The Phnom Penh Post Search

Search form

Logo of Phnom Penh Post newspaper Phnom Penh Post - យុវតី​ខ្មែរ លើក​ពី​តួនាទី​កុមារ និង​យុវជន​ក្នុង​ការ​កាត់​បន្ថយ​គ្រោះ​មហន្តរាយ​ទៅ​លោក​បាន គីមូន




យុវតី​ខ្មែរ លើក​ពី​តួនាទី​កុមារ និង​យុវជន​ក្នុង​ការ​កាត់​បន្ថយ​គ្រោះ​មហន្តរាយ​ទៅ​លោក​បាន គីមូន

Content image - Phnom Penh Post
កញ្ញា អៀន សុភឿន ជួប​ជាមួយ​លោក​បាន គីមូន ក្នុងសន្និបាតពិភពលោក​ស្តីពីការ​កាត់បន្ថយហានិភ័យ​នៃគ្រោះមហន្តរាយ។ រូបថត សហការី

យុវតី​ខ្មែរ លើក​ពី​តួនាទី​កុមារ និង​យុវជន​ក្នុង​ការ​កាត់​បន្ថយ​គ្រោះ​មហន្តរាយ​ទៅ​លោក​បាន គីមូន

ក្នុង​វ័យ​ទើប​តែ​ ២០ ​ឆ្នាំ កញ្ញា​អៀន សុភឿន គឺជា​ប្រតិភូ​យុវជន​កម្ពុជា​តំណាង​អង្គការ​ភ្លែន​អន្តរជាតិ​កម្ពុជា មួយ​រូប​ដែល​បាន​ចូល​រួម​​សន្និបាត​ពិភព​លោក​ស្តីពី «ការ​កាត់​បន្ថយ​​ហានិភ័យ​គ្រោះ​មហន្តរាយ» ដែល​​បាន​ធ្វើ​ឡើង​នៅ​ទីក្រុង​សេន​ដៃ ប្រទេស​ជប៉ុន​កាល​ពី​ថ្ងៃទី ១៦ ដល់ ១៨ ខែ​មីនា កន្លង​ទៅ​នេះ។

យុវតី​ដែល​មាន​ស្រុក​កំណើត​នៅ​ស្រុក​ស្រី​ស្នំ ខេត្ត​សៀមរាប​រូបនេះ បាន​ឲ្យ​ដឹង​ថា នៅ​ក្នុង​សន្និសីទ​នោះ កញ្ញា​បាន ចូល​រួម​ធ្វើជា​វាគ្មិន​ក្នុងការ​ចែក​រំលែក​បទ​ពិសោធ​ទាក់ទង​ទៅ​នឹង​ប្រធាន​បទ «ការ​អប់រំ និង​ចំណេះ​ដឹង​ក្នុង​ការ​កសាង​វប្បធម៌​ទប់ទល់​ទៅ​នឹង​គ្រោះ​មហន្តរាយ» ដោយ​បាន​​រៀប​រាប់​ពី​សកម្មភាព​ដែល​កញ្ញា​បាន​ធ្វើ​ការ​ស្ម័គ្រ​ចិត្ត​នៅ​ក្នុង​សហគមន៍​ក៏​ដូចជា​បញ្ហា​ដែល​ជួប​ប្រទះ និង​​ដំណោះ​ស្រាយ​ផ្សេងៗ ក្នុង​នាម​ជា​អ្នក​ដឹកនាំ​ក្រុម​ប្រឹក្សា​កុមារ​នៅ​ក្នុង​វិទ្យាល័យ​​ ២៨ ​មករា​ដែល​កញ្ញា​បាន​រៀន។

ក្នុង​នោះ​គឺ​កញ្ញា បាន​លើក​ពី​ភាព​ចាំបាច់ និង​ជា​ចំណុច​អាទិភាព​មួយ​នៃ​តួនាទី​កុមារ និង​យុវជន​នៅក្នុង​ការ​ត្រៀម​រៀបចំ​ឆ្លើយតប​ទៅនឹង​គ្រោះ​មហន្តរាយ​ទាំង​ឡាយ ដែល​អាច​ប៉ះពាល់​ដល់​សុវត្ថិភាព​កុមារ តាម​សាលារៀន​នានា នៅ​ចំពោះ​មុខ​ប្រតិភូ​ពិភព​លោក​ទាំង​ ២៥០ ​រូប ដែល​មកពី​ប្រទេស​ចំនួន​ ១៨៧​។​

