លោក ត្រាំ អ៊ីវតឹក ទេសរដ្ឋមន្ត្រី ទទួលបន្ទុកបេសកកម្មពិសេស។ ហេង ជីវ័ន
ភ្នំពេញៈ លោក ត្រាំ អ៊ីវតឹក ទេសរដ្ឋមន្ត្រី ទទួលបន្ទុកបេសកកម្មពិសេសនិងជាប្រធានក្រុមការងារថ្នាក់ជាតិ ចុះជួយពង្រឹងស្រុកកំពង់លែង ខេត្តកំពង់ឆ្នាំង បានទទួលមរណភាពក្នុងអាយុ ៧៣ ឆ្នាំ ដោយរោគាពាធ។ នេះបើតាមការអះអាងលោក សួន សេរីរដ្ឋា អនុប្រធានក្រុមការងារថ្នាក់ជាតិ ចុះពង្រឹងស្រុកកំពង់លែង ខេត្តកំពង់ឆ្នាំង។
លោក សេរីរដ្ឋា បានប្រាប់ ភ្នំពេញ ប៉ុស្តិ៍នៅល្ងាចថ្ងៃទី ០១ ខែមិថុនាថា លោក ត្រាំ អ៊ីវតឹក បានទទួលមរណភាពនៅវេលាម៉ោង ២:៣០ នាទីរសៀល ថ្ងៃទី ១ មិថុនានេះ បន្ទាប់ពីបានសម្រាកព្យាបាលអស់រយៈពេលជាង ១ ខែ នៅឯក្រៅប្រទេស។
លោក សេរីរដ្ឋា បានបញ្ជាក់ថា៖ «មរណភាពរបស់ឯកឧត្តម ត្រាំ អ៊ីវតឹក គឺជាការបាត់បង់នូវធនធានមនុស្សដ៏សំខាន់របស់ជាតិ។ ឯកឧត្តមជាចាស់ទុំដែលមានចរិតដឹកនាំស្លូតបូត ម៉ឺងម៉ាត់ និងសម្ដីសំដៅមួយៗច្បាស់ៗ ព្រមទាំងសមញ្ញគួរជាទីគោរព និងយកគំរូរៀនសូត្រតាម»។
លោក ត្រាំ អ៊ីវតឹក ជាអតីតរដ្ឋមន្ត្រីក្រសួងប្រៃសណីយ៍ និងទូរគមនាគមន៍ពីឆ្នាំ ២០១៦ ដល់ឆ្នាំ ២០២០ បន្ទាប់ពីកាន់តំណែងជារដ្ឋមន្ត្រីក្រសួងសាធារណការ និងដឹកជញ្ជូនពីឆ្នាំ ២០០៨ ដល់ឆ្នាំ ២០១៦។
ដំណឹងនៃមរណទុក្ខដ៏ក្រៀមក្រំនេះ បានធ្វើឲ្យ លោកនាយករដ្ឋមន្ត្រី ហ៊ុន សែន មានក្ដីសោកស្ដាយ អាឡោះអាល័យ ស្ទើរកទីបំផុតគ្មាន។ យោងតាមសាររំលែកទុក្ខ ដែលភ្នំពេញប៉ុស្តិ៍ទទួលបាននៅល្ងាចថ្ងៃទី ០១ ខែមិថុនា ឆ្នាំ ២០២១។
លោកនាយករដ្ឋមន្ត្រី បានគូសបញ្ជាក់ថា៖ «ក្នុងឱកាសប្រកបដោយសមានទុក្ខនេះ ខ្ញុំនិងភរិយាសូមសម្តែងនូវការសោកស្តាយ ស្រណោះ អាឡោះអាល័យ សង្វេគស្ទើររកទីបំផុតគ្មាន ចំពោះការបាត់បង់ឯកឧត្តមទេសរដ្ឋមន្ត្រី ត្រាំ អ៊ីវតឹក គឺជាការបាត់បង់នូវស្វាមីប្រកបដោយសង្គហធម៌ដ៏ល្អ និងជាការបាត់បង់ឪពុក ជីតា ប្រកបដោយ ព្រហ្មវិហារធម៌មិនចេះរីងស្ងួត ព្រមទាំងជាការបាត់បង់នូវឥស្សរជនឆ្នើមមួយរូបដែលពេញមួយជីវិតបានរួមចំណែកយ៉ាងសកម្មជាមួយរាជរដ្ឋាភិបាលក្នុងកិច្ចការបម្រើជាតិមាតុភូមិប្រកបដោយស្មារតីទទួលខុសត្រូវខ្ពស់»។
ចំណែក លោក សំ ចាន់ថន អភិបាលស្រុកកំពង់លែង បានថ្លែងថា ក្នុង២អាណត្តិកន្លងមកនេះ លោក ត្រាំ អ៊ីវតឹក បានជួយអភិវឌ្ឍន៍មូលដ្ឋានស្រុកកំពង់លែង ដោយបានក៏សាងនូវសមទ្ធិផលបានយ៉ាងច្រើនសន្ធឹកសន្ធាប់ ដោយបានកសាងផ្លូវស្ពាននិងប្រព័ន្ធធារាសាស្ត្រ ផ្លូវទឹក ដែលធ្វើឲ្យពលរដ្ឋមានជីវភាពធូធារ សម្បូរសប្បាយ៕
.jpg)
