ស្ទឹងត្រែង៖ នគរបាលព្រហ្មទណ្ឌខេត្តស្ទឹងត្រែង កំពុងបន្តសាកសួរជនសង្ស័យ ៣ នាក់ ឪពុកកូន នៅថ្ងៃទី ១ មិថុនា ពាក់ព័ន្ធនឹងការព្រួតគ្នាចាប់បុរសម្នាក់ចងស្លាបសេក ហើយវាយរហូតដល់បុរសនោះស្លាប់ នៅថ្ងៃទី ៣០ ឧសភា ស្ថិតក្នុងភូមិសាសាន ឃុំកំភុន ស្រុកសេសាន។
លោក វ៉ា សុផាន់ ស្នងការរងទទួលការងារផែននគរបាលព្រហ្មទណ្ឌ នៃស្នងការដ្ឋាននគរបាលខេត្តស្ទឹងត្រែង ប្រាប់ពីម្សិលមិញ ថា ជនសង្ស័យទាំង៣នាក់ទី១- ឈ្មោះ ស្រេង
សែ ភេទប្រុសអាយុ ៥០ ឆ្នាំ (ជាឪពុក) ទី២- ឈ្មោះ លឹម មេងឡុង ភេទប្រុស អាយុ ២៣ ឆ្នាំ និងទី៣- ឈ្មោះ លឹម មេងស្រុង ភេទប្រុស អាយុ ១៩ ឆ្នាំ។ ពួកគេរស់នៅក្នុងភូមិសេសាន ឃុំកំភុន ស្រុកសេសាន ខេត្តស្ទឹងត្រែង។ រីឯបុរសរងគ្រោះ ឈ្មោះ ចាន់ ភាវ៉ាន់ អាយុ ២៧ ឆ្នាំ រស់នៅភូមិស្រែតាប៉ាន ឃុំសាមឃួយ ស្រុកសេសាន ខេត្តស្ទឹងត្រែង។
លោកបន្តថា ជនសង្ស័យទាំង ៣ នាក់ កំពុងត្រូវបានមន្រ្តីជំនាញបន្តសាកសួរនៅស្នងការដ្ឋាននគរបាលខេត្តនៅឡើយទេនៅថ្ងៃទី ១ មិថុនា បន្ទាប់ពីសមត្ថកិច្ចឃាត់ខ្លួនពួកគេ កាលពីថ្ងៃទី ៣០ ឧសភា។ ការបន្តនីតិវិធីសាកសួរនេះ ដោយសារជនសង្ស័យ មានគ្នា ៣ នាក់។ បើមានតែជនសង្ស័យម្នាក់ គឺសមត្ថកិច្ចអនុវត្តនីតិវិធីសាកសួរលឿន។
លោកថ្លែងថា៖ «ពួកគេកំពុងស្ថិតនៅក្នុងដំណាក់កាលនគរបាលយុត្តិធម៌កសាងសំណុំរឿង។ ករណីនេះយើងនៅធ្វើការងារច្រើន ព្រោះជនសង្ស័យមានច្រើននាក់»។
បើតាមលោក វ៉ា សុផាន់ ប្រាប់តាមសម្តីក្រុមគ្រួសារ របស់ជនសង្ស័យថា កាលពីវេលាព្រលប់ថ្ងៃទី ៣០ ឧសភា គឺជនសង្ស័យទាំង ៣ នាក់ ឪពុកកូន បានដើរកៀងសត្វគោ និងសត្វពពែ របស់ពួកគេឲ្យចូលក្នុងក្រោលដូចសព្វមួយដង។ លុះដល់វេលាម៉ោងប្រមាណជា ៨ យប់ថ្ងៃដដែល ស្រាប់តែឃើញជនរងគ្រោះកាន់ដំបងឈើមួយចូលក្នុងក្រោលគោហើយដេញវាយគោ និងសត្វពពែផ្អើលពេញក្រោល។ ដោយឃើញសភាពបែបនេះ ក្រុមជនសង្ស័យបានព្រួតគ្នាចាប់ជនរងគ្រោះចងស្លាបសេក និងវាយរហូតស្លាប់តែម្តង។
លោកបញ្ជាក់ថា ក្រោយកើតហេតុ ប្រជាពលរដ្ឋបានរាយការណ៍ទៅនគរបាលប៉ុស្តិ៍រដ្ឋបាលឃុំកំភុន ទៅអធិការដ្ឋាននគរបាលស្រុកសេសាន ទើបខាងនគរបាលស្រុករាយការណ៍ ដើម្បីសហការស្នើសុំកម្លាំងជំនាញព្រហ្មទណ្ឌខេត្ត ចុះឃាត់ខ្លួនជនសង្ស័យនៅយប់ថ្ងៃទី ៣០ ឧសភា នោះតែម្តង។
ចំពោះសាកសពត្រូវបាននគរបាលជំនាញធ្វើកោសល្យវិច័យ និងគ្រូពេទ្យបានពិនិត្យឃើញថា ជនរងគ្រោះមានស្នាមឆូតមុតក្រោមភ្នែកខាងឆ្វេង។
តាមការសន្និដ្ឋានបឋមរបស់សមត្ថកិច្ចជំនាញ និងតាមរយៈការសួរសាក្សីបង្ហាញថា ជនរងគ្រោះត្រូវបានក្រុមជនសង្ស័យដេញវាយ ហើយជនរងគ្រោះលោតផ្លោះរបងបន្លាលួស តែមិនផុតក៏របូតជើងមុតនឹងបន្លាលួសនោះ។
ទន្ទឹមនឹងនោះមានចំណងចងជើងទាំង ២ ហើយដៃត្រូវក្រុមជនសង្ស័យចងស្លាបសេកទៅក្រោយផង។ រីឯផ្នែកកញ្ចឹងកមានសភាពទន់ដែលសមត្ថកិច្ចសន្និដ្ឋានថា អាចត្រូវនឹងវត្ថុរឹងដែលធ្វើឱ្យប៉ះពាក់ផ្នែកឆ្អឹងក។
ទោះយ៉ាងណា បើតាមលោក វ៉ា សុផាន់ ដែលយោងតាមសម្តីរបស់ម្តាយជនរងគ្រោះថា ជនរងគ្រោះមានប្រពន្ធ ប៉ុន្តែប្រពន្ធរបស់គាត់បានលែងលះគ្នាហើយ។ ដូច្នេះចាប់តាំងពីត្រូវប្រពន្ធលែងលះគ្នាជាមួយគាត់មកប្រហែលធ្វើឱ្យជនរងគ្រោះមានវិបត្តិផ្លូវចិត្ត ទើប ១ អាទិត្យមុនថ្ងៃកើតហេតុ គឺជនរងគ្រោះមិនបានចូលផ្ទះរហូតដល់ថ្ងៃកើតហេតុតែម្តង៕