The Phnom Penh Post Search

Search form

Logo of Phnom Penh Post newspaper Phnom Penh Post - សាលា​បឋមសិក្សា​វត្តបូព៌ បង្រៀន​ម៉ោង​កុំព្យូទ័រ​សម្រាប់​សិស្ស​ថ្នាក់​ទី​ ៣ ដល់​ទី​៦ មុន​គេ​នៅ​ខេត្ត​សៀមរាប




សាលា​បឋមសិក្សា​វត្តបូព៌ បង្រៀន​ម៉ោង​កុំព្យូទ័រ​សម្រាប់​សិស្ស​ថ្នាក់​ទី​ ៣ ដល់​ទី​៦ មុន​គេ​នៅ​ខេត្ត​សៀមរាប

សិស្សានុសិស្ស​សាលា​បឋមសិក្សា​វត្តបូព៌ កំពុង​សិក្សា​ថ្នាក់​កុំព្យូទ័រ។
សិស្សានុសិស្ស​សាលា​បឋមសិក្សា​វត្តបូព៌ កំពុង​សិក្សា​ថ្នាក់​កុំព្យូទ័រ។ រូបថត សហការី

សាលា​បឋមសិក្សា​វត្តបូព៌ បង្រៀន​ម៉ោង​កុំព្យូទ័រ​សម្រាប់​សិស្ស​ថ្នាក់​ទី​ ៣ ដល់​ទី​៦ មុន​គេ​នៅ​ខេត្ត​សៀមរាប

ដោយ​មាន​គំនិត​ចង់​ឲ្យ​សិស្សានុសិស្ស​ថ្នាក់​បឋមសិក្សា បាន​ស្វែងយល់​ពី​បច្ចេកវិជ្ជា ដើម្បី​ជា​ថ្នាល​ទៅ​ថ្ងៃ​អនាគត​របស់​ពួកគេ សាលាបឋមសិក្សា​វត្តបូព៌ បាន​បង្កើត​វគ្គ​សិក្សា​កុំព្យូទ័រ​បន្ថែម​ពី​លើ​ម៉ោង​សិក្សា​របស់​កម្មវិធី​សាលារដ្ឋ​មួយ​ឡើង​ដល់​សិស្សានុសិស្ស​ថ្នាក់​ភាសា​បរទេស ​(បារាំង ​ឬ​ អង់គ្លេស) ​ពី​ថ្នាក់​ទី ​៣ ដល់​ទី​៦។

សព្វថ្ងៃ​សិស្ស​ចំនួន ​២០៧៥​ នាក់ ក្នុង​ចំណោម​សិស្ស​សរុប​ចំនួន​ ៦០៩០​ នាក់ កំពុង​សិក្សា​ថ្នាក់​កុំព្យូទ័រ​នេះ​។

កម្មវិធី​សិក្សា​កុំព្យូទ័រ​នេះ​គឺ​ត្រូវ​បាន​ធ្វើ​ឡើង​ជា​លើក​ដំបូង​គេ​នៅ​ទូទាំង​ខេត្ត​សៀមរាប អស់​រយៈពេល​១០​ឆ្នាំ​មក​ហើយ។

លោក​ពឹង គិមឆេន នាយក​សាលាបឋមសិក្សា​វត្តបូព៌ អ្នក​ផ្តួចផ្តើម​គំនិត​បើក​វគ្គ​សិក្សា​នេះ បាន​ផ្តល់​កិច្ចសម្ភាសន៍​ជាមួយ​ទស្សនាវដ្តី LIFT ដូចតទៅ៖

លោក ពឹង គិមឆេន នាយក​សាលា​បឋមសិក្សា​វត្តបូព៌​។
លោក ពឹង គិមឆេន នាយក​សាលា​បឋមសិក្សា​វត្តបូព៌​។ រូបថត សហការី

