ភ្នំពេញៈ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្មបានយកអាល់កុលក្លែងក្លាយ ឬសារធាតុមេតាណុលជិត ១៨ តោនទៀត ទៅបំផ្លាញចោលនៅថ្ងៃទី ៣១ ខែឧសភា ក្រោយពីបង្ក្រាបបាននៅទីផ្សារនានាក្នុងរាជធានីភ្នំពេញ។
លោក ផាន អូន អគ្គនាយក ក.ប.ប បានថ្លែងខណៈកម្ពុជាកំពុងជួបប្រទះនូវការរីករាលដាលនៃជំងឺកូវីដ ១៩ តាមការចង្អុលបង្ហាញពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម ដោយណែនាំឱ្យមន្ត្រីក្រោមឱវាទទាំងអស់បង្កើនសកម្មភាពត្រួតពិនិត្យគុណភាពអាល់កុល ដែលកំពុងចរាចរដាក់លក់ និងចែកចាយក្នុងក្របខ័ណ្ឌទូទាំងប្រទេស។
លោកថ្លែងថា៖ «ជាក់ស្តែងនៅល្ងាចថ្ងៃទី ៣១ ខែ ឧសភា ឆ្នាំ ២០២១ មន្ត្រីអគ្គនាយកដ្ឋាន ក.ប.ប បានបន្តនាំយកអាល់កុលក្លែងក្លាយ ឬមេតាណុលប្រមាណជិត ១៨ តោន ទៅបំផ្លាញចោលនៅទីលានចាក់សំរាមដែលស្ថិតនៅក្នុងខណ្ឌដង្កោ រាជធានីភ្នំពេញ»។
លោក ហេង មាលី ប្រធានសាខា ក.ប.ប រាជធានីភ្នំពេញបានឱ្យដឹងថា ពិធីបំផ្លាញចោលនេះត្រូវបានរៀបចំឡើងដោយមានការឯកភាពពីស្ថាប័នអយ្យការអមសាលាដំបូងរាជធានីភ្នំពេញ និងមានការចូលរួមពីមន្ត្រីរដ្ឋបាលខណ្ឌដង្កោផងដែរ។
លោកបន្តថា៖ «សារធាតុមេតាណុលទាំងនេះត្រូវបានមន្ត្រីនៃអគ្គនាយកដ្ឋាន ប.ប.ក ត្រួតពិនិត្យ និងរឹបអូសពីតាមបណ្តាឃ្លាំងស្តុកមធ្យោបាយដឹកជញ្ជូន និងបណ្តាឱសថស្ថាននានាក្នុងរាជធានីភ្នំពេញ»។
បើតាមអគ្គនាយកដ្ឋាន ក.ប.ប អាល់កុល ឬអេតាណុល គឺជាសារធាតុ ដែលគេយកមកប្រើសម្រាប់សម្លាប់មេរោគពិសេសក្នុងដំណាក់កាលដែលជំងឺកូវីដ ១៩ កំពុងរីករាលដាលខ្លាំង ធ្វើឱ្យតម្រូវការអាល់កុលមានការកើនឡើងខ្ពស់ជាហេតុនាំឱ្យមានបុគ្គលឆ្លៀតឱកាសមួយចំនួនបានបន្លំយកសារធាតុមេតាណុលមកលក់ជូនពលរដ្ឋដើម្បីយកទៅសម្លាប់មេរោគ ឬធ្វើជាសារធាតុផ្សំសម្រាប់ផលិតជែលសម្លាប់មេរោគ។
ចំណែកសារធាតុគីមីមេតាណុល គឺជាសារធាតុពុលដែលគេច្រើនប្រើធ្វើជាសារធាតុសម្រាប់រំលាយ។ ការប្រើប្រាស់មេតាណុលធ្វើជាសារធាតុសម្លាប់មេរោគ មិនត្រឹមតែមិនមានប្រសិទ្ធភាពក្នុងការសម្លាប់មេរោគប៉ុណ្ណោះទេ តែថែមទាំងបណ្តាលឱ្យប៉ះពាល់ដល់សុខភាពរបស់អ្នកប្រើប្រាស់ដូចជាបណ្តាលឱ្យរលាកស្បែករលាកភ្នែកឈឺក្បាលវិលមុខស្រវាំង ភ្នែក ងងុយដេក បាត់បង់ស្មារតី ក្អួតចង្អោររំខានដល់ការរំលាយអាហារ ឬអាចបណ្តាលឱ្យស្លាប់បានប្រសិនបើយកទៅលាយជាមួយស្រាហើយបរិភោគលើសកម្រិត។
អគ្គនាយកដ្ឋាន ក.ប.ប បានអំពាវនាវដល់អាជីវករលក់ដុំលក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់ សូមប្រកបរបរអាជីវកម្មប្រកបដោយការទទួលខុសត្រូវ ប្រកាន់ខ្ជាប់នូវក្រមសីលធម៌ និងសុចរិតភាពដោយគិតពីសុខុមាលភាពរបស់ប្រជាពលរដ្ឋ ខ្ពស់ជាងផលចំណេញរបស់ខ្លួន។
អគ្គនាយកដ្ឋាន ក.ប.ប បានអំពាវនាវដល់សាធារណជន ដែលជាអ្នកប្រើប្រាស់ទាំងអស់សូមពិនិត្យ និងជ្រើសរើសផលិតផលដែលមានស្លាកសញ្ញា និងប្រភពត្រឹមត្រូវច្បាស់លាស់មុននឹងសម្រេចចិត្តជាវអាល់កុល ឬជែលយកមកប្រើប្រាស់ដើម្បីសម្លាប់មេរោគ។
ក្នុងករណីមានសង្ស័យជា យថាហេតុពាក់ព័ន្ធនឹងគុណភាពអាល់កុល ឬមានព័ត៌មានពីការស្តុកទុក ការចរាចរ ឬចែកចាយអាល់កុលក្លែងក្លាយសូមឱ្យពលរដ្ឋផ្តល់ព័ត៌មានមកអគ្គនាយកដ្ឋាន ក.ប.ប តាមរយៈលេខទូរស័ព្ទ 023 231 856 / 092 830 856 ផេចហ្វេសប៊ុករបស់អគ្គនាយកដ្ឋាន ក.ប.ប www.facebook.com/ccfkh/ ឬតាមរយៈគេហទំព័រ www.ccfdg.gov.kh/៕