The Phnom Penh Post Search

Search form




Logo of Phnom Penh Post newspaper Phnom Penh Post - វិធានការ​ប្លែកៗ​ជួយ​សិស្ស​ប្រឡង​នៅ​កូរ៉េ​ខាង​ត្បូង

វិធានការ​ប្លែកៗ​ជួយ​សិស្ស​ប្រឡង​នៅ​កូរ៉េ​ខាង​ត្បូង

Content image - Phnom Penh Post
សិស្ស​កូរ៉េ​ខាង​ត្បូងអង្គុយ​ប្រឡង​ដោយ​ស្ងៀម​ស្ងាត់​ក្នុង​បន្ទប់។ bloomberg

វិធានការ​ប្លែកៗ​ជួយ​សិស្ស​ប្រឡង​នៅ​កូរ៉េ​ខាង​ត្បូង

សេអ៊ូល៖ កាល​ពី​ថ្ងៃ​ព្រហស្បតិ៍​ម្សិល​ម៉ិញ យុវ​សិស្ស​កូរ៉េ​ខាង​ត្បូង​ចំនួន ៦៣​ម៉ឺន​នាក់ បាន​ចូល​រួម​ប្រឡង​ចូល​មហា​វិទ្យាល័យ​នៅ​ទូទាំង​ប្រទេស។ ខណៈ​ពេល​ប្រឡង​នេះ រដ្ឋាភិបាល​កូរ៉េ​ខាង​ត្បូង បាន​ចាត់​វិធានការ​ពិសេស​ជាច្រើន ដើម្បី​សម្រួល​ដល់​ការ​ប្រឡង​របស់​សិស្ស​ទាំងនោះ។

Content image - Phnom Penh Post

ដើម្បី​ធានាការ​គ្មាន​ផល​ប៉ះ​ពាល់​ដល់​ការ​តាំង​ស្មារតី​ប្រឡង​របស់​សិស្ស​ទាំង​អស់ រាល់​ជើង​ហោះ​ហើរ និង​ចុះ​ចត​ទាំង​អស់​ដែល​កើត​ឡើង​ស្រប​គ្នា​នឹង​ការ​ប្រឡង​ស្ដាប់​ភាសា​បរទេស នឹង​ត្រូវ​ពន្យា​រយៈ​ពេល ៣៥​នាទី។

ក្នុង​ពេល​ប្រឡង​កាល​ពី​ថ្ងៃ​ព្រហស្បតិ៍​កន្លង​មក​នេះ ក្រសួង​ដឹក​ជញ្ជូន​កូរ៉េ​ខាង​ត្បូង និយាយ​ថា ជើង​ហោះ​ហើរ​ចំនួន ៦៩ ត្រូវ​បាន​គេ​កែ​សម្រួល ដោយសារ​តែ​ការ​ពន្យា​ជើង​ហោះ​ហើរ​ក្នុង​ស្រុក​នៅ​ថ្ងៃ​ប្រឡង​នោះ។
រាល់​ជើង​ហោះ​ហើរ​មក​ដល់​ទាំង​អស់​ដែល​កំពុង​ស្ថិត​នៅ​លើ​​អាកាស ត្រូវ​តែ​រក្សា​រយៈ​កម្ពស់​មិន​ទាប​ជាង ៣​គីឡូ​ម៉ែត្រ រហូត​ដល់​មាន​ការ​អនុញ្ញាត​ឲ្យ​ចុះ​ចត។

ការិយាល័យ​សាធារណៈ និង​ក្រុមហ៊ុន​ធំៗ ព្រម​ទាំង​ទីផ្សារ​ភាគ​ហ៊ុន​ផង​ដែរ ត្រូវ​បើក​ទ្វារ​យឺត​ជាង​ធម្មតា​ ១​ម៉ោង​នៅ​ថ្ងៃ​ប្រឡង​នោះ ដើម្បី​សម្រួល​ចរាចរណ៍​ដល់​សិស្ស និង​ធានា​ថា សិស្ស​ធ្វើ​ដំណើរ​ទៅ​ដល់​កន្លែង​ប្រឡង​ទាន់​ពេល​វេលា​ប្រឡង​ដែល​ចាប់​ផ្ដើម​នៅ​ម៉ោង ៨:៤០​នាទី​ព្រឹក (ម៉ោង​នៅ​កូរ៉េ​ខាង​ត្បូង)។

Content image - Phnom Penh Post

បេក្ខជន​ប្រឡង​ណា​ម្នាក់​ដែល​ជាប់​​ស្ទះ​ចរាចរណ៍ អាច​ទូរស័ព្ទ​ទៅ​លេខ​អាសន្ន ១១២ ដើម្បី​សុំ​ជំនួយ​ពី​ឡាន និង​ម៉ូតូ​របស់​ប៉ូលិស​បើក​ផ្លូវ​ទៅ​កាន់​មណ្ឌល​ប្រឡង។

យោង​តាម​ក្រសួង​អប់​រំ​កូរ៉េ​ខាង​ត្បូង​ បាន​ឲ្យ​ដឹង​ថា នៅ​ក្នុង​ឆ្នាំ​២០១៣ ឪ​ពុក​ម្តាយ​ជនជាតិ​កូរ៉េ​ខាង​ត្បូង​ ​បាន​ចំណាយ​ប្រាក់​ជាង ១៩​​កោដិ​វ៉ុន (​១៧.៥​ ពាន់លាន​ដុល្លារ) ទៅ​លើ​ថ្លៃ​នៃ​​ការ​​សិក្ស​បន្ថែម​របស់​កូនៗ​​ពួកគាត់ ដែល​ប្រហែល​ស្មើ​​នឹង​​ ១.៥ ភាគ​រយ​​នៃ​ផលិត​ផល​ក្នុង​ស្រុក​សរុប។

ការ​ត្រៀម​ខ្លួន​សម្រាប់​ការ​ប្រលង​នេះ ត្រូវ​ចាប់​ផ្តើម​ឡើង​ពី​កម្រិត​បឋម​សិក្សា​ឡើង​ទៅ ហើយ​សម្ពាធ​ដែល​បេក្ខជន​ទាំង​អស់​ទទួល​រង​បណ្តាល​មក​ពី​តម្រូវការ​ពិន្ទុ​ខ្ពស់ ត្រូវ​បាន​គេ​ចាត់​ទុក​​ជា​មូលហេតុ​នៃ​រឿង​អាក្រក់​ជាច្រើន​ក្នុង​ចំណោម​យុវ័យ ​រួម​មាន​តាំង​ពី​ការ​នឿយ​ហត់​ផ្លូវ​កាយ រហូត​ដល់​ជំងឺ​បាក់​ទឹក​ចិត្ត និង​ការ​ធ្វើ​អត្តឃាត៕ AFP/ប្រែ​សម្រួល​ដោយ តាំង រីនិត្យ

អត្ថបទគួរចាប់អារម្មណ៍