Q. តើ​ហេតុអ្វី​បាន​ជា​លោក​មាន​គំនិត​បង្កើត​វគ្គ​កុំព្យូទ័រ​នេះ​ឡើង​ក្នុង​ថ្នាក់​បឋមសិក្សា​?

A. យើង​គ្រាន់តែ​ចង់​ថា យ៉ាង​ហោច​ណាស់​ឲ្យ​ពួកគេ​យល់​ថា អ្វី​ទៅ​ជា​កុំព្យូទ័រ វា​មាន​ប្រយោជន៍​យ៉ាង​ណា​ខ្លះ​សម្រាប់​ប្រើប្រាស់​ក្នុង​ការសិក្សា​? យើង​មិន​ហ៊ាន​រំពឹង​ថា សិស្ស​តូចៗ​នឹង​អាច​ចាប់​បាន​ទាំងអស់​ពី​ថ្នាក់​កុំព្យូទ័រ​ហើយ​មាន​សមត្ថភាព​ប្រើប្រាស់​វា​ស្ទាត់​ជំនាញ​នោះ​ទេ។ ទៅ​ថ្ងៃ​អនាគត​ ពួកគេ​អាច​នឹង​មាន​ភាព​ងាយស្រួល​បើសិន​ជា​បាន​ដឹង​ខ្លះៗ​ពី​កុំព្យូទ័រ។ ថា​មិន​បាន​ពួកគេ​អាច​នឹង​មាន​ចំណង់ចំណូល​ចិត្ត​ខ្លាំង​លើ​ផ្នែក​កុំព្យូទ័រ​អាច​ទៅ​បន្ត​ការសិក្សា​ផ្នែក​នេះ​បន្ថែម​ទៀត​ក៏​ថា​បាន។

Q.តើ​សព្វថ្ងៃ​នេះ​សាលា​របស់​លោក​មាន​កុំព្យូទ័រ​ចំនួន​ប៉ុន្មាន? ហើយ​បាន​ការ​ឧបត្ថម្ភ​ពី​ខាង​ណា​ដែរ?

A. សាលា​យើង​សព្វថ្ងៃ មាន​កុំព្យូទ័រ​ចំនួន​៣០​គ្រឿង ដែល​កាលពី​ប៉ុន្មាន​ឆ្នាំ​មុន​យើង​ប្រើប្រាស់​ប្រភេទ Desktop ទើប​តែ​ឥឡូវ​យើង​មាន​លទ្ធភាព​ទិញ​កុំព្យូទ័រ​យួរដៃ (Laptop) ម៉ាក ASUS ដែល​ថវិកា​យើង​មិន​មាន​ការ​ឧបត្ថម្ភ​ពី​ខាង​ណា​នោះ​ទេ។

យើង​បាន​ប្រាក់​មកពី​ការ​ជួយ​របស់​អាណាព្យាបាល​សិស្ស​ខ្លះ ការ​ធ្វើ​បុណ្យ​នៅក្នុង​សាលា​ខ្លះ ហើយ​កុំព្យូទ័រ​យើង​សព្វថ្ងៃ គឺ​នៅ​បង់រំលស់​នៅ​ឡើយ​ទេ ដែល​ក្នុង​មួយ​គ្រឿង​មាន​តម្លៃ​ ២៩០​ ដុល្លារ​។

Q.នៅក្នុង​មុខវិជ្ជា​មេរៀន​កុំព្យូទ័រ តើ​លោក​បាន​បង្រៀន​អ្វី​ខ្លះ​ដល់​កូនសិស្ស? ហេតុ​អ្វី?

A. ពី​ដើម​មក​យើង​មិន​មាន​បំណង​ថា នឹង​ឲ្យ​ពួកគេ​យល់​ទាំងអស់​ពី​កុំព្យូទ័រ​ទេ យើង​គ្រាន់តែ​ចង់​ឲ្យ​មាន​ការ​ចាប់ផ្តើម​មួយ​ដល់​ពួកគេ ឲ្យ​ដឹង​ថា អ្វី​ទៅ​ជា​កុំព្យូទ័រ តែ​ប៉ុណ្ណោះ។ ជាក់ស្តែង​យើង​បែងចែក​ការ​រៀន​ដូចជា Typing Microsoft Word Microsoft Excel ឬ Microsoft Power Point ជាដើម។ ប៉ុន្តែ មិនមែន​មាន​ន័យ​ថា ពួកគេ​ត្រូវ​តែ​ចេះ​ច្បាស់​ទាំងអស់​នោះ​ទេ ដូច​ខ្ញុំ​និយាយ​អ៊ីចឹង គឺ​នេះ​ជា​ការ​ចាប់ផ្តើម​មួយ​សម្រាប់​ពួកគេ​ពី​កុំព្យូទ័រ ដើម្បី​ឲ្យ​ពួកគេ​ស្វែងយល់​ពី​តិចណូឡូជី​ (Technology) ដើម្បី​ជា​ថ្នាល​ទៅ​ថ្ងៃ​អនាគត​ពួកគេ។

Q.តើ​លោក​គិត​ថា​វា​នឹង​អាច​មាន​ប្រសិទ្ធភាព​កម្រិត​ណា?

