The Phnom Penh Post Search

Search form




Logo of Phnom Penh Post newspaper Phnom Penh Post - មន្ត្រី​អាជ្ញាធរ​ជាតិ​អប្សរា​ កំពុង​សហការ​រកមុខ​អ្នក​លួច​អារ​ដើម​គ្រញូង​ក្នុង​រមណីយដ្ឋាន​អង្គរ

មន្ត្រី​អាជ្ញាធរ​ជាតិ​អប្សរា​ កំពុង​សហការ​រកមុខ​អ្នក​លួច​អារ​ដើម​គ្រញូង​ក្នុង​រមណីយដ្ឋាន​អង្គរ

Content image - Phnom Penh Post
ដើម​គ្រញូង​នៅ​រមណីយដ្ឋាន​អង្គរ​ដែល​គេ​លួច​អារ​កាលពី​ចុងខែ​មុន​។ រូបថត ហ្វេសប៊ុក

មន្ត្រី​អាជ្ញាធរ​ជាតិ​អប្សរា​ កំពុង​សហការ​រកមុខ​អ្នក​លួច​អារ​ដើម​គ្រញូង​ក្នុង​រមណីយដ្ឋាន​អង្គរ

សៀមរាបៈ មន្ត្រី​នៃ​អាជ្ញាធរ​ជាតិ​អប្សរា​បាននិង​កំពុង​សហការ​ស្វែងរក​ចាប់ខ្លួន​ជន​មិន​ស្គាល់​អត្តសញ្ញាណ​ដែល​បាន​លួច​ចូល​អារឈើ​គ្រញូង​ ១ ​ដើម​ពី​ថ្ងៃទី​ ៣១ ខែឧសភា នៅ​តំបន់​រមណីយដ្ឋាន​អង្គរ ក្នុង​ភូមិ​ត្រពាំងសេះ សង្កាត់​គោកចក ក្រុង​សៀមរាប​ ដើម្បី​យក​មក​អនុវត្ត​ទោស​តាមច្បាប់​។

លោក ឡុង កុសល អ្នកនាំពាក្យ​អាជ្ញាធ​ជាតិ​អប្សរា​ប្រាប់​ ភ្នំពេញ​ ប៉ុស្តិ៍​ ពី​ម្សិលមិញ​ថា ពេលនេះ អាជ្ញាធរ​ជាតិ​អប្សរា បាននិង​កំពុង​សហការ​ជាមួយ​អង្គភាព​ពាក់ព័ន្ធ​រួមមាន មន្ត្រី​ការពារ​បេតិកភណ្ឌ មន្ត្រី​ឧទ្យានុរក្ស​ទទួលបន្ទុក​ទេសភាព​ក្នុង​តំបន់​អង្គរ​ព្រមទាំង​អាជ្ញាធរ​មូលដ្ឋាន ដើម្បី​ស្វែងរក​អ្នក​លួច​ចូល​អារ​ដើម​គ្រញូង​នេះ ។

ទោះជា​យ៉ាងណា​លោក​បានបញ្ជាក់​​ថា រហូត​មក​ទល់​ពេលនេះ​មិនទាន់​មាន​តម្រុយ​នៅ​ឡើយ​ទេ ប៉ុន្តែ​ក្រុមមន្ត្រី​នឹង​ខំ​ស្វែងរក​ឱ្យឃើញ ដើម្បី​យក​​មក​អនុវត្ត​ទោស​ទៅ​តាម​ផ្លូវច្បាប់​ដោយ​មិន​ឱ្យ​រួចខ្លួន​នោះទេ​។

លោក កុសល បាន​ឱ្យ​ដឹង​ទៀតថា ឈើ​គ្រញូង​នេះ​ត្រូវបាន​គេ​អារ​ក្នុង​ទំហំ​តូចៗ​ត្រឹម​មុខកាត់​ ២ ​ឬ​ ៣ ​តឹក​​ដែល​ដើម​គ្រញូង​នេះ​ត្រូវ​បាន​ដាំ​ឡើងវិញ​កាលពី ២០០៥ កន្លងមក​។ ជន​មិន​ស្គាល់មុខ​នេះ​បាន​អារ​យក​តែ​គល់ឈើ​គ្រញូង​ប្រមាណ​ ១ ​ម៉ែត្រ​ ឬ​ ២ ​ម៉ែត្រ​ប៉ុណ្ណោះ​ដោយ​មិនបាន​យកទៅ​ទាំងអស់​ទេ ហើយ​បាន​បន្សល់​ទុក​វត្ថុតាង​មួយចំនួន​ដូចជា រណារ និង​ស្បែកជើង​ជាដើម​។ ចំណែក​ឈើ​ដែល​នៅ​សេសសល់​ត្រូវបាន​យកមក​រក្សាទុក​នៅក្នុង​ទីស្នាក់ការ​តំបន់​ការពារ​ទេសភាព​អង្គរ​។

លោក ឡុង កុសល បាន​បន្ថែមថា លោក​មិនបាន​ដឹងថា​កំណាត់ឈើ​នេះ​គេ​យកទៅ​ធ្វើ​អ្វី​នោះទេ ប៉ុន្តែ​នៅពេល​ឃាត់ខ្លួន​បាន រួច​សួរនាំ​ទើប​អាច​ដឹង​ពី​បំណង​ប្រាកដ​របស់គេ​។

