The Phnom Penh Post Search

Search form

Logo of Phnom Penh Post newspaper Phnom Penh Post - សិក្ខាកាម​នាវិក​កម្ពុជា ​១១ ​រូប​ចុះ​ធ្វើ​កម្មសិក្សា​នៅ​បរទេស




សិក្ខាកាម​នាវិក​កម្ពុជា ​១១ ​រូប​ចុះ​ធ្វើ​កម្មសិក្សា​នៅ​បរទេស

Content image - Phnom Penh Post

សិក្ខាកាម​នាវិក​កម្ពុជា ​១១ ​រូប​ចុះ​ធ្វើ​កម្មសិក្សា​នៅ​បរទេស

សិក្ខាកាម​នាវិក​កម្ពុជា​ចំនួន​១១​រូប​ប្រចាំ​វិទ្យាស្ថាន​នាវាចរណ៍​កម្ពុជា (Cambodia Mari time Institute) បាន និង​កំពុង​ត្រៀម​ចុះ​ធ្វើ​កម្មសិក្សា​នៅ​តាម​ប្រទេស​ផ្សេងៗ​ដែល​មាន​ដូចជា​ប្រទេស សិង្ហបុរី ចិន និង​ឥណ្ឌា។ ពិធី​ជូន​ដំណើរ​នាវិក​ចំនួន​២​រូប​ដំបូង​បាន​ប្រព្រឹត្ត​ទៅ​កាលពី​ព្រឹក​ថ្ងៃ​ទី​៦ ខែ​មករា ឆ្នាំ​២០១៥​កន្លង​ទៅ​ថ្មីៗ​នេះ។

សិក្ខាកាម​នាវិក​ទាំង​ពីរ​រូប​ដំបូង​គេ​ដែល​បាន​ធ្វើ​ដំណើរ​ទៅកាន់​ប្រទេស​សិង្ហបុរី មាន​ឈ្មោះ​ថា វ៉េង ជីវា អាយុ ២៦​ឆ្នាំ និង​ហ៊ុន ចំរើន អាយុ ៣២​ឆ្នាំ។ ដោយឡែក​សិក្ខាកាម​នាវិក​៩​នាក់​ដែល​នៅ​សល់​នឹង​ត្រូវ​ធ្វើ​ដំណើរ​ជា​បន្តបន្ទាប់​រហូត​ដល់​ដំណាច់ ខែ​មករា ឆ្នាំ​២០១៥​នេះ។

សិក្ខាកាម​នាវិក ក្នុង​អំឡុង​ពេល​នៃ​ការ​ហាត់​រៀន​នៅ​ប្រទេស​កម្ពុជា​។
សិក្ខាកាម​នាវិក ក្នុង​អំឡុង​ពេល​នៃ​ការ​ហាត់​រៀន​នៅ​ប្រទេស​កម្ពុជា​។ រូបថត សហការី

ពួក​គាត់​ទាំង​ពីរ​នាក់​នេះ​បាន​ចេញ​ដំណើរ​ទៅកាន់​ប្រទេស​សិង្ហបុរី​មុន​គេ​ដើម្បី​ទៅ​ហាត់​ការ​នៅលើ​កប៉ាល់​របស់ ក្រុមហ៊ុន​កូរ៉េ​ដែល​មាន​ឈ្មោះ​ថា «​Chang Myung»។

បើ​តាម​លោក ហ៊ឺ បាវី អគ្គនាយក​កំពង់ផែ​ស្វយ័ត​ក្រុង​ភ្នំពេញ និង​ជា​នាយក​នៃ​វិទ្យាស្ថាន​នាវាចរណ៍​កម្ពុជា ការ​បញ្ជូន​សិក្ខាកាម​នាវិក​ទៅ​ធ្វើ​កម្មសិក្សា​គឺ​ដើម្បី​ចូលរួម​អភិវឌ្ឍ​ធនធាន​មនុស្ស​ផ្នែក​នាវាចរណ៍​នៅ​កម្ពុជា​ឲ្យ​កាន់តែ​មាន​ភាព​ប្រសើរ​ឡើង​។ លោក​បាន​បន្ត​ថា នាវិក​កម្ពុជា​នឹង​បន្ត​កុងត្រា​ជាមួយ​នឹង​ក្រុមហ៊ុន​របស់​កូរ៉េ​ដើម្បី​ធ្វើការ​នៅលើ​កប៉ាល់​រហូត​ដល់​ពួកគេ​ដល់​អាយុ​ត្រូវ​ចូលនិវត្តន៍​ប្រសិន​បើ​ពួកគេ​មិន​មាន​បញ្ហា​អ្វី​កើតឡើង​នៅ​អំឡុង​ពេល​នៃ​ការ​ហាត់ការ​នេះ។

