ភ្នំពេញៈ អគ្គនាយកដ្ឋានពន្ធនាគារនៃក្រសួងមហាផ្ទៃកំពុងរៀបចំលិខិតដាក់ជូនទៅក្រសួងសុខាភិបាល ដើម្បីស្នើឱ្យរដ្ឋបាលរាជធានី-ខេត្ដយកចិត្ដទុកដាក់សម្របសម្រួលជួយអន្តរាគមន៍ទៅលើពន្ធនាគារ ដែលស្ថិតនៅក្នុងដែនដីរបស់ខ្លួន បន្ទាប់ពីស្ថានភាពមិនសូវអំណោយផល ទាក់ទងទៅនឹងការឆ្លងរាលដាលជំងឺកូវីដ ១៩ នៅក្នុងពន្ធនាគារ។
លោក នុត សវនា អ្នកនាំពាក្យអគ្គនាយកដ្ឋានពន្ធនាគារបានថ្លែងប្រាប់ ភ្នំពេញ ប៉ុស្ដិ៍ កាលពីម្សិលមិញថា៖ «ស្ថានភាពវាដូចជាមិនសូវអំណោយផលប៉ុន្មានទេ ទាក់ទងទៅនឹងការឆ្លង [នៅក្នុងពន្ធនាគារ]។ យើងកំពុងតែរៀបចំលិខិតមួយ ក្នុងនាមក្រសួងមហាផ្ទៃ ដើម្បីដាក់ជូនទៅក្រសួងសុខាភិបាលយោងទៅលើមាត្រា ១២ នៃច្បាប់ស្ដីពីពន្ធនាគារ ដោយឯកឧត្ដមអគ្គនាយកលោកកំពុងតែរៀបចំលិខិតនេះ»។
តាមរយៈលិខិតនេះគឺអគ្គនាយកដ្ឋានពន្ធនាគារ ស្នើជំរុញឱ្យរដ្ឋបាលរាជធានី-ខេត្ដ យកចិត្ដទុកដាក់ក្នុងការសម្របសម្រួល ជួយអន្តរាគមន៍ទៅពន្ធនាគាររាជធានី-ខេត្ដដែលស្ថិតនៅក្នុងដែនដីរបស់ខ្លួន ព្រោះកិច្ចការងារនេះ ទាមទារឱ្យអាជ្ញាធរគ្រប់រាជធានី-ខេត្ដ ដែលជាអាជ្ញាធរនៅផ្ទាល់ដឹកនាំគណៈបញ្ជាឯកភាព ធ្វើការងារនេះ។
លោក សវានា បានលើកឡើងថា បើយោងតាមច្បាប់ស្ដីពីពន្ធនាគារ កិច្ចការងារសេវាសុខាភិបាលនៅក្នុងពន្ធនាគារគឺជាកិច្ចការរបស់ក្រសួងសុខាភិបាល ទោះបីជនជាប់ឃុំ ស្ថិតនៅក្នុងការគ្រប់គ្រងរបស់អគ្គនាយកដ្ឋានពន្ធនាគារក៏ដោយប៉ុន្ដែសុខភាពជនជាប់ឃុំ គឺជាបន្ទុករបស់សមត្ថកិច្ចរបស់ក្រសួងសុខាភិបាល។
លោកបញ្ជាក់ថា៖ «រដ្ឋបាលរាជធានី-ខេត្ដកំពុងជាប់រវល់ខ្លាំងជាមួយការទប់ស្កាត់ការឆ្លងរីករាលដាលជំងឺកូវីដ ១៩ ក្នុងសហគមន៍នៅក្នុងមូលដ្ឋានខេត្តរបស់ខ្លួន។ ដូច្នេះយើងធ្វើការងារទៅតាមជំនាញ។ ខាងអគ្គនាយកដ្ឋានពន្ធនាគារយើង កំពុងតែយកចិត្ដទុកដាក់ ជាមួយរដ្ឋបាលរាជធានី-ខេត្ដដោយបង្កើតជាក្រុមការងារ បែងចែកទៅតាមគោលដៅ។ យើងបានធ្វើការងារផ្ទាល់ដោយសហការជាមួយថ្នាក់ដឹកនាំរាជធានី-ខេត្ដ»។
នៅថ្ងៃទី ៣១ ខែឧសភា មានការចេញផ្សាយព័ត៌មានតាមបណ្ដាញព័ត៌មានក្នុងស្រុកមួយចំនួន ដោយបញ្ជាក់ថា ទណ្ឌិត និងមន្ត្រីនៅក្នុងពន្ធនាគារខេត្តកណ្ដាល ឆ្លងជំងឺកូវីដ ១៩ កើនឡើងដល់ចំនួន ៣៦៩ នាក់ គិតត្រឹមថ្ងៃទី ៣១ ខែឧសភា។ ប៉ុន្ដែព័ត៌មាននេះត្រូវបានលោក គង់ សោភ័ណ្ឌ អភិបាលខេត្ដកណ្ដាលថ្លែងប្រាប់ភ្នំពេញ ប៉ុស្ដិ៍ នៅថ្ងៃដដែលនេះថា ការផ្សាយនោះជាព័ត៌មានចចាមអារ៉ាម។
