ព្រះវិហារ៖តុលាការខេត្តព្រះវិហារសម្រេចឃុំខ្លួនមនុស្សប្រុសស្រី ២ នាក់ ក្នុងពន្ធនាគារខេត្តកាលពីថ្ងៃទី ៣១ ឧសភា ពាក់ព័ន្ធករណីនាំក្មេងស្រីជាអនីតិជន ២ នាក់ ចេញពីភូមិពោធិ៍ទាប ឃុំម្លូព្រៃ ១ ស្រុកឆែប ខេត្តព្រះវិហារ ប៉ុនប៉ងយកទៅឱ្យបម្រើក្នុងហាងលក់ស្រាបៀរ ១ កន្លែង ក្នុងក្រុងព្រះវិហារ កាលពីថ្ងៃទី ២៧ ឧសភា។
លោកស្រីឧត្តមសេនីយ៍ត្រី ប្រាំង ធីតា ស្នងការរងទទួលផែនការងារនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋាននគរបាលខេត្តព្រះវិហារ បានប្រាប់នៅរសៀលថ្ងៃទី ១ មិថុនាថា ជនសង្ស័យ ឈ្មោះ សុខ សាយ ភេទ ប្រុស អាយុ ២២ ឆ្នាំ មានរបរជាជាងឈើ រស់នៅក្នុងភូមិពោធិ៍ទាប ឃុំម្លូព្រៃ ១ ស្រុកឆែប។ ចំណែកស្ត្រីម្នាក់ទៀតឈ្មោះ សុខ ស្រីពៅ អាយុ ២៨ ឆ្នាំ ប្រកបរបរជានារីបម្រើសេវាស្រាបៀរ ស្នាក់នៅបន្ទប់ជួល ក្នុងភូមិកណ្តាល សង្កាត់កំពង់ប្រណាក ក្រុងព្រះវិហារ ខេត្តព្រះវិហារ។
លោកស្រីថ្លែងថា៖ «បុរសឈ្មោះ សុខ សាយ ត្រូវតុលាការចោទពីបទការនាំចេញយកអនីតិជនជាអាទិ៍ចេញ ដោយមិនស្របច្បាប់តាមមាត្រា ៩។ ស្ត្រីម្នាក់ទៀតចោទពីបទការទទួលយកមនុស្សដោយមានគោលដៅជួយដល់ជនល្មើសតាមមាត្រា ២០។ ទាំង ២ នាក់ ចោទតាមច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ»។
យោងតាមមាត្រា ៩ នៃច្បាប់នេះ បើតុលាការរកឃើញថា ពិតជាបានប្រព្រឹត្តមែននោះនឹងត្រូវផ្តន្ទាទោសដាក់ពន្ធនាគារពី ២ ឆ្នាំដល់ ៥ ឆ្នាំ។ រីឯមាត្រា ២០ នឹងត្រូវផ្តន្ទាទោសដាក់ពន្ធនាគារពី ២ ឆ្នាំដល់ ៥ ឆ្នាំ និងពិន័យជាប្រាក់ចូលថវិការដ្ឋពី ៤ លានដល់ ១០ លានរៀល។ តែបើជនរងគ្រោះជាអនីតិជនវិញនឹងត្រូវផ្តន្ទាទោសពី ៥ ឆ្នាំដល់ ១០ ឆ្នាំ។
បើតាម លោកស្រី ធីតា ការចាប់ខ្លួននេះធ្វើតាមបណ្តឹងអាណាព្យាបាលរបស់ក្មេងស្រីទាំង ២ នាក់ ថ្ងៃទី ៣០ ឧសភា ដែលបានប្ដឹងទៅនគរបាលប៉ុស្តិ៍ឃុំម្លូព្រៃ ១ ដោយបានអះអាងថា កាលពីថ្ងៃទី ២៧ ឧសភា មានបុរសម្នាក់ឈ្មោះ សុខ សាយ បាននាំក្មេងស្រីឈ្មោះ ម.ថ អាយុ ១៥ ឆ្នាំ និងក្មេងស្រីឈ្មោះ ណ.រ អាយុ ១៦ ឆ្នាំ រស់នៅក្នុងភូមិ-ឃុំជាមួយគ្នាដោយឌុបតាមម៉ូតូនាំទៅស្នាក់នៅក្នុងបន្ទប់ជួលរបស់ស្ត្រីឈ្មោះ សុខ ស្រីពៅ ក្នុងភូមិកណ្តាល សង្កាត់កំពង់ប្រណាក ក្រុងព្រះវិហារ។
លោកស្រីបន្តថា ក្រោយពីនគរបាលប៉ុស្ដិ៍ទទួលបានពាក្យបណ្តឹងរួចមកក៏បានរាយការណ៍ទៅលោកអធិការនគរបាលស្រុកឆែប និងបន្តមកការិយាល័យប្រឆាំងការជួញដូរមនុស្សខេត្តព្រះវិហារ ទើបមានការស្រាវជ្រាវឃាត់ខ្លួនជនសង្ស័យបាននៅភូមិកណ្តាល សង្កាត់កំពង់ប្រណាក ក្រុងព្រះវិហារ នៅថ្ងៃទី ៣០ ឧសភា ក្រោយទទួលបណ្តឹងតែប៉ុន្មានម៉ោងប៉ុណ្ណោះ។
លោកស្រី ធីតា បានបញ្ជាក់ថា៖ «ជនប្រុសស្រី២នាក់នោះមិនសារភាពថា នាំក្មេងរងគ្រោះក្នុងគោលដៅឱ្យទទួលភ្ញៀវក្នុងហាងទេ តែបើតាមការសន្និដ្ឋានរបស់យើងគឺជនត្រូវចោទមានបំណងយកក្មេងទៅបម្រើក្នុងហាងលក់ស្រាបៀរ ព្រោះស្ត្រីត្រូវចោទធ្វើការនៅក្នុងហាងនោះ»។
ពាក់ព័ន្ធករណីនេះដែរ នៅរសៀលថ្ងៃទី ១ មិថុនា លោក សូ ស្ម័គ្រ នាយនគរបាលប៉ុស្តិ៍ឃុំព្រៃម្លូ ១ បានប្រាប់ថា ក្មេងស្រីរងគ្រោះទាំង ២ នាក់នោះ រស់នៅក្នុងភូមិជាមួយគ្នា ហើយត្រូវបានសមត្ថកិច្ចរំដោះ និងអនុញ្ញាតឱ្យត្រឡប់មកលំនៅឋានវិញហើយ។
លោកថា៖ «បុរសម្នាក់ឈ្មោះ សុខ សាយ នោះគាត់ឌុបក្មេងស្រីពីភូមិមិនឱ្យឪពុកម្តាយក្មេងដឹង ទើបគាត់មកប្តឹងខ្ញុំ។ ឥឡូវក្មេងរងគ្រោះមកផ្ទះវិញអស់ហើយ»៕