លោក ហ៊ុន ចំរើន ជា​សិក្ខាកាម​ម្នាក់​ក្នុង​ចំណោម​សិក្ខាកាម​ទាំង ​១១ ​នាក់ ដែល​បាន​បញ្ចប់​ការសិក្សា​ផ្នែក​នាវិក​នៅ​វិទ្យាស្ថាន​នាវាចរណ៍​កម្ពុជា​ជំនាន់​ទី​១ បាន​ឲ្យ​ដឹង​ថា លោក​មាន​ក្តីសោមនស្ស រីករាយ​ខ្លាំង​ណាស់​ដែល​បាន​ចេញ​ទៅ​ធ្វើ​ទស្សនកិច្ច​សិក្សា​នៅពេល​នេះ​ដែល​នឹង​មាន​រយៈពេល​១០​ខែ។

សិក្ខាកាម​នាវិក​វ័យ ៣២ ឆ្នាំ​រូប​នេះ បាន​បង្ហាញពី​សុទិដ្ឋិនិយម​នៅពេល​អនាគត​ថា លោក​នឹង​អាច​មាន​លទ្ធភាព​បម្រើ​ការ​ផ្នែក​ឧស្សាហកម្ម​នាវា​សម្រាប់​ប្រទេស​កម្ពុជា​នៅពេល​ដែល​លោក​បញ្ចប់​កម្មសិក្សា​ហើយ​ត្រឡប់​មក​ប្រទេស​កម្ពុជា​វិញ​។

បើ​តាម​លោក ហ៊ុន ចំរើន មុន​នឹង​ក្លាយ​ទៅ​ជា​សិក្ខាកាម​របស់​វិទ្យាស្ថាន​នាវាចរណ៍​កម្ពុជា គេ​ត្រូវ​ឆ្លងកាត់​ការ​ប្រឡង​ចំនួន​៣​គឺ ទី​មួយ​ការ​ធ្វើ​តេស្ត​សុខភាព ទី​ពីរ​ការ​ប្រឡង​ភាសា​អង់គ្លេស និង​ចុងក្រោយ​ការ​ប្រឡង​ចំណេះដឹង​បន្តិចបន្តួច​ពី​ភាសា​កូរ៉េ។

លោក​បាន​រៀបរាប់​បន្ត​ថា ការសិក្សា​គឺ​មាន​រយៈពេល​៣​ខែ​នៅឯ​សាលា ដោយ​ក្នុង​នោះ​មាន​ការសិក្សា​ចំនួន ៦​មុខវិជ្ជា ដូចជា មូលដ្ឋានគ្រឹះ​ភាសា​អង់គ្លេស និង​ភាសាអង់គ្លេស​សម្រាប់​ផ្នែក​នាវាចរណ៍​(basic english and maritime english) ការការពារ និង​ពន្លត់​អគ្គិភ័យ (fire prevention and fire fighting) សុវត្ថិភាព​បុគ្គល និង​ការ​ទទួល​ខុស​ត្រូវ​ក្នុង​សង្គម (personal safety and social responsibilities) វិធីសាស្រ្ត​ផ្ទាល់​ខ្លួន​ដើម្បី​រួចរស់​ពី​គ្រោះថ្នាក់​(proficiency in personal survival techniques) មុខវិជ្ជា​ទាក់ទង និង​កប៉ាល់ និង​ការ​ដឹកជញ្ជូន​(ship and shipping course) និង​ការ​សង្គ្រោះ​បឋម​(medical first aids)។

ក្រោយពី​បាន​សិក្សា​នៅ​ទីក្រុង​ភ្នំពេញ​ហើយ និស្សិត​នឹង​ត្រូវ​បាន​គេ​តម្រូវ​ឲ្យ​ចុះ​កម្មសិក្សា​លើ​កប៉ាល់​នៅក្នុង​កំពង់ផែ​ស្វយ័ត​ខេត្ត​ព្រះសីហនុ​រយៈពេល​៧​ថ្ងៃ​ដើម្បី​ស្វែងយល់​ឲ្យ​កាន់តែ​ច្បាស់​ពី​ស្ថានភាព​ទូទៅ​នៅ​លើ​កប៉ាល់។ មិន​តែ​ប៉ុណ្ណោះ​និស្សិត​ក៏​នឹង​ត្រូវ​បាន​បញ្ជូន​ឲ្យ​ទៅ​ធ្វើ​កម្មសិក្សា​ម្តង​ទៀត​នៅ​ប្រទេស​កូរ៉េ​រយៈពេល​១៨​ថ្ងៃ ដើម្បី​ទទួល​បាន​សញ្ញាបត្រ​ជា​នាវិក​ទទួល​ស្គាល់​ជា​លក្ខណៈ​អន្តរជាតិ​ផង​ដែរ។