A. ចំណុច​នេះ​ខ្ញុំ​មើល​ឃើញ​ថា​ជា​ការ​ប្រឈម​មួយ​ដែរ ដោយសារ​តែ​យើង​មិន​មាន​ការ​ដាក់​បញ្ចូល​ផ្នែក​នេះ​ទៅក្នុង​ប្រព័ន្ធ​អប់រំ​របស់​រដ្ឋ​នៅ​ឡើយ។ យ៉ាងណា​មិញ​ ខ្ញុំ​នៅ​តែ​គិត​ថា ប្រសិន​បើ​សិស្សានុសិស្ស​នៅ​តែ​មាន​ការ​ចាប់អារម្មណ៍​ទៅ​នឹង​ប្រព័ន្ធ​កុំព្យូទ័រ ពួកគេ​អាច​បន្ត​ការ​សិក្សា​ផ្នែក​នេះ​តាម​វិធី​ពីរ​យ៉ាង គឺ​ទី​មួយ​តាម​ប្រព័ន្ធ​របស់​សាលារដ្ឋ​ដោយ​នៅ​ថ្នាក់​វិទ្យាល័យ​មាន​ថ្នាក់​កុំព្យូទ័រ នេះ​ដែរ។ ទី​ពីរ​តាមរយៈ​ការ​ស្វែងរក​ដោយ​ខ្លួនឯង​នៅ​តាម​សាលា​ឯកជន​ឬ​មជ្ឈមណ្ឌល ឬ​អង្គការ​នានា។

Q.តើ​កន្លង​មក​កម្មវិធី​របស់​លោក​ទទួល​បាន​ចំណាប់​អារម្មណ៍​យ៉ាង​ណា​ពី​អាណាព្យាបាល និង​មហាជន?

A. បើ​និយាយ​ពី​ប្រតិកម្ម​វិញ​គឺ​យើង​ទទួល​បាន​ទាំង​វិជ្ជមាន​និង​អវិជ្ជមាន។ វិជ្ជមាន​គឺ​ថា​យើង​ទទួល​បាន​ការ​ស្វាគមន៍​ច្រើន មិន​ថា​ពី​សំណាក់​អាណាព្យាបាល​សិស្ស ឬ​អ្នក​ទូទៅ​ដែល​គេ​យល់​ដឹង​ពី​សារៈប្រយោជន៍​នៃ​ការ​រៀន​កុំព្យូទ័រ​នេះ។

ដោយឡែក​បើ​មតិ​រិះគន់​វិញ​គឺ​មាន​ដូចជា​ថា​វា​អត់ប្រយោជន៍​ព្រោះ​សិស្ស​នៅ​តូចៗ​នៅ​ឡើយ​ឬ​ថា​ដូចជា​លឿន​ពេក​ហើយ​សម្រាប់​ពួកគេ វគ្គ​នេះ​ជា​ការ​ខ្ជះខ្ជាយ​ថវិកា​ដោយសារ​ក្មេងៗ​អាច​ធ្វើឲ្យ​កុំព្យូទ័រ​ខូច ឬ​អស់​ថ្លៃ​ភ្លើង​ជាដើម។

Q.តើ​ការ​បន្ថែម​វគ្គ​កុំព្យូទ័រ​របស់​សាលា​វត្តបូព៌​ទៅក្នុង​ម៉ោង​សិក្សា​របស់​សាលារដ្ឋ​គឺជា​គម្រោង​តែ​មួយ​គត់​នៅក្នុង​ប្រទេស​កម្ពុជា​ដែរ​ឬ​ទេ​?