មិន​តែ​ប៉ុណ្ណោះ សុភឿន ក៏បាន​បង្ហាញ​​សារ​ដែល​សរសេរ​ផ្ទាល់ដៃ ដែល​តំណាង​​ឲ្យ​កុមារ និង​យុវជន​កម្ពុជា ទៅ​លោក​បាន​ គីមូន អគ្គលេខាធិការ​អង្គការ​សហ​ប្រជា​ជាតិ​ផង​ដែរ​។ អត្ថន័យ​នៃ​សារ​​នោះ​គឺ ​«​ក្នុង​ផែន​ការ​ ១០ ​ឆ្នាំ ខ្ញុំ​សង្ឃឹម​ថា កុមារ​​នឹង​មាន​សមត្ថភាព​ក្នុង​​គណៈកម្មាការ​កាត់​បន្ថយ​គ្រោះ​មហន្ត​រាយ​​គ្រប់​ថ្នាក់ និង​គ្រប់​ប្រទេស​ទាំងអស់»។

Content image - Phnom Penh Post

ទាក់ទង​ទៅនឹង​អត្ថន័យ​របស់​សារ​នោះ​ដែរ​សុភឿន បាន​ឲ្យ​ដឹង​ថា សារ​​នេះ​គឺ​កញ្ញា​​ចង់​ផ្តោត​សំខាន់​ទៅ​លើ​​ការចូលរួម​របស់​​កុមារ​ជាមួយ​នឹង​​រដ្ឋាភិបាល ដោយ​សារ​​កញ្ញា មើល​ឃើញ​ថា ការ​ចូល​រួម​របស់​​កុមារ​ជាមួយ​នឹង​រដ្ឋាភិបាល​ហាក់​នៅ​មាន​កម្រិត​នៅ​ឡើយ។

សុភឿន បាន​លើក​ជា​ឧទាហរណ៍​ថា៖ «ជាក់​ស្តែង​គឺ​រូបខ្ញុំ​ផ្ទាល់​មិនសូវ​បាន​ចូលរួម​ជាមួយ​ក្រុម​ប្រឹក្សា ​ភូមិ /​ឃុំ ​ប៉ុន្មាន​នោះទេ ភាគ​ច្រើន​គឺ​ធ្វើការ​តែ​ជាមួយ​នឹង​អង្គការ​ក្រៅ​រដ្ឋាភិបាល ដូចជា​អង្គការ​ភ្លែន​ជាដើម ដូច្នេះ​ខ្ញុំ​យល់​ឃើញ​ថា ប្រសិន​បើ​កុមារ​អាច​មាន​លទ្ធភាព​ចូលរួម​ជជែក​វែក​ញែក​ជាមួយ​រដ្ឋាភិបាល​ដោយ​ផ្ទាល់​នោះ​ពួក​គាត់​នឹង​បាន​យល់​កាន់​តែ​ច្បាស់​ពី​ផល​វិបាក​ដែល​កុមារ​កំពុង​តែ​ជួប​ប្រទះ ហើយ​ពួកគាត់​អាច​នឹង​ចូល​រួម​ជួយ​ដល់​កុមារ​ដែល​រងគ្រោះ​បាន​មួយ​ចំណែក​ទៀត»។

ក្នុង​នាម​ជា​អ្នក​ដឹក​នាំ​ក្រុម​ប្រឹក្សា​កុមារ​​នៅ​វិទ្យាល័យ​របស់​នាង​ក្នុង​ខេត្ត​សៀមរាប សុភឿន បាន​ដឹកនាំ​សកម្មភាព​កាត់​បន្ថយ​ហានិភ័យ​គ្រោះ​មហន្តរាយ​នៅក្នុង​សាលារៀន និង​សហគមន៍​របស់​នាង​ដោយ​ផ្តោត​ទៅ​លើ​ការ​បណ្តុះ​បណ្តាល​ស្តីពី​ការ​សង្រ្គោះ​បឋម និង​ត្រៀម​រៀបចំ​ក្នុង​ករណី​មាន​​ទឹក​ជំនន់ និង​គ្រោះ​រាំង​ស្ងួត។

នៅ​ក្នុង​ឆ្នាំ ២០១២ សុភឿន បាន​ជួប​ជា​មួយ​នឹង​តំណាង​ពិសេស​នៃ​អង្គការ​សហប្រជាជាតិ​​ទទួល​បន្ទុក​កាត់​បន្ថយ​ហានិភ័យ​គ្រោះ​មហន្តរាយ​លោក​ស្រី ម៉ាហ្គារ៉េតា វ៉ាល​ស្រូម (Margareta Wahlström) ដែល​កាល​នោះ​លោកស្រី បាន​ទៅ​​ទស្សនកិច្ច សាលា​រៀន​​របស់​សុភឿន នៅ​កម្ពុជា​។​

