.jpg)
ពលរដ្ឋតវ៉ាទាមទារឲ្យក្រុមហ៊ុន GFX ចេញមុខដោះស្រាយរឿងការបាត់លុយដែលពួកគេដាក់វិនិយោគជាមួយក្រុមហ៊ុន។ រូបថត ហ្វេសប៊ុក
ភ្នំពេញៈ ប្រជាពលរដ្ឋជាច្រើននាក់ ដែលជាអតិថិជនដាក់ប្រាក់វិនិយោគជាមួយ ក្រុមហ៊ុន GFX Investment Co.Ltd មានទីតាំងនៅតាមបណ្ដោយផ្លូវ ៥១៦ សង្កាត់បឹងកក់ទី១ ខណ្ឌទួលគោក រាជធានីភ្នំពេញ នៅថ្ងៃនេះ បានផ្ទុះការតវ៉ាទាមទារឱ្យក្រុមហ៊ុនមួយនេះ ចេញមុខមកដោះស្រាយ ដោយបានចោទប្រកាន់ថា បោកប្រាស់អតិថិជនរបស់ខ្លួន។
តំណាងអតិថិជនម្នាក់ស្នើសុំមិនបញ្ចេញឈ្មោះប្រាប់ក្រុមអ្នកសារព័ត៌មាននៅខាងមុខក្រុមហ៊ុន GFX នៅថ្ងៃទី ៣១ ឧសភា ថា ពលរដ្ឋដែលបានដាក់វិនិយោគជាមួយនឹងក្រុម GFX នេះមានចំនួនជាង ៦ ពាន់នាក់ ហើយត្រូវបានបាត់បង់ប្រាក់ទាំងស្រុងក្នុងរយៈពេលត្រឹមតែ ១ ថ្ងៃ។ ករណីនេះកើតឡើងចាប់តាំងពីចុងខែមីនា រហូតមកដល់បច្ចុប្បន្ន ប៉ុន្តែក្រុមហ៊ុនមិនមានការដោះស្រាយជូនអតិថិជនរបស់ខ្លួនឡើយ។
តំណាងអតិថិជនរូបនេះបន្ថែមថា ដោយសារបញ្ហាផ្ទុះនូវជំងឺកូវីដ ១៩ និងមានការបិទក្រុង បានធ្វើឱ្យរូបលោក ក៏ដូចជាអតិថិជនផ្សេងទៀត មិនអាចមកតវ៉ាបាន ទើបនៅថ្ងៃនេះបានមកប្រមូលផ្តុំតវ៉ានៅខាងមុខការិយាល័យក្រុមហ៊ុន ដើម្បីឱ្យក្រុមហ៊ុនចូលខ្លួនដោះស្រាយតាមសន្តិវិធី។
អតិថិជនដែលមកដាក់ប្រាក់វិនិយោគជាមួយក្រុមហ៊ុននេះ គឺទៅតាមលទ្ធភាពដើម្បីឱ្យក្រុមហ៊ុនយកប្រាក់របស់ខ្លួនទៅវិនិយោគបន្តនៅប្រទេសអាមេរិក ជប៉ុន កាណាដា និងប្រទេសផ្សេងទៀត។ បន្ទាប់ពីចំណេញ ក្រុមហ៊ុននឹងធ្វើការបែងចែកទៅតាមភាគរយ ដែលអតិថិជនបានដាក់ទៅតាមប្រភេទកិច្ចសន្យាជាមួយក្រុមហ៊ុន។
បើតាមការរៀបរាប់របស់អតិថិនជនម្នាក់នេះ ក្រុមហ៊ុនបានធ្វើកិច្ចសន្យាជាមួយអតិថិជនគ្រប់រូបទាំងអស់ ដោយមានទាំងរយៈពេលនៃការវិនិយោគ និងចំនួនទឹកប្រាក់។ ប៉ុន្តែដល់ពេលមានបញ្ហាកើតឡើង ក្រុមហ៊ុនគ្មានការដោះស្រាយជាមួយអតិថិជនទេ ហើយឱ្យអតិថិជនរបស់ខ្លួនទៅប្តឹងជនទី៣ នៅក្រៅប្រទេស។
