ភ្នំពេញៈ ក្រុមការងាររបស់គណៈកម្មាធិការសិទ្ធិមនុស្សកម្ពុជាបានបញ្ចប់ការរៀបចំសេចក្ដីព្រាងដំបូងនៃសេចក្ដីព្រាងច្បាប់ ស្ដីពីការបង្កើតស្ថាប័នសិទ្ធិមនុស្សជាតិកម្ពុជា ដោយក្រុមការងារបានដាក់ទិសដៅបន្តពិភាក្សាជាមួយភាគីពាក់ព័ន្ធនាពេលឆាប់ៗខាងមុខទៀត។
លោក ជិន ម៉ាលីន អ្នកនាំពាក្យគណៈកម្មាធិការសិទ្ធិមនុស្សកម្ពុជា (គ.ស.ម.ក) ថ្លែងនៅថ្ងៃទី ១ ខែមិថុនាថា ឥឡូវនេះក្រុមការងារបានបញ្ចប់សេចក្ដីព្រាងដំបូង ហើយកំពុងដាក់ពិភាក្សាផ្ទៃក្នុង ដើម្បីកែសម្រួលបន្ថែម។
កិច្ចប្រជុំនៅល្ងាចថ្ងៃទី ៣១ ខែឧសភា ក្រុមការងារបានពិភាក្សា និងផ្ដល់នូវធាតុចូលមួយចំនួនពីសមាជិកសមាជិកាគណៈកម្មាធិការសិទ្ធិមនុស្សកម្ពុជាដទៃទៀត ទៅលើខ្លឹមសារសេចក្ដីព្រាងដំបូងនេះ។
លោកបញ្ជាក់ថា៖ «ក្រុមការងារនឹងធ្វើការសម្អាតកែសម្រួលសេចក្ដីព្រាងច្បាប់នេះបន្ថែមទៀត ក្រោយពីកិច្ចប្រជុំពិភាក្សាផ្ទៃក្នុងនេះ។ ជាទិសដៅបន្តទៀត ក្រុមការងារនឹងពិនិត្យមើលលទ្ធភាពក្នុងការពិគ្រោះយោបល់ជាមួយភាគីពាក់ព័ន្ធដទៃទៀត រួមមានអង្គការសង្គមស៊ីវិល ស្ថាប័នអន្តរក្រសួង គ្រឹះស្ថានឧត្ដមសិក្សា អ្នកវិជ្ជាជីវៈ និងស្ថាប័នតុលាការជាដើម»។
លោក ជិន ម៉ាលីន បានឱ្យដឹងថា ដោយសារតែស្ថានភាពជំងឺកូវីដ ១៩ ក្រុមការងារកំពុងតែធ្វើការពិចារណាក្នុងការប្រើប្រាស់នូវយន្តការ ឬមធ្យោបាយណាមួយ ដើម្បីអាចធ្វើការពិភាក្សាជាមួយគ្រប់ភាគីពាក់ព័ន្ធបាន លើសេចក្ដីព្រាងនេះ នាពេលខាងមុខឆាប់ៗ។
បើតាមលោក ម៉ាលីន ក្រុមការងារចង់បញ្ចប់ការរៀបចំសេចក្ដីព្រាងច្បាប់នេះឱ្យបានចប់ឆាប់ៗ ប៉ុន្ដែការរៀបចំបង្កើតច្បាប់នេះ គឺត្រូវការពេលវេលាច្រើនដើម្បីពិភាក្សាជាមួយភាគីពាក់ព័ន្ធ។ ច្បាប់នេះមានសារៈសំខាន់ហើយពេលអនុម័តឱ្យប្រើប្រាស់ គឺមានវិសាលភាពគ្របដណ្ដប់លើគ្រប់ភាគីពាក់ព័ន្ធទាំងអស់។
