វាមិនមែន​ជា​រឿង​ធម្មតា​ឡើយ​សម្រាប់​និស្សិត​ខ្មែរ​ដែល​បាន​ជាប់​អាហារូបករណ៍ Kofi Annan Fellowship ដ៏​មាន​ការ​ប្រកួតប្រជែង​ជា​លក្ខណៈ​សកល​នេះ។ Kofi Annan Fellowship ជា​អាហារូបករណ៍​មួយ​ដែល​ជ្រើស​យក​តែ​បេក្ខជន​៥​នាក់​ប៉ុណ្ណោះ​ក្នុង​ចំណោម​ប្រទេស​៨០​នៅ​ទូទាំង​ពិភពលោក។ នេះ​គឺជា​ជំហាន​ទៅ​មុខ​មួយ​ដ៏ជោគជ័យ​របស់​យុវតី កញ្ញា ណឹម សុផា មាន​ដើមកំណើត​នៅ​រាជធានី​ភ្នំពេញ​ដែល​ទទួល​បាន​អាហារូបករណ៍​បន្ត​ការ​សិក្សា​ថ្នាក់​អនុបណ្ឌិត​ក្នុង​ជំនាញ​គ្រប់គ្រង​លើ​ប្រព័ន្ធ​តិចណូឡូជី​នៅ​ប្រទេស​អាល្លឺម៉ង់។