.jpg)
ក្រុមមន្ត្រីចុះពិនិត្យទីតាំងពន្ធនាគារខេត្តកំពង់ស្ពឺ ដែលមានការឆ្លងកូវីដដល់អ្នកជាប់ឃុំ។ រូបថត ពន្ធនាគារខេត្តកំពង់ស្ពឺ
កំពង់ស្ពឺៈ ក្នុងចំណោមជនជាប់ឃុំចំនួន ១ ៨០២ នាក់ ក្នុងពន្ធនាគារខេត្ដកំពង់ស្ពឺ មានជនជាប់ឃុំជាង ១០០ នាក់ ត្រូវបានរកឃើញវិជ្ជមាន ជំងឺកូវីដ ១៩ និងម្នាក់បានស្លាប់ កាលពីថ្ងៃទី ២៩ ឧសភា ក្រោយពីមានការឆ្លងចូលក្នុងពន្ធនាគារ កាលពីសប្ដាហ៍មុន។ នេះបើតាមលោក វ៉ី សំណាង អភិបាលខេត្ដកំពង់ស្ពឺ ថ្លែងប្រាប់ ភ្នំពេញ ប៉ុស្ដិ៍ នៅថ្ងៃទី ១ ខែមិថុនានេះ។
លោក វ៉ី សំណាង បានថ្លែងថា ការឆ្លងជំងឺកូវីដ ១៩ ចូលក្នុងពន្ធនាគារនេះ កើតឡើងនាអំឡុងពេលប្រហែល ១ សប្ដាហ៍មុន នាចុងខែឧសភាកន្លងទៅនេះ។ ក្នុងចំណោមជនជាប់ឃុំនៅក្នុងពន្ធនាគារសរុបចំនួន ១៨០២នាក់ មានជនជាប់ឃុំជាង ១០០ នាក់ បានឆ្លងជំងឺកូវីដ ១៩។
លោកបានថ្លែងថា៖ «មានជនជាប់ឃុំម្នាក់ស្លាប់ គាត់មានយុច្រើន ហើយគាត់មានជំងឺជាប់ខ្លួនច្រើនទៅហើយ ដូច្នេះនៅពេលដែលគាត់ឆ្លងកូវីដកូវីដ ១៩ ក៏បណ្ដាលឱ្យគាត់ស្លាប់»។
ជនជាប់ឃុំដែលស្លាប់ឈ្មោះ ឡាំ សុខា ភេទស្រី អាយុ ៦៦ ឆ្នាំ ស្លាប់នៅថ្ងៃទី ២៩ ខែឧសភា។ ជនជាប់ឃុំដែលស្លាប់នេះដោយសារតែមានជំងឺប្រចាំកាយជាច្រើនទើបបានជាក្រុមគ្រូពេទ្យមិនអាចជួយសង្គ្រោះបាន។
លោកអភិបាលខេត្តបន្តថា ការឆ្លងរីករាលដាល នៅក្នុងពន្ធនាគារបែបនេះ ដោយសារនៅក្នុងពន្ធនាគារ មិនអាចរក្សាគម្លាតបាន។
លោកថ្លែងថា៖ «ប៉ុន្តែវិធានការដែលយើងបានធ្វើ គឺយើងបានបែងចែកពួកគាត់ ឱ្យនៅដាច់ដោយឡែកពីគ្នា។ ក្នុងនោះគឺក្រុមអ្នកដែលឆ្លងជំងឺកូវីដ ១៩ យើងដាក់គាត់មួយកន្លែង ក្រុមអ្នកដែលជាប់ពាក់ព័ន្ធយើងដាក់មួយកន្លែង។ ចំណែកក្រុមជនជាប់ឃុំ ដែលមិនមានពាក់ព័ន្ធយើងឱ្យគាត់នៅកន្លែងមួយផ្សេងនៅក្នុងពន្ធនាគារ»។
បើតាមលោក វ៉ី សំណាង នៅពេលនេះ អាជ្ញាធរពាក់ព័ន្ធ កំពុងបន្តខិតខំផ្សព្វផ្សាយនៅក្នុងពន្ធនាគារ ទាក់ទងនឹងការរក្សាអនាម័យ ងូតទឹក លាងដៃនឹងសាប៊ូឱ្យបានញឹកញាប់ជាដើម។ ចំពោះជនជាប់ឃុំ ដែលមានឆ្លងជំងឺកូវីដ ១៩ គឺកំពុងត្រូវបានគ្រូពេទ្យធ្វើការព្យាបាល៕
