The Phnom Penh Post Search

Search form

Logo of Phnom Penh Post newspaper Phnom Penh Post - សិក្សា​ពី​ចំណុច​គន្លឹះ​នៃ​ការ​សរសេរអត្ថបទ​ពី​ជ័យលាភី​អត្ថបទ​សរសេរ​ទាំង​បី​រូប​របស់​សហភាពអឺរ៉ុប




សិក្សា​ពី​ចំណុច​គន្លឹះ​នៃ​ការ​សរសេរអត្ថបទ​ពី​ជ័យលាភី​អត្ថបទ​សរសេរ​ទាំង​បី​រូប​របស់​សហភាពអឺរ៉ុប

លោក សេង សុវត្ថិ ម្ចាស់​ជ័យលាភី​លេខ​មួយ​អត្ថបទសរសេរ។ លោក សៀម ពេជ្រណូរៈ ម្ចាស់​ជ័យលាភី​លេខ​មួយ​អត្ថបទសរសេរ។ លោក នី អាទិគុណ ម្ចាស់​ជ័យលាភី​លេខ​មួយ​អត្ថបទ​សរសេរ។
លោក សេង សុវត្ថិ ម្ចាស់​ជ័យលាភី​លេខ​មួយ​អត្ថបទសរសេរ។ លោក សៀម ពេជ្រណូរៈ ម្ចាស់​ជ័យលាភី​លេខ​មួយ​អត្ថបទសរសេរ។ លោក នី អាទិគុណ ម្ចាស់​ជ័យលាភី​លេខ​មួយ​អត្ថបទ​សរសេរ។ រូបថត សហការី

សិក្សា​ពី​ចំណុច​គន្លឹះ​នៃ​ការ​សរសេរអត្ថបទ​ពី​ជ័យលាភី​អត្ថបទ​សរសេរ​ទាំង​បី​រូប​របស់​សហភាពអឺរ៉ុប

កាលពី​ចុង​ខែ​វិច្ឆិកា​កន្លង​ទៅ​នេះ យុវជន​បី​រូប បាន​ទទួល​ជ័យលាភី​លេខ​មួយ ក្នុង​ការ​ប្រឡង​សរសេរ​អត្ថបទ​របស់​សហភាពអឺរ៉ុប​លើក​ទី​ពីរ លើ​ប្រធានបទ ចំនួន​បី គឺ​ការ​ប្រឈម និង​កាលានុវត្តភាព​សម្រាប់​កម្ពុជា​ក្នុង​ដំណើរ​ឆ្ពោះ​ទៅកាន់​អាស៊ាន​២០១៥(ASEAN toward 2015: challenges and opportunities for Cambodia)​ការ​ប្រឈម និង​កាលានុវឌ្ឍភាព​សម្រាប់​កម្ពុជា​លើ​ចំណាកស្រុក និង​អភិវឌ្ឍ (Migration and development in Cambodia) និង​ការ​ប្រឈម និង​កាលានុវត្តភាព​សម្រាប់​កម្ពុជា​លើ​យុវជន និង​ការ​ចូលរួម​ក្នុង​នយោបាយ (Youth and political engagement in Cambodia: challenges and opportunities)។

យុវជន​ទាំង​បី​នាក់ រួមមាន​លោក សេង សុវត្ថិ អាយុ​២២​ឆ្នាំ ជា​សិស្ស​មកពី​សាកលវិទ្យាល័យ​កម្ពុជា ផ្នែក​ភាសា​អង់គ្លេស​ជា​ម្ចាស់​ជ័យលាភី​អត្ថបទ​ការ​ប្រឈម និង​កាលានុវត្តភាព​សម្រាប់​កម្ពុជា​លើ​ចំនាក​ស្រុក​និង​អភិវឌ្ឍន៍ (Migration and development in Cambodia:challenges and opportunities)។

លោក​សៀម ពេជ្រណូរៈ អាយុ​២២​ឆ្នាំ ជា​សិស្ស​មកពី​វិទ្យាស្ថាន​ភាសា​បរទេស ផ្នែក​សិក្សា​អន្តរជាតិ​ជា​ម្ចាស់​ជ័យលាភី​អត្ថបទ​ការ​ប្រឈម​និង​កាលានុវត្តភាព​សម្រាប់​កម្ពុជា​ក្នុង​ដំណើរ​ឆ្ពោះ​ទៅកាន់​អាស៊ាន​២០១៥ (ASEAN toward 2015: challenges and opportunities for Cambodia)។

លោក នី អាទិគុណ អាយុ​១៨​ឆ្នាំ​ជា​សិស្ស​មកពី​វិទ្យាស្ថាន​ភាសា​បរទេស​ផ្នែក​សិក្សា​អន្តរជាតិ​ជា​ម្ចាស់​អត្ថបទ​ការ​ប្រឈម និង​កាលានុវត្តភាព​សម្រាប់​កម្ពុជា​លើ​យុវជន និង​ការ​ចូលរួម​ក្នុង​នយោបាយ (Youth and political engagement in Cambodia: challenges and opportunities)។