លោក​ថា​៖ «​យើង​បាន​ធ្វើការ​រួមគ្នា​ជាមួយ​ផ្នែក​ពាក់ព័ន្ធ​ទាំងអស់​ ដើម្បី​ធ្វើ​​យ៉ាងណា​ឈាន​ដល់​ការចាប់ខ្លួន​ជនសង្ស័យ​ឱ្យ​ទាល់តែ​បាន ព្រោះ​យើង​មិន​​ចង់​ឱ្យ​បញ្ហា​នេះ​កើតឡើង​ទេ​»​។

បើតាម​លោក ឡុង កុសល ការលួច​អារឈើ​គ្រញូង​នេះ គឺ​ជន​មិន​ស្គាល់មុខ​បានធ្វើ​នៅពេល​យប់ ដោយ​ប្រើប្រាស់​រណារ​ដៃ ព្រោះ​បើ​ពួកគាត់​ប្រើ​ម៉ាស៊ីន​នឹងធ្វើ​ឱ្យ​អ្នកភូមិ​ដឹង ព្រោះ​តំបន់​រមណីយដ្ឋាន​អង្គរ​នេះ មាន​ភូមិ​របស់​ពលរដ្ឋ​រស់​នៅ​ច្រើន​។ ​

លោក​ថា ​​ករណី​លួច​អារ​ដើមឈើ​គ្រញូង​ក្នុង​តំបន់​រមណីយដ្ឋាន​អង្គរ​នេះ​មិនមែន​មាន​តែ​ ១ ​ករណីនេះ​ទេ តែ​កន្លងមក​ក៏​ធ្លាប់មាន​ដែរ តែ​លោក​មិន​ចាំ​តួលេខ​ទេ​។ រីឯ​អ្នកប្រព្រឹត្ត​ក៏​ធ្លាប់​បាន​បញ្ជូន​ទៅ​តុលាការ​ផងដែរ​។

លោក ខៀវ ធី ប្រធាន​សមាគម​មគ្គុទ្ទេសក៍​ទេសចរណ៍​អង្គរ​បាន​សម្តែង​ការសោកស្តាយ​ចំពោះ​ករណី​លួច​កាប់​ដើមឈើ​គ្រញូង​ក្នុង​តំបន់​រមណីយដ្ឋាន​អង្គរ​នេះ ខណៈ​មន្ត្រី​ការពារ​ក៏​មាន​ច្រើន រួមមាន នគរបាល​បេតិកភណ្ឌ និង​អាជ្ញាធរ​ពាក់ព័ន្ធ​ដែល​បាននិង​កំពុង​ការពារ​នៅ​ទីនោះ​ទាំងយប់​ទាំង​ថ្ងៃ ប៉ុន្តែ​នៅតែ​មាន​ជន​ឆ្លៀតឱកាស​ចូលទៅ​អារ​យក​បាន​។

បើតាម​លោក ធី នេះ​មិនមែន​ជា​ករណី​ទី​១ ​ទេ ដែលមាន​ការកាប់​ដើមឈើ​គ្រញូង​ក្នុង​តំបន់​រមណីយដ្ឋាន​អង្គរ​នេះ ប៉ុន្តែ​កន្លងមក​ក៏មាន ២ ទៅ ៣ ​ករណី​ដែរ តែ​ដូច​មិនបាន​រកឃើញ​អ្នកប្រព្រឹត្ត​ទេ​។ ដូច្នេះ​គួរ​ដាក់ពិន័យ​ចំពោះ​អ្នកទទួល​បន្ទុក​ការពារ​ទៅតាម​ច្បាប់ ព្រោះ​បណ្តោយ​ឱ្យ​មាន​ការលួច​ចូល​ទៅ​អារឈើ​គ្រញូង​នៅក្នុង​តំបន់​ការពារ​នេះ ។

លោក​បាន​ថ្លែងថា​៖ «​យើង​មិនអាច​ឆ្លើយថា មិនដឹងៗ​ហើយ​ធ្វើ​តែ​របាយការណ៍​ឡើង​ទៅ​លើ​អស់​តែ​ក្រដាស​​ហើយ​ទាំង​អ្នកប្រព្រឹត្ត និង​អ្នកទទួល​ខុសត្រូវ រួចខ្លួន​រហូត និង​មិន​មាន​ការដាក់​ទណ្ឌកម្ម​អ្នក​ណាមួយ​អ៊ីចឹង​ទេ »​។

លោក ខៀវ ធី បាន​បញ្ជាក់ថា តំបន់​រមណីយដ្ឋាន​អង្គរ​ជា​តំបន់​ទេសចរណ៍​ជាតិ និង​អន្តរជាតិ ដែល​ភាគច្រើន​គឺ​ភ្ញៀវទេសចរ​ពេញ​ចិត្តនឹង​បរិស្ថាន​ធម្មជាតិ​ដែលមាន​ព្រៃឈើ ហ៊ុមព័ទ្ធ​ដោយ​ព្រៃឈើ​ធំ​ដែល​នឹង​ធ្វើឱ្យ​មាន​ការទាក់ទាញ​ភ្ញៀវទេសចរ​កាន់តែ​ច្រើន​​ថែម​ទៀត​៕

អត្ថបទគួរចាប់អារម្មណ៍