យ៉ាងណាក្តី លោកស្រី ចក់ សុភាព នាយិកាមជ្ឈមណ្ឌលសិទ្ធិមនុស្សកម្ពុជា បានថ្លែងនៅថ្ងៃទី ១ ខែមិថុនាថា ក្នុងស្ថានភាពសិទ្ធិមនុស្សបច្ចុប្បន្ន រួមផ្សំនឹងទិដ្ឋភាពនយោបាយ ដែលរដ្ឋត្រូវបានគ្រប់គ្រងដោយគណបក្សកាន់អំណាចទាំងស្រុងតែឯងនោះ មជ្ឈមណ្ឌលសិទ្ធិមនុស្សកម្ពុជា មិនគិតថា ស្ថាប័នសិទ្ធិមនុស្សថ្នាក់ជាតិមួយនឹងត្រូវបានបង្កើតឡើងដោយអាចនឹងអនុលោមតាមគោលការណ៍អន្តរជាតិ ជាពិសេសគោលការណ៍ទីក្រុងប៉ារីសដែលកំណត់នូវបទដ្ឋានជាអប្បបរមាបំផុតដែលស្ថាប័នសិទ្ធិមនុស្សថ្នាក់ជាតិមួយ គួរមានដំណើរការ ដើម្បីទទួលបានការទុកចិត្ត និងមានប្រសិទ្ធភាពនោះឡើយ។
លោកស្រីគូសបញ្ជាក់ថា៖ «ចំណុចសំខាន់បំផុតនៃស្ថាប័នសិទ្ធិមនុស្សថ្នាក់ជាតិនេះ ទាមទារចាំបាច់នូវឯករាជភាពពីរដ្ឋាភិបាល ដើម្បីអាចឱ្យស្ថាប័ននេះបំពេញភារកិច្ច ឆ្លើយតបនឹងស្ថានភាពសិទ្ធិមនុស្ស»។
គ.ស.ម.ក កាលពីថ្ងៃទី ១០ ខែកញ្ញា ឆ្នាំ ២០១៩ បានចេញសេចក្ដីប្រកាសព័ត៌មានមួយស្ដីពីការបង្កើតក្រុមការងាររៀបចំសេចក្ដីព្រាងច្បាប់ ស្ដីពីការបង្កើតស្ថាប័នសិទ្ធិមនុស្សជាតិកម្ពុជានេះ។
គ.ស.ម.ក បានបញ្ជាក់ថា ស្របតាមឆន្ទៈរបស់រាជរដ្ឋាភិបាលសារៈសំខាន់នៃតួនាទីរបស់ស្ថាប័នសិទ្ធិមនុស្សជាតិ និងស្របតាមអនុសាសន៍នៃរបាយការណ៍ពិនិត្យជាសកលតាមកាលកំណត់ (UPR) រាជរដ្ឋាភិបាល បានប្រគល់ភារកិច្ចឱ្យ គ.ស.ម.ក ដឹកនាំ និងសម្របសម្រួលរៀបចំបង្កើតសេចក្ដីព្រាងច្បាប់នេះឱ្យបានត្រឹមត្រូវតាមទម្រង់ និងខ្លឹមសារនៃច្បាប់ជាតិ និងអន្ដរជាតិ ព្រមទាំងពន្លឿននីតិវិធីដើម្បីពិភាក្សា និងពិគ្រោះយោបល់ ឈានទៅដល់ការអនុម័ត។
បើតាម គ.ស.ម.ក សេចក្តីព្រាងច្បាប់នេះមាន ៧ ជំពូក និង ២៧ មាត្រា។ សេចក្ដីព្រាងច្បាប់នេះត្រូវបានរៀបចំឡើងដោយទទួលបានកិច្ចសហការ ជាមួយភ្នាក់ងារអង្គការសហប្រជាជាតិប្រចាំនៅកម្ពុជា និងបណ្ដាទូតបរទេសជាច្រើនទៀត ដើម្បីប្រមូលធាតុចូលក្នុងការរៀបចំបង្កើតស្ថាប័ននេះ៕