ដើម្បី​ជា​ការ​ចែករំលែក ក្នុង​សប្តាហ៍​នេះ អ្នក​ទាំង​បី​បាន​ចូលរួម​ផ្តល់​ជា​គន្លឹះ​សំខាន់ៗ​មួយ​ចំនួន​ដែល​ពួកគេ​បាន​អនុវត្ត​ដើម្បី​ទទួល​បាន​ជ័យ​ដូចត​ទៅ៖

១. លោក សេង សុវត្ថិ

ជា​ដំបូង​ត្រូវ​សួរ​ខ្លួនឯង​ថា តើ​សមត្ថភាព​ភាសា​អង់គ្លេស​យើង​យក​ជា​ការបាន ឬ​នៅ ព្រោះ​ថា ការ​ប្រឡង​តម្រូវ​ឲ្យ​សរសេរ ជា​ភាសា​អង់គ្លេស​។

-ជ្រើសរើស​ប្រធានបទ​ដែល​ខ្លួន​ពេញចិត្ត​ហើយ​គិត​ថា អាច​នឹង​រក​ឯកសារ​ស្រាវជ្រាវ​បាន​ច្រើន​ពី​វា។

-ធ្វើការ​ស្រាវជ្រាវ​លើ​ប្រធានបទ ដើម្បី​ស្វែងរក​ឯកសារ​មក​គាំទ្រ​ចំណុច​ដែល​យើង​នឹង​លើក​យក​មក​ពិភាក្សា​ក្នុង​អត្ថបទ។

-នៅពេល​អាន​អត្ថបទ​ផ្សេងៗ​នោះ​ត្រូវ​យក​ចិត្ត​ទុកដាក់​លើ​ការ​ប្រើប្រាស់​ពាក្យពេចន៍​របស់​គេ។ ការ​ធ្វើ​បែប​នេះ​គឺ​ចៀសវាង​ការ​ប្រើប្រាស់​មិន​បាន​ត្រឹមត្រូវ​ឬ​មាន​ការ​ភាន់ច្រលំ​ផ្សេងៗ។

-ធ្វើ​ខ្លួន​ជា​អ្នក​អាន​ផង និង​សរសេរ​ផង: រាល់​ពេល​សរសេរ​ចប់​មួយ​ឃ្លាៗ ត្រូវ​អាន​ឡើង​វិញ​ថា​តើ​អត្ថន័យ​របស់​វា​មាន​ន័យ​ស្តាប់​បាន​និង​ភ្ជាប់​គ្នា​ដែរ​ឬ​ទេ?

-ពេល​សរសេរ​ចប់ ត្រូវ​អាន​ឡើង​វិញ​ហើយ​ពិនិត្យ​មើល​ពី​ភាព​ពេញលេញ​របស់​អត្ថបទ​ថា តើ​មាន​ត្រូវការ​បន្ថែម​ទិន្នន័យ ឬ​ភស្តុតាង​ទៀត​ដែរ ឬ​ទេ?

២ លោក សៀម ពេជ្រណូរៈ

ជ្រើសរើស​ប្រធានបទ​ដែល​ខ្លួន​ពេញចិត្ត។ សម្រាប់​លោក​ផ្ទាល់ គឺ​ជ្រើសរើស​យក​ប្រធានបទ​អាស៊ាន​ដោយសារ​តែ​លោក​មាន​ចំណេះដឹង​ខាង​ផ្នែក​នេះ​ច្រើន។

-ស្រាវជ្រាវ​លើ​ប្រធានបទ: ត្រូវ អាន​ឲ្យ​បាន​ច្រើន​តាម​ដែល​អាច​ធ្វើ​ទៅ​បាន​ដើម្បី​ទទួល​បាន​ចំណេះដឹង​ទូលំទូលាយ និង យល់​ពី​ការ​ប្រើប្រាស់​ពាក្យ (ភាសា​អង់គ្លេស)។

-ការ​រៀបចំ​សំណេរ (​Organization​): ត្រូវ​សួរ​ខ្លួនឯង​ថា​តើ​យើង​ចង់​រៀបចំ​បែបបទ​នៃ​សំណេរ​យ៉ាង​ដូច​ម្តេច​ខ្លះ?