តំណាងអតិថិជនម្នាក់ទៀតបា្រប់ថាពលរដ្ឋដែលមកតវ៉ានេះ ជាអតិថិជនរបស់ក្រុមហ៊ុន GFX ដើម្បីឱ្យភាគីខាងក្រុមហ៊ុនចូលខ្លួនដោះស្រាយ។ ប៉ុន្តែបែរជាក្រុមហ៊ុនប្រាប់ឱ្យប្តឹងទៅជនទី៣ ដែលជាថ្នាក់ដឹកនាំរបស់ក្រុមហ៊ុន ខណៈដែលអតិថិជនទាំងនោះ មិនដែលស្គាល់ជនទី៣ ជានរណានោះទេ។
អតិថិជនរូបនោះថ្លែងថា៖ «ខាងក្រុមហ៊ុន គ្មានដំណោះស្រាយអ្វីក្រៅពីឱ្យអតិថិជនចូលរួមប្តឹងជាមួយនោះទេ។ ដូច្នេះ ពួកខ្ញុំបានរង់ចំាក្នុងរយៈពេល ២ ខែមកហើយ គ្មានដំណោះស្រាយអ្វីទាំងអស់ ហើយបានបាត់លុយទាំងវិនិយោគ និងប្រាក់ចំណេញ»។
បើតាមអតិថិជនរូបនេះ ក្រុមហ៊ុន GFX បានវិនិយោគនៅក្នុងប្រទេសកម្ពុជាចាប់តាំងពីឆ្នាំ ២០១៥ មិនដែលមានបញ្ហានោះទេ ហើយមានអតិថិជនសរុបចំនួន ៦ ពាន់នាក់និងទឹកប្រាក់វិនិយោគចំនួន ២៧ លានដុល្លារអាមេរិក។
ទោះជាយ៉ាងណា និយ័តករមូលបត្រកម្ពុជា(ន.ម.ក.) កាលពីថ្ងៃទី ៣០ ខែមិនា បានស្នើឱ្យអតិថិជនរបស់ក្រុមហ៊ុន GFX នេះទាំងអស់ដាក់ពាក្យប្តឹងតវ៉ា នៅនិយ័តករមូលបត្រកម្ពុជា ដែលមានទីស្នាក់ការនៅ អគារ ១៦៨F ផ្លូវ ៥៩៨ សង្កាត់ច្រាំងចំរេះ១ ខណ្ឌឫស្សីកែវ រាជធានីភ្នំពេញ នៅរៀងរាល់ម៉ោងធ្វើការ។
បើតាមនិយ័តករមូលបត្រកម្ពុជា ក្រុមហ៊ុន GFX Investment Co.Ltd បានដាក់លិខិតស្នើសុំព្យួរប្រតិបត្តិការជួញដូរបណ្តោះអាសន្នកាលពី ថ្ងៃទី ២៩ ខែ មីនា ឆ្នាំ ២០២១ ប៉ុន្តែមិនប្រាប់ពីមូលហេតុឱ្យបានច្បាស់លាស់នៃការដាក់លិខិតព្យួរនេះនោះទេ។
លោក ឯក ឃុនដឿន អភិបាលខណ្ឌទូលគោកថ្លែងនៅថ្ងៃនេះថា លោកបានឱ្យមន្ត្រីនគរបាលខណ្ឌចុះទៅជួយការពារ និងសម្របសម្រួលជាមួយប្រជាពលរដ្ឋក្នុងការតវ៉ានេះហើយ។ ក្រៅពីនេះពួកគាត់អាចដាក់ពាក្យបណ្តឹងទៅតាមនីតិវិធី ដើម្បីរកដំណោះស្រាយតាមផ្លូវច្បាប់៕
