The Phnom Penh Post Search

Search form




Logo of Phnom Penh Post newspaper Phnom Penh Post - ១០ ចំណុចត្រូវដឹងអំពីសកលវិទ្យាល័យ UTS អូស្ត្រាលី

១០ ចំណុចត្រូវដឹងអំពីសកលវិទ្យាល័យ UTS អូស្ត្រាលី

Content image - Phnom Penh Post

១០ ចំណុចត្រូវដឹងអំពីសកលវិទ្យាល័យ UTS អូស្ត្រាលី

ស៊ីដនីៈ លទ្ធផល​ស្រង់​មតិ​ជា​សកល​សម្រាប់​ឆ្នាំ ២០១៥ បាន​បង្ហាញ​ថា​សាកល​វិទ្យាល័យ​បច្ចេកវិទ្យា​ក្រុង​ស៊ីដនី​ដែល​មាន​និស្សិត​កម្ពុជា​មួយ​ចំនួន​កំពុង​បន្ត​ការ​សិក្សា​ជាប់​ឈ្មោះ​ជា​សាកល​វិទ្យាល័យ​ឈាន​មុខ​ប្រចាំ​ប្រទេស​អូស្ត្រាលី និង​ឈាន​មុខ​លើ​សកល​លោក​ពាក់ព័ន្ធ​នឹង​កម្មវិធី​បង្រៀន និង​ការ​ស្រាវជ្រាវ។

សាកល​វិទ្យាល័យ​បច្ចេកវិទ្យា​ស៊ីដនី ឬ​ហៅ​កាត់​ថា UTS (University of Technology Sydney) ស្ថិត​ក្នុង​ចំ​កណ្តាល​នៃ​តំបន់​ភាគ​ខាង​ត្បូង​ទីក្រុង​ស៊ីដនី ប្រទេស​អូស្ត្រាលី​ហើយ​ត្រូវ​បាន​បង្កើត​ឡើង​នៅ​ឆ្នាំ ១៩៨៨។

UTS ជា​សកល​វិទ្យាល័យ​ដែល​ផ្តុំ​នូវ​មហាវិទ្យាល័យ​ជាច្រើន​រួមមាន មហា​វិទ្យាល័យ​សិល្បៈ និង​វិទ្យាសាស្ត្រ​សង្គម, មហា​វិទ្យាល័យ​ពាណិជ្ជកម្ម, មហា​វិទ្យាល័យ​រចនាកម្ម និង​ស្ថាបត្យកម្ម និង​សំណង់​អគារ, មហា​វិទ្យាល័យ​វិសវកម្ម និង​ព័ត៌មាន​វិទ្យា, មហា​វិទ្យាល័យ​សុខាភិបាល, មហា​វិទ្យាល័យ​ច្បាប់ និង​មហា​វិទ្យាល័យ​វិទ្យាសាស្ត្រ​ជាដើម។

ជាមួយ​នឹង​ការ​ចុះ​ឈ្មោះ​ចូល​រៀន​របស់​សិស្ស​និស្សិត​សរុប​ជាង ៣ ម៉ឺន ៧ ពាន់​នាក់ UTS បច្ចុប្បន្ន​ជា​ផ្នែក​មួយ​នៃ​សាកល​វិទ្យាល័យ​ធំ​បំផុត​នៅ​ក្នុង​ប្រទេស​អូស្រ្តាលី។

UTS ហ៊ុំ​ព័ទ្ធ​ដោយ​បរិវេណ​ទីធ្លា​ចម្រុះ​ជាតិ​សាសន៍ និង​មាន​កម្មវិធី​ផ្លាស់​ប្តូរ​បែប​អន្តរជាតិ​សំបូរ​បែប​ជាមួយ​នឹង​កម្មវិធី​ស្រាវជ្រាវ​ដែល​អាច​ធានា​ឲ្យ​និស្សិត​ដែល​បញ្ចប់​ការ​សិក្សា​អាច​ស្វែងរក​ការងារ​ជាក់​លាក់​នៅ​ថ្ងៃ​អនាគត។

