.jpg)
អ្នកកាសែតម្នាក់ត្រូវបានបញ្ជូនទៅស្នងការដ្ឋាននគរបាល ពាក់ព័ន្ធការជួញដូរគ្រឿងញៀន កាលពីម្សិលមិញ។ រូបថត ប៉ូលិស
ភ្នំពេញៈ អ្នកកាសែតអនឡាញម្នាក់ត្រូវបានបញ្ជូនទៅស្នងការដ្ឋាននគរបាលខេត្តក្រចេះពីម្សិលមិញ បន្ទាប់ពីចាប់ខ្លួនបាន ១ ថ្ងៃ ពាក់ព័ន្ធនឹងការជួញដូរគ្រឿងញៀនមេតំហ្វេតាមីនចំនួន ១១ កញ្ចប់តូចនៅផ្ទះសំណាក់ ១ កន្លែង ក្នុងភូមិក្បាលស្នួល ឃុំ-ស្រុកស្នួល។
លោក ចាន់ សុគីម អធិការនគរបាលស្រុកស្នួល ឱ្យដឹងពីម្សិលមិញ ថា ជនសង្ស័យឈ្មោះ អូន សេត ភេទប្រុស អាយុ ៤១ ឆ្នាំ រស់នៅភូមិសួងលិច ឃុំសួង ស្រុក-ខេត្តត្បូងឃ្មុំមានរបរជាអ្នកកាសែតអនឡាញ ឈ្មោះ «KTV អនឡាញ»។ ជនសង្ស័យគ្មានទីលំនៅ ឬរស់នៅក្នុងខេត្តក្រចេះទេ។
លោកបញ្ជាក់ថា៖ «យើងឃាត់ខ្លួនបុរសសង្ស័យម្នាក់នេះ ក្នុងពេលគាត់កំពុងរក្សាទុកគ្រឿងញៀន ដើម្បីចែកចាយបន្តទៅអ្នកផ្សេង។ យើងអនុវត្តទៅតាមនីតិវិធីច្បាប់ និងបញ្ជូនទាំងរបាយការណ៍ ទាំងមនុស្សទៅខេត្ត ដើម្បីចាត់វិធានការបន្តទៀត»។
លោកថា មុនឈានដល់ការឃាត់ខ្លួនជនសង្ស័យ គឺកម្លាំងនគរបាលទទួលបានដំណឹងថា មានបុរសម្នាក់សង្ស័យជួញដូរគ្រឿងញៀន ហើយបានទៅដេកនៅផ្ទះសំណាក់មួយកន្លែង ដែលមានយីហោឈ្មោះ សប្បាយៗ ដែលមានទីតាំងស្ថិតក្នុងភូមិក្បាលស្នួល ឃុំ-ស្រុកស្នួល ខេត្តក្រចេះ។
បន្ទាប់ពីទទួលបានសេចក្តីរាយការណ៍កម្លាំងសមត្ថកិច្ចរបស់លោក សហការជាមួយកម្លាំងនគរបាលប៉ុស្តិ៍រដ្ឋបាលឃុំស្នួលចុះដល់ទីតាំងផ្ទះសំណាក់នៅម៉ោងជិត ៦ ល្ងាច ថ្ងៃទី ៣០ ឧសភា និងចូលទៅក្នុងបន្ទប់ស្នាក់នៅរបស់ជនសង្ស័យហើយឃាត់ខ្លួនជនសង្ស័យភ្លាមៗតែម្តង។
លោកថា នៅពេលសមត្ថកិច្ចឆ្មក់ចូលទៅក្នុងបន្ទប់ស្នាក់នៅរបស់ជននោះក្នុងផ្ទះសំណាក់ គឺសមត្ថកិច្ចឃើញតែជនសង្ស័យម្នាក់តែប៉ុណ្ណោះ មិនឃើញមនុស្សផ្សេងនៅក្នុងបន្ទប់ជាមួយជនសង្ស័យឡើយ។ ក្រោយឃាត់ខ្លួនសមត្ថកិច្ចឆែកក្នុងសាក់កាដូរបស់ជនសង្ស័យ រកឃើញថ្នាំញៀនប្រភេទម្សៅក្រាមចំនួន ១១ កញ្ចប់តូច ទុយោចូករំលែកម្សៅគ្រឿងញៀន ១ ដើម ទូរស័ព្ទដៃ ១ គ្រឿង ម៉ូតូ ១ គ្រឿង អត្តសញ្ញាណប័ណ្ណសញ្ជាតិខ្មែរ ១ សន្លឹក បណ្ណសម្គាល់អ្នកសារព័ត៌មាន ១ សន្លឹក និងឧបករណ៍សម្រាប់ជក់គ្រឿងញៀនមួយចំនួន។
ជនសង្ស័យធ្លាប់ជាប់ពន្ធនាគារខេត្តកំពង់ចាមម្តង ប៉ុន្តែជននេះមិនបានប្រាប់សមត្ថកិច្ចថា ការជាប់ពន្ធនាគារពេលនោះពាក់ព័ន្ធនឹងបទល្មើសអ្វីទេ។ លោកបន្ថែមថា ជនសង្ស័យបានជិះម៉ូតូពីខេត្តត្បូងឃ្មុំ មកកាន់ស្រុកស្នួលក្នុងខេត្តក្រចេះ ដើម្បីចែកចាយគ្រឿងញៀន។
សមត្ថកិច្ចបានសាកសួររកបក្ខពួកជនសង្ស័យផងដែរ ប៉ុន្តែជននេះឆ្លើយថា មិនមានបក្ខពួកទេ។ ពាក់ព័ន្ធការងារបង្ក្រាបគ្រឿងញៀន និងបទល្មើសផ្សេងៗ គឺកម្លាំងសមត្ថកិច្ចតែងតែធ្វើជាប្រចាំដូចភ្លៀងរលឹម ដើម្បីរក្សាសន្តិសុខសុវត្ថិភាពជូនប្រជាពលរដ្ឋ។
ពាក់ព័ន្ធអ្នកកាសែតនេះ លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មានប្រាប់ភ្នំពេញប៉ុស្តិ៍ពីម្សិលមិញថា កាសែត KTV អនឡាញនេះមានចុះបញ្ជិកាត្រឹមត្រូវនៅក្រសួងព័ត៌មាន ប៉ុន្តែចាងហ្វាងកាសែត KTV អនឡាញនេះ គឺលោកស្រី ខុម កង ជាម្ចាស់។
លោកបានថ្លែងថា៖ «សម្រាប់អ្នកខុសច្បាប់ វិធានការច្បាប់នឹងត្រូវយកមកអនុវត្ត។ ដោយឡែកក្រមសីលធម៌ បើខុសវាអស់តម្លៃរបស់បុគ្គលនោះ។ យើងកំពុងពិនិត្យក្រមសីលធម៌ដាក់បញ្ហានេះចូលសិក្ខាសាលាមួយឆាប់ៗនេះ។ កំហុសអ្នកកាសែតអ៊ីចឹង ជួនកាលក្រសួងហៅចាងហ្វាងព្រមាន ឬបើសមត្ថកិច្ចចោទប្រកាន់ក៏ត្រូវព្យួរការងាររបស់គាត់អ៊ីចឹងដែរ»៕
