The Phnom Penh Post Search

Search form

Logo of Phnom Penh Post newspaper Phnom Penh Post - សន្និបាត​បញ្ញវន្ត​ពិភពលោក​ (Global Alumni Convention)​ នឹង​ប្រព្រឹត្ត​ទៅ​នៅ​កម្ពុជា​ជា​លើកដំបូង




សន្និបាត​បញ្ញវន្ត​ពិភពលោក​ (Global Alumni Convention)​ នឹង​ប្រព្រឹត្ត​ទៅ​នៅ​កម្ពុជា​ជា​លើកដំបូង

លោក​ម៉ៅ ស្រេង នាយកប្រតិបត្តិ IDP Education និង​ជា​ស្ថាបនិក​នៃ​សន្និបាត GAC ថ្លែង​ក្នុង​សន្និសីទ​កាសែត​កាលពី​ថ្ងៃ​ទី​៩ មករា ២០១៥​(រូប​ទី​បី ពី​ស្តាំ​ទៅ​ឆ្វេង)។
លោក​ម៉ៅ ស្រេង នាយកប្រតិបត្តិ IDP Education និង​ជា​ស្ថាបនិក​នៃ​សន្និបាត GAC ថ្លែង​ក្នុង​សន្និសីទ​កាសែត​កាលពី​ថ្ងៃ​ទី​៩ មករា ២០១៥​(រូប​ទី​បី ពី​ស្តាំ​ទៅ​ឆ្វេង)។ រូបថត សហការី

សន្និបាត​បញ្ញវន្ត​ពិភពលោក​ (Global Alumni Convention)​ នឹង​ប្រព្រឹត្ត​ទៅ​នៅ​កម្ពុជា​ជា​លើកដំបូង

សន្និបាត​បញ្ញវន្ត​ពិភពលោក ​(Global Alumni Conventionឬ GAC) ​នឹង​ត្រូវ​ប្រព្រឹត្ត​ឡើង​ជា​លើក​ដំបូង​បង្អស់​នៅក្នុង​រាជធានី​ភ្នំពេញ​នៅ​ថ្ងៃ​ទី​ ១៥​ ខែ​ កុម្ភៈ ​ឆ្នាំ​ ២០១៥​ ខាង​មុខ​នេះ​សម្រាប់​ផ្តល់​ឱកាស​ដល់​អតីត​និស្សិត​កម្ពុជា​ដែល​បាន​ទៅ​សិក្សា​នៅ​ក្រៅ​ប្រទេស​មក​ជួបជុំ​គ្នា​បង្កើន​នូវ​បណ្តាញ​ទំនាក់ទំនង ព្រមទាំង​លើក​ទឹកចិត្ត​ឲ្យ​ពួកគេ​ចូលរួម​អភិវឌ្ឍ​សង្គម និង​ដើម្បី​ក្លាយ​ជា​មេដឹកនាំ​នា​ពេល​អនាគត។

លោក​ម៉ៅ ស្រេង ដែល​ជា​នាយកប្រតិបត្តិ IDP Education និង​ជា​ស្ថាបនិក​នៃ​សន្និបាត GAC​ បាន​ប្រកាស​ក្នុង​សន្និសីទ​កាសែត​កាលពី​ថ្ងៃ​ទី​ ៩ ខែ​មករា ឆ្នាំ​ ២០១៥​ ថា នេះ​គឺជា​សន្និបាត​ប្រចាំ​ឆ្នាំ​លើក​ដំបូង​ដែល​មាន​គោលបំណង​ដើម្បី​ទទួល​ស្គាល់ និង​អបអរ​សមិទ្ធផល ក៏​ដូចជា​ការ​ការ​ចូលរួម​អភិវឌ្ឍ​ប្រទេស​ជាតិ​របស់​អតីត​និស្សិត​កម្ពុជា​ដែល​បញ្ចប់​ការសិក្សា​ពី​បរទេស ព្រមទាំង​ជំរុញ​អ្នក​ទាំងនោះ​ឱ្យ​បន្ត​វិថី​នៃ​ការសិក្សា​ដើម្បី​កា្លយ​ជា​អ្នកដឹកនាំ​នាពេល​អនាគត។