Content image - Phnom Penh Post

គោលដៅ​អនាគត​នៃ​កម្មវិធី​សិក្សា Future Learning

ក្រៅ​ពី​ការ​បង្រៀន​និស្សិត​ត្រូវ​បាន​ជំរុញ និង​លើក​ទឹក​ចិត្ត​ក្នុង​ការ​ស្រាវជ្រាវ​ដើម្បី​រៀន​សូត្រ​បន្ថែម និង​បង្កើន​នូវ​ការ​យល់​ដឹង។ ជាមួយ​គ្នា​នេះ​សាស្ត្រាចារ្យ​ជាច្រើន​រូប​នឹង​ជួយ​ប្រឹក្សា​នូវ​មេរៀន​ការ​ងឿង​ឆ្ងល់​របស់​និស្សិត​ពាក់ព័ន្ធ​នឹង​មេរៀន​ទន្ទឹម​នឹង​ផល​វិបាក​ក្នុង​ការ​រៀន ឬ​ការ​រស់​នៅ​ប្រចាំ​ថ្ងៃ​ផង​ដែរ។

គោលដៅ​អនាគត​នៃ​កម្មវិធី​សិក្សា​របស់ UTS គឺ​ចង់​ឲ្យ​និស្សិត​មាន​សមត្ថភាព​ក្នុង​ការ​ស្រាវជ្រាវ ស្វ័យ​សិក្សា​ដើម្បី​ពង្រឹង​នូវ​វិជ្ជាជីវៈ និង​ទេពកោសល្យ​ស្រប​តាម​តម្រូវការ​ទីផ្សារ​ការងារ។

Content image - Phnom Penh Post

បណ្ណាល័យ​បែប​ទំនើប Modern Library & robotic library retrieval system

សៀវភៅ​រាប់​ម៉ឺន​ក្បាល​ត្រូវ​បាន​រក្សា​ទុក​តាម​ប្រអប់​នីមួយៗ​ដោយ​មិន​កំណត់​នូវ​លេខ​កូដ​ភ្ជាប់​ជាមួយ​នឹង​ប្រព័ន្ធ​កុំព្យូទ័រ​ងាយ​ស្រួល​ក្នុង​ការ​ស្វែងរក និង​ចំណាយ​ពេល​តិច។ និស្សិត​អាច​ស្វែងរក​សៀវភៅ​ដែល​ខ្លួន​ត្រូវការ​តាម​រយៈ​វេបសាយ​របស់​សាលារៀន និង​ដឹង​ច្បាស់​ពី​សៀវភៅ​ណា​ដែល​អាច​ខ្ចី​មើល​បាន​ដោយ​គ្រាន់​តែ​ចូល​ទៅ​ជួប​បណ្ណារក្ស​ដើម្បី​ប្រាប់​ឈ្មោះ​សៀវភៅ និង​កំណត់​អត្តសញ្ញាណ​សិស្ស និស្សិត​រួច​ជា​ការ​ស្រេច។

និស្សិត​ក៏​អាច​ចុះ​ឈ្មោះ​តាម​រយៈ Online និង​ទទួល​បាន​ការ​ជូន​ដំណឹង​មក​ទទួល​សៀវភៅ​ដែល​ខ្លួន​ស្នើសុំ​ដែល​ចំនាយ​ពេល​ប្រមាណ​ពីរ​ទៅ​បី​ម៉ោង។ សម្រាប់​បណ្ណារក្ស​ដែល​ស្វែងរក​សៀវភៅ​គឺ​ចំណាយ​ពេល​ចន្លោះ​ពី ១៥ ទៅ ២០ នាទី​តែ​ប៉ុណ្ណោះ​សម្រាប់​ស្វែងរក​សៀវភៅ​ម្តង ៥ ទៅ ១០ ក្បាល។

តាមរយៈ​បច្ចេកវិទ្យា​ថ្មី​បណ្ណាល័យ​ប្រើប្រាស់​ឧបករណ៍​ទំនើប​ក្នុង​ការ​កំណត់​ប្រអប់​សៀវភៅ​តាម​ផ្នែក​នីមួយៗ​ដើម្បី​បញ្ជូន​មក​កាន់​បណ្ណារក្ស​ក្នុង​ការ​រើស​យក។

Content image - Phnom Penh Post

បន្ទប់​ពិសោធន៍ Super-Lab

ការ​បង្រៀន​ក្នុង​បន្ទប់​ពិសោធន៍​ផ្ទាល់​និស្សិត​អាច​សាក​ល្បង​នូវ​ការ​ពិសោធន៍​ពាក់ព័ន្ធ​នឹង​មេរៀន​ព្រម​ទាំង​ការ​បង្កើត​គំនិត​ច្នៃប្រឌិត​ថ្មីៗ​ដោយ​ទទួល​បាន​ការ​លើក​ទឹក​ចិត្ត​ និង​ការ​ណែនាំ​ពី​សាស្ត្រាចារ្យ​ជំនាញ។