សូម​បញ្ជាក់​ថា វិទ្យាស្ថាន​នាវាចរណ៍​កម្ពុជា​ត្រូវ​បាន​បង្កើតឡើង​នៅក្នុង​ឆ្នាំ​២០០៨ ដែល​ស្ថិត​នៅ​ក្រោម​ក្រសួង​សាធារណការ និង​ដឹកជញ្ជូន និង​គ្រប់គ្រង និង​ដំណើរការ​ដោយ​ផ្ទាល់​ដោយ​កំពង់ផែ​ស្វយ័ត​រាជធានី​ភ្នំពេញ​ជាមួយ​នឹង​ការ​សហការ ជិត​ស្និទ្ធ​ជាមួយ​កំពង់ផែ​ស្វយ័ត​ក្រុងព្រះសីហនុ។ នៅក្នុង​ឆ្នាំ​ ២០១២ វិទ្យាស្ថាន​នេះ បាន​សហការ​ជាមួយ​នឹង​ប្រទេស​កូរ៉េ ហើយ​ឆ្នាំ​ ២០១៣ បាន​ចុះ​អនុស្សរណៈ​យោគយល់​ជាមួយ​នឹង​វិទ្យាស្ថាន​នាវាចរណ៍ និង​នេសាទ​នៃ​ប្រទេស​កូរ៉េ (Korea Institute of Maritime and Fishery)។

កាលពី​ឆ្នាំ​២០១៣ កន្លងមក​វិទ្យាស្ថាន​នាវាចរណ៍​កម្ពុជា​បាន​បើក​វគ្គសិក្សា​ជំនាញ​នាវាចរណ៍​ចំនួន ​២ ​វគ្គ ក្នុង​នោះ​វគ្គ​ទី​មួយ​ទទួល​បាន​សិស្ស​ចំនួន​៤៧​នាក់ ហើយ​វគ្គ​ទី​ពីរ​ចំនួន​៧០​នាក់។ ក្នុង​ចំណោម​នោះ សិក្ខាកាម​ចំនួន​១១​នាក់ ត្រូវ​បាន​ជ្រើសរើស​ឲ្យ​ទៅ​ចុះ​កម្មសិក្សា​នៅក្នុង​ក្រុមហ៊ុន​របស់​កូរ៉េ​ដោយសារ​មើល​ឃើញ​ពី​ភាព​ឆ្លាតវៃ និង​សមត្ថភាព​ភាសា​អង់គ្លេស​របស់​ពួកគេ។ នេះ​បើ​យោងតាម លោក ហាន់ សឹងឆាង (Han Seung chang​) តំណាង​ភាគី​កូរ៉េ​ដែល​ជា​ដៃគូ​ក្នុង​ការ​ជួយ​បណ្តុះបណ្តាល​ធនធាន​វិស័យ​នាវា​ចរណ៍​សមុទ្រ​នៃ​វិទ្យាស្ថាន​នាវាចរណ៍​កម្ពុជា។

ក្នុង​រយៈពេល​១០​ឆ្នាំ​ពី​ឆ្នាំ​២០១២ ដល់​២០២២ វិទ្យាស្ថាន​នេះ មាន​គោលបំណង​បង្កើត​ការងារ​ដល់​កម្មករ​នាវា​ឲ្យ​បាន​ចំនួន​២​ម៉ឺន​នាក់ និង​បុគ្គលិក​បម្រើការ​ក្នុង​នាវា​ចំនួន​២​ពាន់​នាក់​។

សម្រាប់​វគ្គ​សិក្សា​ជំនាន់​ទី​បី​នឹង​ចាប់​បើក​នៅ​ខែ​មីនា ឆ្នាំ​២០១៥ ដោយ​នឹង​ទទួល​សិស្ស​ចូលរៀន​ចំនួន ​២០០ ​នាក់​៕

អត្ថបទគួរចាប់អារម្មណ៍