-សេចក្តីផ្តើមៈ អ្នក​សរសេរ​ត្រូវ​យក​ចិត្ត​ទុកដាក់​ពី​សេចក្តី​ផ្តើម​មែនទែន ដោយ​លៃ​យ៉ាង​ណា​ឲ្យ​វា​មាន​ភាព​ទាក់ទាញ​ឲ្យ​អ្នក​អាន​ចង់​អាន​បន្ត​ទៅ​មុខ​ទៀត។

-តួសេចក្តីៈ ស្វែងរក​ចំណុច​ប្រទាក់​គ្នា (Argument) ហើយ​លើក​យក​ភ័ស្តុតាង ឬ​ទិន្នន័យ​មក​គាំទ្រ​ចំណុច​ដែល​លើក​ឡើង​ដើម្បី​ធ្វើឲ្យ​អត្ថបទ​កាន់តែ​មាន​ទម្ងន់។

-សេចក្តីបញ្ចប់ៈ អ្នក​សរសេរ​អាច​សរុប​សេចក្តី​ដោយ​ក្តោប​អត្ថន័យ​របស់​អត្ថបទ រួច​ហើយ​បញ្ចេញ​ជា​យោបល់​ផ្ទាល់​ខ្លួន ព្រមទាំង​សំណូមពរ​ផង​ដែរ​ប្រសិន​ជា​មាន។

៣ លោក នី អាទិគុណ

-ចេះ​ពី​របៀប​សរសេរ Essay: វា​សំខាន់​ណាស់​ដែល​យើង​ត្រូវ​ដឹង​ពី​របៀប​នៃ​ការ​សរសេរ​យ៉ាង​ហោច​យល់​ពី​ធាតុ​ផ្សំ​ថា​តើ​ការ​សរសេរ​អត្ថបទ​មាន​អ្វី​ខ្លះ​ដូចជា​សេចក្តី​ផ្តើម (Introduction) តួសេចក្តី (Body) និង​សេចក្តី​បញ្ចប់ (Conclusion)។

-យល់​ពី​ប្រធានបទ​ឲ្យ​បាន​ច្បាស់ (Understand Topic): ត្រូវ​អាន​ប្រធានបទ​ឲ្យ​បាន​យល់​ច្បាស់ និង​ចាប់​ឲ្យ​បាន​នូវ​ពាក្យ​គន្លឹះ​ដើម្បី​ដឹង​ថា នោះ​ប្រធានបទ​និយាយ​ពី​អ្វី និង​ចង់​បាន​អ្វី​ពិតប្រាកដ​។

-ធ្វើការ​ស្រាវជ្រាវ (Research): កុំ​យក​តែ​គំនិត​របស់​យើង​សុទ្ធ​នៅក្នុង​អត្ថបទ ត្រូវ​អាន​ហើយ​ដកស្រង់​គំនិត​សំខាន់​របស់​អ្នក​ដទៃ​ផង​ដែរ​ដើម្បី​ជា​ភ័ស្តុតាង ឬ​ទិន្នន័យ​មក​គាំទ្រ​ចំណុច​ដែល​យើង​លើក​ឡើង។

-ពិនិត្យ​មើល​ប្រធានបទ: អ្នក​សរសេរ​ត្រូវ​ពិនិត្យមើល​លើ​ប្រធានបទ​ជា​មុន​សិន​ថា​តើ​គួរ​សរសេរ​បែប​ណា (Block Style ឬ Point by Point) ដើម្បី​ធ្វើឲ្យ​អ្នក​អាន​មាន​ការ​ចាប់​អារម្មណ៍ និង​ងាយស្រួល​យល់។

-បញ្ចប់​សេចក្តី​ប្រកប​ដោយ​ភាព​ទាក់ទាញ ក្តោប​យក​ន័យ​ទាំង​មូល ដើម្បី​ឲ្យ​អ្នក​អាន​ងាយ​យល់ និង​ចាប់​អារម្មណ៍ អត្ថបទ​របស់​យើង។

សូម​បញ្ជាក់​ថា ការ​ប្រឡង​សរសេរ​អត្ថបទ​លើក​ទី​ពីរ របស់​សហភាព​អឺរ៉ុប​នេះ​គឺជា​ការ​សហការ​ជាមួយ​នឹង​សមាគម​យុវជន​ខ្មែរ​(KYA)​ដែល​បើក​សម្រាប់​សិស្ស​ដែល​មាន​ការ​អប់រំ​កម្រិត​ខ្ពស់​អាយុ​ចាប់ពី​១៨ ដល់​៣០​ឆ្នាំ ដោយ​ពួកគេ​អាច​ជ្រើសរើស​ប្រធានបទ​មួយ​ក្នុង​ចំណោម​បី​ដែល​ពួកគេ​ស្រឡាញ់។ អ្នក​ចូលរួម​អាច​ជ្រើសរើស​សរសេរ​ជា​ភាសា​អង់គ្លេស បារាំង ឬ​អាល្លឺម៉ង់។ ជ័យលាភី​លេខ​មួយ​សម្រាប់​ប្រធានបទ​នីមួយៗ​ទទួល​បាន​រង្វាន់​ដែល​ស្មើ​នឹង​ទឹកប្រាក់​ចំនួន​៥០០​អឺរ៉ូ ហើយ​លេខ​ពីរ និង​លេខ​បី​ទទួល​បាន​រង្វាន់​ស្មើ​នឹង​ទឹកប្រាក់​ចំនួន​២៥០​អឺរ៉ូ៕

អត្ថបទគួរចាប់អារម្មណ៍