និស្សិត​មាន​ឱកាស​ច្រើន​ក្នុង​ការ​ប្រើប្រាស់​នូវ​ឧបករណ៍​បច្ចេកវិទ្យា​ទំនើប​ក្នុង​ការ​ពិសោធន៍​ទៅ​លើ​សារធាតុ​គីមី និង​វត្ថុ​ធាតុ​នានា។

Content image - Phnom Penh Post

ការ​ស្នាក់នៅ និង​ការ​រស់នៅ​ជុំ​គ្នា​ជា​គ្រួសារ Housing and Homestay

សម្រាប់​និស្សិត​បរទេស​ដែល​មក​សិក្សា​នៅ​សាកល​វិទ្យាល័យ UTS និង​និស្សិត​ដែល​មាន​ផ្ទះ​ឆ្ងាយ​ពិបាក​ក្នុង​ការ​ធ្វើ​ដំណើរ​នោះ​សាកល​វិទ្យាល័យ​ក៏​មាន​រៀបចំ​ផ្តល់​នូវ​បន្ទប់​ជួល​ស្នាក់​ក្នុង​សំណង់​អាគារ​ក្បែរ​សាលារៀន​បែប​ទំនើប និង​ធំ​ជាមួយ​និស្សិត​ដូច​គ្នា​គ្រប់​ជាតិសាសន៍​ក្នុង​តម្លៃ​សមរម្យ​ដើម្បី​បង្ក​នូវ​បរិយាកាស​កាន់តែ​ស្និតស្នាល​នឹង​ការ​សិក្សា។ និស្សិត​ក៏​អាច​ជ្រើសរើស​ការ​រស់នៅ​ជុំ​គ្រួសារ​ដោយ​មាន​ឪពុកម្តាយ ឬ​បង​ប្អូន​ជនជាតិ​ផ្សេង​គ្នា​តាម​ការ​ចង់​បាន​ដើម្បី​បន្ស៉ាំ​ខ្លួន​នឹង​បរិយាកាស​នៃ​ការ​ប្រើប្រាស់​ភាសា​អង់គ្លេស​ទាំង​ក្នុង​ម៉ោង​រៀន និង​នៅ​ផ្ទះ។

សម្រាប់​និស្សិត​ដែល​ជ្រើសរើស​ការ​រស់នៅ​ជា​លក្ខណៈ​បន្ទប់​ជួល​ក្នុង​សំណង់​អគារ​រួម​គ្រប់​ជាតិ​សាសន៍​វិញ​គឺ​មាន​ផ្តល់​នូវ​ទីតាំង​កំសាន្ត​ផ្សេងៗ​ដូចជា​បន្ទប់​កីឡា ​បន្ទប់​អង្គុយ​កំសាន្ត និង​អាង​ហែល​ទឹក​ជាដើម។

Content image - Phnom Penh Post

ការ​រក្សា​សុវត្ថិភាព​របស់​និស្សិត​បរទេស Safety for International Students

និស្សិត​បរទេស​ដែល​មក​សិក្សា​នៅ​សាកល​វិទ្យាល័យ UTS និង សាកល​វិទ្យាល័យ​ភាសា INSEARCH គឺ​ទទួល​បាន​ការ​ណែនាំ​ពី​ការ​រក្សា​សុវត្ថិភាព​ផ្ទាល់ និង​ការ​ការពារ​ពី​សំណាក់​ប៉ូលីស​អូស្ត្រាលី និង​អាជ្ញាធរ​មូលដ្ឋាន​ផង​ដែរ។

Content image - Phnom Penh Post

កៅអី​យន្ត​ប្រើប្រាស់​ខួរ​ក្បាល​ក្នុង​ការ​បញ្ជា

នេះ​ជា​គំរូ​នៃ​ការ​បង្រៀន​និស្សិត​ក្នុង​ការ​ប្រើប្រាស់​គំនិត​ច្នៃ​ប្រឌិត​ក្នុង​ការ​បង្កើត​នូវ​អ្វី​ដែល​ថ្មី និង​ជា​របក​គំហើញ​ដែល​មិន​ធ្លាប់​មាន។ តាមរយៈ​ការ​ដឹកនាំ​របស់​លោក​សាស្ត្រាចារ្យ Hung Nguyen កៅអី​យន្ត​ប្រើប្រាស់​ខួរ​ក្បាល​ក្នុង​ការ​បញ្ជា​គឺជា​បច្ចេក​វិទ្យា​ថ្មី​មួយ​ដែល​គ្រោង​នឹង​បញ្ចប់​ហើយ​ដាក់​លក់​ជា​សាធារណៈ​ក្នុង​តម្លៃ​ថ្លៃ​មួយ។