ថ្លែង​ក្នុង​សន្និសីទ​កាសែត​បើក​សម្ពោធ​ការ​ទទួល​ចុះឈ្មោះ​ចូលរួម​សន្និបាត​បញ្ញវន្ត​ពិភពលោក​ (GAC)​ ក្រុម​អ្នក​រៀបចំ​កម្មវិធី ម្ចាស់​ឧបត្ថម្ភ​កម្មវិធី និង​អ្នកគាំទ្រ​កម្មវិធី​បាន​លើក​ទឹកចិត្ត​ដល់​អតីត​និស្សិត​ពី​ប្រទេស​អូស្ត្រាលី កាណាដា នូវែលសេឡង់ ចក្រភព​អង់គ្លេស និង​សហរដ្ឋអាមេរិក ក៏ដូចជា​ពី​តំបន់​អាស៊ី និង​អឺរ៉ុប​ដើម្បី​ទាញ​យក​ប្រយោជន៍​ពី​ឱកាស​នេះ​ដើម្បី​បង្កើន​នូវ​បណ្តាញ​ទំនាក់ទំនង និង​ការ​អភិវឌ្ឍ​វិជ្ជាជីវៈ។

ស្របគ្នា​នេះ​ដែរ​លោក​បណ្ឌិតឌី សុវណ្ណ ដែល​ជា​ប្រធាន​សមាគម​អតីត​និស្សិត​កម្ពុជា​ពី​ចក្រភព​អង់គ្លេស បាន​លើក​ទឹកចិត្ត​សមាជិក​របស់​ខ្លួន​ដើម្បី​ចូលរួម​សន្និបាត GAC ព្រោះ​វា​ជា​ឱកាស​មួយ​ដើម្បី​ចែករំលែក​បទពិសោធ​ការសិក្សា និង​បង្កើត​ការ​ស្រាវជ្រាវ​វិជ្ជមាន​សម្រាប់​គោលនយោបាយ​ក្នុង​ការ​អភិវឌ្ឍ​ប្រទេស​កម្ពុជា។

ប្រធាន​សមាគម​អតីត​និស្សិត​អាហារូបករណ៍ ​«ឈីវឺនីង» ​របស់​ប្រទេស​ អង់គ្លេស ​ប្រចាំ​នៅ​កម្ពុជា ​(The British Chevening Alumni Association of Cambodia--BCAAC)​ លោក​ញាន សុមុន្និន្ទ ក៏​បាន​ថ្លែង​ដែរ​ថា សន្និបាត​បញ្ញវន្ត​ពិភពលោក​គឺជា​ព្រឹត្តិការណ៍​ដ៏សំខាន់​សម្រាប់​អតីត​និស្សិត​ឱ្យ​ចូលរួម​ដើម្បី​ចែករំលែក​ជំនាញ និង​ចំណេះដឹង​ល្អៗ​ដែល​ពួកគេ​បាន​រៀន​ពី​ប្រទេស​ផ្សេង​គ្នា​ហើយ​លោក​ក៏​បាន​លើក​ទឹកចិត្ត​ឱ្យ​សមាជិក​នៃ​អតីតនិស្សិត“ឈីវឺនីង”ចុះឈ្មោះ​ចូលរួម​សន្និបាត​នេះ​ផង​ដែរ។

ជាមួយ​គ្នា​នេះ​ដែរ​អ្នកនាង សៅ ណាគ្រី ជា​អ្នកគ្រប់គ្រង់​កម្មវិធី​អាហារូបករណ៍​នូវែលសេឡង់ និង​អ្នក​សម្របសម្រួល​នៃ​សមាគម​អតីតនិស្សិត​នូវែលសេឡង់​នៅ​កម្ពុជា មាន​ភាព​ត្រកអរ​ចំពោះ​ការ​ចូលរួម​ប្រមូលផ្តុំ​នៃ​អតីត​និស្សិត​មកពី​នូវែលសេឡង់​នៅក្នុង​សន្និបាត​ GAC ពីព្រោះ​នេះ​គឺជា​ជំហ៊ាន​មួយ​ទៀត​សម្រាប់​ការ​ឈាន​ទៅ​រក​ការ​បង្កើត​សមាគម​អតីត​និស្សិត​នូវែលសេឡង់​នៅ​កម្ពុជា។