ចាប់​តាំង​ពី​ពេលនោះ​មក អៀន សុភឿន ដែល​បច្ចុប្បន្ន​ជា​និស្សិត​ឆ្នាំ​ទី​ ១ ​ផ្នែក​ច្បាប់​នៅ​សាកល​វិទ្យាល័យ​ភូមិន្ទ​នីតិសាស្ត្រ និង​វិទ្យាសាស្ត្រ​សេដ្ឋកិច្ច បាន​ដើរ​តួនាទី​យ៉ាង​សកម្ម​ក្នុង​ការ​លើក​កម្ពស់​សំឡេង​យុវជន​នៅក្នុង​គ្រោះ​មហន្ត​រាយ ហើយ​នេះ​គឺជា​លើក​ទីបី​សម្រាប់​កញ្ញា​ដែល​បាន​ចូលរួម​ក្នុង​សន្និសីទ​ស្តីពី​ការ​កាត់​បន្ថយ​ហានិភ័យ​គ្រោះ​មហន្តរាយ ដោយ​កន្លង​មក​កញ្ញា​ធ្លាប់​បាន​ធ្វើ​ការ​ចែក​រំលែក​បទ​ពិសោធ​របស់​ខ្លួន​ពីរដង​រួច​មក​ហើយ​នៅឯ​ប្រទេស​​ឥណ្ឌូនេស៊ី និង​ប្រទេស​ស្វ៊ីស។

ហេតុអ្វី​បានជា​កុមារ និង​យុវជន​មាន​តួនាទី​សំខាន់​ក្នុង​ការ​ចូល​រួម​កាត់​បន្ថយ​គ្រោះ​មហន្តរាយ​?

បើ​តាម​ការ​លើកឡើង​របស់​លោក​យន់ ស៊ីណា ប្រធាន​គម្រោង​កិច្ច​ព្រម​ព្រៀង​អាស៊ាន​ស្តីពី​ការ​គ្រប់​គ្រង​គ្រោះ​មហន្តរាយ និង​ឆ្លើយតប​សង្គ្រោះ​បន្ទាន់​ប្រចាំ​​អង្គការ​ភ្លែន​អន្តរជាតិ​កម្ពុជា កុមារ​មាន​តួនាទី​សំខាន់​ក្នុង​ការ​ចូល​រួម​កាត់​បន្ថយ​​ហានិភ័យ​គ្រោះ​មហន្តរាយ​ដោយ​សារ​ថា កុមារ​គឺជា​អ្នក​ដែល​ងាយ​នឹងរង​គ្រោះ​បំផុត ហើយក៏​ជា​អ្នក​ដែល​ទទួល​ដឹង ឮ​ពី​ផលវិបាក​នៃ​គ្រោះ​មហន្តរាយ​ដែល​គេ​បាន​ជួបប្រទះ​ជាង​អ្នក​ណាៗ​ទាំង​អស់​។ ដូច្នេះ ការ​ចូល​រួម​របស់​កុមារ​ក្នុង​ការ​ចែក​រំលែក និង​ផ្សព្វផ្សាយ​បន្តទៅ​កុមារ​​ដទៃ​ទៀត​គឺមាន​ប្រសិទ្ធ​ភាព និង​សារៈ​​​សំខាន់​បំផុត។

លោក​បាន​ពោល​ថា៖ «ប្រសិន​បើ​យើង​​ឲ្យ​មនុស្ស​ចាស់​ទៅ​ធ្វើ​ការ​ផ្សព្វ​ផ្សាយ​​នៅ​ក្នុង​សហគមន៍​ភាគច្រើន​គឺ​មាន​តែ​មនុស្ស​ចាស់​ដូចគ្នា​ទេ​ដែល​ចង់​ស្តាប់​​ផ្ទុយ​ទៅវិញ​ប្រសិនបើ​យើង​ឲ្យ​កុមារ​ ឬ​យុវជន​​​ជា​អ្នក​ចែក​រំលែក​យើង​ឃើញ​ថា​​នឹង​មាន​ការ​ចាប់​អារម្មណ៍​ និង​មាន​ប្រសិទ្ធ​ភាព​ខ្ពស់​ជាង»។

អង្គការ​ភ្លែន បាន​អនុវត្ត​គម្រោង «ពង្រឹង​​សំឡេង​កុមារ​ដើម្បី​លើក​កម្ពស់​សុវត្ថិភាព​សាលា​រៀន» នៅ​ក្នុង​សាលា​ចំនួន ១២ ក្នុង​ឃុំ​ចំនួន ១១ ស្រុក​ចំនួន ​៤ ក្នុង​ខេត្ត​សៀមរាប ខេត្ត​កំពង់ចាម ខេត្ត​រតនគិរី និង​រាជធានី​ភ្នំពេញ។ មិន​តែ​ប៉ុណ្ណោះ​នៅ​ថ្នាក់​ជាតិ​អង្គការ​​នេះ​បាន​​​សហការ​ជាមួយ​យុវជន​​ដើម្បី​​ជំរុញ​ការ​រៀប​ចំ​ផែនការ​សកម្មភាព​​ថ្នាក់​ជាតិ​សម្រាប់​ការ​កាត់​បន្ថយ​ហា​និភ័យ​គ្រោះ​មហន្តរាយ​ឆ្នាំ ២០១៤-២០១៨ ផង​ដែរ៕

អត្ថបទគួរចាប់អារម្មណ៍