កៅអី​យន្ត​នេះ​មិនមាន​ទាមទារ​នូវ​ការ​បង្វិល​ដោយ​ដៃ​នោះ​ទេ​តែ​អ្នក​អង្គុយ​លើ​វា​អាច​បញ្ជា​វា​បាន​តាមរយៈ​ឧបករណ៍​ខ្សែ​ភ្ជាប់​ទៅ​នឹង​សៀត​ថ្កា​ក្នុង​ការ​បញ្ជា​កៅអី​យន្ត​នេះ​ដោយ​មិន​ចាំ​បាច់​និយាយ។

Content image - Phnom Penh Post

បច្ចេកវិទ្យា 3D ក្នុង​ការ​គ្រប់គ្រង​ទិន្នន័យ Data Arena

បន្ទប់​បច្ចេក​វិទ្យា​គឺជា​ឆាក​ដ៏​ធំ​មួយ​ដែល​បង្ហាញ​ច្បាស់​នូវ​ទិន្នន័យ​ដែល​ប្រមូល​ផ្តុំ​រាប់​លាន​ប្រភេទ​ក្នុង​ប្រព័ន្ធ​កុំព្យូទ័រ​ងាយ​ស្រួល​ក្នុង​ការ​រាប់ និងរៀបចំ។ បន្ទប់​នេះ​ក៏​ជា​រោង​បញ្ចាំង​រូបភាព 3D ដែល​ច្បាស់ និង​ទាក់​ទាញ​ដូច​ស្ថានភាព​ជាក់ស្តែង។

Content image - Phnom Penh Post

មុខរបរ និង​ការងារ Employability and Careers

ក្រៅពី​ការ​ផ្តល់​ការ​សិក្សា និង​ការ​បង្រៀន​សាកល​វិទ្យាល័យ UTS ក៏​ផ្តល់​ជា​ឱកាស​ការងារ និង​បង្ហាត់​បង្ហាញ​និស្សិត​ពី​មុខរបរ​ការងារ​ដែល​ស្រប​តាម​ទីផ្សារ​ដើម្បី​ឲ្យ​និស្សិត​មាន​សញ្ញាណ​ច្បាស់លាស់​ក្នុង​ការ​រក​ការងារ​ធ្វើ ឬ​ប្រកបរបរ​ផ្ទាល់​ខ្លួន។

Content image - Phnom Penh Post

អាហារូបករណ៍ Scholarships

ក្រៅពី​ការ​សិក្សា​បង់​ថ្លៃ​សាកល​វិទ្យាល័យ UTS ក៏​មាន​ផ្តល់​ជា​អាហារ​រូបករណ៍​ប្រចាំ​ឆ្នាំ​ដល់​និស្សិត​ជាច្រើន​ប្រភេទ​ដែល​មាន​បំណង​ចិត្ត​មក​សិក្សា​នៅ​ទី​នេះ។ បន្ថែម​ពី​នេះ​សម្រាប់​និស្សិត​ដែល​ទទួល​បាន​ពិន្ទុ​ខ្ពស់​គឺ​មាន​ឱកាស​ទទួល​បាន​នូវ​ប្រាក់​លើក​ទឹក​ចិត្ត​ផង​ដែរ។

តាម​របាយការណ៍​ទិន្នន័យ​គិត​ចាប់​ពី​ខែ​មករា​រហូត​ដល់​ខែ​កញ្ញា ឆ្នាំ ២០១៥ និស្សិត​ដែល​បាន​ចុះ​ឈ្មោះ​ចូល​រៀន​នៅ​សកល​វិទ្យាល័យ​នានា​ក្នុង​តំបន់​ភាគ​ខាង​ត្បូង​នៃ​ទីក្រុង​ស៊ីដនី (New South Wales) ប្រទេស​អូស្ត្រាលី​មាន​សរុប ៣៧,១៣៦ នាក់។

ក្នុង​នោះ​និស្សិត​ជនជាតិ​កម្ពុជា​មាន ៨៦ នាក់​ជនជាតិ​ចិន ១៥,៩២២ នាក់​ជនជាតិ​ឥណ្ឌា ៤,២៧២ នាក់​ជនជាតិ​ឥណ្ឌូនេស៊ី ៩៦៦ នាក់​ជនជាតិ​ម៉ាឡេស៊ី ៧៧៤ នាក់ ជនជាតិ​វៀតណាម ១,៦៥១ នាក់ ក្រៅ​ពី​នោះ​ក៏​មាន​ជាតិ​សាសន៍​ផ្សេងៗ​ទៀត៕

អត្ថបទគួរចាប់អារម្មណ៍