លោក ជា កញ្ញារិទិ្ធ អតីតប្រធាន​សមាគម​អតីត​និស្សិត​អាហារូបករណ៍​ហ៊្វុលប្រាយ ​(Fulbright) និង​អាហារូបករណ៍​សហរដ្ឋ​អាមេរិក បាន​និយាយ​ថា សន្និបាត​មួយ​នេះ​អាច​ជួយ​ឲ្យ​អតីត​និស្សិត​ទាំងអស់​ផ្សារភ្ជាប់​ទំនាក់ទំនង​ជាមួយ​គ្នា ព្រមទាំង​ជំរុញ និង​រៀន​ពី​គម្រោង​ផ្សេងៗ​ដែល​អតីត​និស្សិត​ម្នាក់ៗ​ធ្លាប់​បាន​ធ្វើ​កន្លង​មក​។

អ្នកស្រីសេង ចានិន្ទ អតីត​និស្សិត​មកពី​សាកលវិទ្យាល័យ​អាល់ប៊ែរតា (University of Alberta​)​ នៃ​ប្រទេស​កាណាដា​ក៏​បាន​ឲ្យ​ដឹង​ដែរ​ថា សន្និបាត​នេះ​គឺជា​ឱកាស​ដ៏វិសេសវិសាល​ដើម្បី​ស្វែងយល់​បន្ថែម​ពី​ការ​រៀនសូត្រ​នៅ​បរទេស​រួមមាន​អាហារូបករណ៍ ការ​កសាង​ទំនាក់ទំនង​ឲ្យ​រឹងមាំ ព្រមទាំង​ទទួល​បាន​ចំណេះដឹង​កាន់តែ​ច្រើន​ពី​រឿងរ៉ាវ​ដែល​កំពុងតែ​កើត​មាន​នៅក្នុង​សង្គម​កម្ពុជា​នា​ពេល​បច្ចុប្បន្ន។

ចុងក្រោយ​លោកស្រី ​អាណា ម៉ារៀ នូហ្គិន (Anna-Maria Nugent)​ដែល​ជា​នាយកប្រតិបត្តិ​សហការ​ពាណិជ្ជកម្ម​អូស្ត្រាលី​នៅ​កម្ពុជា​ (Aus Cham) និង​ជា​អ្នក​គ្រប់គ្រង​សន្និបាត​ GAC ​ប្រចាំ​នៅ IDP បាន​ថ្លែងអំណរគុណ​ចំពោះ​អ្នក​ឧបត្ថម្ភ និង​ដៃគូ​សហការ​ទាំងអស់។

អ្នកស្រី​មាន​ភាព​ត្រេកអរ​យ៉ាងខ្លាំង​ចំពោះ​ឱកាស​ដ៏ពិសេស​ដែល​ជា​វេទិកា​តែ​មួយ​គត់​សម្រាប់​អតីត​និស្សិត​មកពី​សាកល​លោកមន្ត្រី​មកពី​ស្ថាប័នរដ្ឋ ស្ថាប័ន​ឯកជន​រួមមាន​អ្នក​ជំនួញ និង​សង្គម​ស៊ីវិល។

ជា​ព័ត៌មាន​បន្ថែម​សម្រាប់​សិស្សនិស្សិត ឬ​អ្នក​ដែល​មាន​បំណង​ចូលរួម​ក្នុង​សន្និបាត​នេះ​អាច​ស្វែងរក​សំបុត្រ​នៅ​ទីតាំង​ទាំង​បី​សាខា​របស់​មជ្ឈមណ្ឌល​អប់រំ​អូស្ត្រាលី (ACE) ឬ​ចូល​ទៅ​ចុះ​ឈ្មោះ​តាម​ប្រព័ន​អ៊ីនធឺណិត តាមរយៈ www.cambodiaga.org)ហើយ​តម្លៃ​សំបុត្រ​ចូលរួម​សន្និបាត​ដ៏​មាន​អត្ថប្រយោជន៍​នេះ គឺ​ ៦០​ ដុល្លារ​អាមេរិក៕

អត្ថបទគួរចាប់អារម្មណ៍