A. ខ្ញុំ​មិន​ហ៊ាន​និយាយ​ថា សាលា​យើង​ជា​សាលា​តែ​មួយ​គត់​ដែល​មាន​ម៉ោង​កុំព្យូទ័រ​បន្ថែម​លើ​ម៉ោង​សិក្សា​របស់​រដ្ឋ​ទេ តែ​នៅក្នុង​ខេត្ត​សៀមរាប​នេះ ខ្ញុំ​គិត​ថា​គ្មាន​សាលា​បឋមសិក្សា​របស់​រដ្ឋ​ណា​ដែល​មាន​បើក​វគ្គ​កុំព្យូទ័រ​ដូច​យើង​ឡើយ ខ្ញុំ​គិត​ថា សាលា​ខ្ញុំ​គឺ​ដំបូង​គេ ហើយ​តែ​មួយ​គត់។

Q.តើ​ខាង​ក្រសួង​អប់រំ​មាន​ការ​យល់ឃើញ​យ៉ាង​ណា​ដែរ​ពី​គម្រោង​មួយ​នេះ​របស់​សាលា​លោក?

A. តាំងពី​ថ្នាក់​កុំព្យូទ័រ​នេះ​បើក​មក​ជាង​១០​ឆ្នាំ មិន​ដែល​ឃើញ​ថា​ខាង​ក្រសួង​អប់រំ​ចាប់​អារម្មណ៍ និង​គាំទ្រ​ទេ ទើប​តែ​ក្នុង​ជំនាន់​លោក ហង់ ជួនណារ៉ុន លោក​បាន​អញ្ជើញ​ចុះ​ទៅ​ដល់​សាលា​យើង​បាន​ម្តង ហើយ​មាន​ការ​ចាប់អារម្មណ៍​ពី​គម្រោង​នេះ​ដែរ។ យ៉ាងណា​មិញ​លោក​មិន​ទាន់​និយាយ​ថា​យ៉ាង​ម៉េច​នោះ​ទេ​គ្រាន់តែ​លោក​ថា​នឹង​យក​ទៅ​ពិចារណា។

Q.តើ​ទៅ​ថ្ងៃ​អនាគត​លោក​មាន​គម្រោង​យ៉ាង​ណា​ដែរ​សម្រាប់​ថ្នាក់​កុំព្យូទ័រ​របស់​សិស្ស​ថ្នាក់​បឋមសិក្សា​នេះ?

A. អនាគត​របស់​យើង​គឺ​ចង់​ឲ្យ​សិស្ស​ទាំងអស់​បាន​សិក្សា​ថ្នាក់​កុំព្យូទ័រ​នេះ​មិនមែន​តែ​សិស្ស​ថ្នាក់​ភាសា​បរទេស​នោះ​ទេ។ ដោយសារ​ពេល​នេះ​ធនធាន​យើង​នៅ​មាន​កម្រិត​នៅ​ឡើយ​យើង​មិន​មាន​ដី​នៅ​សល់​ដើម្បី​សង់​អគារ​ហើយ​ក៏​មិន​មាន​ប្រាក់​ដើម្បី​សង់​ដែរ។ តែ​យ៉ាង​ណា​ក៏ដោយ​យើង​នឹង​នៅ​តែ​ព្យាយាម​បន្ថែម​ទៀត​ព្រោះ​ថា​ជំនាញ​កុំព្យូទ័រ​ពិតជា​មាន​សារៈសំខាន់ ខ្លាំង​ណាស់​នា​ពេល​បច្ចុប្បន្ន​នេះ។ សិស្ស​របស់​យើង​ត្រូវ​តែ​ខិតខំ​ប្រឹងប្រែង​ដើម្បី​ប្រកួតប្រជែង​ជាមួយ​នឹង​សិស្ស​ដទៃ​ទៀត​នៅក្នុង​សមាគម​អាស៊ាន​ព្រោះ​យើង​បាន និង​កំពុង​ធ្វើ​សមាហរណកម្ម​អាស៊ាន​មែនទែន​ហើយ បើ​យើង​មិន​មាន​ការ​ពង្រឹង​បន្ថែម​ផ្នែក ICT នេះ​ទេ យើង​នឹង​យឺត​ជាង​គេ ចាញ់​គេ​មិន​ខាន៕

អត្ថបទគួរចាប់អារម្មណ៍