.jpg)
ទេសភាពតាមបណ្ដោយផ្លូវជាតិលេខ៣ ភ្នំពេញ-កំពត។ រូបថត ក្រសួងសាធារណការនិងដឹកជញ្ជូន
ភ្នំពេញៈ ក្រសួងសាធារណៈការ និងដឹកជញ្ជូននឹងឱ្យមន្រ្ដីអនុវត្ដច្បាប់ចាប់ល្បឿនយានយន្តដែលបើកបរលើសល្បឿនកំណត់លើផ្លូជាតិលេខ ៣ ពីរាជធានីភ្នំពេញទៅក្រុងកំពត ក្រោយពេលផ្លូវនេះសម្ពោធឱ្យប្រើប្រាស់ផ្លូវការ។ យោងតាមមន្រ្ដីអ្នកនាំពាក្យក្រសួងនេះ។
លោក ហ៊ាង សុទ្ធាយុត្តិ អ្នកនាំពាក្យក្រសួងសាធារណៈការ និងដឹកជញ្ជូន ថ្លែងនៅថ្ងៃនេះថា ការស្ថាបនាផ្លូវជាតិលេខ ៣ ពីភ្នំពេញទៅខេត្ដកំពត គិតត្រឹមបំណាច់ខែឧសភានេះ សម្រេចបានជាង ៩៨ ភាគរយហើយ។
លោកបានថ្លែងថា៖ «ការដាក់កាមេរ៉ាចាប់ល្បឿននេះ គឺដាក់ចំនួន ១៤ ទីតាំង ចាប់ផ្តើមពីបង្គោលគីឡូម៉ែត្រលេខ ៣៣ ទៅដល់បង្គោលគីឡូម៉ែត្រលេខ ១៦២ នៃផ្លូវជាតិលេខ ៣ ពីរាជធានីភ្នំពេញទៅដល់ក្រុងកំពត។ ការចាប់ផ្ដើមចុះអនុវត្ដច្បាប់ ការចាប់ល្បឿន នឹងចាប់ផ្ដើមក្រោយពេលការសម្ពោធផ្លូវនេះជាផ្លូវការ»។
លោកបន្តថា៖ «បច្ចុប្បន្ន យើងមិនទាន់បានការកំណត់ពេលវេលាជាក់លាក់ក្នុងការសម្ពោធផ្លូវជាតិលេខ ៣ នេះនៅឡើយទេ ដោយសារតែការរីករាលដាលជំងឺកូវីដ ១៩ ដែលជារឿងចំពោះមុខត្រូវរួមគ្នាដោះស្រាយសិន»។
លោកបានឱ្យដឹងថា បន្ទាប់ពីសម្ពោធដាក់ឱ្យដំណើរជាផ្លូវការនាពេលខាងមុខ កាមេរ៉ាចាប់ល្បឿនទាំង ១៤ ទីតាំងនេះ នឹងកំណត់ការចាប់ល្បឿនយានយន្តទាំងចរាចរទៅនិងមកព្រមគ្នាដែរ ដើម្បីត្រួតពិនិត្យលើអ្នកបើកបរលើសល្បឿនកំណត់នៃច្បាប់ចរាចរណ៍។
លោក សុទ្ធាយុត្តិ បានបញ្ជាក់ថា៖ «ការដាក់ឱ្យដំណើរការកាមេរ៉ាចាប់ល្បឿននេះ គឺដើម្បីចូលរួមចំណែកកាត់បន្ថយនូវអត្រាគ្រោះថ្នាក់ចរាចរណ៍នៅលើដងផ្លូវ និងចូលរួមធ្វើយ៉ាងណាកាត់បន្ថយនូវអត្រាស្លាប់ដោយគ្រោះថ្នាក់ចរាចរណ៍របស់ប្រជាពលរដ្ឋ»។
លោក គឹម បញ្ញា នាយកប្រតិបត្តិអង្គការ AIP គាំទ្រចំពោះវិធានការរបស់ក្រសួងសាធារណៈការ ក្នុងការបំពាក់កាមេរ៉ាចាប់ល្បឿនយានយន្តនៅតាមផ្លូវជាតិបែបនេះ ដើម្បីឱ្យពលរដ្ឋចូលរួមគោរពច្បាប់ចរាចរន៍ ព្រោះផ្លូវជាតិលេខ៣នេះ ក៏ជាផ្លូវជាតិមួយប្រឈមនឹងបញ្ហាគ្រោះថ្នាក់ចរាចរណ៍ខ្ពស់ដែរ។
លោកបានថ្លែងថា៖ «តាមរបាយការណ៍របស់សមត្ថកិច្ចផ្លូវជាតិលេខ ៣ នេះ ក្នុង ១ ឆ្នាំៗជនរងគ្រោះដែលបានស្លាប់ដោយគ្រោះថ្នាក់ចរាចរណ៍មានចំនួន ១០ ភាគរយ បើសរុបជនរងគ្រោះដែលបានស្លាប់នៅលើផ្លូវជាតិទាំងអស់ក្នុងប្រទេសកម្ពុជា។
ខ្ញុំជឿជាក់ថា តាមរយៈការបំពាក់កាមេរ៉ាចាប់ល្បឿននេះប្រាកដជាត្រូវបំពាក់នៅតាមតំបន់ដែលឧស្សាមានគ្រោះថ្នាក់ចរាចរណ៍ញឹកញាប់ ដើម្បីកាត់បន្ថយហានិភ័យគ្រោះថ្នាក់ចរាចរណ៍នេះ»។
លោកបានលើកឡើងថា តាមរយៈបទពិសោធន៍តាមបណ្ដាប្រទេសនានា មុននឹងអនុវត្ដវិធានការច្បាប់ចាប់ល្បឿននេះ អាជ្ញាធរត្រូវជូនដំណឹងដល់ប្រជាពលរដ្ឋជាមុនដើម្បីឱ្យមានការប្រុងប្រយ័ត្ន។
បើតាមលោក សុទ្ធាយុត្តិ គម្រោងពង្រីកនិងលើកកម្រិតផ្លូវជាតិលេខ ៣ ពីភ្នំពេញទៅក្រុងកំពត មានប្រវែងសរុប ១៣៤.៧ គីឡូម៉ែត្រ។ គម្រោងស្ថាបនាផ្លូវនេះ ត្រូវចំណាយថវិកាសរុបជាង ២១៩ លានដុល្លារអាមេរិក ជាហិរញ្ញប្បទានសម្បទានពីសាធារណរដ្ឋ ប្រជាមានិតចិនរួមជាមួយនឹងថវិកាបដិភាគរបស់រាជរដ្ឋាភិបាលកម្ពុជា។
ផ្លូវនេះទទួលសិទ្ធិសាងសង់ដោយក្រុមហ៊ុន សាជីវកម្មស្ពាន និងថ្នល់ចិន ត្រួតពិនិត្យបច្ចេកទេស ដោយក្រុមហ៊ុនទីប្រឹក្សាបច្ចេកទេសសំណង់ ក្វាងចូវ វ៉ានអាន ដោយប្រើប្រាស់រយៈពេលសាងសង់ ៤៨ ខែ៕