លោកអភិបាលខេត្ដថ្លែងថា៖ «យើងមិនអាចផ្ដល់ព័ត៌មានចំពោះករណីដែលមានការឆ្លងរីករាលដាលជំងឺកូវីដ ១៩ នៅក្នុងពន្ធនាគារបានទេ។ ព័ត៌មានដែលឮចេញ គឺសុទ្ធតែព័ត៌មានចចាមអារ៉ាម ព្រោះខ្ញុំមិនបានផ្ដល់ព័ត៌មានទាល់តែសោះពាក់ព័ន្ធនឹងបញ្ហានេះ។ យើងមិនផ្ដល់ព័ត៌មានទាក់ទងនឹងបញ្ហានេះ ដោយសារតែយើងស្ថិតនៅក្នុងចំណុចមួយ គឺយើងយកសុវត្ថិភាពជាធំ»។
បច្ចុប្បន្នរដ្ឋបាលខេត្ដកណ្តាលកំពុងអនុវត្ដវិធានការសំខាន់ៗមួយចំនួន ក្នុងការទប់ស្កាត់ការឆ្លងរីករាលដាលជំងឺកូវីដ ១៩ នៅក្នុងពន្ធនាគារដោយធ្វើយ៉ាងណាកុំឱ្យមានការយល់ច្រឡំ និងមានបញ្ហាសតិអារម្មណ៍កើតឡើងនៅក្នុងចំណុចកើតហេតុ។
លោកថា៖ «យើងមានការប្រុងប្រយ័ត្នខ្ពស់ដោយយើងត្រូវតែអនុវត្ដនូវវិធានការពារសន្តិសុខ សណ្ដាប់ធ្នាប់ សុវត្ថិភាពក្នុងពេល ២៤ ម៉ោងជាប់ជាប្រចាំនៃបរិវេណពន្ធនាគារ។ យើងចាត់ទុកបរិវេណពន្ធនាគារដែលមានការឆ្លងជំងឺកូវីដ ១៩ គឺជាតំបន់ក្រហម»។
បើតាម គង់ សោភ័ណ្ឌ អាជ្ញាធរបានជួសជុល និងបង្កើតនូវអគារជាបន្តបន្ទាប់ ដើម្បីរៀបចំសម្រាប់ទុកដាក់ជនដែលត្រូវធ្វើចត្ដាឡីស័ក និងដាក់ឱ្យនៅរក្សាគម្លាតពីគ្នា។ ចំណែកមន្ទីរសុខាភិបាលកំពុងតែដាក់ក្រុមការងារចុះធ្វើការព្យាបាលជាបន្តបន្ទាប់ទៅលើអ្នកដែលឆ្លងជំងឺកូវីដ។
លោកអភិបាលខេត្ដអះអាងថា ចំពោះការរីករាលដាលជំងឺកូវីដ ១៩ នៅក្នុងពន្ធាគារ គឺអាចគ្រប់គ្រងបាន។ លោកស្នើឱ្យទុកកិច្ចការងារនេះឱ្យសមត្ថកិច្ចធ្វើការងារ។
លោក អំ សំអាត នាយករងអង្គការ លីកាដូ ថ្លែងជាថ្មីទៀតថា តុលាការគួរពិចារណាលើការដោះលែងឱ្យនៅក្រៅឃុំបណ្តោះអាសន្ន ចំពោះជនត្រូវចោទណាដែលជាប់ចោទពីបទល្មើសមជ្ឈិមកម្រិតស្រាលជាពិសេសស្ត្រីដែលមានផ្ទៃពោះ ស្ត្រីដែលមានកូនតាមម្តាយ អនីតិជន។
លើសពីនេះ តុលាការគួរពន្លឿននីតិវិធីលើការជំនុំជម្រះ ព្រោះជនជាប់ឃុំខ្លះអាចត្រូវបានកាត់ទោសតម្រឹម ខ្លះអាចត្រូវបានកាត់ទោសព្យួរ ខ្លះអាចកាត់ទោសធ្វើការងារ សហគមន៍ និងខ្លះទៀតអាចកាត់ទោសពាក់កណ្តាលនៃទោស។
លោកបន្តថា៖ «រាជរដ្ឋាភិបាល និងតុលាការគួរពិនិត្យដោះលែងទៅលើទណ្ឌិតដែលជិតរួចទោស អ្នកមានជំងឺរុំារ៉ៃជាដើម។ មធ្យោបាយនេះអាចកាត់បន្ថយភាពចង្អៀតណែនក្នុងពន្ធនាគារ ហើយក៏ជាការកាត់បន្ថយហានិភ័យ និងជួយសម្រួលដល់ការគ្រប់គ្រង និងវិធានការបង្ការ និងការទប់ស្កាត់ការរីករាលដាលជំងឺកូវីដ ១៩ ក្នុងពន្ធនាគារ»៕