់​អគ្គិភ័យ និង​សង្គ្រោះ​នៃ​ស្នងការដ្ឋាន​នគរបាល​រាជធានី​ភ្នំពេញ ដើម្បី​ចូលរួមចំណែក​ធ្វើឱ្យ​ប្រសើ​ឡើង​នូវ​ប្រសិទ្ធភាព​ការងារ​ឆ្លើយតប និង​ការ​កាត់បន្ថយ​នូវ​ហានិភ័យ​នានា ដែល​បង្កឡើង​ដោយ​គ្រោះ​អគ្គិភ័យ​នៅ​កម្ពុជា ពិសេស​ក្នុង​រាជធានី​ភ្នំពេញ​។

  • ភ្នំពេញៈ ​សាជីវកម្ម​ធានាឥណទាន​កម្ពុជា (CGCC) និង​មជ្ឈមណ្ឌល​បច្ចេកវិទ្យា និង​ព័ត៌មាន​ជីវឧស្ម័ន (BTIC) នៅ​ថ្ងៃទី​ ២៤ ខែមករា បាន​ចុះ​អនុស្សរណៈ​ជាមួយ​គ្នា ដើម្បី​លើកកម្ពស់​បរិយាកាស​អំណោយផល​ដល់​ការវិនិយោគ​លើ​បច្ចេកវិទ្យា​ជីវឧស្ម័ន​ខ្នាត​ធំ​នៅ​កម្ពុជា​ដើម្បី​រួមចំណែក​កាត់​បន្ថយ​ការប្រែប្រួល​អាកាសធាតុ​។ នេះ​បើតាម​សេចក្ដី​ប្រកាស​ព័ត៌មាន​។